E Dua na Cakamana

Mai vei Elder Neil L. Andersen

Ena Kuoramu ni iApositolo Le Tinikarua

Na nona bula e vuravura o Jisu Karisito a vakayacora e levu na cakamana: e dua na tina goneyalewa, e dua na kalokalo vou, era rairai na agilosi vei ira na ivakatawa ni sipi, era sa rai na mataboko, era sa lako na lokiloki, era rairai na agilosi e Kecisemani vakakina ena ibulubulu, kei na cakamana cecere duadua—na Nona Tucaketale lagilagi.

E rawa beka mo ni raitayaloyalotaka na kedratou irairai na tinikadua na iApositolo ena ulunivanua volekati Kalili ena gauna sa lako mai kina vei iratou na Turaga sa qai tucaketale ka kaya, “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu.”?¹ “Dou lako yani ki vuravura taucoko, ka vunautaka na itukutuku vinaka kivei ira na tamata kecega.”²

“Na veimatanitu kecega”? “E vuravura taucoko”? “Na tamata kecega”? A rawa beka? E dina ga sa vakadeitaka vei iratou o Jisu, eratou na vakataroga beka ena lako vata beka kei iratou na cakamana ena kena vakatetei na kosipeli.³

Sa takali na vakatitiqa ena vakabauta ka tabalaka cake na domona o Pita, ka kaya:

“Kemudou kecega sa tiko e Jerusalemi, … rogoca na noqu vosa: …

“… Ko Jisu na kai Nasareci, … sa soli oti yani [o koya] vei kemudou, dou sa taura ka vakota ki na kauveilatai ka vakamatea ena ligadra na tamata ca: …

“Ko Jisu oqo … sa [mai] vakatura cake na Kalou, [ka] sa ivakadinadina ni ka oqo koi keitou.”⁴

A sega ni vakatitiqataki na kena a sovaraki na yalotabu ena siga o ya, ka ra papitaiso rawa kina, e 3,000 na tamata. Me vaka a yalataka o Jisu, na ivakatakilakila kei na cakamana ena salamuria ga mai na nodra vakabauta o ira sa vakadinata.

Me vaka ni a vakalesuimai na Lotu i Jisu Karisito ki vuravura ena 183 na yabaki sa oti, na ilesilesi ni Turaga kivei iratou na Nona ilawalawa lailai ni tisaipeli era sa mai voqataka tale na Nona vosa a cauraki ena vica na senitiuri yani e liu: “Ia sa tukuni yani na noqu vunau vei ira na tamata kecega.”⁵ “Raica me tekivu vunautaki yani eke na itukutuku vinaka … ki na veivanua kecega, io me yacova na iyalayala kei vuravura.”⁶

“Na tamata kecega”? “E vuravura taucoko”? “Na iyalayala kei vuravura”? A rawa beka?

Sa mai vakadeitaka kina na iVakabula vei ira na Nona Yalododonu Edaidai,⁷ ia era na rawa beka ni raica na kena tete kei na icavacava ni cakacaka veivakurabuitaki oqo? Era na vakataroga ena rawa beka me salavata kei ira na cakamana ena kena vakatetei na kosipeli.

Sa yaco tale, me takali na vakatitiqa ena vakabauta, ka ra sa papitaiso kina e udolu na tamata. Mai Igiladi a raica o Elder Wilford Woodruff, ni ra sa waraka tiko e dua na itikotiko taucoko me yaco yani. Era sobuti kece ena Yalo ni Turaga, ka papitaisotaka kina e 45 na dauvunau kei na vica na drau na nodra lewenilotu ena imatai ni nona vula ena itikotiko vakateitei e Benbow.⁸

E sega ni duidui na noda gauna oqo. Ena gauna keirau a se kaulotu tiko kina kei Elder David A. Bednar ena 40 na yabaki sa oti (kau rawa ni vakadeitaka vei kemuni ni keirau sega ni daukaulotu oti qase duadua e dabe tiko ena idabedabe damudamu), e a 16,000 na daukaulotu. Me vaka a vakaraitaka e nanoa o Peresitedi Thomas S. Monson, ena gauna oqo sa 65,000—ka levu cake sara mai na kena e liu. Ena gauna o ya a 562 tiko kina na iteki. Nikua sa sivia sara na 3,000. Ena gauna o ya, a tiko na noda tabanalevu kei na tabana ena 59 na matanitu. Nikua sa tu na ivavakoso ni 189 taucoko ena loma ni 224 na veimatanitu kei na veiyasana kei vuravura. Eda lewe lailai, me vaka ga a parofisaitaka o Nifai.⁹ Ia ena gauna vata oqo, o iko kei au daru sa raica e matanavotu na vosa vakaparofita nei Taniela o ya: “na vatu … ka sega … ni ta ena ligana e dua … [sa robota tiko] na vuravura taucoko.”¹⁰

