“Boya Liboso na Ngai”

Na Mokambi Henry B. Eyring

Mosungi ya Yambo na Bokambi ya Yambo

Na nzela ya maloba na Ye mpe ndakisa na Ye, Klisto alakisi biso lolenge nini kobelema mpembeni na Ye koleka.

Nazali na botondi mpo na kozala elongo na bino na likita oyo ya Eklezia ya Yesu Klisto ya Basantu ba Mikolo mya Nsuka. Oyo ezali Eklezia na Ye. Tozwi nkombo na Ye ntango tokoti na bokonzi na Ye. Tozwi nkombo na Ye ntango tokoti na bokonzi na Ye. Tozali bakufi na nse ya liwa mpe lisumu. Nzokande na bolingo na Ye mpo na biso mpe mabota na biso, Ye abengisi biso tozala mpembeni na Ye. Yoka maloba na Ye: “Belema mpembeni na ngai mpe nakobelema mpembeni na yo; luka ngai na etingia mpe okomona ngai; senga mpe okozwa; beta, mpe ekofungolema yo.”¹

Na eleko ya Pasika oyo tomikundoli oyo etali mpo na nini tolingaka Ye mpe oyo etali elaka Ye apesi mpo na bayekoli na Ye ya botongono mpo na kokoma baninga na Ye ba bolingo. Mobikisi apesaki elaka wana mpe alobaki na biso lolenge, na mosala na biso mpo na Ye, Ye ayei epai na biso. Ndakisa moko na libimisi epai ya Oliver Cowdery ntango azalaki kosalela Nkolo elongo Profeta Joseph Smith na bobongoli ya buku ya Mormon: “Tala, ozali Oliver, mpe nalobi na yo mpo na bamposa na yo, yango wana bomba maloba oyo na motema na yo. Zala botongono mpe etingia na kobatelaka mitindo ya Nzambe, mpe nakolinga yo na maboko ya bolingo na ngai.”²

Nayoki esengo ya koyaka mpembeni ya Mobikisi mpe ya boyei na Ye mpembeni na ngai mbala mingi mpenza na nzela ya misala ya pete ya botosi na mitindo na Ye.

Bosili koyoka makambo ya boye. Ekokaki kozala ntango boponaki kokende na liyangani ya elambo. Ezalaki mpo na ngai na Saba ntango nazalaki elenge mpenza. Na mikolo wana tozalaki kozwa elambo na liyangani moko ya mpokwa. Likundoli ya mokolo moko koleka mibu 65 eleka, ntango nabatelaka motindo ya kosangana elongo na libota na ngai mpe elongo na basantu, ezali kaka kobenda ngai mpembeni epai ya Mobikisi.

Libanda ezalaki molili mpe malili. Namikundoli koyokaka pole mpe moto na ndako ya losambo mpokwa wana elongo na baboti na ngai. Toliaki elambo, epesamaka na basimbi ya Bonganganzambe ya Alona, koyokanaka elongo na Tata wa biso ya Lola mpo na komikundolaka ntango nyonso Mwana wa Ye mpe kobatelaka mitindo na Ye.

Na nsuka ya liyangani toyembaki loyembo “Abide with Me; ’Tis Eventide,” na maloba kati na yango “O Mobikisi, tikala mpokwa oyo elongo na ngai.”³

Nayokaki bolingo mpe bobelemi ya Mobikisi mpokwa wana. Mpe nayokaki libondi ya Molimo Mosantu.

Nalingaki kopelisa lisusu mayoki ya bolingo ya Mobikisi mpe penepene na Ye oyo nayokaki na liyangani ya elambo wana na bolenge na ngai. Yango wana kala te nabatelaki motindo mosusu. Nalukaki na makomi. Kati na yango, nayebaki ete nakokaki kozonga lisusu mpo ete Molimo Mosantu atika ngai nayoka maye bayekoli ya Nkolo mosekwi bayokaka ntango Ye andimaka libiangi na bango ya koya na ndako na bango mpe mpo na kofanda elongo na bango.

Natangi na ntina ya mokolo ya misato nsima ya Bobakami na ekulusu mpe bokundami na Ye. Basi ya botongono mpe basusu bakutaki libanga ya kolongwa uta na lilita mpe bamonaki ete nzoto na Ye ezalaki na bolingo mpo na Ye kopakola Ye mafuta na nzoto na Ye.

Banzelu mibale batelemaki mpembeni mpe batunaki mpo na nini bazalaki kobanga, kolobaka:

“Bojali koluka moto na bomoi kati na bakufi mpo na nini?

