Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k
Kōm̧m̧an bwe kwon aolep iien ukweļo̧k bwe pedped ko n̄an mour eo am̧ me komaron̄ in kōjerbale priesthood eo kōn eļapļo̧k kajoor jān kar m̧okta.
Em̧m̧aan ro jeiū im jatū, ej juon men em̧m̧an n̄an rewaj ioon jarlepju in eļap an ritariņae ro an Irooj an rikabwijer priesthood ro. Ej juon kajoor ekajoor kōn em̧m̧an eo am̧! Kōmij iakwe kom̧. Kōmij jar kōn kom̧. Im kōmij lukkuun kam̧m̧oolol kōn kom̧.
Jidik iien em̧ootļo̧k ikar loe aō make epaakeļo̧k kakiplōklōk eo an Irooj kar leļo̧k n̄an Rikanaan Josep Smith: “Ba ejjeļo̧k ijello̧kun wōt ukeļo̧k n̄an epepen in.”1 Naan in kōmlet in ekkā an ālij ilo jeje ko rekwojarjar.2 Ej letok juon kajjitōk em̧m̧an: “Aolep rej ke aikuj in ukweļo̧k?” Uwaak eo ej aaet.
Ebooļ armej ro rej ļōmņak ukweļo̧k ej āinwōt kaje—juon men eo kajekdo̧o̧ne ijjelo̧kin wōt n̄e jekjek ko reļļap. Ak en̄jake in kōn kaje ej kōm̧m̧an jān Setan. Ej kajjieon̄ kabōjrak kōj jān ad reilo̧k n̄an Jisōs Kraist,3 eo ej jutak kōn pā ko reppeļļo̧k,4 kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare kōj.
Naan eo n̄an ukweļo̧k ilo Kallim̧ur Ekāāl an kajin Greek ej metanoeo. Leta ko im̧aan naan eo rej meta ej meļeļein “oktak.” Leta ko āliktata -noeo ej iookļo̧k naan in Greek ko me meļeļein “ļōmņak,” “jeļāļo̧kjeņ,” “jetōb,” im “menono.”5
Kōn menin, ke Jisōs ekar kajjitōk ippem̧ im ippa n̄an “ukweļo̧k,”6 Ej karuwainene kōj n̄an ukōt ļōmņak ko ad, ad kōļmenļo̧kjeņ, jetōb eo ad—aaet wāween ad menono. Ej kajjitōk ippād n̄an ukōte wāween ad iakwe, ļōmņak, jerbal, joļo̧k ad iien, kōm̧m̧an n̄an kōrā ro pāleed, katakin ajri ro nejid, im aaet kōjparok ānbwinnid.
Ejjeļo̧k juon men ej kanemkwoj eļapļo̧k, kōkwojarjar eļapļo̧k, ak aorōkļo̧k jān juon ukweļo̧k eo emakijkij im aolep iien ukweļo̧k. Ukweļo̧k ejjab juon m̧akūtkūt, ej juon wāween jerbal. Ej kii eo n̄an lem̧ōņōņō im aenōm̧m̧an ilo kōļmenļo̧kjeņ. N̄e kobain tōmak, ukweļo̧k ej kōppeļļo̧k ad deļo̧n̄e kajoor in Pinmuur eo an Jisōs Kraist.7
Mekarta kwoj tiljek em̧m̧akūt m̧aanļo̧k ilo iaļen bujen eo, kar jejļo̧k ak bweradikļo̧k jān iaļen bujen eo, ak jab maron̄ loe iaļ eo jān ijo kwoj pād ie kiiō, ij akweļap ippem̧ n̄an ukweļo̧k. En̄jake kajoor in kajoorļo̧k eo an ukweļo̧k aolep raan—jān kōm̧m̧an im maron̄ kōm̧m̧an em̧m̧anļo̧k jidik kajjojo raan.
