“Iai Au Mwakuri Ibukim”
Ngaira ni kabane iai tabera aika kakawaki ni karakaan ana mwakuri te Atua.
Nakon Mote, e katanoata te Atua, “Iai Au Mwakuri Ibukim” (Mote 1:6). Koa tia n titiraki ngkana Tamam are i Karawa iai ana mwakuri ibukim? Iai baika a bongana aika E katauraoi ibukim—ae tii ibukim—bwa kona kakoroa nanona? I kakoaua bwa te kaeka “eng!”
Iangoa Girish Ghimire, ae bungiaki ao e rikirake n te aba ae Nepal. Ngke ngaia te kairake, e reirei i Tiaina, ike a kabwarabwara nakoina kaain ana kiraati taekan ana euangkerio Iesu Kristo. N tokina, Girish e nakon te Brigham Young Iuniwetiri ibukin te mwakuri n angabeeba ao ni kaitibo ma buuna are e a tekateka ma ngaia. A maeka n te Salt Lake Valley ao a tabekiia uoman ataei mai Nepal.
Ririki imwiina, ngke e raka iaon 1,500 taenikai man te kaembwa i Nepal a kamaekaaki i Utah,1 e kaungaaki nanon Girish bwa e na ibuobuoki. Ma taetaen abana ae nakoraoi ao otana n ana katei, Girish e mwakuri bwa te tia raitaeka, tia reirei, ao te tia rabakau. Imwiin ae a manga maeka ma kaain te komiunitii, tabeman taenikai mai Nepal ake a kaota nanoia n tangira te euangkerio. E a kateaki te tabo n taromauri n te mwaanga i Nepal, ao imwiina e rineaki Girish bwa te beretitenti n te mwaanga. E ibuobuoki naba n rairan ana Boki Moomon nakon te taetae n Nepali.
Ko kona n noora aron te Tama are i Karawa ni katauraoa ao ni kabongana Girish?
Iai Ana Mwakuri te Atua Ibukira n Tatabemaniira Nako
Tariu ao Mwaneu, iai ana mwakuri te Atua ae kakawaki ibukira n tatabemaniira nako. N taetae nakoia aine ma n reirei koaua ae kaineti nakoira, e reirei Beretitenti Spencer W. Kimball: “Imwain ae ti roko, [iaon te aba, ti] anganaki tabera aika kakaokoro. … Ngkai tiaki kona n uring ngkai aroia, aio e aki kona ni bita koauan te kimwareirei n aron are ti a tia ni kariaia nako iai.”2 Tera te koaua ae rine! Tamara are i Karawa iai bwaai aika a kaineti man tamaroa ibukim ao ibukiu bwa ti na kakoroi nanoia (taraa I-Ebeto 2:10).
Mwakuri mai ieta aikai aki katukaki ti ibukiia tabeman ma bon ibukira ni kabane—n aki taraaki bwa antai, rorora, te reeti n aomata raa, kain ia, mwaitira boona, aroarona, ke tera nakoana n te Ekaretia. Ngaira ni kabane iai tabera aika kakawaki ni karakaan ana mwakuri te Atua (taraa Mote 1:39).
Tabeman iroura a titiraki bwa E kona Tamara are i Karawa ni kabonganaira ni karaoi anganano aika kakawaki. Ma uringnga, E bon aki toki ni kabonganaia aomata nako ni karaoi bwaai aika korakora (taraa 1 I-Korinto 1:27–28; R&B 35:13; 124:1). “[Ngaira] taan tei,” ao “te mwaaka e mena i [roura]” ni “karekea te raoiroi ae bati” (R&B 58:27–28).3
Beretitenti Russell M. Nelson e kabwarabwaraa:
“E korakora riki ana iango te Uea ibukim nakon are ko ataia i bon iroum! “Ko a tia ni katukaki ao ni kawakinaki ibukin te tai aei ao te tabo aei. …
“Ko a tia ni katukaki ao ni kawakinaki ibukin te tai aei ao te tabo aei. Ngkai ko butimwaia ao n iriira Ana kantaninga, ko na katiai ni karaoi bwaai aika aki kona ni karaoaki!”4
Ao ti na kanga n ataa ao ni karaoa te mwakuri are nanonna te Atua ibukira?N na tibwai aua te reirei ake a na ibuobuoki.
