“Itok, Ļoor Eō”
Jisōs Kraist ej kajjitōk ippād n̄an bōk iaļen bujen eo ļo̧k n̄an m̧weo n̄an ippān ro Jined im Jemād Ilan̄ im pād ippān ro jej iakwe er.
Ro jeiū im jatū rejitōn bōro, kōrā eo pāleeō im n̄a kom̧ro ej m̧ōņōņō in pād ippemi ilo Jibbon̄ in Jabōt in. Eļap men ko rekar kōm̧m̧an ālkin kar kweilo̧k eo ļo̧k eļap. Tampeļ ko rekāāl kar aji ilo Concepción, Chile; Barranquilla, Colombia; and Rome, Italy. Jekar en̄jake juon lutōktok eo eļap an Jetōb eo ilo m̧akūtkūt kein rekwojarjar.
Ij kōjeraam̧m̧an elōn̄ kōrā ro (im em̧m̧aan ro) ro rej kab riiti Bok in Mormon eo im loe lan̄lōn̄ im mennin aorōk ko rettiņo̧. Ij m̧weiūr kōn riboot ko kōn kabwilōn̄lōn̄ ko kar būki.
Ij laudin̄din̄ kōn likao ro 11 iiō rūttoier ro, kiiō āinwōt tikōn ro, rerreo im rej ajije kwojkwoj kajjojo Jabōt. Rej etal n̄an tampeļ eo ippān jiron̄ ro 11 iiō rūttoier, ro rej kiiō ekkatak im jerbal āinwōt Beehive ro. Jim̧or likao ro im jiron̄ ro rej kwaļo̧k m̧ool ko an gospel eo ilo alikkar im tōmak.
Ij lan̄lōn̄ ippān ajri ro im jodikdik ro rej jipan̄ ilo katakin gospel eo ilo m̧ōko m̧weer ilo aer jerbal ippān ro jineer im jemāer ļoor laajrak in kein katak eo pedped wōt ioon m̧weo, im Kabun̄ in ej rie.
Jekar bōk pija in Blake eo im emān an iiō, eo, ilo jibbon̄ tata ilo juon Jādede, ekar bōk juon bok in Kabun̄ in im ba. “Ij aikuj in naajdik jetōb eo aō!”
Blake, kōmij laudin̄din̄ kōn kwe im ro jet ro rej kālet n̄an naajdik jetōb ko aer ilo kwojkwoj ion m̧ool ko an jepļaaktok eo an gospel eo an Jisōs Kraist. Im kōmij m̧ōņōņō n̄an jeļā bwe elōn̄ rej bōk kajoor eo an Anij ilo mour ko aer ilo aer kabun̄jar im jerbal ilo tampeļ ko.
Āinwōt an lōn̄ wōt iami ejeļā, baam̧le eo am ekar jelm̧ae juon jenolo̧k eo em̧m̧an jilu allōn̄ ko remootļo̧k ke leddik eo nejim̧ Wendy ekar likūt mour in. Ilo raan ko āliktata in an tariņae kāānjer eo ippān, ikar jeraam̧m̧an kōn iien eo em̧m̧an kōn juon iien am̧ro bwebwenato im iak iakwe doon.
Ikar jibwe pein im jiron̄ļo̧k e ewi jon̄an aō iakwe e im aō kam̧m̧oolol bwe imaron̄ erom eo jemān. Ikar ba: “Kwaar m̧are ilo tampeļ eo im tiljek kautieji bujen ko am̧. Kwe im ļeo pāleem̧ kar karuwaineneiktok ajri ro jiljilimjuon n̄an m̧weo im̧ōm̧ im karūttoļo̧k er n̄an erom̧ rikaļoor ro rewujlepļo̧k an Jisōs Kraist, membōr in Kabun̄ in ro rekajoor, citizen ro rej jipan̄. Im rekar kālet ro rier kōn ejja jon̄ak in wōt. Jemōm̧ ej lukkuun, lukkuun uteij būruwōn kōn eok. Kwaar bōktok ekanooj ļap lan̄lōn̄ n̄an n̄a!”