N̄e jej kāālet n̄an ukweļo̧k, jej kāālet n̄an oktak! Jej kōtļo̧k an Rilo̧mo̧o̧r eo ukōt kōj n̄an juon nememe eo ekāāl ad make. Jej kāālet n̄an eddōļo̧k ilo jetōb im bōk lan̄lōn̄—lan̄lōn̄ eo jān pinmuur ilo E.8 N̄e jej kāālet n̄an ukweļo̧k, jej kāālet n̄an erom̧ āinwōt Jisōs Kraist!9
Em̧m̧aan ro Jeiū im Jatū, jej aikuj in kōm̧m̧an em̧m̧anļo̧k im maron̄ em̧m̧anļo̧k kōnke jej pād ilo juon tariņae. Tariņae in ippān jerawiwi ej lukkuun bōk jikin. Rikapo eo ej lukkuun ļapļo̧k kijejeto ko an n̄an kabweer naan in kam̧ool ko im bōbrae jerbal eo an Irooj. E ej leļo̧k n̄an rikarejar ro an kein tariņae ko rekajoor n̄an dāpij kōj jān ad bōk m̧ōttan lan̄lōn̄ im iakwe eo an Irooj.10
Ukweļo̧k ej kii eo n̄an kōttoļo̧k wāween ko rejelet jepelļo̧k jān aujiid ko an rikap eo. Irooj ejjab kōtmāne wāppen jān kōj ilo wāween in ilo ad eddōkļo̧k n̄an indeeo. Ak Ej kōtmāne bwe en ļapļo̧k ad erreoļo̧k. Ukweļo̧k aolep iien ej iaļ eo n̄an erreo, im erreo ej bōktok kajoor. Erreo an juon make emaron̄ kōm̧m̧an bwe jen kein jerbal ko rekajoor ilo pein Anij. Ad ukweļo̧k—ad erreo—enaaj kōkajoorļo̧k kōj im jipan̄ ilo ad aiintok Israel.
Irooj ekar katakin Rikanaan Josep Smith “bwe jim̧we ko an priesthood rej ekkejelļo̧k im jamin jekadļo̧k jān kajoor ko an lan̄, im bwe kajoor ko an lan̄ jab maron̄ kajeikiki ak kōm̧akūtkūti ak ioon wōt pedped ko an wānōk.”11
Jej jeļā bwe ta naaj letok n̄an kōj eļapļo̧k ej n̄an bōk kajoor ko an lan̄. Jej barāinwōt jeļā ta eo enaaj kōmaron̄ ad eddōkļo̧k—ta eo jej aikuj in bōjrak ad kōm̧m̧ane n̄an kōļapļo̧k ad maron̄ deļo̧n̄e kajoor ko an lan̄. Em̧m̧aan ro Jeiū im Jatū, tiljek pukot n̄an meļeļe ta eo ej jutak im̧aan am̧ iaļ n̄an ukweļo̧k. Kakkilōne ta ko rej kabwijrak eok jān am̧ ukweļo̧k. Innām, oktak! Ukweļo̧k! Kōj aolep maron̄ in kōm̧m̧an em̧m̧anļo̧k im maron̄ em̧m̧anļo̧k jān kar m̧okta.12
Ewōr wāween ko rejeno̧lok me jemaron̄ in kōkōm̧anm̧aninļo̧k. Juon ej ilo wāween ad kōm̧m̧an n̄an ānbwinnid. Ij ļo̧kjenaō kōn kabwilōn̄lōn̄ eo an ānbwinnin armej. Ej juon kōm̧anm̧an eo eaiboojoj, aorōk n̄an ad eddōkļo̧k m̧ae jibadbad eo eļap im ekwojarjar. Jeban eddōkļo̧k eļan̄n̄e ejako. Ilo an kar letok mennin letok eo an juon ānbwin, Anij ekar kōtļo̧k ad bōk bun̄tōn eo eaorōk m̧ae ad erom̧ āinwōt E.
Setan emeļeļe menin. Ej illu kōnke bun̄jān tōmak eo an ilo mour eo m̧okta im jab maron̄ karbōb jān kōjeraam̧m̧an in, likūt e ilo juon mejatoto in ebanban im kitōtō. Men̄e elōn̄, eļan̄n̄e ejjab aolep, kapo ko ej likūti im̧aan ad iaļ rej kōm̧m̧an ad kakkure ānbwinnid ak ānbwin ko an ro jet. Kōnke Setan emake iaan ilo an ejjeļo̧k juon ānbwin, ekōņaan bwe jen make iaad kōnke kōn wōt ānbwin ko ad.13
Ānbwinnum̧ ej tampeļ eo am̧ make, kōm̧anm̧an n̄an jetōb eo am̧ indeeo.14 Am̧ kōjparok tampeļ ņe ej aorōk. Kiiō, ij kajjitōk ippemi, em̧m̧aan ro jeiū im jatū kwoj ke nuknuk im kōm̧anm̧ane ānbwinnūm̧ n̄an kwaļo̧k n̄an laļ in eļapļo̧k jān am̧ kam̧ōņōņōik Anij? Uwaak eo am̧ n̄an kajjitōk in ej jilkinļo̧k juon ennaan kajju n̄an E kōn en̄jake ko am̧ kōn mennin letok em̧m̧anm̧ōn in n̄an kwe. Ilo kautiej n̄an ānbwinnid, em̧m̧aan ro jeiū im jatū, ij ļōmņak jemaron̄ kōm̧m̧an em̧m̧anļo̧k im maron̄ em̧m̧anļo̧k.
