2010–2019
Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?
Oktoba 2017
2:3

Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?

Jān Būreejtōn Russell M. Nelson

Būreejtōn eo an Doulul eo an Rijilōk ro Jon̄oulruo

Ilo juon wāween eo ekabwilōn̄lōn̄ im ejejjet, Bok in Mormon eo ej katakin kōj kōn Jisōs Kraist im gospel eo An.

Ilo 1986, kar kūrļo̧k eō bwe in leļo̧k juon ekkatak eo eaorōk ilo juon university ilo Accra, Ghana. Ijin ikar ioon elōn̄ rutiej ro jān kien, ekoba juon iaan kiin̄ in bwij ko ilo Africa. Ke kōmro kar kōnono ippān doon m̧okta jān an jino katak eo aō, kiin̄ eo ekar kōnono tok n̄an eō kōn rukook eo an, eo ekar ukook n̄an n̄a. Ikar uwaak im kōnono n̄an rukook eo, innām rukook eo ekar ukōte uwaak ko aō n̄an kiin̄ eo.

Ālkin aō katakin, kiin̄ eo ekar kaju im jorjortok n̄an n̄a, ak ilo iien in ekar jab kōn rukook eo. Kōn bwilōn̄ eo aō, ekar lukkuun em̧m̧an an kōnono kajin English—kajin English in England, m̧ool!

Kiin̄ eo āinwōt epok. “Bwe wōn kwe?” ekar kajjitōk.

Ikar uwaak, “Ij juon Rijilōk an Jisōs Kraist eo em̧ōj kapiti.”

Kiin̄ eo ekar kajjitōk, “Ta eo komaron̄ katakin eō kōn Jisōs Kraist?”

Ikar uwaak kōn juon kajjitōk: “Imaron̄ ke kajjitōk ta eo kwōjeļā kadede kōn E?”

Uwaak eo an kiin̄ eo ekar kwaļo̧k ke ekar lukkuun ekkatak kōn Baibōļ im elukkuun iakwe Irooj.

Innām ikar kajjitōk eļan̄n̄e ekar jeļā kōn kwaļo̧k eo an Jisōs Kraist n̄an armej ro etto ilo Amedka.

Ilo aō kōtmāne, bwe ekar jaje.

Ekar kōmeļeļeik bwe ālkin Dōbwāāl im Jerkakpeje eo an Rilo̧mo̧o̧r eo, Ekar lotok armej ro ilo Amedka etto, ijo ekar katakin gospel eo An. Ekar ejaake Kabun̄ eo An im kar kajjitōk ippān rikaļoor ro An bwe ren je juon ļo̧o̧k in kwaļo̧k ko An ilubwilijier.

“Rekoot in,” ikar wōnm̧aanļo̧k wōt, “ej ta eo me jej jeļā āinwōt Bok in Mormon eo. Ej bar juon kallim̧ur kōn Jisōs Kraist. Ej juon jeje ekwojarjar me ej kobaļo̧k ippān Baibōļ eo Ekwojarjar.”

Ilo iien in, kiin̄ in ekar jino lukkuun itok limoin. Ikar oktakļo̧k n̄an mijen būreejtōn eo ej mije eō im kajjitōk eļan̄n̄e ewōr bar juon an kape in Bok in Mormon eo ippān. Ekar jibwetok juon jān būripkeij eo an.

Ikar kōppeļļo̧k n̄an 3 Nipai jebta 11, im kiin̄ eo im n̄a kom̧ro kar riiti kwaļo̧k eo an Rilo̧mo̧o̧r eo n̄an RiNipai ro. Innām ikar leļo̧k kape in Bok in Mormon eo n̄an e. Uwaak eo an ekar pād wōt ilo ļōmņak eo aō im būruwō n̄an indeeo: “Komaron̄ kar letok n̄an eō diamond ko ak mōr ko, ak ejjeļo̧k juon men eaiboojoj ļo̧k n̄an n̄a jān bar juon jeļāļo̧kjeņ kōn Irooj Jisōs Kraist.”

Ālkin en̄jake kajoor in naan ko an Rilo̧mo̧o̧r eo ilo 3 Nipai, kiin̄ eo ekar kwaļo̧k, “Eļan̄n̄e inej oktak waj im koba ilo Kabun̄ ņe, inej bōktok aolepān bwij eo ippa waj.”