Ekar mera an uwaak, “Kom̧m̧ool, Baba.”
Ekar juon iien em̧m̧an, iien būrom̧ōj n̄an kōm̧. Ilo iiō ko an 67, kōm kar jerbal ippān doon, al ippān doon, im emakijkij jikeet ippān doon. Bōtaab joteen eo, kōm kar kōnono kōn men ko relukkuun aorōk, ko āinwōt bujen ko, kain̄i ko, pokake, tōmak, baam̧le, kautiej, iakwe, im mour indeeo.
Kōmij lukkuun on̄ kōn leddik eo nejim. Ijoke, kōnke kōn pļaaktok eo an gospel eo an Jisōs Kraist, kōmj jab inepata kōn e. Ilo am wōnm̧aanļo̧k im kautiej bujen ko am ippān Anij, kōmj mour ilo kōjatdikdik kōn am pād ippān bar juon alen. Ilo iien in kōmij jerbal n̄an Irooj ijin im e ej jerbal n̄an E ijōņ—ilo paradise.1
Ilo m̧ool, kōrā eo pāleeō im n̄a kōmro kar loļo̧k Paradise ilo kar jinoin iiō in—Paradise California, en̄in ej. Ilo tōre eo ekar kōm̧m̧an, jikejuuļ in loļo̧k eo am n̄an ijeņ ekar kaduļo̧k jān 40 awa ko ālkin an kar leddik eo nejim likūt mour in. Kōm̧ro, kobaļo̧k ippān Elder Kevin W. Pearson im kōrā pāleen June, kōm̧ kar bōk jipan̄ jān Armej ro Rekwojarjar ilo Chico California Stake. Kōm̧ kar ekkatak kōn tōmak eo aer eļap, jerbal in karejar eo aer, im kabwilōn̄lōn̄ ko rekar waļo̧k jekdo̧o̧n ilo iien eo ekabūrom̧ōjm̧ōj ilo an kar jako men ko m̧wier jān kijeek eo eļap tata ilo bwebwenato in California.
Ke kōmij pād ijeņ, kōm kar kōnono ilo juon iien ippān juon likao ej police opiija, John, eo ekar juon iaan rijerbal ro reperan m̧oktata. Ekar keememej marok eo emijel ekar wanlōn̄ļo̧k ioon Paradise ilo Nobōm̧ba 8, 2018, ilo an kijeek ko im mellā ko rej ajedeed n̄an em̧ kilep ko ilo bukwōn in, tile m̧weiūk ko im kakkure āinwōt juon eo ekar kakkure im ejjeļo̧k bōrran ijjelo̧kin wōt ejouj in menkwaraar ko im birōk chimney ko.
Ium̧win 15 awa ko, John ekar kattōr ibuļōn juon maroklep eo ekar obrak kōn men ko rebwil ilo an jipan̄ armej im bar armej, baam̧le im bar baam̧le em̧m̧akūt im pukot kōjparok—ekar kōm̧m̧ane aolep menin aaet kaarmejet mour eo an make. Ilo iien me en̄jake eo epen emenin aikuj, ta eo ekar kōmjak John eļap ekar kajjitōk in: “Ewi baam̧le eo aō?” Ālkin elōn̄ awa ko raitok, mijak kōn lim̧ō, āliktata ekar maron̄ jeļā kōn jikin kone eo aer.
Bwebwenato in inepata eo an John kōn baam̧le eo an ekar im̧we eō n̄an kōnono rainin kōn kom̧ ro me remaron̄ kajjitōk in ilo epaak an jem̧ļo̧k mour eo am̧, “Ewi baam̧le eo aō?” Ilo raan ko ilju jekļaj n̄e kwonaaj kadedeļo̧k iien mālijjon̄ eo ilo mour in am̧ im deļo̧n̄e laļ eo an jetōb, kwonaaj aikuj in jelm̧ae kajjitōk eo epen: “Ewi baam̧le eo aō?”
