Ni Cristo: Ti Silaw nga Agraniag iti Sipnget
No mariknayo a gumilgil-ayab ti parola ti pammaneknekyo ken umas-asideg ti sipnget, dikayo agbuteng. Tungpalenyo dagiti kariyo iti Dios.
Manipud iti opisinak iti Relief Society Building makita unay ti Salt Lake Temple. Tunggal rabii, nga eksakto iti oras, agsindi dagiti silaw iti ruar ti templo iti ilelennek ti init. Ti templo ket maysa a parola nga agtultuloy a mangted iti lawag iti ruar laeng ti tawak.
Maysa a rabii itoy napalabas a Pebrero, saan a gagangay a sipnget iti opisinak kabayatan ti ilelennek ti init. Iti itatamdagko iti tawa, nasipnget ti templo. Saan a nagsindi dagiti silaw. Kellaat a naglidayak. Diak makita dagiti dawis ti templo a kanayon idi a mataldiapak iti tunggal sardam iti uneg ti adu a tawen.
Ipalagip kaniak ti pannakakitak iti sipnget iti namnamaek a pakakitaak iti lawag a maysa kadagiti kangrunaan a kasapulan nga adda kadatayo tapno dumur-as ket ti panagtalinaed iti pagtaudantayo iti lawag—ni Jesucristo. Isu ti pagtaudan ti bilegtayo, ti Silaw ken Biag ti Lubong. Mangrugi a mataytayo a naespirituan no awan ti napigsa a koneksiontayo Kenkuana. iti pannakaammo iti dayta, us-usaren ni Satanas dagiti nainlubongan a pammilit a sangsangnguentayo amin. Pasipngetenna ti silawtayo, dadaelenna ti koneksion, ken putdenna ti pagtaudan ti enerhia, ket mabatitayo nga agmaymaysa iti kasipngetan. Gagangay a kondision iti mortalidad dagitoy a parikut, ngem ikagumaan ni Satanas a paggaadaywennatayo ket ibagana a datayo laeng ti agpaspasar kadagita.
Paralisado dagiti Sumagmamano Kadatayo gapu iti Liday
No mapasamak kadatayo dagiti trahedia, no ditayon makaanges gapu iti nalaus a pannakapasakit iti biag, no mamalmalotayo kas iti lalaki iti dalan nga agturong iti Jerico ken nabaybay-an a dumanin matay, ket dumteng ni Jesus ket bukbokanna iti lana dagiti sugattayo, naannad a patakderennatayo, ipannatayo iti pagdagusan, ket aywanannatayo. Kadatayo nga agladladingit, kinunana “Palag-anekto dagiti dagensen a naibaklay iti abagayo, tapno diyo ida marikrikna iti kaaddada iti likudyo, … tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada.” Agasan ni Cristo dagiti sugat.
Sumagmamano Kadatayo ti Nabannog La Unayen
Kinuna ni Elder Jeffrey R. Holland: “Saan a naisangrat nga agtaraytayo iti naparpardas ngem iti kabaelantayo. … Ngem [iti baet] dayta, ammok … nga adu kadakayo ti agtaray [iti kasta unay,] a kapardasna ket no dadduma dumani maibus ti pagtaudan ti pigsa ken emosion.“ No nakaad-adu dagiti namnamaen kadatayo, mabalin nga agsardengtayo ket agsaludsod iti Nailangitan nga Ama no ania dagiti ibbatantayo. Paset ti padastayo iti biag ti panagsursuro no ania ti saan nga aramiden. Ngem nupay kasta, no dadduma mabalin a makabannog ti biag. Impatalged ni Jesus kadatayo “Umaykayo kaniak, dakayo amin nga agrigrigat ken madagdagsenan, ta paginanaenkayto.”
Siaayat ni Cristo a makikadua a mangtulong kadatayo tapno mapalag-an dagiti dagensentayo. Ni Cristo ti panaginana.
Marikna ti Sumagmamano Kadatayo a Saantayo a Gagangay a Miembro iti Simbaan
Gapu iti nadumaduma a rason, mariknatayo a saantayo a maawat wenno maibilang. Ipakita ti Baro a Tulag dagiti dadakkel a panagkagumaan nga inaramid ni Jesus a tumulong iti amin a kita ti tao: dagiti agkukutel, dagiti agsingsingir iti buis, dagiti ubbing, dagiti Taga Galilea, dagiti balangkantis, babbai, dagiti Fariseo, dagiti managbasol, dagiti Samaritano, dagiti balo, dagiti soldado a Romano, dagiti mannakiabig, dagiti narugit. Iti dumani amin nga estoria, tultulonganna iti maysa a tao a saan a gagangay a maawat iti kagimongan.
