Auaunaga
O le a tatou faatinoina, se auala fou atu, ma paia atu e tausi ma auauna atu ai i isi.
Faafetai atu Elder Gong ma Elder Soares mo le faailoaga o lo oulua faatuatua faamaoni.Matou te matuai faafetai tele mo oulua ma a oulua soa pele.
Uso e ma tuafafine pele, o loo matou saili atu pea i le taitaiga mai le Alii i le auala e mafai ona tatou fesoasoani atu ai i o tatou tagata ia tausia poloaiga a le Atua, aemaise lava na poloaiga sili e lua ia alofa atu i le Atua ma o tatou tuaoi.
Mo masina, na matou sailia ai se ala lelei atu e auauna atu ai i manaoga faaleagaga ma faaletino o o tatou tagata i le ala a le Faaola.
Ua matou faia le faaiuga ia faamuta “faiaoga o aiga” ma “faiaoga asiasi” e pei ona tatou iloaina ai. Ae, o le a tatou faatinoina, se auala fou atu, ma paia atu e tausi ma auauna atu ai i isi. O le a tatou faasino atu ma le faigofie i nei taumafaiga o “auaunaga (ministering).”
O taumafaiga faaleauaunaga mataalia e mafai ona faia e ala i meaalofa taua a tuafafine, ma e ala i le mana lemafaatusalia o le perisitua. Tatou te manaomia uma sea puipuiga mai togafiti ma mailei a le fili.
O le a faamalamalama atu e Elder Jeffrey R. Holland o le Korama a Aposetolo e Toasefululua, ma Sister Jean B. Bingham, Peresitene Aoao o le Aualofa, le auala o le a galulue ai nei ia uso ua tofia o le perisitua ma tuafafine ua tofia o le Aualofa ma Tamaitai Talavou i le auauna atu ma le leoleoina o tagata o le Ekalesia i le lalolagi atoa.
Ua autasi le Au Peresitene Sili ma le Toasefululua i le faamaoniaina o a laua savali. Ua tatou tatalaina ma le agaga faafetai ma le agaga tatalo lenei itulau fou i le talafaasolopito o le Ekalesia. I le suafa o Iesu Keriso, amene.