Ngaahi Tefitoʻi Meʻa Mahuʻinga ʻo e Ongoongoleleí
Hoko ko ha Konga ʻo e Moʻui ʻa ha Taha
Muimui ki he sīpinga ʻa Kalaisí ke ngāue fakaetauhi ʻi he ʻofa.
Ko e hā ʻa e ngāue fakaetauhi, pea ʻoku fakahoko fēfē nai ia? Sai, ko e founga ʻe taha ke fakakaukau ai ki he ngāue fakaetauhí ko hoʻo muimui ki he sīpinga ʻa Kalaisí ke ʻofa, hiki hake, mo tokoniʻi e niʻihi kehé. ʻOku hangē ʻa e ngāue fakaetauhí ko e hoko ko ha konga ʻo e moʻui ʻa ha taha!
ʻI heʻetau hoko ko e kau ākonga ʻa Sīsū Kalaisí, ʻoku tau maʻu ʻa e lāngilangi mo e faingamālie ke muimui ki Heʻene sīpingá. Lolotonga e ngāue ʻa e Fakamoʻuí ʻi he matelié, naʻá Ne lotua fakafoʻituitui, mo tāpuekina lahi e moʻui ʻa ha lauiafe. Ko e meʻa tatau pē, ʻi hotau kuongá ni, ʻoku fakaʻatā ʻe he ngāue fakaetauhí ke tau tāpuekina ʻa kinautolu ʻoku tau feohí, ʻo faʻa taha ki he taha, ʻi he founga naʻá Ne fakahokó. ʻOku tokoniʻi kitautolu ʻe he ngāue fakaetauhí ke tau fetuʻutaki lahi ange mo e niʻihi kehé pea mo Sīsū Kalaisi.
ʻOku sai pē kapau ʻokú ke ongoʻi manavasiʻi, momou, pe puputuʻu ʻi he founga te ke lava ai ʻo ngāue fakaetauhi ki ha tahá. ʻE fakalahi ʻe Kalaisi hoʻo ngaahi feingá. Fiemaʻu ha ngaahi fokotuʻu ki he feituʻu ke kamata aí? Vakaiʻi ʻa e lisi ko ʻení.
Fiemaʻu ha ngaahi fokotuʻu? Ko ha fanga kiʻi meʻa faingofua ʻeni ʻe 10 te ke lava ʻo fakahoko ke ngāue fakaetauhi ki he niʻihi kehé:
-
Lotua kinautolu.
-
ʻAve ha pōpoaki fakakaungāmeʻa.
-
Fehuʻi fekauʻaki mo honau manakó mo e ngaahi meʻa ʻoku nau saiʻia aí.
-
Tohi ha kaati pe faitohi.
-
Fetuʻutaki ki ai ʻo vakai pe naʻe fēfē honau ʻahó.
-
Fakaafeʻi ke mou kau ki ha ʻekitivitī.
-
ʻAve ange e fakaneifua ʻoku nau saiʻia taha aí.
-
Vahevahe ha hiva fakalaumālie pe langaki moʻui.
-
Tangutu ʻo talanoa mo kinautolu ʻi he akó pe ʻi he lotú.
-
Fekumi ki ha ngaahi faingamālie ke tokoniʻi ai kinautolu mo honau fāmilí.
ʻI he fakalau ʻa e taimí, te ke fakatokangaʻi ʻoku tokoniʻi moʻoni koe ʻe he ʻofá, langaki haké, mo e tokoni ki he niʻihi kehé ke ke hoko ko ha konga ʻo ʻenau moʻuí!