“O, Kiin̄,” ikar ba, “ejjab jerbal ilo wāween ņe. Oktak ej an juon armej make eddo. Rilo̧mo̧o̧r eo ekar kwaļo̧k n̄an RiNipai ro juon ilo̧k juon. Kajjojo armej rej bōk juon kam̧ool im naan in kam̧ool kōn gospel eo an Jisōs Kraist.”1

Jisōs Kraist ej kwaļo̧k n̄an RiNipai ro

Ro jeiū im jatū, ewi jon̄an an aiboojoj Bok in Mormon eo n̄an eok? Eļan̄n̄e kwaar itōn leļo̧k diamond ak m̧ōr ko ak Bok in Mormon eo, ewi wōt eo kwon kar kālet? Ilo m̧ool, ewi wōt eo ej aorōkļo̧k n̄an eok?

Keememej m̧wein̄an eo an jibbon̄ in Jabōt eo ilo Eprōļ 2017 in kwelo̧k eo eļap, Būreejtōn Thomas S. Monson ekar akweļļap “ippādwōj kajjojo bwe jen lukkuun ekkatak im kejōkļo̧kjeņ kōn Bok in Mormon kajjojo raan.”2 Elōn̄ rekar uwaak n̄an kajjitōk in an rikanaan eo.

In ba bwe ejjeļo̧k iaam̧ro Riley eo ralitōk an iiō ekar jeļā jabdewōt armej ekar bōk pija ko pijaim. Kile bwe Riley ej riiti Bok in Mormon eo kōn jipan̄ an juon “N̄a Nejin Anij” bookmark.

Būreejtōn Nelson im Riley rej ekkatak jeje ko rekwojarjar

Juon men ekajoor ej waļo̧k n̄e juon ajri nejin Anij ej pukot n̄an jeļā eļapļo̧k kōn E im Nejin Ejitōn Bōro. Ejjeļo̧k ilo bar juon jikin me m̧ool kein rej katakin ralikkarļo̧k im kajoorļo̧k jān Bok in Mormon eo.

Jān tōre eo Būreejtōn Monson ekar kajjitōk jiljino allōn̄ remootļo̧k, ikar kajjieon̄ ļoor kapilōk in. Ibwilijn men ko jet, Iaar kōm̧m̧an laajrak ko kōn ta Bok in Mormon eo, ta eo ej kapene, ta eo ej kariabe, ta eo ej kakūrm̧oole, ta eo ej kalkkare, im ta eo kwaļo̧ke. Kalimjek Bok in Mormon eo kōn māj in riit kein ekar juon kamminene eo em̧m̧an im eim̧we! Ij elmakote n̄an kom̧ kajjojo.

Ilowaan allōn̄ kein jiljino, ikar karuwaineneik elōn̄ kūrub ko—ekoba Em̧m̧aan ro Rejitōn Bōro ilo Doulul eo an Jon̄oulruo eo, mijenede ro ilo Chile, im mijen būreejtōn ro im kōrā ro pāleer rekar kuktok ilo Argentina—n̄an ļōmņak kōn kajjitōk kein jilu kapilōk eok bwe kwon ļōmņak kaki rainin:

Kein kajuon, eļan̄n̄e en kar ejjeļo̧k Book in Mormon elmen nej kar mour eo am̧? Kein karuo, ta eo kwon kar jab jeļā? Im kein kajilu, ta eo en kar ejjeļo̧k ippam̧?

Kurub kein rekar laudin̄din̄ im uwaak kaju jān būrweer. Errein rej jet iaan uwaak ko aer:

“Eļan̄n̄e en kar ejjeļo̧k Bok in Mormon eo, inej kar pok kōn katak ko rekapokpok im ļōmņak ko kōn elōn̄ men ko. Inej kar āinwōt n̄a jinoin m̧okta jān aō lo Kabun̄ in, ke ikar pukōt jeļāļo̧kjeņ, tōmak, im kōjatdikdik.”

Bar juon ekar ba: “Iban kar jeļā kōn eddo eo an Jetōb Kwojarjar emaron̄ jerbal ilo mour eo aō.”

Bar juon: “Eban kar lukkuun alikkar unleplep in aō pād ioon laļ in!”

Bar juon ekar ba: “Iban kar jeļā bwe ewōr eddōkļo̧k ālkin mour in. Kōnke Bok in Mormon, ijeļā bwe em̧ool ewōr mour ālkin mej. En̄in ej kōttōbar eo eļaptata eo me kōj aolep jej jerbale.”

