Buk blong Momon:?Bae Laef blong Yu I Olsem Wanem Sapos Yu No Gat Buk Ia?
Long wan wei we i spesel mo i wan merikel, Buk blong Momon i stap tijim yumi abaot Jisas Kraes mo gospel blong Hem.
Long 1986, oli invaetem mi blong givim wan toktok long wan yunivesiti long Akra, Gana. Long ples ia, mi mitim ol man blong gavman, mo tu wan king blong wan traeb blong Afrika. Taem mifala i storian bifo mi givim toktok, king ia i toktok long mi tru long transleta blong hem. Mi ansa, mo transleta i transletem ansa blong mi i gobak long king.
Afta long toktok blong mi, king i wokbaot stret i kam long mi, be tetaem ia i no gat transleta blong hem. Long sapraes blong mi, hem i toktok gud Inglis—!Inglis blong Kwin, mi save talem!
I luk olsem se king i sapraes smol. “?Huia yu?” hem i askem.
Mi ansa: “Mi wan Aposol blong Jisas Kraes we oli odenem mi.”
King i askem: “?Wanem nao yu save tijim mi abaot Jisas Kraes?”
Mi ansa wetem wan kwestin: “?Mi save askem wanem nao yu save finis abaot Hem?”
Ansa blong king i soem se hem i wan bigfala studen blong Baebol mo hem i lavem Lod.
Afta, mi askem sapos hem i save abaot seves blong Jisas Kraes long ol pipol blong Amerika bifo.
Olsem we mi ting, hem i no save.
Mi eksplenem se afta we oli hangem Sevya long kros mo Hem i laef bakegen long ded, Hem i bin kamaot long ol pipol blong Amerika bifo, mo Hem i tijim gospel blong Hem. Hem i oganaesem Jos blong Hem, mo i askem ol disaepol blong kipim wan histri blong seves blong Hem long medel blong olgeta.
“Histri ia,” mi gohed, “i wanem we yumi save long hem olsem Buk blong Momon. Hem i wan nara testeman abaot Jisas Kraes. Hem i wan kampani skripja blong Tabu Baebol.”
Nao king i intrestumas. Mi tanem mi i go long misin presiden we i stap wetem mi, mo askem sapos hem i gat wan moa kopi blong Buk blong Momon. Hem i karemaot wan long smol bag blong hem.
Mi openem i go long 3 Nifae long japta 11, mo tugeta, king mo mi i ridim toktok blong Sevya long Ol Man blong Nifae. Afta, mi givim kopi ia blong Buk blong Momon i go long hem. Ansa blong hem i stap long maen mo hat blong mi blong oltaem: “Yu save givim ol daeman mo ol rij ston, be i no gat wan samting we i moa sas long mi bitim smol moa save ia abaot Lod Jisas Kraes.”
Afta we hem i filim paoa blong toktok blong Sevya long 3 Nifae, king i talem: “Sapos mi mi jenisim laef mo joenem Jos, bambae mi tekem ful traeb blong mi wetem mi.”
Mi ansa: “O King, hemia i no wok olsem. Blong jenisim laef i desisen blong wanwan man. Sevya i tijim Ol Man blong Nifae, wan afta wan. Wanwan i kasem wan witnes mo wan testemoni abaot gospel blong Jisas Kraes.”
Ol brata mo sista. ?Hamas nao Buk blong Momon i impoten long yu? ?Sapos oli givim ol daeman mo ol rij ston, o Buk blong Momon, wijwan nao bae yu jusum? Yu ones, ?wijwan nao i moa impoten long yu?
Long Sandei moning sesen blong Epril 2017 jeneral konfrens, Presiden Thomas S. Monson i plis long “wanwan long yumi blong prea, mo stadi, mo tingting hevi long Buk blong Momon, evri dei.” Plante oli mekem folem wanem profet i askem.
Bae mi talem se, mi o eit yia Raeli i no save se wan i stap tekem pikja. Luk se Raeli i stap ridim Buk blong Momon blong hem wetem help blong bukmak blong “Mi, mi Pikinini blong God.”