Salaysayen tiLucas 19 ti estoria ti panguluen ti agsingsingir iti buis iti Jerico nga agnagan iti Zaqueo. Inulina ti maysa a kayo tapno makitana ti panaglabas ni Jesus. Agtrabaho ni Zaqueo iti gobierno ti Roma ket maibilang a dakes ken maysa a managbasol. Nakita ni Jesus isuna iti ngato ti kayo ket inawaganna, a kinunana, “Zaqueo, darasem, ket bumabaka; ta nasken nga umayak idiay balaymo ita nga aldaw.” Ket idi nakita ni Jesus ti kinasayaat ti puso ni Zaqueo ken dagiti banag nga inaramidna kadagiti dadduma, inawatna ti datonna, a kunkunana, “Ita nga aldaw, dimteng ti pannakaisalakan iti daytoy a balay, [ta] anak met ni Abraham daytoy a tao.”
Siaayat nga imbaga ni Cristo kadagiti Nephite, “Imbilinko nga awan kadakayo ti umadayo.” Adda ken ni Pedro dayta a napateg a paltiing iti Dagiti Aramid 10 idi impakdaarna, “Impakita kaniak ti Dios a saanko nga ibilang ti siasino man a narugit wenno natulawan.” Isu a saan a mapagduaduaan a naidawat a kasapulan kadagiti Kristiano a disipulo ken dagiti Santo iti Ud-udina nga Aldaw a mangipakita iti pudno nga ayat iti tunggal maysa. Agtultuloy nga ited ni Jesus kadatayo ti isu met laeng a kita ti awis nga intedna ken ni Zaqueo: “Denggem, addaak nga agtatakder iti ruar ket agtuktuktokak iti ruangan. No adda makangngeg iti timekko ket luktanna ti ruangan, sumrekakto iti balayna ket agkalanglangkamto a mangan.” makitanatayo ni Cristo no sadino ti yantayo.
Sumagmamano Kadatayo ti Maburiboran kadagiti Saludsod
Sumagmamanon a tawen ti naglabas, nariribukan ken nasuronnak gapu kadagiti saludsod a saanko a masarakan dagiti sungbatda. Maysa nga agsapa iti bigat ti Sabado, adda natagtagainepko. Iti dayta a tagainep makitak ti maysa a gazebo, ket naawatak a masapul nga umunegak iti dayta. Napalawlawan daytoy iti lima nga arko, ngem naaramid dagiti tawa iti bato. Nagreklamoak iti tagtagainep, a saanko a tinarigagayan ti mapan iti uneg gapu ta nailet ken nasipnget unay daytoy. Kalpasanna simmangbay iti panunotko ti kabsat ni Jared a siaanus a nanglunag kadagiti bato tapno agbalin dagitoy a natarnaw a sarming. Ti sarming ket bato a dimmalan iti proseso ti panagbalbaliw. Idi sinagid ti Apo dagiti bato para iti kabsat ni Jared, nangted iti silaw kadagiti nasipnget a bapor. Kellaat a napnuanak iti tarigagay a mapan iti uneg iti dayta a gazebo ngem iti ania man a sabali pay a lugar. Daytoy ti mismo a lugar—ti kakaisuna a lugar—tapno pudno a “maawatak.” Adda pay laeng dagiti saludsod a nangburburibor kaniak, ngem ti nalawlawag iti panunotko ket ti saludsod idi nakariingak: “Kasano a mapapigsayo ti pammatiyo kas iti kabsat ni Jared, tapno agbalin a silaw dagiti batoyo?”
Naaramid ti mortal nga utektayo nga agsapul iti saggabassit a pannakaawat ken kaipapanan iti kada aldaw. Diak ammo ti amin a rason no apay a napuskol la unay ti belo iti mortalidad. Saan a daytoy ti panawen iti agnanayon a panagdur-astayo a no sadino nga adda amin dagiti sungbat kadatayo. Daytoy ti panawen a mapadur-astayo ti pammatalgedtayo (wenno no dadduma ti namnamatayo) iti pakakitaan kadagiti banag a saan a makita. Umay ti pammatalged kadagiti wagas a saan a kanayon a nalaka nga amirisen, ngem adda silaw iti sipngettayo. Kinuna ni Jesus, “Siak ti silaw, ken ti biag, ken ti kinapudno ti lubong.” Para kadagiti agsapsapul ti kinapudno, mabalin a kasla iti damo a minamaag ti mapan kadagiti nailet ken nasipnget a tawa a naaramid iti bato. Ngem gapu iti panaganus ken napudno a panagsaludsod, mapagbalin ni Jesus dagiti tawatayo a bato iti sarming ken silaw. Ni Cristo ti silaw a makita.
Marikna ti Sumagmamano Kadatayo a Ditayo Kaanoman nga Agbalin a Naan-anay a Nasayaat
Ti eskarlata a pagtina iti Daan a Tulag ket saan laeng a napnuan marisna ngem kasta met a saan nga agkupas daytoy, a ti kayatna a sawen ti narangrang a maris iti lupot a delana ket kumpet a nasayaat iti lana ken saan nga agkupas uray no mamin-adu a daras a malabaan daytoy. Usaren ni Satanas daytoy a panagrason tapno mariknatayo a saantayon a mapakawan: ti puraw a lupot a delana a namansaan iti nalabaga ket saanto a pulos makasubli iti kinapurawna. Ngem ipakdaar ni Jesucristo, “Nangatngato [dagiti] wagasko ngem dagiti wagasyo,” ken ti milagro ti paraburna ket no agbabawitayo kadagiti basbasoltayo, ti nalabaga a darana ti mangpasubli kadatayo iti kinatarnaw. Saan a nainrasonan, ngem nupay kasta pudno.