“Ajali awa ate kasi asekwi. Kanisa lokola elobaki ye na bino naino ejalaki ye na Galilai,

“Ete ekoki na Mwana na moto kopesama na maboko na bato na masumu mpe kobakisama na ekulusu mpe na mokolo na misato kosekwa.”⁴

Nsango malamu ya Malako ebakisi bokambi uta na moko ya banzelu: “Nde bokenda, boyebisa bayekoli na ye mpe Petelo ete ajali koleka na liboso na bino kino Galilai. Bokomona ye kuna, pelamoko elobi ye na bino.”⁵

Bapostolo mpe bayekoli basanganaki na Yelusaleme. Lokola tokokaki kozala, babangaki mpe bakamwaki wana ezalaki bango koloba elongo na ntina ya nini liwa mpe bambando ya kosekwisama na Ye elingaki koloba mpo na bango.

Mibale ya bayekoli batambolaki nsima ya nzanga wana uta Yelusaleme na nzela ya kokende na Emau. Klisto mosekwi abimelaki bango na nzela mpe atambolaki elongo na bango. Nkolo ayaki epai na bango.

Buku ya Luka epesi biso nzela ya kotambola elongo na bango:

“Ejalaki bango kosolana mpe kotunana, Yesu ye mpenja abelemaki na bango mpe atambolaki na bango njela moko.

“Nde miso na bango mapekisamaki ete basosola ye te.

“Alobaki na bango ete, Oyo makambo nini majali bino kosolana awa na mobembo? Btelemaki na bilongi na mawa.

“Bongo moko na bango, nkombo na ye Keleopa, alobaki na ye ete, Bobele yo moko ojali mopaya na Yelusaleme, oyo ayebi makambo mabimi wana na mikolo oyo te?”⁶

Balobaki na Ye na ntina ya mawa na bango ete Yesu akufaki ntango balikiaka ete Ye alingaki kozala Mosikoli ya Yisalaele.

Esengelaki kozala na boboto na mongogo ya Nkolo mosekwi wana ezalaki Ye koloba na bayekoli mibale ya mawa mpe matanga:

“Ye alobaki na bango ete, bino bajoba! Bato na goigoi na mitema mpo na kondima makambo yonso malobaki basakoli:

“Ekokaki na Klisto koyoka mpasi oyo mpe kokota na nkembo na ye te?

“Mpe abandaki na mikanda na Mose na basakoli yonso mpe alimbolaki mpo na bango makambo na ntina na ye mpenja na kati na makomi yonso.”⁷

Nsima ekomaki ntango oyo eniangoisaki motema na ngai uta nazalaki elenge mobali:

“Babelemaki na mboka kuna ejalaki bango kokenda, mpe ye asalaki lokola alingaki koleka na ye.

“Nde bandimisaki ye makasi ete, Umela awa na biso mpo ete moi etiki mpe butu elingi kokufa. Akotaki na ndako mpo na koumela na bango elongo.”⁸

Mobikisi andimaki butu wana libiangi ya kokota na ndako ya bayekoli na Ye mpembeni ya mboka Emau.

Afandaki na mesa elongo na bango. Ye azwaki limpa, apambolaki yango, abukaki, mpe apesaki yango epai na bango. Miso na bango efongwamaki mpo ete bayeba Ye. Nsima alimwaki uta na miso na bango. Luka akomaki mpo na biso mayoki ya bayekoli bapambolama oyo: “Balobanaki ete, Wana ejalaki ye kosolola na biso na njela mpe kofungola makomi mpo na biso, mitema na biso mijalaki na moto kati na biso te?”⁹

Na ntango wana kaka, bayekoli mibale yango bakendeki mbangu na Yelusaleme mpo na koloba na Bapostolo zomi na moko maye makomelaki bango. Na ntango wana Mobikisi abimelaki bango lisusu.

Ye azongelaki masakoli ya misio na Ye mpo na komikaba mpo na masumu ya bana banso ya Tata wa Ye mpe mpo na kobuka basinga ya liwa.

“Mpe alobaki na bango ete, Esili kokomama boye ete Klisto akojua mpasi, mpe akosekwa na bakufi na mokolo na misato:

“Mpe ete kobongolama na motema na kolimbisama na masumu, ekosalama na nkombo na ye na mabota yonso, kobanda Yelusaleme.

“Bino bojali batatoli na makambo oyo.”¹⁰

Maloba ya Mobikisi ezali solo mpo na biso lokola mpe ezalaki mpo na bayekoli na Ye kala. Tozali banzeneneke ya makambo oyo. Mpe mokumba ya nkembo tondimaki ntango tobatisamaki kati na Eklezia ya Yesu Klisto ya Basantu ba Mikolo mya Nsuka ekomisamaki polele mpo na biso na profeta Alma bikeke bileka. Na bamai ya Mormon:

“Mpe esalamaki ete alobaki epai ya bango: Talani, awa ezali mai ma Molomoni yango oyo (mpo boye mango mabiangemaki) mpe sikawa, lokola bozali na mposa ya kokota o kati ya etonga ya Nzambe, mpe kobiangema bato ba ye, mpe bozali kondima komeme mikumba mya bino na bino, ete mikoka kozala pepele;

