Lix xamlel li qapaab’aal
Choq’ reheb’ li neke’xsik’, neke’xk’ulub’a, ut neke’royb’eni, li saqewk re li paab’aal taachalq malaj naru taasutq’iiq, us ta wan naq timil timil nak’ulman.
Ex was wiitz’in, ma ink’a’ q’axal chaab’il li xk’ulb’al li na’leb’ k’utb’esinb’il chaq sa’ choxa rik’in li Awa’b’ej Russell N. Nelson ut eb’ laj jolominel qe sa’ li Iglees li nokoxb’oq chixyu’aminkil jun ak’ ut santil xjayal li qayu’am, sa’ qochoch ut sa’ li iglees, chi anchal li qach’ool, li qak’a’uxl, ut li qametz’ew?
Ma aab’aanuhom jun sutaq k’a’ruhaq li xaweek’a naq moko kawresinb’ilat ta malaj naq ink’a’ nakatru chixb’aanunkil, a’ut toj xat-osob’tesiik xb’aan naq xayal xb’aanunkil?
Laa’in inb’aanuhom a’an. Wahe’ jun reetalil a’an.
Junjunq chihab’ chaq anajwan, li Elder Richard G. Scott, jun komon re lix Molameb’ li Kab’laju chi Apostol, kixpatz’ we, “Gerrit, ma taawaj xb’onb’al jun jalam-uuch wik’in?”
Li Elder Scott kixye naq kitenq’aak xb’aan li b’onok chi ilok ut chi yiib’ank. A’an kixtz’iib’a: “K’e aach’ool chixyiib’ankil k’a’ruhaq, us ta ink’a’ jwal chaq’al ru li nakayiib’. … Li seeb’al chi yiib’ank naru tatxk’e chi b’antioxink xb’aan laa yu’am ut li seeb’al k’eeb’ileb’ aawe xb’aan li Qaawa’ naq xatxyo’ob’tesi. … Wi nakatsik’ok-u chi chaab’il, ink’a’ mas li hoonal taaraj ru li na’leb’ a’an.”
Li Awa’b’ej Henry B. Eyring naxch’olob’ naq eek’asinb’ileb’ lix k’oxlahom xb’aan “jun eek’ahom re rahok,” jo’ “lix rahom jun aj Yo’ob’tesinel li naraj naq li ralal xk’ajol te’wulaq jo’ chanru a’an—re te’yo’ob’tesinq ut te’yiib’anq.” Eb’ li k’a’aq re ru yiib’anb’ileb’ xb’aan li Awa’b’ej Eyring neke’xk’ut jun “musiq’ejil ilok junaj ru chirix li xnawom ch’oolej ut li paab’aal.”
Lix b’onb’il jalam-uuch li Awa’b’ej Boyd K. Packer naxk’utb’esi jun esil jwal aajel ru re li evangelio: “Li Dios a’an aj Yo’ob’tesihom re li choxa ut li ruchich’och’ ut chixjunil li k’a’aq re ru wan, chixjunil li rax pim naxch’olob’ xyaalal li yo’ob’tesink a’an b’eresinb’il chaq sa’ choxa, ut wan jun tz’aqal xjunajil chixjunil li wan sa’ ruchich’och’, li ciencia, ut lix evangelio li Jesukristo.”
Laj Alma kixch’olob’ xyaalal, “Chixjunil li k’a’aq re ru naxk’ut naq wan jun li Dios.” Sa’ li Tzoleb’aal reheb’ li Kok’al, eb’ li qakok’al neke’xb’icha, “Laa’in wab’ihom xb’icheb’ li kok’ xul, wilom xchaq’al ru li choxa, … Sahilal sa’ inch’ool xweek’a, naq wankin arin sa’ li chaq’al ru ch’och’ xk’e chaq we lin Yuwa’ sa’ choxa.” Jun aj tz’iib’anel, laj Victor Hugo naxnima ru li “sachb’a-ch’oolejil komonil wankeb’ wi’ li k’a’ru yo’yo ut li k’a’ru ink’a’ yo’yo sa’ li ruchich’och’ a’in, jo’ li nimla saq’e toj li xul q’axal ka’ch’in. … Chixjunileb’ li tz’ik neke’purik sa’ choxa chi chapb’il li junelik qe’ kutan sa’ roqeb’. … Jun li nebulosa a’an chanchan rochoch li sank choq’ reheb’ li chahim sa’ choxa.”