Oqo sa gauna talei ni cakamana. Ena ono na vula sa oti a vakaraitaka kina o Peresitedi Monson ni sa mai veisau na nodra yabaki ni bula na cauravou kei na goneyalewa era gadreva me ra laki kaulotu, a sega ni vakatitiqataki na kena sovaraki yani na yalotabu. Sa takali na vakatitiqa ena vakabauta, ka ra sa maqusa yani ki liu na cauravou kei na goneyalewa. Na siga Lotulevu ena macawa ni koniferedi, au a lesi meu vakatura yani na veikacivi ni kaulotu ki na Mataveiliutaki Taumada. Au kurabui niu raica na nodra ivola ni kerecuru na cauravou yabaki 18 kei na goneyalewa yabaki 19 era sa veisautaka oti tu na nodra ituvatuva, era sa laurai oti mai vakavuniwai, veivakatarogi oti mai na nodra bisopi kei na peresitedi ni iteki, ka solia yani na nodra ivola ni kerecuru ki na kaulotu—ena lima ga na siga. Era sa mai tomani ira ena gauna oqo e udolu tale. Oqo e dua na cakamana.

Eda sa vakavinavinaka ki na nodra vakabauta veivakakaukauwataki na noda goneyalewa, na tubu cake tiko ni daukaulotu mai na veimatanitu e vuravura taucoko, kei na toso cake ni iwiliwili ni veiwatini era sa vakavakarau tiko me ra laki kaulotu. Sa mai kacivaki oqo e limasagavulu ka walu tale na tabana vou ni kaulotu, ka sa mai tokoni na koronivuli ni kaulotu qaqa mai Provo ena dua na kena itokani vou e Mexico City.

A kaya kina o Peresitedi Thomas S. Monson: “Eda sa taura vakabibi na nona ituvatuva na i Vakabula …, ‘O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu.’”¹¹ “Na … cakacaka oqo … ena toso tikoga yani ki liu, me veisautaka ka vakalougatataka na bula ni tamata. … E sega ni rawa ki na dua na kaukauwa e vuravura taucoko me tarova rawa na cakacaka ni Kalou.”¹²

Eda sa vakadinadinataka tiko oqo na cakamana ni Turaga ka sa tete tiko yani na Nona kosipeli ki vuravura taucoko.

Kemuni na taciqu kei na ganequ, me vaka ga ni sa veivakauqeti vakaidina tiko na Turaga vei ira e vuqa na daukaulotu me ra kaulotu yani, sa vakakina na Nona sa vakayadrata na nodra vakasama ka dolavi na yalodra e vuqa sara na tamata vinaka ka dina me ra na ciqomi ira na Nona daukaulotu. Ko ni sa kilai ira tiko se ko ni na qai kilai ira. Era tiko ena nomuni matavuvale ka ra tiko ena nomuni itikotiko raraba. Era lako tikivi kemuni e gaunisala, ko ni dabe vata e koronivuli, ka ra veivosaki kei kemuni ena kompiuta. Ko ni sa tiki bibi talega ni kena vakayacori na kena vakatakilai na cakamana oqo.

Kevaka o ni sega ni daukaulotu tudei vakabeji toka ena nomuni kote, sa kena gauna oqo mo droinitaka e dua e yalomu—droinitaka, me vaka a kaya o Paula, “sega ni volai ena wai ni volavola, sa volai ga ena Yalo ni Kalou bula.”¹³ Kei kemuni na daukaulotu oti, ni kauta mai na nomuni beji makawa ni kaulotu. Kakua ni dara, ia biuta ena vanua mo raica toka kina. E gadrevi iko sara vakalevu na Turaga ena gauna oqo mo mai iyaya ni cakacaka e Ligana. E tiko na nomu cau ki na cakamana oqo.

O ira yadua na lewenilotu ivalavala dodonu ni Lotu ko ni sa vakasamataka tiko na nomuni rawa ni laki wasea na kosipeli. Eso sa nodra itovo na wasea na kosipeli, ka sa rawa meda vuli mai vei ira.¹⁴ Eso era sa sasagataka tiko ga ka vakataroga beka na sala me ra vakayacora vakavinaka cake kina, ka diva tu na yalo duatani o ya e dau yaco mai vei keda me na vagolei ki na dua tale na vanua.

