“Kemuni na Turaga, Au sa Vakabauta”

Mai vei Elder Jeffrey R. Holland

Ena Kuoramu ni iApositolo Le Tinikarua

Dau taro ka vakaraitaka vakadodonu na lomamu, ia me imatai ka vaka tu ga kina, irivaka na yameyame ni nomu vakabauta, baleta ni sa rawarawa na ka kecega vei ira era sa vakabauta.

Ena dua na gauna a sotava o Jisu e dua na ilawalawa era a veiba sara tiko vakaukauwa kei ira na Nona tisaipeli. Ni taroga na iVakabula se cava na vuna e yaco tiko kina na veileti oqo, a kalawa mai liu e dua na tama ka tauvimate na luvena ka kaya ni sa kerei iratou na tisaipeli i Jisu me ratou masulaka na luvena tagane, ia a sega ni ratou rawata rawa. Ena gauna sa vakasequruquru bati tiko kina o cauravou lailai, vakatubu vuso na gusuna, ka bitabitalaki koya ena qele e matadra kece, sa vakamamasu o tamanigone vei Jisu me sa iotioti beka ni kere veivuke ka tabalaka na domona:

“Ia kevaka ko ni sa rawata e dua na ka,” a tukuna okoya, “mo ni lomani keirau mai, ka vukei keirau.

“Sa qai kaya vua ko Jisu, Kevaka ko sa vakabauta rawa, sa rawarawa na ka kecega vua sa vakabauta.

“Sa qai tabalaka vakasauri na domona o tamanigone, ka kaya, ia ka vakawai na matana, Kemuni na Turaga, au sa vakabauta; vukea na noqu tawa-vakabauta.”¹

Na veivakadeitaki taumada nei koya na tamata oqo, sa kila tu o koya, e vakaiyalayala. Ia sa tu vua, e dua na gagadre vakusakusa, ka nuiqawaqawa me baleti luvena duabau. Eda sa kila oqo ni sa itekitekivu vinaka o ya. “Ia kevaka dou sa sega ni rawa ni vakabauta,” e kaya o Alama, “dou rogoca mada ga ka vakasamataka, de mani rawa mo dou vakabauta e vica na tikina.”² Ni sa sega tale ni dua na inuinui e vo, sa qai vakadeitaka kina o tama oqo na vakabauta sa tu vua ka vakamasuta na iVakabula kei vuravura, “Ia kevakako ni sa rawata e dua na ka, mo ni lomani keirau mai, ka vukei keirau.”³ Au dau tagi ga ni’u wilika na vosa oqo. Na vosa e vakavuqataki oya na keirau sa vakayagataki tiko ena kena inaki. Sa tukuna tiko na tamata oqo, vakaidina: “Sa vakamamasu tiko na noqu matavuvale taucoko. Sa sega ni cegu na neirau sasaga. Keirau sa wale sara ga. E dau lutu na luvei keirau tagane ki na wai. E dau lutu ki na bukawaqa. E dau tu leqaleqa tu ga ena veigauna ka keirau sa rere sara ga. Keirau sa sega ni kila me keirau rai tale evei. E rawa bekamo ni vukei keirau? Keirau na vakavinavinakataka na cava ga—veimasulaki vakatikina ga, e dua na inuinui lailai, me kautani kina eso na veivakararawataki e colata tu o tinai cauravou lailai oqo ena veisiga ni nona bula.”