Jisōs Kraist ej katakin iaļ eo ad ļo̧k n̄an m̧weo im̧ōd n̄an indeeo. Emeļeļeļo̧k karōk in eddōkļo̧k indeeo eo an Jemedwōj Ilan̄ jān jabdewōt iaad. Ālkin men otemjej, E ej dōkā in jabōn em̧ eo. Ej ad Ripinmuur, ad Rikōmour, im ad Rilo̧mo̧o̧r.
Jān tōre eo Adam im Iv rekar kadiwōjļo̧k er jān Jikin Kallib Iden, Jisōs Rikriast eo ekar leļo̧k pein jipan̄ eo An ekajoor n̄an jipan̄ aolep ro rej kālet n̄an ļoor E. Ālij im bar ālij, jeje ko rekwojarjar rej rekoote menin, men̄e aolep kain jerawiwi ko jān aolep kain armej, pā ko Pein rej erļo̧ktok.2
Jetōb eo ilo kōj kajjojo ej januwaade eo jaar jolete kōn iakwe an baam̧le n̄an indeeo. Al in iakwe ko rej kwaļo̧k juon kōjatdikdik eo eriab bwe iakwe ej men eo de eo kwoj aikuj eļan̄n̄e kokōņaan in ippān doon n̄an indeeo. Im jet armej rebōd aer tōmak bwe Jerkakpeje eo an Jisōs Kraist ej letok juon kallim̧ur bwe aolep armej renaaj pād ippān ro rej iakwe ālkin mej.
Ilo m̧ool, Rilo̧mo̧o̧r eo Make ekar lukkuun kalikkar bwe ilo an Jerkakpeje eo An ej kallim̧ur bwe aolep armej ro rekar mour em̧ool naaj jerkakpeje im mour n̄an indeeo,3 eļapļo̧k aikuj eo eļan̄n̄e jej kōņaan in bōk jeraam̧m̧an in eutiej an mour ijo eutiejtata. Lo̧mo̧o̧r ej juon men eo eaorōk n̄an kajjojo armej, mour ijo eutiejtata ej juon men eaorōk n̄an baam̧le.
Ron̄jake naan kein kar kōnono jān Irooj Jisōs Kraist n̄an rikanaan eo An: “Aolep bujen ko, kontōreak ko, koņ ko, eddo ko, kallim̧ur ko, kanejnej ko, m̧akūtkūt ko, kōtaan ko, iiaio ko, ak kōtmāne ko, im rej jab kōm̧m̧an im deļo̧n̄i im sili jān Jetōb Kwōjarjar in kallim̧ur … rej itok kōn ejjeļo̧k kajoor, eddo, ak an̄ier ilo im ālikin jerkakpeje eo jān ro remej; bwe aolep kooņtōreak ko im jab kōm̧m̧ani n̄an jem̧ļok in ewōr jem̧ļokier n̄e armej rej men.”4
Kōn menin, ta eo emennin aikuj n̄an juon baam̧le n̄an an wanlōn̄ļo̧k n̄an indeeo? Jej karbab kōn menin jeraam̧m̧an eo jān kōm̧m̧an bujen ko ippān Anij, kōjparok bujen kein, im bōk kain̄i ko raorōk.
Menin ekar m̧ool jān jinoin iien. Adam im Iv, Noa im kōrā eo pāleen, Ebream im Sara, Liai im Sara, im aolep ro jet rikaļoor ro rewūjlepļo̧k an Jisōs Kraist—jān tōre eo laļ in ekar kōm̧anm̧an—kar kōm̧m̧an ejja bujen kein ippān Anij. Rej bōk ejja kain̄i kein me ro uwaan Kabun̄ eo an Irooj ekar jepļaaktok rainin mw rekar bōke ilo peptaij ilo ilo tampeļ eo.
Rilo̧mo̧o̧r eo ej karuwaineneik aolep n̄an ļoor E lalļo̧k n̄an dān in peptaij im, ilo iien, n̄an kōm̧m̧an bujen ko jet ippān Anij ilo tampeļ eo im bōk im tiljek n̄an kain̄i ko raorōkļo̧k. Aolepān men kein rej menin aikuj eļan̄n̄e jekōņaan in wanlōn̄ļo̧k ippān baam̧le ko ad im ippān Anij n̄an indeeo.