Ut a’an nokoxk’am wi’chik rik’in lix b’oqom li Elder Scott.
“At Elder Scott,” chankin, “Nawaj raj naq taanimanq inseeb’al chi ilok ut chi yiib’ank. Nasaho’ inch’ool chixk’oxlankil naq li qaChoxahil Yuwa’ nab’onok rik’ineb’ li choql neke’b’olbot ut rik’in chixjunileb’ lix b’onol li choxa ut li ha’. “A’b’anan”—aran kinxaqli chiru jun najtil hoonal—“At Elder Scott,” chankin, “Maak’a’ inseeb’al chi b’onok. Na’ok ink’a’uxl naq tattitz’q chixyalb’al aaq’e chintzolb’al.”
Kise’ek li Elder Scott ut kixk’uub’ xhoonal naq taqach’utub’ qib’. Naq kiwulak li eetanb’il kutan, a’an kixkawresi li hu, li b’on, ut li b’onleb’. A’an kixyiib’ junjunq li jalam-uuch ut kixtaq’resi li hu choq’ we.
Kiqoksi jo’ jun reetalil li taqab’on, jun lix ch’ina-usil b’onb’il jalam-uuch, li k’ab’a’inb’il Jun li xam sa’ xkub’sinkil li saq’e. Naq yooko chi b’onok, koo’aatinak chirix li paab’aal—naq naqil lix saqen ut naqeek’a lix q’ixnal li xam, noko’el sa’ li aak’ab’ ut li wiib’ank ch’oolej li wan chiqix—naq wan naq chiru jun najtil q’ojyin re junaatalil, sa’ lix xamlel li qapaab’aal naru taqataw li yo’onihom ut lix k’ojob’ankil li qach’ool. Ut relik chi yaal naq taachalq li saqewk. Lix xamlel li qapaab’aal—a’ li nanaq sa’ qach’ool, li qanumsihom, ut li qosob’tesihom re paab’aal chirix li rusilal li Dios ut lix q’unil uxtaan sa’ li qayu’am—nokoxkawob’resi chiru li q’ojyin.
Lix nawom inch’ool a’an—naq choq’ reheb’ li neke’xsik’, neke’xk’ulub’a, ut neke’royb’eni—li saqewk re li paab’aal taachalq malaj naru taasutq’iiq, us ta wan naq timil timil nak’ulman. Li saqen taachalq naq naqaj ru ut naqasik’, naq wan li qakuyum ut naq noko’ab’in chiru lix taqlahom li Dios, naq wan qach’ool chixk’ulb’al li ruxtaan, lix k’irtesihom, ut lix sumwank li Dios.
Naq koo’ok chi b’onok, li Elder Scott kixwaklesi inch’ool, “Gerrit, rik’in jun ajwi’ li tzolok, taab’on k’a’ruhaq li taawaj raj xk’uulankil ut xjultikankil.” Yaal li kixye li Elder Scott. Nim xloq’al choq’ we xjalam-uuch li xam li kinixtenq’a chixb’onb’al li Elder Scott. Jwal b’ab’ay chaq inseeb’al chi b’onok ut toj jo’kan ajwi’ anajwan, a’b’an xjultikankil lix xamlel li qapaab’aal naru tixwaklesi qach’ool rik’in li oob’ chi na’leb’ a’in.