“Ia kevaka ko ni sa rawata e dua na ka,” a cavuta o tamana, e lesu tale vua “Kevaka ko sa vakabauta rawa,” a kaya na iVakavuvuli.⁴

“Vakasauri,” e tukuna na ivolanikalou—sega ni vakamalua se vakatitiqa se yalolailai ia e “vakasauri”—ni sa tabalaka cake na domona na tamanigone ena rarawa dina vakaitubutubu, “Kemuni na Turaga, au sa vakabauta; vukea na noqu tawa-vakabauta.” Me idole ki na vakabauta vou ka se vakatikina ga, a vakabula o Jisu na cauravou lailai, ni sa vaka ga e vakabulai koya mai na mate, me vaka e vakamacalataka na ka oqo o Marika.⁵

Mai na itukutuku vakaciriloloma oqo mai na ivolanikalou, au gadreva kina meu vosa vei kemuni na itabagone ena Lotu—se lailai tiko na yabaki ni nomuni bula se yabaki ni nomuni lewenilotu se gone tiko ena vakabauta. Eda sa kovuti vata kece tu ena sala oqo se dua tale beka.

Na imatai ni vakadidike e laurai ena italanoa oqo o ya ni sa bolei na vakabauta, a vakadeitaka taumada o tamanigone na nona vakabauta ka qai kila ena gauna oya ni sa vakaiyalayala walega. Na veivakadeitaki taumada o ya e dodonu sara ka sega ni lomalomarua: “Kemuni na Turaga, au sa vakabauta.” Au sa kaya kina vei kemuni kece e gadreva me vakalevutaki na nomuni vakabauta, mo ni nanuma tiko na tamata oqo! E na veigauna ni rere se vakatitiqa se veigauna dredre, taura matua tiko na yavu o sa qaqa tiko kina, ena gauna mada ga e vakaiyalayala tu kina na yavu o ya. Na tubu eda na mai sotava kece ena vuravura oqo, na vakatauvatani ni veika vakayalo ni veivakararawataki ni cauravou lailai oqo se nodrau nuiqawaqawa na itubutubu ena yaco kece mai vei keda. Ni ra yaco mai na veigauna vakaoqori ka lasika mai na ituvaki eso, ka na berabera mai na kena iwali, ququmi matua toka ga ena ka o sa kila tiko ka tu vakaukauwa me yacova ni sa tadu mai na ikuri ni kila. O koya gona ena ka a yaco oqo, na cakamana saraga oqo, ka kaya kina vaqo o Jisu, “Kevaka e tu vei kemudou na vakabauta e vaka na sore ni musita, dou na kaya ki na ulunivanua oqo, Lako tani ki kea; ka na lako tani; a sa sega na ka ena dredre vei kemudou.”⁶ Na levu ni nomu vakabauta se na ivakatagedegede ni nomu kila-ka e sega ni kena iusutu—sai koya ga na dina o vakaraitaka kina na nomu vakabauta vata kei na dina o sa kila rawa tiko.

Na ikarua ni vakadidike e duidui toka mai na kena imatai. Ni dau yaco mai na leqa se lomatarotaro, kakua ni saga mo vakataroga na nomu vakabauta ena nomu taroga na kena e sega ni tiko vei iko, vakatekivu ena nomu “tawa-vakabauta.” Oqori e vaka ga mo sosomaka vakasivia na ka ena gusu ni taki! Meu vakamatatataka mada na tikina oqo: Au sega ni kerei kemuni mo ni lasutaka na vakabauta e sega ni tiko vei kemuni. Au sa kerei kemuni tiko mo ni dina ki na vakabauta sa tiko vei kemuni. Eso na gauna eda vakayacora me vaka e sa ivakaraitaki cecere ni noda yaloqaqa ka sega ni noda ivakaraitaki dina ni vakabauta na noda ivakaraitaki dina ni lomatarotaro. E sega dina ni vakakina! Meda sa qai nanuma kece na itukutuku savasava ni italanoa vakaivolatabu oqo: Mo dina sara ena veika o vakataroga ni ko sa gadreva vakakina; sa sinai tu na bula oqo ena dua na ulutaga se dua tale. Ia kevaka dou gadreva vakamatavuvale mo dou vakabulai, kakua ni laiva na lomatarotaro oqori me veivakataotaki ki na cakamana ni nomudou vakabauta.