Wan samting we i gat paoa i hapen taem wan pikinini blong God i lukaot blong save moa abaot Hem mo Pikinini we Hem i Lavem Tumas. I no gat nara ples we oli tijim ol trutok ia i klia moa, mo wetem moa paoa bitim insaed long Buk blong Momon.
Stat long taem we Presiden Monson i givim jalenj sikis manis i pas, mi bin traem blong folem kaonsel blong hem. Long medel blong sam moa samting, mi bin mekem wan lis blong wanem nao hem i Buk blong Momon, wanem nao hem i konfemem, wanem hem i sakemaot, mo wanem hem i mekem i kamtru, wanem hem i mekem i klia mo wanem hem i talemaot. !Taem mi bin lukluk long Buk blong Momon tru long ol glas ia, i bin givim niu tingting mo i bin wan gud praktis! Mi leftemap tingting blong yufala i mekem hemia.
Long ol sikis manis ia, mi bin invaetem ol defren grup—wetem Ol Brata blong mi insaed long Kworom blong Olgeta Twelef Aposol, ol misinari long Jile, mo ol misin presiden mo waef blong olgeta we oli kam tugeta long Ajentina—blong tingting long ol trifala kwestin ia we bae mi askem yufala tu, blong tingting long hem tedei:
Faswan, ?Bae laef blong yu i olsem wanem sapos yu no gat Buk blong Momon? Nambatu, ?Wanem nao bae yu no save? Mo nambatri, ?wanem nao bae yu no gat?
Ol gudfala ansa oli kam long ol grup ia, ol ansa oli kamaot stret long hat blong olgeta. Hemia samfala tingting blong olgeta:
“Sapos i no gat Buk blong Momon, bae mi konfius long saed blong ol tijing mo tingting we oli tutu abaot plante samting. Bae mi jes stap olsem mi bin stap bifo mi faenem Jos, long tetaem ia we mi stap lukaotem save, fet, mo hop.”
Wan narawan i talem: “Bae mi no save abaot rol blong Tabu Spirit long laef blong mi.”
Narawan: “!Bae mi no andastanem klia stamba tingting blong mi long wol ia!”
Wan narawan i talem: “Bae mi no save se bae yumi progres afta long laef ia o no. From Buk blong Momon, mi save se i tru se i gat wan laef afta we yumi ded. Hemia stamba gol we yumi stap wok from.”
Las toktok ia i mekem mi tingting i gobak long laef blong mi, plante yia i gobak, olsem wan yang dokta. Wan long ol klia responsabiliti we wan dokta i gat, wanwan taem, i blong talemaot long famli se wan i ded. Long wan hospital we mi wok long hem, oli bildim wan spesel rum, we wol blong hem oli kavremap long matres, wan rum ia we ol memba blong famli oli save kasem kaen nius olsem. Long ples ia, sam pipol oli soemaot harem nogud blong olgeta taem oli bangem hed blong olgeta agensem ol matres wol ia. Mi wantem tumas blong tijim wanwan long olgeta se ded, nomata i had long olgeta we oli laef i stap, i wan pat we i nid blong hapen long laef long wol ia. Ded i letem yumi progres i go long nekis wol.
Wan moa we i ansarem kwestin blong mi i: “Mi no bin gat wan laef kasem taem mi bin ridim Buk blong Momon. Nomata mi bin prea mo go long Jos long ful laef blong mi, Buk blong Momon i bin helpem mi blong toktok stret wetem Papa long Heven blong fas taem.”
Wan moa i talem se: “Sapos i no gat Buk blong Momon, bae mi no andastanem se Sevya i safa from ol sin blong mi, be tu, Hem i save hilim ol sobodi mo harem nogud blong mi.”
Mo narawan bakegen: “Bae mi no save se yumi gat ol profet blong lidim yumi.”
Blong draon oltaem long ol trutok blong Buk blong Momon i save jenisim eksperiens blong laef. Wan long ol apugel misinari, Sista Olivia Nelson, i promesem wan investigeta se sapos hem i ridim Buk blong Momon evri dei, bae ol mak blong tes blong hem long yunivesiti eksam bae oli kam antap. Hem i mekem, mo mak i kam antap.