Li xb’een, lix xamlel li qapaab’aal naru tixwaklesi qach’ool chixtawb’al li sahil ch’oolejil sa’ li yo’ob’tesink sa’ xyaalal.
Naru xtawb’al li sahil ch’oolejil sa’ li k’oxlak, li tzolok, ut xb’aanunkil li k’a’ru ak’ ut chaab’il. K’a’jo’ wi’chik naq yaal a’an naq naqanimob’resi li qapaab’aal ut naqakanab’ wi’chik qib’ chiru li qaChoxahil Yuwa’ ut li Jesukristo, li Ralal. Ink’a’ wan li qawankil re xkolb’al qib’ yal rik’in xraab’al qib’. A’b’an li qaChoxahil Yuwa’ nokoxra ut naxnaw qu k’a’jo’ wi’chik chiru naq naqara qib’ ut naqanaw qib’ qajunes. Naru taqakanab’ qib’ chiru li Qaawa’ ut maawa’ chiru li qak’a’uxl qana’leb’.
Ma xk’ulman jun sutaq naq ka’ajwi’ laa’at ink’a’ xatb’oqe’ sa’ jun ninq’e?
Ma xk’ulman jun sutaq naq xsik’e’ laa wu laa’at sa’ xraqik, malaj ink’a’ ajwi’ xsik’e’ aawu naq yookeb’ chixch’utub’ankil jun li equipo?
Ma xakawresi aawib’ jun sutaq choq’ re jun li tz’ilok-ix sa’ li tzoleb’aal malaj re xk’ulb’al jun trab’aaj, k’a’ruhaq jwal xawaj xk’ulb’al—ut xaweek’a naq ink’a’ xatru?
Ma xattijok jun sutaq choq’ re jun aawochb’een, a’ut chirix a’an xejach eerib’?
Ma wan laa yajel nakana chiru xnajtil li yu’amej, ma xatkanab’aak xb’aan laa sum aatin, malaj ma xak’ul rahilal xb’aan laa junkab’al?
Rik’in li paab’aal wan ajwi’ li ajom ut li xtaql ch’oolej re paab’ank. Naq naqak’anjela lix taql qach’ool k’eeb’il qe xb’aan li Dios ut naqoksi chixjunil li qaseeb’al sa’ tuulanil ut paab’aal, li qaKolonel, li Jesukristo, naru tooxtenq’a chixnumsinkileb’ lix cha’a’ajkilal jo’ ajwi’ lix sahilal li yu’amej. Li paab’aal nachal ajwi’ rik’in ab’ink chiruheb’ lix taqlahom li Dios, k’eeb’il re qosob’tesinkil naq naqataaqe lix b’e a’an re li sumwank.
Naq xqeek’a, malaj toj naqeek’a, li wiib’ank ch’oolej, li junaatalil, li josq’il, li rahil ch’oolej, malaj naq najt wankeb’ rik’in li Dios ut lix Iglees k’ojob’anb’il wi’chik, naru naq taa’ajmanq ru xkomon chik li yalok-q’e ut li paab’aal re ok wi’chik sa’ lix b’e a’an re li sumwank. A’b’an k’a’jo’ x’aajelil ru! B’aanuhomaq usilal, chalqex, malaj sutq’inqex rik’in li Qaawa’ Jesukristo! Lix rahom li Dios q’axal kaw wi’chik chiru xb’ak’leb’ li kamk—sa’ tib’elej ut sa’ musiq’ej. Lix tojb’al rix li maak xb’aan li Kolonel wan chi junelik ut chi maak’a’ roso’jik. Chiqajunilo nokosach sa’ li b’e ut ink’a’ nokowulak. Naru naq laa’o, chiru jun hoonal, toosachq sa’ li b’e. Rik’in rahok, li Dios naxk’ojob’ qach’ool naq maak’a’ naxye b’ar wanko malaj k’a’ru qab’aanuhom, maak’a’ li na’ajej b’ar wi’ ink’a’ chik nokoru chi sutq’iik. A’an nokoroyb’eni re qaq’alunkil.