Me kena ikuri, e levu cake na nomu vakabauta mai na kena o nanuma ni tiko vei iko baleta ni tukuna na iVola i Momani “ni sa levu na kena ivakadinadina.”⁷ “Dou na kilai ira ena vuadra,” e kaya o Jisu,⁸ kei na vua ni bulataka na kosipeli sa vakadinadinataki tu ena nodra bula na Yalododonu Edaidai ena veivanua kecega. Me vaka na nodrau kaya o Pita kei Joni ena dua na gauna kivei ira na dauvakarorogo ena gauna eliu, au kaya nikua, “Ni sa dredre vei keirau me keirau kua ni tukuna na veika keirau a raica ka rogoca,” kei na veika eda sa raica ka rogoca o ya “ni sa dua na cakacaka mana rogo e rau sa cakava” ena nodra bula e milioni na lewe ni Lotu oqo. Ena sega ni cakitaki rawa oqo.⁹

Kemuni na taciqu kei na ganequ, oqo na cakacaka vakalou sa toso tiko, vata kei na ivakaraitaki eso kei na kena veivakalougatataki sa kovuti tu ena veiyasana kecega, kau kerea meda na kua ni dau lomaleqataka vakasivia kevaka era na dau yaco mai na ituvaki eso ka dodonu me vakadikevi, kilai vakavinaka, ka vakadodonutaki. E dau yaco oqo ka na yaco. Ena Lotu oqo, na veika eda kila sa ka bibi cake tikoga mai na kena eda sega tu ni kila. Mo ni dau nanuma tiko, ena vuravura oqo, sa dodonu meda na lako voli tikoga ena vakabauta.

Mo ni daulomana na malumalumu vakatamata—na nomu vakai-iko vakakina o ira na tamata era veiqaravi vata kei iko ena Lotu oqo ena nodra veiliutaki na tagane kei na yalewa tawasaumi vakayago. Vakavo ga vei koya na Luvena Daubau Ga, sai ira ga na tamata ivalavala ca ena cakacaka kina na Kalou mai na ivakatekivu ni gauna. Ena rairai veivakaogai sara vakalevu Vua, ia a vakayaco-ka kina o Koya. Meda sa vakakina. Kei na gauna o raica kina na malumalumu, mo nanuma tiko na kena yalani e sega ni tiko ena vakacerecerei ni cakacaka. Me vaka ga a tukuna e dua na dauvolaivola vakoroi, ni gauna sa sovaraki mai kina na taucoko tawayalani ena sega ni beitaki na waiwai ke yaco eso na leqa baleta ni sega ni rawa vua na waqa yalani me vakatawana taucoko.¹⁰ Sa okati ena waqa yalani oya o iko kei au, o koya gona meda na tu vakarau ka dauloloma ka dauveivosoti.

iOtioti ni vakadidike: ni yaco mai na vakatitiqa se veika dredre, kakua ni rere mo kerea na veivuke. Kevaka eda vinakata oqo ena yalomalua kei na dina me vaka a cakava o tamanigone oqo, eda na rawata. Na ivolanikalou e tukuna tiko ni mataqali gagadre dina vakaoqo esa “vakainaki dina,” ka vakasaqarai “lomamudou taucoko, sega kina na veidabui kei na veivakaisini ena mata ni Kalou.”¹¹ Au vakadinadinataka na vakamuri ni mataqali veivakamasuti wasoma vaka o ya ena tala mai na veivuke ni Kalou mai na yasa ruarua ni ilati me vaqaqacotaka na noda vakabauta.