Wāween eo juon jemaron̄ barāinwōt kōm̧m̧an em̧m̧anļo̧k ej ilo wāween ad kautiej kōrā ro ilo mour ko ad, jino ippān kōrā ro pāleed im leddik ro nejid, jined im kōrā ro jeid im jatid.15
Allōn̄ ko ļo̧k, ikar bōk juon leta ekabūrom̧ōjm̧ōj jān juon jeid ak jatid kōrā. Ekar jeje: “[Leddik eo nejū im n̄a] kom̧ro ej en̄jake ke kōm̧ro ej pād ilo jiāe eo eļap n̄an ļeo pāleeō im ļaddik ro nejū wūjlepļo̧k eo aer, 24/7 kōn meļeļe ko rekāāl kōn ikkure, mijjiin, m̧weiūk ko wiakaki, [im] ekkatak im alooji ikkure ko an aolep ikkure ko [maron̄i]. En̄jake eo ej āinwōt n̄e kōmij luuji jiea ko im̧aan ippān ļeo pālele im ļaddik ro nejim kōnke aolep aer iien maron̄ kōm̧aati n̄an alooj [ikkure ko im game ko].”16
Em̧m̧aan ro jeiū im jatū, eddo eo am̧ kein kajuon im im̧aantata āinwōt juon rikabwijer priesthood eo ej n̄an iakwe im kōjparok kōrā eo pāleem̧. Erom̧ juon wōt ippān. Erom̧ m̧ōttan. Kōm̧m̧an bwe en pidodo n̄ane bwe kōņaan bwe en am̧. Ejjeļo̧k itok limo ko jet ilo mour in ej aikuj in kaorōke im̧aantata jān am̧ kalōk juon jem̧jerā n̄an indeeo ippān. Ejjeļo̧k ilo TV eo, juon kein taļboon ko, ak juon kamputōr eaorōkļok jān ājmour eo an. Kwon bwine ewi jon̄an am̧ joļo̧k am̧ iien im ia eo kwoj wūjlepļo̧k am̧ kajoor n̄ane. Enej kwaļo̧k n̄an eok ia eo būruwōm̧ ej pād ie. Jar bwe būruwōm̧ en ekkejelļo̧k wōt n̄an būruwōn. kappukot n̄an kam̧ōņōņōiki. Pukot kapilōk eo an, im ron̄jake. Naan in rōjan̄ ko an renaaj kōkōm̧anm̧anļo̧k m̧akūtkūt ko am̧.
Eļan̄n̄e kwoj aikuj in ukweļo̧k kōnke kōn wāween am̧ kar kōm̧anm̧an n̄an kōrā ro repaak tata n̄an eok, jino kiiō. Im keememej bwe ej eddo eo am̧ ej n̄an jipan̄ kōrā ro ilo mour eo am̧ bōk kōjeraam̧m̧an ko rej itok jān mour kōn kien erreo eo an Irooj. Jab ļōmņak bwe juon kōrā ejjab maron̄ bōk kōjeraam̧m̧an ko an tampeļ.
Em̧m̧aan ro jeiū im jatū, jej aolep aikuj in ukweļo̧k. Jej aikuj in jutak jān couch eo, likūt remote eo, im ruj jān ad kakkure eo ad ilo jetōb. Ej iien eo n̄an ad kōņake kein tariņae an Anij bwe jen maron̄ bōk koņaad ilo jerbal in eaorōktata ioon laļ in. Ej iien n̄an “bun̄raake sickle ko [ad], im m̧adm̧ōd kōn aolepān amiro kajoor, ļōmņak, im maron̄.”17 Kareel ko an eo enana rej jan̄in kar lukkuun kajoor aer ajeeded m̧okta jān aer waļo̧k rainin. Āinwōt juon rikarejar an Irooj, jejjab maron̄ kiki ilo an tariņae in wōnm̧aanļok.