Ol brata mo sista blong mi. Mi testifae se Buk blong Momon, i tru toktok blong God. I tekem ol ansa blong ol bigfala kwestin blong laef. I tijim doktrin blong Kraes. I eksplenem samting mo i talem klia plante “gudfala mo impoten trutok” we oli bin lus tru long ol handred yia mo plante kaen translesen blong Baebol.
Buk blong Momon i givim andastaning we i moa fulwan mo i gat moa paoa abaot Atonmen blong Jisas Kraes, we yu save faenem long eni ples. I tijim se i rili minim wanem blong bon bakegen. Aot long Buk blong Momon, yumi lanem abaot fasin blong kam tugeta blong Isrel ia we i seraot olbaot. Yumi save from wanem yumi stap long ples ia long wol. Trutok ia mo plante narawan moa oli tijim wetem moa paoa mo moa strong insaed long Buk blong Momon bitim long eni nara buk. Ful paoa blong gospel blong Jisas Kraes i stap insaed long Buk blong Momon. Ful stop.
Buk blong Momon i givim laet long ol tijing blong Masta, mo tu, i soemaot klia ol teknik blong enemi. Buk blong Momon i tijim tru doktrin we i sakemaot ol giaman kastom blong relijin—olsem praktis blong baptaesem wan smol bebi. Buk blong Momon i givim stamba tingting long laef mo i pusum yumi blong tingting hevi long laef we i no save finis mo “wan hapines we i no gat en.” Buk blong Momon i brekemdaon ol giaman bilif se oli save faenem hapines insaed long nogud fasin, mo man i nidim blong hem i gud nomo blong save gobak stap long ples blong God. Hem i katemaot giaman tingting ia se revelesen i finis wetem Baebol, mo ol heven oli sil tedei.
Taem mi tingting long Buk blong Momon, mi tingting long toktok ia, paoa. Ol trutok blong Buk blong Momon oli gat paoa blong hilim, kamfotem, putumbak, givhan, mekem i kam strong moa, stretem mo mekem sol blong yumi i glad.
Ol dia brata mo sista blong mi. Mi promes se taem yufala i stap prea mo stadi long Buk blong Momon, evri dei, bae yu mekem ol desisen we oli gud moa—evri dei. Mi promes se taem yu stap tingting hevi long wanem yu stadi, ol windo blong heven bae oli open, mo bae yu kasem ol ansa long ol kwestin blong yuwan, mo kasem daereksen long laef blong yuwan. Mi promes se, taem we, evri dei, yu draonem yuwan long Buk blong Momon, bae yu gat proteksen long ol ivel blong tedei, iven strong fos blong ponografi, mo ol nara adiksen we i mekem maen i nomo wok.
Taem we mi harem wan i talem, mo miwan tu, i talem: “Mi save se Buk blong Momon i tru,” mi wantem singaot se: “!I gud. Be i no inaf!” Yumi nidim yumi filim, dip insaed long hat blong yumi, se Buk blong Momon i stret toktok blong God evriwan. Yumi mas filim hemia dip insaed we bae yumi neva wantem blong laef, wan moa dei, we yumi no gat buk ia. Bae mi talemsot toktok blong Presiden Brigham Yang taem hem i talem: “Mi wantem nomo se mi gat voes blong seven tanda blong wekemap ol pipol” blong oli luk trutok mo paoa blong Buk blong Momon.
Yumi nid blong stap olsem yang misinari ia we i givim seves long Yurop, we i filim dip insaed se Buk blong Momon i tru, mekem se hem i ron wetem wan kopi blong tabu histri ia i go long wan man long wan park, we hem mo kompanion blong hem i jes faenem.
Mi testifae se Josef Smit i bin, mo hem i profet blong las dispensesen ia. Hem nao we, tru long presen mo paoa blong God, i bin transletem tabu buk ia. Buk ia nao bae i helpem wol blong rere from Seken Kaming blong Lod.
Mi testifae se Jisas Kraes i stret Pikinini we i stap laef blong God we i stap laef. Hem i Sevya blong yumi, Ridima blong yumi, Eksampol blong yumi, Loya blong yumi long fes blong Papa. Hem nao i Mesaea blong promes, Mesaea blong wol ia, mo bae i Mesaea long mileniom. Mi testifae wetem ful sol blong mi se long wan wei we i spesel mo i wan merikel, Buk blong Momon i stap tijim yumi abaot Jisas Kraes mo gospel blong Hem.