Ennaan in āliktata ekar kōm̧m̧an aō kejōkļo̧k kōn mour eo aō elōn̄ iiō ko rem̧ootļo̧k āinwōt juon rim̧wijm̧wij eo edik ekar ekkatak. Juon iaan eddo ko an juon rim̧wijm̧wij, ilo kajjojo iien, ej kōjjeļļāiki baam̧le eo n̄e juon eo ejitōn bōro ej mej. Ilo juon aujipitōl ijo ikar jerbal ie, juon ruum̧ ejeno̧lo̧k kar kalōke kōn rā ko rejjab lukkuun pen n̄an an ro uwaan baam̧le ko bōk nuuj ko jān taktō ro. Ijin, jet armej rekar kwaļo̧k aer jan̄ im n̄iļaļļaļ im kaļoļoļ bōrāer idipin wo̧o̧ļ kein. Ekōjkan aō kōņaan in katakin armej rein bwe mej, men̄e epen n̄an an mour ro rejitōn bōro, ej juon jekjek eo eaorōk n̄an mour in jab wabanban eo ad. Mej ej kōtļo̧k ad eddōkļo̧k n̄an mour eo juon.3

Bar juon uwaak n̄an kajjitōk eo aō ekar ba: “Ekar ejjeļo̧k aō mour m̧ae iien ikar riiti Bok in Mormon eo. Men̄e ikar jar im etal n̄an kabun̄ eo aō aolepān mour eo aō, Bok in Mormon eo ekar jipan̄ eō bwe in lukkuun bwebwenato ippān Jemedwōj Ilan̄ ej kab kein kajuon.”

Bar juon ekar ba: “Eļan̄n̄e ejjeļo̧k Bok in Mormon eo, iban maron̄ meļeļe bwe Rilo̧mo̧o̧r ekar jab wōt en̄taan kōn jerawiwi ko aō, ak Ekar maron̄ kōmour metak ko im būrom̧ōj ko aō.”4

Im bar juon: “Iban kar jeļā bwe ewōr ikanaan ro rej tōl kōj.”

Lukkuun katak m̧ool ko ilo Bok in Mormon eo aolep raan emaron̄ erom̧ juon oktak in mour. Juon iaan mijenede ro jibūm̧, Sister Olivia Nelson, ekar kallim̧uri juon rikkatak bwe eļan̄n̄e enej riiti Bok in Mormon eo aolep raan, teej ko an ilo university eo renej em̧m̧anļo̧k. Ekar kōm̧m̧an, im rekar em̧m̧anļo̧k.

Sister Olivia Nelson

Ro jeiū im jatū, ij kam̧ool bwe Bok in Mormon eo ej m̧ool in naan ko an Anij. Ewōr ie uwaak ko relukkuun aorōk im kaitoktok limo ilo mour in. Ej katakin katak ko an Kraist.5 Ej kōļapļo̧k im kalikkar elōn̄ “men kein realikkar im aorōk”6 m̧ool ko me rekar jako epepen n̄an epepen im ukook ko an Baibōļ.

Bok in Mormon eo ej letok likio im meļeļe eo ekajoor kōn Pinmuur eo an Jisōs Kraist eo ej waļo̧k ilo aolepān. Ej katakin ta meļeļein n̄an bar ļo̧tak. Jān Bok in Mormon eo jej ekkatak kōn an Israel bar aiintok doon. Jej jeļā etke jej pād ioon laļ in. Men kein im m̧ool ko jet relukkuun kajoor im kareelel aer katakin ilo Bok in Mormon eo jān jabdewōt bar bok. Aolepān kajoor eo an gospel eo an Jisōs Kraist ewōr ie ilo Bok in Bok in Mormon eo. Em̧ool.