Metak eo an būruwō ej bwe elōn̄ armej ro ij iakwe er, ro ij kautiej er, im ro ij nōbar er me rej kowaane kajjitōk in An. Rej kōjekdo̧o̧n akweļap in an Jisōs Kraist ke Ej jeaļ, “Itok, Ļoor Eō.”5
Ij meļeļe etke Anij ej jan̄.6 Ij barāinwōt jan̄ kōn ro jera im ro nuku. Er rej em̧m̧aan im kōrā ro rem̧m̧an, wūjlepļo̧k n̄an baam̧le ko aer im eddo ko aer. Rej leļo̧k ilo jouj iien ko aer, kajoor eo aer, im menin jipan̄ ko aer. Im laļ in ej em̧m̧anļo̧k kōn kijejeto ko aer. Bōtaab rekar kālet n̄an jab kōm̧m̧an bujen ko ippān Anij. Rekar jab bōk kain̄i ko me renaaj ļōn̄aj er ippān baam̧le ko aer im liāpe er ippān doon n̄an indeeo.7
Ewi jon̄an aō kōņaan bwe in kar loļo̧k er im karuwaineneik er n̄an lukkuun ļōmņak kōn kakien kein kōmaron̄ jān Irooj. Ikar ļōmņak ta eo emaron̄ pidodo aō ba me renaaj en̄jake ewi jon̄an an Rilo̧mo̧o̧r eo iakwe er, jeļā ewi jon̄an aō iakwe er im itok im kile wāween an kōrā im m̧aan ro kōjparok bujen ko maron̄ bōk “dipio in m̧ōņōņō.”8
Rej aikuj in meļeļe bwe ewōr juon jikin n̄an er ālkin mour in—ippān em̧m̧aan im kōrā ro rem̧m̧an ro rej barāinwōt jab kālet n̄an kōm̧m̧an bujen ippān Anij—en̄in ej jab jikin eo ijo baam̧le ko renaaj bar koba ippān doon im bōk jeraam̧man eo n̄an mour im eddōkļo̧k n̄an indeeo. En̄in ej bwe ejjab aelōn̄ in kiin̄ eo ijo renaaj en̄jake dipio in m̧ōņōņō eo—kōn eddōkļo̧k im m̧ōņōņō eo ejjeļo̧k jem̧ļo̧kin.9 Kōjeraam̧m̧an kein reļļaptata remaron̄ itok wōt jān mour ilo juon jikin eutiejtata ippān Anij, Jemed Indeeo; Nejin Jisōs Kraist; im ro uwaan baam̧le eo ad rem̧m̧an, rerreo, im karbab.
Ij en̄jake in ba n̄an kom̧ ro m̧ōttan rem̧akoko:
“Ilo mour in, kwoj jan̄in leļo̧k am̧ n̄an men eo kein karuo em̧m̧antata iaan men otemjej. Kiiō, ilo am̧ jum̧ae n̄an lukkuun kautiej jepļaaktok eo an gospel eo an Jisōs Kraist, kwoj kālet n̄an leļo̧k eok n̄an men eo kein karuo em̧m̧antata.
“Rilo̧mo̧o̧r eo ekar ba, ‘Ilo im̧ōn Jema’ elōn̄ jikin.’10 Ijoke, ilo am kālet n̄an jab kōm̧m̧an bujen ko ippān Anij, kwoj leļo̧k eok n̄an juon nōbar eo edik an indeeo n̄an eok.”
Ikōņaan kaitokļo̧k kareel in n̄an ro m̧ōtta rem̧akoko im ba:
“Wūjlepļo̧k būruōm̧ n̄an Anij. Kajjitōk Ippān eļan̄n̄e men kein rem̧ool. Kōm̧m̧an iien n̄an katak naan ko An. Lukkuun katak! Eļan̄n̄e kwoj lukkuun iakwe baam̧le eo am̧ im eļan̄n̄e kwoj kōņaan in pād ijo eutiejtata ippāer ilo aolep indeeo, kōļļāik wōņāān eo kiiō—kōn katak eo em̧ool im jar ejjab jokōd—n̄an jeļā men kein rem̧ool innām mour kaki.