Baam̧le eo am̧ eaikuji tōl eo am̧ im am̧ iakwe. Doulul eo am̧ im ro ilo ward eo am̧ ak branch eo rej aikuji kajoor eo am̧. Im aolep ro rej ioon eok rej aikuj in jeļā ta eo juon rikaļooran Irooj ej āinwōt im m̧akūtkūt āinwōt.
Em̧m̧aan ro jeiū im jatū, kar kāālet kom̧ jān Jemād n̄an itok n̄an laļ in ilo iien in eaorōk kōnke peran eo am̧ ilo kar mour eo m̧okta. Kom̧wij pād ilubwilijin em̧m̧aan ro rem̧m̧antata, im reperan ro rekar itok n̄an laļ in. Setan ejeļā wōn kwe im bwe kwaar pād ilo mour eo m̧okta, im e emeļeļe jerbal eo me aikuj in kōm̧m̧an m̧okta jān an Rilo̧mo̧o̧r eo ro̧o̧ltok. Im ālkin taujin iiō ko an jerbal in m̧oņ ko an, rikapo eo ej en̄jake im ejjab maron̄ oktak.
Kam̧m̧oolol, priesthood eo jej kabwijere ekajoorļo̧k jān kōttōbalbal ko an rikapo eo. Ij akweļap ippemi bwe kom̧win erom̧ m̧aan ro im likao ro Irooj ej aikuji kom̧ n̄an erom̧. Kōm̧m̧an bwe kwon aolep iien ukweļo̧k bwe pedped ko n̄an mour eo am̧ me komaron̄ in kōjerbale priesthood eo kōn eļapļo̧k kajoor jān kar m̧okta. En̄in ej wāween eo kwonaaj kōjparoke n̄an eok make im kōjparok in jetōb eo an baam̧le eo am̧ ilo raan ko reppen im̧aan.
Irooj ej aikuj em̧m̧aan ro rejjab ļōmņak kōn er make ro rej likūt ājmour eo an ro jet im̧aan eo aer. Ej aikuji em̧m̧aan ro ro rej lukkuun jerbal n̄an ron̄jake ainikien Jetōb eo ilo alikkar. Ej aikuji em̧m̧aan in bujen ro rej kōjparok bujen ko kōn m̧ool. Ej aikuji em̧m̧aan ro rej ļōmņak in kōjparok erreo eo aer make—em̧m̧aan ro rerreo kōn jidik wōt iien n̄an kōppopo n̄an leļo̧k kōjeraam̧m̧an ko kōn bōro ko rerreo, ļōmņak ko rerreo, im pā ko rem̧ōņōņō in jerbal. Irooj ej aikuji em̧m̧aan ro rekōņaan in ukweļo̧k—em̧m̧aan ro ewōr ikdeleel n̄an jerbal im erom̧ m̧ōttan jar in tariņae eo an Irooj an rikabwijer priesthood ro rerreo.
Ij kōjeraam̧m̧an kom̧ n̄an erom̧ kain em̧m̧aan rot in. Ij kōjeraam̧m̧an kom̧ kōn peran n̄an ukweļo̧k aolep raan im ekkatak n̄an kōjerbal likio in kajoor eo an priesthood eo. Ij kōjeraam̧m̧an kom̧ n̄an kōnono kōn iakwe eo an Rilo̧mo̧o̧r eo n̄an kōrā eo pāleem̧ im ajri ro nejūm̧ im n̄an aolep ro kwojeļā kajjeer. Ij kōjeraam̧m̧an kom̧ n̄an kōm̧m̧an em̧m̧anļo̧k im maron̄ em̧m̧anļo̧k. Im kōjeraam̧m̧an kom̧ bwe ilo ami kōm̧m̧an kijejeto kein, kom̧ naaj en̄jake kabwilōn̄lōn̄ ko ilo mour eo am̧.
Jej bōk kuņaad ilo jerbal in an Anij Ekajoor Pōtata. Jisōs ej RiKraist eo. Jej An rijerbal. Ij lukkuun kam̧ool ilo etan Jisōs Kraist, amen.