Bok in Mormon eo ej jim̧or kalikkarļo̧k katak ko an Maajta eo im ej kwaļo̧k aujiid ko an rikapo eo.7 Bok in Mormon eo ej katakin katak eo em̧ool n̄an an joļo̧k imminene ko reriab an kabun̄ ko—āinwōt meļeļe eo ebōd kōn peptaiji nin̄nin̄ ko.8 Bok in Mormon eo ej letok jibadbad eo n̄an mour jān rōjan̄ kōj n̄an kejōkļo̧kjeņ kōn kōjatdikdik eo kōn mour indeeo im “m̧ōņōņō eo ejjeļo̧k jem̧ļo̧kin.”9 Bok in Mormon eo ej kakkure tōmak ko rebōd bwe lem̧ōņōņō jab maron̄ loe ilo mour ko renana10 im bwe em̧m̧an in kajjojo armej ej men eo me jej aikuji n̄an jepļaak n̄an im̧aan mejān Anij.11 Ej kajōm̧ļo̧k meļeļe ko rebōd bwe revelesōn ekar jem̧ļo̧k ippān Baibōļ eo im bwe ejjeļo̧k kōnono jān lan̄ rainin.

N̄e ij ļōmņak kōn Bok in Mormon eo, ij ļōmņak kōn naan eo kajoor. Lōke ko ewōr ilo Bok in Mormon ej kajoor n̄an kōmour, kaenōm̧m̧an, kōjepļaaktok, joļo̧k, kōkajoorļo̧k, kōjebwebweik, im kam̧ōņōņik jetōb ko.

Ro jeiū im jatū, ij kallim̧ur bwe ilo ami lukkuun ekkatak Bok in Mormon eo aolep raan, kom̧ naaj kōm̧m̧ani kālet ko rem̧m̧an—aolep raan. Ij kallim̧ur bwe ilo ami kejōkļo̧kjeņ kōn ta eo kwoj ekkatak, wintō in lan̄ enaaj peļļo̧k, im kom̧ naaj bōk uwaak ko n̄an kajjitōk ko ami im tōl n̄an mour eo ami make. Ij kallim̧ur bwe ilo ami leļo̧k eok make aolep raan n̄an Bok in Mormon eo, kom̧ maron̄ lo kōjparok ņae men ko renana an raan kein, aaet ibebtok in pija ko retonoon im an̄ūrlep ko rej kakkure jetōb ko ad.

Jabdewōt iien ij ron̄jake an jabdewōt, ekoba n̄a make, ba, “Ijeļā bwe Bok in Mormon ej m̧ool,” ikōņaan in ba, “Menin em̧m̧an, ak ejjab bwe!” Jej aikuj in en̄jake, jān ijo em̧wilaļ ilowaan“buruwōd,12 bwe Bok in Mormon eo ej lukkuun naan ko an Anij. Jej aikuj en̄jake lukkuun m̧wilaļ in bwe jab maron̄ mour juon raan ilo an ejjeļo̧k. Ij aikuj kōmeļeļeiki ilo tukaduin naan kein an Būreejtōn Brigham Young ilo naan kein, “Ikōņaan bwe en kar ainikeō ej ainikien jourur ko jiljilimjuon n̄an karwij armej raņ”13 n̄an m̧ool im kajoor eo an Bok in Mormon eo.

Jej aikuj in erom̧ mijenede in edik ej jerbal ilo Europe eo ekar lukkuun en̄jake m̧ool ko an Bok in Mormon eo me ekar leļo̧k juon kape in rekoot in ekwojarjar n̄an em̧m̧aan eo ilo juon baak e im eo m̧ōttan rej kab iioone.

Mijenede ej ettōr

Ij kam̧ool bwe Josep Smith ekar im ej rikanaan eo an epepen in āliktata. Ekar e eo, jān mennin letok im kajoor eo an Anij, ekar ukōte bok in ekwojarjar. En̄in ej bok eo enaaj jipan̄ n̄an kōpooj laļ in n̄an itok eo Kein Karuo an Irooj.

Ij kam̧ool bwe Jisōs Kraist ej nejin Anij eo ad emour. E ej ad Rilo̧mo̧o̧r; ad Ripinmuur, Waanjon̄ak eļap, im ad Rijojom̧ar ippān Jemen. E ekar Messaia eo kar kallim̧ur kake, Messaia eo an mour in, im enaaj Messaia eo enaaj irooj ioon laļ ilo mellōniūm̧ eo. Ij kam̧ool kōn aolepān aō bwe ilo juon wāween eo ekabwilōn̄lōn̄ im ejejjet, Bok in Mormon eo ej katakin kōj kōn Jisōs Kraist im gospel eo An.

Ijeļā bwe Būreejtōn Thomas S. Monson ej rikanaan eo an Anij ioon laļ in. Ij iakwe e im rejtake e kōn aolepān būruwō. Ij kam̧ool ilo et eo ekwojarjar etan Jisōs Kraist, amen.