“Iyo, mpe bozali kondima kolela elongo na baye bazali kolela; iyo, mpe kobondisa baye batelemi na mposa ya libondisi, mpe kotelemeke lokola banzeneneke ba Nzambe o ntango inso mpe o makambo manso, mpe o bisika binso bokoka kozala, kutu kina liwa, ete bokoka kosikolama na Nzambe, mpe kotangema elongo na bango ba bosekwi bwa ya yambo, ete bokoka kozwa bomoi bwa seko—

“Sikawa nakoloba epai ya bino, soko eye ezali mposa ya mitema mya bino, nini ekopekisa bino bobatisama o nkombo ya Nkolo, lokola litatoli liboso lya ye ete bokoti o kati ya boyokani na ye, ete bokosalela ye mpe bokobatela mitindo mya ye, ete akoka kosopa libanda molimo mwa ye mingi koleka likolo lya bino?

“Mpe sikawa eyokaka bato maloba maye, babeteki maboko ma bango mpo ya bosepeli, mpe bangakaki: Eye ezali mposa ya mitema mya biso.”¹¹

Tozali na nse ya boyokani ya kotombola baye bakeleli mpe kozala banzeneneke ya Mobikisi ntango tozali na bomoi lokola.

Tokokoka kosala yango na bokweyi te kaka soki toyoki bolingo mpo na Mobikisi mpe bolingo na Ye mpo na biso. Wana ezali biso botongono na bilaka tosali tokoyoka bolingo na biso mpo na Ye. Ekoya mingi mpamba te tokoyoka nguya na Ye mpe bobelemi na Ye epai na biso na mosala na Ye.

Mokambi Thomas S. Monson akundolisi biso mbala mingi na ntina ya elaka ya Nkolo epai ya bayekoli na Ye ya botongono: “mpe nyonso oyo ayambi yo, kuna nakozala lisusu, mpe nakotambola liboso ya elongi na yo. Nakozala na loboko na yo ya mobali mpe na loboko na yo ya mwasi, mpe molimo na ngai ekozala na motema na yo, mpe banzelu na ngai bakozinga yo, mpo na kotombola yo.”¹²

Ezali na nzela mosusu bino mpe ngai toyokeli Ye mpembeni na biso koleka. Ntango tozali komipesa na mosala na Ye, Ye abelemi mpembeni mingi koleka na baye tolingaka na mabota na biso. Ntango nyonso nabiangemaki na mosala ya Nkolo mpo na kokende mobembo to kotika libota na ngai, nasili komona ete Nkolo azalaki kopambola mwasi na ngai mpe bana na ngai. Ye alengelaki baombo ya bolingo na Ye mpe mabaku ya kobelemisa libota na ngai mpembeni na Ye koleka.

Boyokaki mapamboli wana kaka na babomoi na bino. Mingi kati na bino bazali na balingami na bango oyo bazali kowayawaya libanda ya nzela epai ya bomoi ya seko. Bozali kokamwa nini lisusu bokoki kosala mpo na kozongisa bango. Bokoki koyekama na Nkolo mpo na kobelema mpembeni koleka na bango wana ezali bino kolela Ye na bondimi.

Bomikundola elaka ya Nkolo epai ya Joseph Smith mpe Sidney Rigdon ntango bazalaki mosika ya mabota na bango likolo ya bitinda na Ye: “Baninga na ngai Sidney mpe Joseph, mabota na bino mazali malamu; mazali na maboko na ngai, mpe nakosala na mango lokola ekomonana malamu; mpo kati na ngai ezali na nguya nyonso.”¹³

Lokola Alma mpe Mokonzi Moziya, boko baboti ya botongono basaleli Nkolo mingi mpe malamu kasi basili kozwa bana oyo bazalaki kowayawaya atako komibonza ya baboti na bango mpo na Nkolo. Basili kosala nyonso oyo ekokaki bango kosala kasi neti kaka mpamba, ata kutu na lisalisi uta na baninga ya bolingo mpe botongono.

Alma mpe Basantu ya ntango na ye basambelaki mpo na mwana na ye ya mobali mpe bana ya mibali ya mokonzi Moziya. Anzelu moko ayaki. Nsambo na bino ya baoyo basalelaka bondimi na bango ekomema baombo ya Nkolo kosalisa baye libota na bino. Bakosalisa bango bapona nzela ya kozonga ndako epai ya Nzambe, kutu ntango babundisami na Satana mpe balandi na ye, oyo ya ye ntina ezali kobebisa mabota na bomoi oyo mpe na boseko.