Mi save se Presiden Thomas S. Monson i profet blong God long wol tedei. Mi lavem hem mo sastenem hem wetem ful hat blong mi. Mi testifae olsem long tabu nem blong Jisas Kraes, amen.
Ol Lis blong Presiden Nelson Abaot
Buk blong Momonhem i:
-
Wan nara testeman blong Jisas Kraes. Olgeta we oli raetem oli—Nifae, Jekob, Momon, Moronae—mo transleta, Josef Smit, olgeta evriwan oli ol ae witnes blong Lod.
-
Wan histri blong seves blong Hem long ol pipol we oli bin stap long Amerika blong bifo.
-
Tru, olsem we Lod Hemwan i talem.
Buk blong Momoni konfemem se:
-
Aedentiti blong Papa long Heven mo aedentiti blong Pikinini blong Hem we Hem i Lavem, Jisas Kraes.
-
Nid blong Adam i foldaon, mo waes blong Iv, blong mekem se ol man oli save gat glad.
Buk blong Momon i sakemaot ol tingting se:
-
Revelesen i finis wetem Baebol.
-
Ol smol pikinini oli nidim blong kasem baptaes.
-
Oli save faenem hapines insaed long fasin nogud.
-
Blong stap olsem wan gud man o woman i inaf blong kam olsem wan god (i nid blong kasem ol odinens mo mekem ol kavenan).
-
Foldaon blong Adam i makem ol man wetem “fas sin.”
Buk blong Momon i soem se ol profesi blong Baebol oli kamtru, olsem:
-
“Ol narafala sipsip” bambae oli harem voes blong Hem.
-
God bambae i mekem “wan wok we i bigwan mo wan sapraes wok,” we hem i toktok “aot long das i kam.”
-
“Stik blong Juda” mo “stik blong Josef” bae oli kam wan.
-
Isrel we i seraot olbaot bae i kam wan “long ol las dei,” mo olsem wanem nao bambae hemia i hapen.
-
Graon we i kamaot long ol papa, long saed blong laen blong Josef, hem i stap long Wes Pat blong Wol.
Buk blong Momon i mekem klia olsem wanem yumi andastanem:
-
Laef blong yumi bifo yumi kam long wol ia.
-
Ded. Hem i wan pat we i mas stap insaed long bigfala plan blong God blong stap hapi.
-
Laef afta long ded, we i stat insaed long paradaes.
-
Olsem wanem long laef bakegen blong bodi, we i joen bakegen wetem spirit blong hem, i kam wan sol we i nomo save ded.
-
Olsem wanem, jajmen we Lod bae i givim long yumi, bae i folem ol wok blong yumi mo ol tingting blong hat blong yumi.
-
Olsem wanem ol odinens blong yumi, oli mekem long stret wei: eksampol, baptaes, sakramen, mo givim Tabu Spirit.
-
Atonmen blong Jisas Kraes.
-
Laef bakegen long ded.
-
Impoten rol blong ol enjel.
-
Wanem stret hem i prishud.
-
Olsem wanem fasin blong man, paoa blong toktok nao i lidim hem i bitim paoa blong naef blong faet.
Buk blong Momon i talemaot sam infomesen we oli no bin save long hem bifo:
-
Oli bin stap mekem ol baptaes bifo we Jisas Kraes i bon i kam long wol ia.
-
Ol pipol long Amerika blong bifo, oli bin bildim mo yusum ol tempol.
-
Josef, namba 11 pikinini boe blong Isrel, i bin luk finis rol blong Josef Smit olsem profet.
-
Nifae (long yia 600–592 BKB) i bin luk finis se oli faenem mo tekova long Amerika.
-
Ol pat blong Baebol we oli bin klia mo oli impoten oli bin lus.
-
Wanwan man o woman i kasem Laet blong Kraes.
-
Olsem wanem fasin blong wanwan i gat fridom blong joes i impoten, mo nid blong i gat oposisen long evri samting.
-
Ol woning abaot “ol sikret plan.”