Li xkab’, lix xamlel li qapaab’aal naru tixwaklesi qach’ool chirilb’aleb’ li qakomon rik’in jun ak’il ilom li q’axal wi’chik taqenaq, loq’, ut nujob’resinb’il rik’in li Musiq’ej.
Rilb’aleb’ li komon chi jo’ka’in naxk’am chaq li sachb’a-ch’oolej ut li osob’tesink re li okenk sa’eb’ li sumwank—b’ar wi’ naqeek’a lix rahom li Dios ut naqasik’ rilb’al li qakomon rik’in li eek’ahom a’an.
Toje’ chaq, li Hermana Gong ut laa’in xqanaw ru jun li yuwa’b’ej ut lix junkab’al li osob’tesinb’ileb’ xb’aan jun aj k’amol re li tijonelil tiik xch’ool li xpatz’ re lix obiisp ma naru a’an (a’ laj k’amol re li tijonelil a’an) taa’ok choq’ rochb’een li yuwa’b’ej a’an sa’ li tzolok ochochnal. Li yuwa’b’ej a’an ink’a’ chik nawulak sa’ iglees ut maak’a’ naraj rik’in li tzolok ochochnal. A’b’an naq x’ok chi jalaak xch’ool li yuwa’b’ej, a’an ut laj k’amol re li tijonelil aj rahonel xe’ok chirula’ankileb’ “lix” junkab’aleb’. Chirix jun li ula’anink xe’xb’aanu, li rixaqil—a’an ajwi’ ink’a’ nawulak sa’ iglees sa’ li hoonal a’an—xpatz’ re lix b’eelom chan ru li ula’anink. Li yuwa’b’ej xye, “Maare xweek’a’ k’a’ruhaq”—toja’ naq xko’o sa’ li kosiin re xchapb’al jun li ha’ nakaltesin.
A’b’an timil timil xe’k’ulman a’in: li q’unil chaab’ilal, li k’anjelak chiruheb’ li komon, li jalaak sa’ ch’oolej, li tzoleb’aal re kawresink-ib’ re xik sa’ li santil ochoch, li wulak sa’ iglees, li tz’ape’k sa’ junajil jo’ junkab’al sa’ li santil ochoch. K’oxla li b’antioxihom neke’reek’a li ralal xk’ajol ut li rimam li na’b’ej yuwa’b’ej choq’ reheb’, ut choq’ ajwi’ re li hermano li xchal jo’ jun ramiiw ut rochb’een li yuwa’b’ej re rilb’al ut xraab’al jalaneb’ li komon.
Li roxil xamlel li paab’aal: li sahil ch’oolejil ut li osob’tesink re li evangelio neke’chal naq naqasik’ xraab’al li Qaawa’ ut li qas qiitz’in chi anchal li qach’ool ut li qaam.
Eb’ li loq’laj hu nokohe’xb’oq chixq’axtesinkil chixjunil li qaam sa xb’een li artal re rahok ut k’anjelak chiru li qas qiitz’in. Sa’ li Najter Chaq’rab’, li hu Deuteronomio nokorelaji naq “taqara li Qaawa’ li qaDios” chi anchal qach’ool, li qaam, ut li qametz’ew. Laj Josue naxjultika, “Chera li Qaawa’ lee Dios, … chetaaqe lix b’e, chepaab’ lix chaq’rab’, junajaqex rik’in A’an ut chexk’anjelaq chi anchal lee ch’ool ut chi anchal lee raam.”
Sa’ li Ak’ Chaq’rab’, li qaKolonel naxyeheb’ li wiib’ chi ninqi taqlahom: “Taara li Qaawa’ laa Dios chi anchal aach’ool, chi anchal aawaam, chi anchal aametz’ew, … ut taara laa was aawiitz’in jo’ naq nakara aawib’ laa’at.”