Bomikundola maloba elobamaki na anzelu epai ya Alma Elenge mpe bana babali ya Moziya na botomboki na bango: “Mpe lisusu, anzelu alobaki: Tala, Nkolo ayokaki nsambo ya bato ba ye, mpe lisusu nsambo ya moombo wa ye, Alama, oyo azali tata wa yo; mpo asambelaki na bondimi boike etali yo ete okoka komememe o boyebi bwa bosolo; yango wana mpo na mwango moye nayei mpo na kondimisa yo nguya mpe bokulaka bwa Nzambe, ete nsambo ya baombo ba ye ikoka koyanolama engebene na bondimi bwa bango.”¹⁴

Elaka na ngai na bino oyo bozali kosambela mpe kosalela Nkolo ekoki kozala te ete bokozwa mapomboli manso bokoki kolinga mpo na binomei mpe libota na bino. Kasi nakoki kolaka bino ete Mobikisi akobelema mpembeni na bino mpe akopambola bino mpe libota na bino elongo na nini ezali malamu mingi koleka. Bokozwa libondi ya bolingo na Ye mpe bokoyoka eyano ya bobelemi mpembeni na ye wana bopesi maboko mpo na kopesaka lisalisi na basusu. Wana ezali bino kokangisa bampota ya baye bakeleli mpe bopesi bopetoli ya Bomikabi na Ye na baoyo bayokisami mawa na masumu, nguya ya Nkolo ekosunga bino. Maboko na Ye makosembolama elongo na oyo ya bino mpo na kosalisa mpe kopambola bana ya Tata wa biso ya Lola, kokwaka baye bazali na libota na bino.

Ezali na bozongi ndako ya nkembo oyo elengelami mpo na biso. Yango wana tokomona elaka ya Nkolo oyo tolingi kokokisama. Ezali Ye nde ayambi na bomoi ya seko elongo na Ye mpe Tata wa biso ya Lola. Yesu Klisto alimbolaki yango na lolenge oyo:

“Boluka komeme mpe kotia Siona na ngai. Bobatela mibeko na ngai na makambo manso.

“Mpe, soki bobateli mitindo na ngai mpe boyiki mpiko kino na nsuka bokozwa bomoi ya seko, oyo likabo eleki monene na makambo nyonso ya Nzambe.”¹⁵

“Mpo na baye baye bazali na bomoi bakosangola libula ya mabele, mpe baoyo bakufi bakozwa kimia uta na misala na bango nyonso, mpe misala na bango mikolanda bango; mpe bakozwa montole na bandako minene ya Tata wa ngai, oyo nalengeli mpo na bango.”¹⁶

Natatoli ete tokoki na nzela ya Molimo Mosantu kolanda libengisi ya Tata wa Lola: “Oyo azali Mwana na Ngai wa Bolingo. Yokela Ye!”¹⁷

Na maloba na Ye mpe ndakisa na Ye, Klisto alakisi biso kobelema mpembeni na Ye. Mwana nyonso ya Tata wa lola oyo aponi kokota na ekuke ya libatisi kati na Eklezia akozwa libaku na bomoi oyo ya koteyama nsango malamu na Ye mpe koyoka uta na baombo na Ye babiangami libengisi na Ye, “Boya liboso na ngai.”¹⁸

Moombo ya liyokani nyonso ya Ye o ntei ya bokonzi na Ye na mabele na mokili ya molimo akozwa toli na Ye na nzela ya Molimo wana ezali bango kopambola mpe kosalisa basusu mpo na Ye. Mpe bakoyoka bolingo na Ye mpe bakokuta esengo na kozalaka ya kobelema mpembeni na Ye.

Nazali nzeneneke ya Lisekwa ya Nkolo na solo lokola soki nazalaka wana na mpokwa elongo na bayekoli mibale na ndako na nzela ya Emau. Nayebi ete Ye azali na bomoi na solo lokola eyebaki Joseph Smith ntango amonaki Tata mpe Mwana na pole ya ntongo moko ya kongenga na zamba ya banzete na Palmyra.

Oyo ezali Eklezia ya Yesu Klisto ya solo. Nguya mpo na biso tokangisama na mabota mpe kozala na bomoi seko na seko elongo na Tata wa biso ya Lola mpe Yesu Klisto ezali kaka se na bafungola ya bonganganzambe oyo esimbami na Mokambi Thomas S. Monson. Tokozala na Mokolo ya Bosambisi ya kotelema liboso ya Mobikisi, miso na miso. Ekozala ntango ya esengo mpe mpo na baoyo babelemi mpembeni na Ye na mosala na Ye na bomoi oyo. Ekozala esengo koyoka maloba: “Malamu, moombo malamu mpe na sembo.”¹⁹ Natatoli boye lokola nzeneneke ya Mobikisi mosekwi mpe mosikoli na biso na nkombo ya Yesu Klisto, amene.