Kabanea Am Tai ma Tabeman
Te Moan, kabanea am tai ma tabeman. Ti kona n rimwin Kristo, “are nakonako ni karaoa ae raoiroi” (Mwakuri 10:38; taraa naba 2 Nibwaai 26:24).
Imwiin okiu man au mitinare ae bwanin taina, I a uringii kantaninga ake I taneiai ni kukurei ni karaoi ngkoa. Ni bon arona, I kainnanoa kawakinan au berita, karekean te reirei, wakinan te utu, ao karekean te maiu. Ma I kan ataia ngkana iai riki, ke ae onoti, are tangiria te Uea bwa N na karaoia. Imwin iangoana tabeua namwakaina, I a kunea te kibu aio: “Ngkana ko tangiria, ko na riki ngkoe bwa te tia karaoa ae raoiroi n te roro aei” (R&B 11:8). Te Tamnei e buokai n ataia bwa ana kantaninga ae kakaawaki mai karawa bwa kakabwaiakiia tabeman ao ni karaoa “te raoiroi ae bati.”
Ti kona ni iangoa ae bongana ibukin maiura—n aron te bwai ae kona kamatebwaia, tera ae ko na karaoia ibukin te mwakuri, ke ko na maeka ia—ibukin te iango are ko na buokiia tabeman.
E mwae teuana te utu nakon te kawa ae boou. Irarikin are kakaeakin te mweenga n te tabo ae mari, e anaaki nanoia n te tabo ae kinaki man iai baika a kainanoaki iai. Inanon ririki aika bati, E a tia ni mwakuri te Uea rinanoia ni boutokaia aika mwaiti ao ni kakorakora aia uote ao aia titeiki.
Te aomata ae mwaatai n te bwai n aoraki e bon kakaonimaki ni karaoa a na kataneiai ma e namakina kairana ni kaokoroa teuana te bong ni katoa wiki ni butimwaia aoraki ake akea boon kuakuakiia. Ibukin nanon te mwane aio ma buuna ni buokiia tabeman, e a tia te Uea ni katauraoa te kawai ibukin buokaia bubua aoraki ao karikirakean aia utu ae bubura.
Kakaei ao Karikirakei Bwaintangira N Tamnei.
Kauoua, kakaei ao karikirakei bwaintangira n tamnei. E a tia n anganiira Tamara are i Karawa bwaintangira aikai ni buokira n ata, ni karaoa ao ni kukurei n Ana mwakuri te Uea are iai Irouna ibukira.
Tabeman mai ibuakora a miimi, “Iai au tarena?” Riki, te kaeka e kangai eng! “Nakoia mwaane ni kabane [ao aine] a anganaki te bwaintangirq iroun Tamnein te Atua … bwa aonga ni kakabwaiaki iai” (R&B 46:11–12; e kairaki ma katuruturuana).5 Mwaitin bwaintituaraoi n te tamnei a koreaki taekaia n booki aika tabu (taraa 1 I-Korinto 12:1–11, 31; Moronaai 10:8–18; R&B 46:8–26), ma a mwaiti riki.6 Tabeua a kona n ae te nanoanga, kabwarabwaran te kantaaninga, itoman ma aomata, waakinaki n te aro ae nakoraoi, taetae ke koroboki n anai nano, ootan raoi te reirei, ao te mwakuri korakora.
Ngaia ae ti na kanga n atai ara bwaintituaraoi? Ti kona n rimwiin ara kakabwaia n te tamanuea, n titirakiniia naake a rangin ni kinaira, ao ni kinaa te bwai ae ti mwaatai iai ke n tatangiria. Ae kakawaki riki, ti kona ni butiia te Atua (taraa Iakobo 1:5; R&B 112:10). E atai bwaintituaraoi ibukira, ngkai E anganiira (taraa R&B 46:26).
Ngkana a reke ara bwaintituaraoi, iai tabera ni karikirakei (taraa Mataio 25:14–30). Ao Iesu E “aki karekea ae bwanin n te moan tai, ma [e reitinako] man te akoi nakon te akoi” (R&B 93:13
Temanna te ataeinimwaane e karekei tamnei ni mwamwannano ni karikirakea ataakin kakawakin te aro. Mamaten nanou bon tamnein te Tia Kamaiu, katotongan are tinetine n ara auti. Te tari aei e karikirakea ao e kamanena rabakauna ni korotamnei. Te mwakuri Rinanona, e a tia te Tamara are i Karawa ni kaungai nanoia kaain te uoote ni karikirakea aroia n riki bwa ana reirei.