“Eļan̄n̄e kwojjab lukkuun jeļā aaet tōmak ilo Anij, jinoe ijin. Meļeļe bwe ilo jako jān en̄jake ko ippān Anij, juon emaron̄ pere an Anij mour. Kōn men in, likūt eok make ilo juon jekjek n̄an jinoe bōk en̄jake ko Ippān. Kōttāik eok make. Jar n̄an bōk māj ko n̄an loe pein Anij ilo mour eo am̧ im ilo laļ in ej jepooļe eok. Kajjitōk Ippān bwe En jiron̄ eok eļan̄n̄e E ej lukkuun pād ijeņ—eļan̄n̄e Ejeļā kajjeem̧. Kajjitōk Ippān ewi wāween an en̄jake kōn eok. Innām ron̄jake.”
Juon iaan ro m̧ōtta rejitōn bōro ekar jab lukkuun lōn̄ an en̄jake ippān Anij. Ak ekar jan̄uwaade an maron̄ pād ippān kōrā eo pāleen eo em̧ōj an jako. Innām eaar kajjitōk ippa n̄an jipan̄ e. Ikar rōjan̄ e n̄an an ioon mijenede ro bwe en maron̄ meļeļe katak ko an Kraist im ekkatak bujen ko an gospel eo, kain̄i ko, im kōjeraam̧m̧an ko.
Menin ekar kōm̧m̧ane. Bōtaab ekar en̄jake bwe ekkatak eo rekar kapilōk e enej aikuj in kōm̧m̧an elōn̄ oktak ko ilo mour eo an. Ekar ba, “Kien kein im bujen kein relukkuun pen n̄an n̄a. Barāinwōt, ij jab maron̄ kōļļā juon m̧ōttan jon̄oul eo, im ejjeļo̧k aō iien jerbal ilo Kabun̄ in.” Innām ekar kajjitōk ippa, “N̄e inej mej, komaron̄ kejouj im kōm̧m̧ani jerbal ko an tampeļ remenin aikuj n̄an kōrā eo pāleeō im n̄a bwe kōmro en maron̄ mour ippān doon?”
Kam̧m̧ool, ijjab riekajet eo an em̧m̧aan in. Ak ij kajjitōkin wājabdik in jerbal in tampeļ eo n̄an ro remej n̄an juon em̧m̧aan eo ewōr an iien em̧m̧an n̄an peptaij ilo mour in—n̄an ekkapit n̄an priesthood eo im bōk kōjeraam̧m̧an ko an tampeļ ijin ilo mour in—ak eo ekar kōm̧m̧an jokālet n̄an jab bōke iaļ in.
Ro jeiū im jatū rejitōn bōro, Jisōs Kraist ej kajjitōk ippād n̄an bōk iaļen bujen eo ļo̧k n̄an m̧weo n̄an ippān ro Jined im Jemād Ilan̄ im pād ippān ro jej iakwe er. Ej kūr kōj n̄an “itok, ļoor eō.”
Kiiō, āinwōt Būreejtōn eo an Kabun̄ eo An, ij akweļap ippemi ro rej kattoļo̧k kom̧ make jān Kabun̄ in im ippemi ro rejjan̄in lukkuun pukot n̄an jeļā bwe Kabun̄ eo an Rilo̧mo̧o̧r eo em̧ōj an jepļaaktok. Kōm̧m̧ane jerbal eo an jetōb n̄an lo kōn kwe make, im jouj im kōm̧m̧ane kiiō. Iien ej etal n̄an an jem̧ļo̧k.
Ij kam̧ool bwe Anij emour! Jisōs ej RiKraist eo. Kabun̄ eo An im tarlep in gospel eo An em̧ōj an jepļaaktok n̄an kōjeraam̧m̧an mour ko ad kōn lan̄lōn̄, ijin im ijin tokālik. Ij lukkuun kam̧ool ilo etan Jisōs Kraist, amen.