Na noda gadreva meda wasea yani na kosipeli ena muataki keda taucoko meda tekiduru ka masu, ka sa dodonu ga, baleta ni da sa gadreva ga na veivuke ni Turaga.

Sa kerei keda kina o Peresitedi Monson meda sa masulaka “na vanua e vakaiyalayala kina na noda veivakauqeti kei na vanua eda sega ni wasea kina na kosipeli ena galala.”¹⁵ Ni da sa masuta vakaidina ka vakaduavata yani vua na Tamada mai Lomalagi, ena tomana tikoga na Turaga na kena dolavi vei keda na katuba bibi eso.

Eda na masulaka talega na noda gauna donu meda laki wasea yani na kosipeli. E kaya kina o Pita na iApositolo: “Mo dou vakarau tiko mo dou tukuna vua na tamata yadua sa taroga … [me baleta] na vu ni nuinui sa tu e na lomamudou.”¹⁶

Ena veilecayaki¹⁷ kei na lomalomarua¹⁸ ni vuravura ena gauna oqo, e sega ni da kurabui ni ra sa lewe lailai tiko ga mai na tamata era tiko ena nodra vanua ni sokalou. E dina ga ni vuqa era vinakata me ra voleka sara vua na Kalou ka me ra kila vakavinaka na inaki ni bula oqo, ia e sega ni saumi rawa na nodra vakatataro. E vuqa era sa dolava na yalodra ki na ka dina, ia me vaka a vakamacalataka o parofita Emosi, “era na veiciciyaki [tiko] me ra [vakasaqara tiko] na vosa i Jiova, a ra na [sega] ni kunea”¹⁹ Sa rawa mo veivuke mo sauma na nodra taro. Ena nomu veivosaki ena veisiga sa rawa mo vakuria ki na nodra vakabauta va-Karisito.²⁰

E kaya kina na iVakabula: “Ia mo dou dulaka cake na nomudou rarama me cilavi vuravura. Raica sai au ga na rarama mo dou dulaka cake.”²¹

Au sa yalataka, ni ko masulaka na tamata mo veiwasei kina, ena votu mai na yacadra kei na matadra ena nomu vakasama. Ena soli mai vei iko na vosa mo cavuta ena gauna sara ga o gadreva kina.²² Ena tadola mai vei iko na madigi eso. Ena takali na vakatitiqa ena vakabauta, ka na vakalougatataki iko na Turaga mo cakamana ga vakai iko.

Sa vakavulica vei keda na i Vakabula na sala meda wasea kina na kosipeli. Au taleitaka na italanoa kei Adriu, ni a taroga, “Rapai, ko sa tiko mai vei?”²³ A rawa sara ga vei Jisu me tukuna na vanua e vakaitikotiko kina. Ia a mani kaya ga vei Adriu, “Lako mai ka raica.”²⁴ Au nanuma kina ni sa tukuna tiko na i Vakabula, “Lako mai ka raica sega walega ni noqu itikotiko ia na ivakarau ni noqu bula. Lako mai ka raica o cei oi au. Lako mai mo vakila na Yalotabu.” Eda sega ni kila na veika kece ni siga o ya, ia eda sa kila ni gauna a rai yani o Adriu me raici tacina o Saimoni, a kaya, “Keitou sa kunea … na Karisito.”²⁵

Kivei ira era taleitaka na noda veivosaki, eda sa rawa ni muria na ivakaraitaki ni i Vakabula ena noda sureti ira me ra “lako mai ka raica.” Eso era na ciqoma na noda veisureti, ka so ena sega. Eda kila taucoko e dua sa sureti oti vakavica ni bera ni ciqoma e dua na veisureti me “lako mai ka raica.” Meda sa nanumi ira talega era a tiko vata kei keda e liu ia oqo eda sega ni bau raici ira, ka meda sureti ira me ra lesu mai ka raica tale mada vakadua.