Ladawan manipud iti iStock.com/iinwibisono
“Uray no dagiti basbasolyo kasda la eskarlata, mapapudawdanto a kasla niebe; nupay no nalabbasitda a kasla carmesi, agbalindanto a kasla napudaw a delana.” Kuna ti Apo a yunay-unay: ti lalaki wenno babai “a nangibabawi iti… basbasolna, isu ti mapakawan, ket siak, ti Apo, diakto idan malagip.” Iti kaipapananna: Umaykayo, aglilinnawagtayo. Nagbasol amin a tattao ket agkurangda iti kinadayag. Umaykayo kaniak ket agbabawi. Ti basol diakto idan malagip. Mapaimbagnakanto manen. Adda aramidko a para kenka. Mapagbalin ni Cristo a puraw ti lupot a delana.
Ngem ania dagiti addang a maaramat? Ania ti tulbek a mangipasubli manen iti bileg ni Jesucristo no agduaduatayo? Simple nga imbaga ni Presidente Russell M. Nelson a: “Ti tulbek ket ti agaramid ken agtungpal kadagiti sagrado a katulagan. … Saan a komplikado a wagas.” Aramidenyo ni Cristo a sentro ti biagyo.
No mariknayo a gumilgil-ayab ti parola ti pammaneknekyo ken umas-asideg ti sipnget, dikayo agbuteng. Tungpalenyo dagiti kariyo iti Dios. Agdamagkayo kadagiti saludsodyo. Siaanus a manglunag iti bato nga agbalin a sarming. Umasidegkayo ken ni Jesucristo, nga agtultuloy a mangipatpateg kadakayo.
Kinuna ni Jesus, “Siak ti silaw nga agraniag iti kasipngetan, ket saan a maawatan ti kasipngetan.” Kayatna a sawen nga uray no kasano man a rigat ti pananggandatna, saan a kabaelan ti kasipngetan nga iddepen dayta a silaw. Saan iti kaano man. Mabalin nga agtalekkayo nga addanto latta sadiay ti silawna para kadakayo.
Datayo, wenno dagiti tattao nga ipatpategtayo, mabalin a temporario nga agsipngettayo. Iti napasamak iti Salt Lake Temple, ti facilities manager,a ni Brother Val White, nakaawat iti dumani madagdagus nga awag. Nadlaw dagiti tao. Ania ti napasamak kadagiti silaw iti templo? Umuna, personal a napan ti maysa a staff iti tunggal electrical panel iti templo ket manomano a pinaseggedna dagiti silaw. Kalpasanna sinuktanda dagiti bateria iti automatic power supply ket sinubokda dagitoy tapno makitada no apay a di gumana.
Narigat a maipasubli dagiti silaw a dakdakayo laeng. Kasapulantayo dagiti gagayyem. Kasapulantayo ti tunggal maysa. Kas met laeng kadagiti temple facilities staff, makatulongtayo iti tunggal maysa babaen ti panagpakita a personal, a mangkarkarga kadagiti naespirituan a bateriatayo, ken mangtartarimaan no ania ti nadadael.
Mabalin a maidasig ti bukodtayo a silaw iti maysa laeng a bombilia iti maysa a kayo. Ngem mapagagraniagtayo latta ti bassit a silawtayo, ket amin a sangkamaysa, kas iti Temple Square iti panawen ti Paskua, maawistayo ti minilmilion a tattao iti balay ti Apo. Kasayaatan iti amin, kas ti inyallukoy ni Presidente Nelson, maisangbaytayo ti silaw ti Mangisalakan iti bagbagitayo ken dagiti tao a napateg kadatayo babaen ti simple nga aramid ti panagtungpal kadagiti katulagantayo. Iti nadumaduma a wagas, gunggonaan ti Apo dayta napudno nga aramid iti bileg ken rag-o.
Paneknekak a maipatpategkayo. Ammo ti Apo no kasano ti panangikarkarigatanyo. Dumurdur-askayo. Agtultuloykayo. Makitana dagiti amin a nailemmeng a sakripisioyo ket gunggonaannakayo para iti pagimbaganyo ken ti pagimbagan dagiti ay-ayatenyo. Adda kaes-eskanna dagiti aramidyo. Saankayo nga agmaymaysa. Ti mismo a naganna, Emmanuel, kayatna a sawen ti “kaduanatayo ti Dios.” Awan duadua a kaduaennakayo.
Umaddang iti sumagmamano pay iti dana ti katulagan, uray no nakasipsipnget a makita ti adda iti adayo. Mapaseggedto manen dagiti silaw. Paneknekak ti kinapudno dagiti balikas ni Jesus, ket napnuanda iti lawag: “Umasidegkayo kaniak ket umasidegakto kadakayo; sapulendak a sireregta ket masapulandakto; agdawatkayo, ket umawatkayonto; agtuktokkayo ket malukatankayto.” Iti nagan ni Jesucristo, amen.