N tabetai ti namakinna bwa akea te bwaintituaraoi ae kakawaki iroura. Te bong teuana te aine ae bwara nanona e bubuti, “te Uea, tera au mwakuri?” E kaeka, “Kinaia tabeman.” Bon te bwaintituaraoi n te tamnei! Man te tai anne e a tia ni kunea te kimwareirei n atakiia ake a tia ni mwanuokinaki, ao te Atua E mwakuri rinanona ni kakabwaiaia aika mwaiti. Ngkai tabeua bwaintituaraoi n te tamnei a aki uotira rake nakon ana kainibaire te aonnaba, a tau nakon te Atua ao Ana mwakuri.7
Kamanena te Kaangaanga
Te Kateniua, kamanena te kaangaanga. Katakira a buokira ni kunei ao ni katauraoi ibukin te mwakuri are iai iroun Tamara are i Karawa ibukira. E kabwarabwara Aramwa, “Imwiin te kaangaanga ae bati, Te Uea … e karikai bwa te bwai ni mwakuri i nanon baina” (Motiaea 23:10).8 N aekan te Tia Kamaiu, are Ana mwakuri ni kamaiu e karikia bwa E na kamaiura (taraa Aramwa 7:11–12), ti kona ni kamanena te wanawana ae reke man namakin aika kaangaanga n kaunga, ni kakorakora ao ni kakabwaiaia tabeman.
Imwiin kamotirawan temanna te tia mwakuri ibukin kakoroan mooti irouia taan ni mwakuri, e wareka ana kakabwaia n te tamanuea ao ni namakina te kairaki mai ieta bwa e na wakina ana kambwana ni buokiia tabeman aika a mwatai ni karekei aia mwakuri. (E buokai naba ni kakaea au mwakuri ngke a oki au utu man karaoan aia mition.) E kamanena ana kataitai te Uea bwa ana kawai n ibuobuoki ni kakabwaiaia tabeman, ngke e karekea ana mwakuri ae kakawaki riki.
Taanga aika kairake a rootaki ni maten natia ae bungiaki. Ma uruakin nanoia, a iangoia ni kaota karinean natiia man karekean te reirei ao buoka ni bwain reirei nakoia kaaro are a rinanon te aeka ni kaangaanga naba aei. E a tia ni mwakuri te Uea rinanoia te taanga aei bukina nanokawakiia ae onoti, ae riki rinanon te kaangaanga.
Onimakina te Atua.
Ao te kaua, onimakina te Atua. Ngkana ti Bubutiia ma te onimaki ma nanomi raoi, E na bon kaoti tabera mai ieta nakoira.9 N te tai are ti kunei iai, E na buokira ni kakoroi nanon mwakuri aikanne. “A bane ni kaoti bwaai akanne [I] matana” (R&B 38:2; taraa naba Aberaam 2:8), ao n taina ae riai. E na kauki mataroa aika tau ibukira (taraa Te Kaotioti 3:8). E kanakoa Natina te mwaane, Iesu Kristo, n te aro bwa ti kona ni katine i Aona ibukin te korakora are riaon ara kona (taraa I-Biribi 4:13; Aramwa 26:12).
Te tari temanna, e tabeaianga n ana babaire te tautaeka inanoa, e namakina te kan riki n tia tei ibukin te botanaomata. Ibukin aki kukureina n te waaki n anainano, e kamwakura ana onimaki ao e karekea buokana. N tokina, e aki tokanikai ma e namakinna bwa e a tia te Uea n anganna kairana ao te korakora n taekin bwaai aika kakawaki nakon te botanaomata.
Te tina ae akea buna, natina aika rikirake ma rikiraken te aki konabwai, e titirakinaki bwa e kona ni kaitarai kainanoia ana utu. E ngae ngke e rangin ni kaangaanga, e namakina te kakorakoraaki iroun te Uea bwa e na kakoroa bukin ana mition ae moan te nakoraoi.