Laajrak in Bok in Mormon an Būreejtōn Nelson

Bok in Mormon eo ej:

  • Bar juon kallim̧ur kōn Jisōs Kraist. Lukkuun rijeje ro an—Nipai, Jekab, Mormon, Moronai—im rukook eo an, Joseph Smith, rekar aolep rikam̧ool ro an Irooj.

  • Juon rekoot in jerbal eo An n̄an armej ro rekar jokwe ilo Amedka etto.

  • Mool, āinwōt an Irooj make kar kam̧ool e.

Book in Mormon ej kam̧ool:

  • Kajjojo armej nejin Jemedwōj Ilan̄ im Nejin Jitōn Bōro, Jisōs Kraist.

  • Aikuj eo bwe Wōtlo̧k eo an Adam ej kōm̧m̧an im māletlet an Iv, bwe armej ren m̧ōņōņō.

Bok in Mormon eo ej kam̧oole men in:

  • Revelesōn ekar jem̧ļo̧k ippān Baibōļ eo.

  • Nin̄nin̄ ro rej aikuj peptaij.

  • Lem̧ōņōņō emaron̄ loe ilo men eo enana.

  • Em̧m̧an an kajjojo armej ej ebwe n̄an mour ijo eutiej tata (kain̄i ko im bujen ko rej mennin aikuj).

  • Wōtlo̧k eo an Adam ekar kakkure armej kōn “jerawiwi eo jinoin.”

Bok in Mormon eo ej kakūrm̧ool kanaan in:

  • “bar jet sip” renaaj ron̄jake Ainikien.

  • Anij enaaj kōm̧m̧ane “juon jerbal ekabwilōn̄lōn̄ im aiboojoj,” kōnono “jān bwidej.”

  • Bwe “alal an Judah” im “alal an Josep” renaaj erom̧ juon wōt.

  • Israel eo ejeplōklōk enaaj kuktok ippān doon “ilo raan kein āliktata” im ewi wāween an menin naaj kōm̧m̧an.

  • Ānen jolet eo n̄an bwij eo an Josep ej Western Hemisphere.

Bok in Mormon eo ej kalikkar meļeļein kōn:

  • Mour eo ad m̧okta.

  • Mej. Ej ruo men ko remennin aikuj ilo karōk in m̧ōņōņō eo eļap an Anij.

  • Mour ālkin mej ej ijjino ilo paradise.

  • Jerkakpeje an ānbwin, kobatok ippān jetōb eo an, ej erom̧ juon jetōb ejjab wabanban.

  • Ekōjkan ekajet eo ad jān Irooj enaaj ekkar n̄an kōm̧m̧an ko ad im ikdeleel ko an būruwōd.

  • Ewi wāween an kain̄i ko jejjet kōm̧m̧ani: n̄an waanjon̄ak, peptaij, kwojkwoj, leļo̧k ioon Jetōb Kwojarjar eo.

  • Pinmuur eo an Jisōs Kraist.

  • Jerkakpeje eo.

  • Jerbal eo eaorōk an enjeļ ro.

  • Piktokin priesthood eo ekwojarjar.

  • Ewi wāween an m̧wil ko m̧wilin armej ļapļo̧k aer im̧we kōn kajoor in naan eo jān kajoor in jāje eo.

Bok in Mormon eo rej kwaļo̧k meļeļe ko ejjeļo̧k en ekar jeļā kaki m̧okta:

  • Peptaij ekar kōm̧m̧an m̧okta jān an Jisōs Kraist ļotak.

  • Tampeļ ko rekar ekkal im kōjerbali jān armej ro etto ilo Amedka.

  • Joseph, kein kajon̄oul 11th em̧m̧aan nejin Israel, ekar lo kanaan im eddo eo an Josep Smith.

  • Nipai (600–592 B.C.) ekar lo loe im kiene Amedka.

  • Mōttan ko ralikkar im aiboojoj an Baibōļ eo im rekar jako.

  • Meram eo an Kraist leļo̧k n̄an kajjojo armej.

  • Aorōk in anemkwoj in kālet eo an kajjojo armej im aikuj eo kōn jum̧ae ilo men otemjej.

  • Kakkōļ ko kōn “kumi ittino ko.”