Sa’ lix Hu laj Mormon: Jun chik Ch’olob’anb’il Esil chirix li Jesukristo, li rey aj Benjamin kik’anjelak “chi anchal xmetz’ew lix tib’el ut xseeb’al anchal li raam” ut kixxaqab’ li tuqtuukilal sa’ li ch’och’. Sa’ li Tzol’leb’ ut Sumwank, jo’ naxnaw li junjunq chi misioneer, li Qaawa’ naxpatz’ qe naq took’anjelaq chiru “chi anchal qach’ool, qametz’ew, qak’a’uxl ut qakawilal.” Naq eb’ laj santil paab’anel ke’ok sa’ li Condado Jackson, li Qaawa’ kixtaqlaheb’ naq te’xsantob’resi li hilob’aal kutan rik’in xraab’al “li Qaawa’ laa Dios chi anchal aach’ool, ut chi anchal aametz’ew, aak’a’uxl, ut aakawilal; ut sa’ lix k’ab’a’ li Jesukristo tatk’anjelaq chiru.”
Nasaho’ qach’ool rik’in li b’oqom re xq’axtesinkil chixjunil li qaam sa’ xsik’b’al jun b’e q’axal wi’chik taqenaq ut loq’ re xraab’al li Dios ut li ani wankeb’ chiqasutam ut re xkawob’resinkil li qapaab’aal chirix li qaChoxahil Yuwa’ ut li Jesukristo sa’ li qach’ool ut sa’ li qochoch ut sa’ li iglees.
Li xkaa, lix xamlel li qapaab’aal naxwaklesi qach’ool chixb’aanunkil rajal li k’a’ru tiik li naxnimob’resi li qapaab’aal ut li qamusiq’ejil.
Naru naq eb’ li loq’laj k’anjel a’an, li tiikil na’leb’ k’aynaqo wi’ chixb’aanunkil, a’an li tijok; li xtzolb’aleb’ li loq’laj hu; li kuyuk sa’; li xjultikankil li qaKolonel ut li qasumwank rik’in xk’ulb’al li loq’laj wa’ak; xwotzb’aleb’ li osob’tesink re li evangelio rik’in li k’anjelak jo’ misioneer, rik’in li santil ochoch ut li resilal li junkab’al, malaj jalan chik li k’anjel chiruheb’ li qas qiitz’in; li tz’iib’ak sa’ jun li diario; ut wan xkomon chik.
Naq neke’junajiik li tiikil k’anjel ut li musiq’ejil ajom, neke’junajiik ajwi’ xq’ehil li ruchich’och’ ut li junelik q’e kutan. Li musiq’ejil saqen ut yu’am neke’chal naq li paab’ank chi rajlal nokoxjilosi rik’in li qaChoxahil Yuwa’ ut li qaKolonel, li Jesukristo. Naq naqara lix musiq’ li chaq’rab’ jo’ ajwi’ li tz’aqal naxye, li k’a’ru re li junelik q’e kutan naru taanaq chiru li qaam chanchan li k’ajob’ chalen chaq sa’ choxa. Rik’in li ab’ink chiru li Dios wulaj wulaj ut li sahil yo’yookil ha’, naqataweb’ li sumehom, li paab’aal, ut li metz’ew re xnumsinkileb’ li ch’a’ajkilal re li yu’amej rik’in li kuyuk, li ilok, ut li sahil ch’oolejil re li evangelio.
Li ro’, naq toj naqab’aanu li k’a’ru chaab’il re li k’anjel ak naqanaw naq yooko chixsik’b’al jun li ak’il b’e q’axal wi’chik loq’ re xraab’al li Dios ut xkawresinkil qib’ ut li qas qiitz’in chi sutq’iik rik’in, lix xamlel li qapaab’aal naru tixwaklesi qach’ool chixjultikankil naq li tz’aqlok-u wan rik’in li Kristo, ink’a’ qik’in malaj rik’in lix na’leb’ li ruchich’och’.