Au a kaya niu vosa tiko vei ira na itabagone. Io e dina. Ena dua na gauna lekaleka sa oti a vosa vakamalua kina vei au e dua na cauravou yabaki 14, “Baraca Holland, au sega ni tukuna rawa tiko ni dina na Lotu, ia au vakabauta ni dina.” E veilecayaki na cauravou oqo niu sa mokoti koya yani vakaukauwa. Au tukuna vua mai na vu ni yaloqu taucoko ni vakabauta e vosa vakamareqeti sara, e dua na itovo vakamareqeti cake, ka sega ni gadrevi vua me kere veivosoti ni “vakabauta walega.” Au a kaya vua ni Karisito Vakaikoya e tukuna, “Kakua ni yalolailai, vakadinata ga,”¹² na malanivosa ena dua na gauna ka a vakauta na cauravou o Gordon B. Hinckley ki na kaulotu.¹³ Au a kaya vua na cauravou oqo ni vakabauta sa dau imatai tikoga ni ikalawa ki na dina kei na ivakaraitaki ni yavu cokovata ni noda vakabauta ka vakadeitaki vakaukauwa ena malanivosa, “Keimami vakabauta.”¹⁴ Au a qai tukuna vua na noqu dokai koya vakalevu ena vuku ni nona yalodina ni vakasaqaqara.

Oqo, mai na veivakalougatataki ni 60 na yabaki e yaco vei au, vakatekivu niu se qai yabaki 14 kina ka vou ena vakabauta, au mai vakaraitaka kina na veika au sa mai kila nikua. Au kila ni Kalou ena veigauna kecega kei na sala kecega kei na ituvaki kecega sa Tamada mai Lomalagi dauloloma ka dauveivosoti. Au kila ni ko Jisu e Luvena uasivi duabau duadua, ka a solia na nona bula ena yalololoma ena nodrau lewa na Tamada kei na Luvena meda vakabulai kina oi keda kece oqo eda sa sega ni taucoko sara. Au kila ni a tucake mai na mate o ya, me bula tale, ka ni baleta na Nona sa vakayacora, o iko kei au ena vakakina. Au kila ni o Josefa Simici, ka kaya ni a sega ni uasivi sara,¹⁵ ia a digitaki ga yani me iyaya ni cakacaka ena liga ni Kalou me vakalesuyamai na kosipeli tawayalani ki vuravura. Au kila talega ni da vakayacora oqo—vakabibi ena kena vakadewataki na iVola i Momani—sa mai vakatavulica vei au o koya e vuqa sara na loloma ni Kalou, ituvaki vakalou i Karisito, kei na kaukauwa ni matabete ni vakatauvatani kei na dua tale na parofita au sa bau wilika oti, kila se rogoca, ena noqu bula taucoko ni vakasaqaqara. Au kila ni o Peresitedi Thomas S. Monson, e bula curuma yani ena yalodina kei na yalomaqusa na ika 50 ni yabaki ni marautaki ni nona a vakatikori me dua na iApositolo, ni sa ikoya na isosomi dina ki na ituvi vakaparofita nikua. Eda sa raica tale vua na ituvi oya ena koniferedi oqo. Au kila ni o iratou na vo ni 14 tale na turaga ko ni sa mai tokoni ira mera parofita, daurairai, ka daunivakatakila era sa tokoni koya ena laveliga, ena yalodra, kei na nodra dui idola vakaiapositolo.

Au sa vakaraitaka na veika kece oqo vei kemuni ena ivakadinadina e vakatoka o Pita me “vosa sa vakadinadinataki vakalevu cake, a parofisai.”¹⁶ Na ka a tekivu ga ena dua na sorenikau lailai ni vakabauta vei au sa mai tubu cake ki na dua na vunikau ni bula, o koya gona kevaka ena vakatovolei vakalailai na nomuni vakabauta ena ka oqo se ena ituvaki tani tale, au sa sureti kemuni mo ni ravita na noqu. Au kila na cakacaka oqo sa ikoya na dina ni Kalou, kau kila mai na noda lomaleqa duadua ga eda na vakatara kina na vakatitiqa se tevoro eso me kuitaki keda tani mai na kena salatu. Vakanuinui tiko. Toso tiko. Dau taro ka vakaraitaka vakadodonu na lomamu, ia me imatai ka vaka tu ga kina, irivaka na yameyame ni nomu vakabauta, baleta ni sa rawarawa na ka kecega vei ira era sa vakabauta. Ena yaca i Jisu Karisito, emeni.