Eda sa doka na nodra digidigi kei na nodra gauna na tamata yadua. E kaya na Turaga, “Me ra dui lewa na tamata yadua na ka me ra kitaka.”²⁶ Na nona sega ni malele mai e dua na tamata ena sega ni vakayalia na noda duavata tiko vakaveitokani kei na loloma. Ke ciqomi se sega na veisureti o vakayacora vei ira me ra “lako mai ka raica,” ko na vakila ni sa vakadonui iko na Turaga, ka yaco mai na veivakadonui oqo, e dua na ikuri ivakarau ni vakabauta mo laki wasea vakadua tale kina na nomu vakabauta.

Kivei ira era vakayagataka tiko na Initaneti kei na talevoni veikauyaki, era sa tu na sala vovou me ra sureti kina na tamata me ra “lako mai ka raica.” Meda cakava na noda wasea yani na noda vakabauta ena kompiuta me sa tiki tiko ni noda bula ena veisiga. Na LDS.org, Facebook, Twitter—era sa veivakarautaki ki na ka oqo.

Ena nodra gadreva me ra wasea na kosipeli, era sa tauyavutaka kina na itabagone mai Boston e vica na bulago.²⁷ O ira era sa mai lewena na Lotu era a tekivu vuli ena kompiuta ka salamuria na nodra vuli vata kei ira na daukaulotu. Na cakacaka oqo era sa mai vukei vakakina na itabagone me vakalevutaka na nodra vakabauta me ra tukuna yani na kosipeli e matanavotu. A kaya kina e dua vei ira, “Oqo e sega ni cakacaka ni kaulotu. E dua na marau ni kaulotu.”²⁸

Eda sa duavata tiko ena ka oqo. Meda tuvalaka ka masu ka veivukei vata kei ira eda sa lewenilotu vata kei ira na daukaulotu. Kerea mo ni vakasamataka ka masulaki ira tikoga na daukaulotu tudei. Vakabauti ira tiko kei ira nomuni matavuvale kei na itokani. Sa vakabauti ira tiko na Turaga ka sa kacivi ira me ra vakavulica ka vakalougatataki ira era sa vakasaqarai Koya tiko.

E kaya kina vakaoqo o Peresitedi Paulo Kretly ena Tabana ni Kaulotu e Mozambique Maputo: “Sa kena ivakarau tu mai Mozambique [vei ira] na veiwatini me ra na bula vata tiko ga [ka sega ni vakamau baleta] ni itovo vakavanua mai Aferika e gadrevi kina e dua na iyautalei me qai vakayacori na vakamau, ka vuqa na vakawati era sega ni volia rawa na iyautalei oqo.”²⁹

Era vakasamataka ka masulaka na lewenilotu kei na daukaulotu na sala me ra veivuke kina.

Na isau ni nodra masu o ya me ra na vakamatatataka na lawa ni tiko savasava kei na bibi ni vakamau kei na matavuvale tawamudu. Ni gauna era vukei ira tiko kina na veiwatini me ra veivutuni ka vakamau vakalawa, era a vakavulica talega kina na bula marau e yaco duadua ga ni ra muri Jisu Karisito.

Oqo e dua na kedra itaba na veiwatini mai na rua na siti e Mozambique. Era a vakamau ena Vakaraubuka, era a papitaisotaki vata kei ira na luvedra qase cake ena Vakarauwai.³⁰ Era sureti mai na itokani kei na matavuvale me ra “lako mai ka raica,” ka drau vei ira era a “lako mai ka raica.”

Ni oti na papitaiso, e kaya e dua na sisita, “Sa gadrevi me keimami digitaka me keimami muria na nodra ivakavuvuli na neimami qase se muri Jisu Karisito. Keimami sa digitaka me keimami muri Karisito.”³¹

O ni sega beka ni vakaitikotiko mai Mozambique, ia ena nomuni sala ga, ena nomu ivakarau ga, sa rawa mo wasea yani na kosipeli i Jisu Karisito.

Masuta na Tamamu Vakalomalagi. Oqo na Nona cakacaka tabu. O Koya ena dusimaki iko ena ka mo cakava. Ena dolava o Koya na katuba, vagalalataka na veivakataotaki eso, ka vukei iko mo vorata rawa na veika dredre. Sa vakaraitaka kina na Turaga, “Ia sa tukuni yani na noqu vunau vei ira na tamata kecega, ena gusudra na noqu tisaipeli, … ka sega e dua me tarovi ira.”³²

Au sa vakadinadinataka ni “[sa na yaco me] vunautaki yani na vosa ni Turaga ki na iyalayala kei vuravura, me ra rogoca na tamata kecega.”³³ Oqo na cakamana. Oqo na cakamana. Ena yaca i Jisu Karisito, emeni.