Eb’ lix b’oqom li Dios nujenaqeb’ rik’in li rahok ut li yo’onink xb’aan naq li Jesukristo a’an “li b’e, li yaal, ut li yu’am.” A’an naxb’oqeb’ li ani neke’reek’a naq aal li riiqeb’, “Chalqex wik’in,” ut reheb’ li ani neke’chal rik’in, a’an naxyeechi’i, “laa’in texinhiltasi.” “Chalqex rik’in li Kristo, ut chitz’aqloq eere eeru rik’in, … chera li Dios chi anchal eemetz’ew, eek’a’uxl, ut eekawilal, rik’in a’an tz’aqal li rusilal choq’ eere, re naq rik’in li rusilal taaruuq texwanq chi tz’aqal eere eeru rik’in li Kristo.”
Sa’ li ch’ol aatin “rik’in li rusilal taaruuq texwanq chi tz’aqal eere eeru rik’in li Kristo” wan ajwi’ li k’ojob’ank ch’oolej, li tuqtuukilal, ut li yeechi’ihom naq tooruuq chi xik chi uub’ej rik’in paab’aal ut xkawilal qach’ool chirix li Qaawa’ us ta nachal li ink’a’ naqaj, naqoyb’eni, malaj naqasik’, chi maak’a’ qamaak laa’o ut us ta xqab’aanu li q’axal chaab’il naru chiqu.
Chi jo’q’ehaq, chiqajunil naqeek’a naq wan qapaaltil, naq moko tz’aqal ta qanawom, malaj naq moko k’ulub’ejo ta. A’ut sa’ lix yalb’al qaq’e rik’in paab’aal chixraab’al li Dios ut chirilb’aleb’ li qas qiitz’in, naru taqeek’a lix rahom ut lix musiq’ahom li Dios li naqaj ru choq’ reheb’ a’an ut choq’ qe laa’o sa’eb’ li ak’il b’e q’axal wi’chik loq’eb’.
Rik’in ruxtaan, li qaKolonel naxwaklesi qach’ool ut naxyeechi’i qe naq naru “taqatiikisi qib’ chi uub’ej chi xaqxooko junelik rik’in li Kristo, rik’in tz’aqal xlemtz’unkil li yo’onink, ut rik’in rahok choq’ re li Dios ut reheb’ chixjunil li winq.” Lix tzol’leb’ li Kristo, lix tojb’al rix li maak xb’aan li qaKolonel, ut li xtaaqenkil lix b’e a’an re li sumwank chi anchal li qaam te’ruuq chiqatenq’ankil chixnawb’aleb’ lix yaalil na’leb’ ut chiqach’ab’ankil.
Ninch’olob’ xyaalal naq k’ojob’anb’ileb’ wi’chik lix tz’aqalil lix evangelio ut lix k’uub’anb’il na’leb’ re sahil ch’oolejil ut k’utb’ileb’ sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, sa’eb’ li loq’laj hu, ut xb’aaneb’ li profeet chalen chaq li profeet aj Jose Smith toj li Awa’b’ej Russell M. Nelson sa’ li kutan a’in. Ninch’olob’ xyaalal naq lix b’e re li sumwank naxk’am sa’ li maatan q’axal wi’chik xnimal ru li yeechi’inb’il xb’aan li qaChoxahil Yuwa’ aj rahonel: “Taawanq eeyu’am chi junelik.”
Chiqak’uleb’ li rosob’tesihom ut li sahil ch’oolejil li ink’a’ na’oso’ naq naq’ixno’ li qach’ool li qayo’onihom ut li qateneb’ankil chiru lix xamlel li paab’aal. A’an li nintz’aama sa’ lix santil ut loq’laj k’ab’a’ li Jesukristo, amen.