Te Taeka ni Kauring
N te tai naba anne E buokira te Atua ni kakoroi mwakuri mai ieta, temwakuri ni kakaitara e katikiira nako ao ni kabwarai nanora man te maiu are ti maiuakinna.
Te bure tao bon te aro ni kakatai ae kauarerekea ara namakin nakon te Tamnei are Raoiroi ao n totokoa rokora nakon mwakan te tamnei. Ni karaoan ana mwakuri Tamara are i Karawa ibukira, ti na kekeiaki bwa ti aonga n itiaki (taraa 3 Nibwaai 8:1). Ti maiu n te aeka ni kawai are e na kona te Atua ni mwakuri rinanora?
Tatan e kakaea kairakira nakon baika a aki bati ni manena.E a tia te Uea ni moantaai ni kauringa te tia kairiiri ngkoa n te Ekaretia, “Am iango e mena riki iaon bwain te aonaba nakon bwaa ake mai irou… ao n te mwakuri are ko a tia ni weteaki nako iai” (R&B 30:2). Ti a kaman katabeaki ma bwain aon te aba are ti a kairaki nako iai man tabera ae mimitong?
N raonaki ma aei, Taatan e kabwarai nanora n namakinan te aki tau. E karaoa ara mwakuri bwa e na taraa ni kanganga ke ni kakamaaku. E ngae n anne, ti kona n onimakina te Atua! Ibukina bwa E tangiriira. E tangirira bwa ti na tokanikai. E “nako n rimoa [ra]; e na memena [iroura], e na bon aki [kakiira]” (Te Tua Kaua 31:8; taraa naba Taian Areru 32:8; Taeka n Rabakau 3:5–6; Mataio 19:26; R&B 78:18).
Tatan e kona naba ni keweira n tarai ara mwakuri bwa e aki rang kakaawaki nakon te mwakuri are e katabeia iai tabeman. Mwakuri ni kabane mai iroun te Atua e kakaawaki, ao ti riai ni karekea te kukurei ngkai ti “mimitong n te bwai are e a tia n tua te Uea [nakoira]” (Aramwa 29:9).
Ngkana E mwakuri te Atua rinanora, te buakaka e kona ni karirira n anaa karineana ibukin baika a tia ni karaoaki. E ngae n anne, ao ti kona ni katotonga nanorinanon te Tia Kamaiu man kakean kamoamoakira ao n neboa te Tama (taraa Mataio 5:16; Mote 4:2 Ngke e kataia te tia kareke rongorongo ni kina te Tina Teresa ibukin maiuna n ana mwakuri n nanoangaia kainnano, e kaeka: “Bon ana mwakuri te [Atua]. I riki n aekan te … bentira inanoni baina. … E karaoa te iango. E karaoa te koroboki. Akea te bwai ae karaoia te bentira. E na ti kariaia te bentira bwa e na kabonganaaki.”10
Kabaneana
Tariu ao mwaneu aika tangiraki, I kaoira n tatabemaniira ni “kaotira [ngaira] nakon te Atua … ba tabonibain te raoiroi” (I-Rom 6:13). Kaotakira bon iroura e irekereke ma kaotakim nako Ina bwa ti tangiria ni kamanenaaki, ni ukora Ana kairiiri, ao ni kamanena Korakorana.
N taainako ti kona n taraa Iesu Kristo, ara katoto ae kororaoi. N te maiu imwain te aonnaba, E titiraki Tamara are i Karawa, “Antai ae N na kanakoa?”
Ao Iesu e kaeka, “Aio Ngai, kanakoai” (Aberaam 3:27; taraa naba Itaia 6:8).
Iesu Kristo e butimwaia, tauraoi ibukin ao e karaoa moan kabirakina bwa ara Tia Kamaiu ao te Tia Kabooira. E karaoa nanon te Tama (taraa Ioane 5:30; 6:38; 3 Nibwaai 27:13) ao e kabanea Ana mwakuri mai ieta.
Ngkai ti rimwin Ana katoto Kristo ao ni kaotira nakon te Atua, I kakoaua bwa E na kamanenaira nakon Ana mwakuri tabeua ao ni kakabwaiaia tabeman. N aran Iesu Kristo, amen.