Mga Pagbag-o sa Pagpabakod sang mga Lamharon

Ni Elder Quentin L. Cook

Sang Korum sang Dose ka mga Apostoles

Mas madamo nga lamharon nga lalaki kag babayi ang magaatubang sa hangkat kag magapabilin sa banas sang kasugtanan bangod sa sining daw pareho sa laser nga pagtutok sa aton mga lamharon.

Salamat, mahal namon nga President Nelson, para sa sinang makalilipay nga napahayag nga giya parte sa mga saksi sa bunyag kag sa direksyon nga imo ginpangabay sa amon nga ipaambit agud buligan nga mapabakod ang mga lamharon kag mapauswag ang ila sagrado nga potensyal.

Antes ko ipaambit ang mga pagbag-o, ginapabutyag namon ang amon sinsero nga pagpasalamat para sa dalayawon nga paagi nga ginbaton sang mga miyembro ang mga hitabo sa nagapadayon nga Pagpanumbalik sang ebanghelyo. Subong nga ginpanugyan ni President Nelson sang nagligad nga tuig, gin-inom ninyo ang inyo mga bitamina!

Malipayon ninyo nga ginatun-an ang Come, Follow Me sa puluy-an. Ginsunod man ninyo ang mga pagbag-o sa simbahan. Ang mga miyembro sang elders quorum kag mga sister sang Relief Society tingob nga ginahimo ang buluhaton sang kaluwasan.

Nagalumapaw ang amon pagpasalamat. Labi kami nga nagapasalamat nga ang aton mga lamharon padayon sa pagpabilin nga mabakod kag matutum.

Ang aton mga lamharon nagapuyo sa makalilipay pero makahalangkat man nga tion. Ang natigayon nga mga pagpili nangin grabe na gid. Isa ka halimbawa: ang moderno nga smartphone makatigayon sing tuman ka importante kag nagainspirar nga impormasyon, lakip ang maragtas sang panimalay kag balaan nga mga kasulatan. Sa pihak nga bahin, nagaunod ini sang mga kabuangan, imoralidad, kag kalainan nga indi basta nga hayag sang una.

Agud buligan ang aton mga lamharon sa paghimo sing husto nga mga pagpili, ang Simbahan naghanda sing tatlo ka dako kag komprehensibo nga mga inisyatibo. Una, ang kurikulum ginpabakod kag ginpasangkad tubtob sa puluy-an. Ika-duha, isa ka programa sang mga kabataan kag lamharon nga nagalakip sang makalilingaw nga mga kahiwatan kag personal nga pag-uswag ginpresentar sang nagligad lang nga Domingo nanday President Russell M. Nelson, President M. Russell Ballard, kag sang Kabilogan nga mga Opisyal. Ang ika-tatlo nga inisyatibo amo ang mga pagbag-o sa organisasyon agud himuon ang mga lamharon nga mas importante nga pagtamod sang aton mga bishop kag iban nga lider. Ini nga pagtamod kinahanglan mangin gamhanan sing espirituwal kag magbulig sa aton mga lamharon nga mangin batalyon sang mga lamharon nga ginpangabay ni President Nelson sa ila nga mangin.

Konektado nga mga Sulundan

Ining mga pagtinguha, upod sadtong gin-anunsyo sang nagligad nga pila ka tuig, indi lain naman nga mga pagbag-o. Ang tagsa sang mga pagbag-o importante nga bahin sang konektado nga sulundan agud bugayan ang mga Santos kag ihanda sila sa pag-atubang sa Dios.

Isa ka bahin sang sulundan naangot sa ulihing-tubo. Ang aton mga lamharon ginapangabay nga mangin mas responsable nga bata pa—nga wala sang mga ginikanan kag mga lider nga nagasalo para sa ila sang kon ano ang sarang himuon sang mga lamharon sa ila kaugalingon.

Pahibalo

Karon nga adlaw ginaanunsyo namon ang mga pagbag-o sa organisasyon sang mga lamharon sa ward kag stake. Suno sa ginpaathag ni President Nelson, si Sister Bonnie H. Cordon magahambal parte sa mga pagbag-o para sa lamharon nga mga babayi sa sini nga gab-i. Isa ka tuyo para sa mga pagbag-o nga hambalan ko subong amo nga pabakuron ang mga manugkapot sang Aaronic Priesthood, mga korum, kag mga pangulohan sang korum. Ini nga mga pagbag-o nagasanto sang aton ginahikot sa Doctrine and Covenants 107:15, nga nagasiling, “Ang bishopric ang pangulohan sining pagkapari, kag ang nagakapot sang mga yabi ukon awtoridad sini”

Isa sang mga tulumanon sang bishop suno sa balaan nga kasulatan amo ang magpangulo sa mga priest kag magmiting upod sa ila, nga ginatudloan sila sang mga tulumanon sang ila palangakoan. Dugang pa, ang unang manuglaygay sa bishopric may pat-od nga responsibilidad para sa mga teacher kag ang ika-duhang manuglaygay para sa mga deacon.

Sing nagakaigo, agud magsanto sa sining rebelasyon sa Doctrine and Covenants, ang mga pangulohan sang Young Men sa ward pagauntaton na. Ining matutum nga mga kauturan naghimo sing madamo nga kaayohan, kag ginapabutyag naton ang aton pagpasalamat sa ila.

Nagalaum kami nga ang mga bishopric maghatag sing dako nga importansya kag pagtamod sa mga responsibilidad sa priesthood sang mga lamharon nga lalaki kag magbulig sa ila sa ila mga tulumanon sa korum. Ang makasarang nga hamtong nga mga manuglaygay sang Young Men pagatawgon sa pagbulig sa mga pangulohan sang korum sang Aaronic Priesthood kag sa bishopric sa ila mga tulumanon. Nagasalig kami nga mas madamo nga lamharon nga lalaki kag babayi ang magaatubang sa hangkat kag magapabilin sa banas sang kasugtanan bangod sining daw pareho sa laser nga pagtutok sa aton mga lamharon.

Sa inspirado nga sulundan sang Ginuo, ang bishop may responsibilidad sa tanan-tanan sa ward. Ginapakamaayo niya ang mga ginikanan sang mga lamharon kag amo man ang mga lamharon. Isa ka bishop nakarealisar nga sa iya paglaygay sa isa ka lamharon nga lalaki nga nagapakigbato sa pornograpiya, sarang niya nga nabuligan ang lamharon nga lalaki sa iya paghinulsol sa amo man nga tion nga nabuligan niya ang mga ginikanan nga magpakita sang pagpalangga kag pag-intiendi. Ang pag-ayo sang lamharon nangin pag-ayo sang iya pamilya kag nangin posible paagi sa bishop nga nagpangabudlay para sa bilog nga pamilya. Ang lamharon sa karon nangin takos nga manugkapot sang Melchizedek Priesthood kag full-time nga misyonero.

Suno sa ginapanugyan sining istorya, ining mga pagbag-o:

• Magabulig sa mga bishop kag ila mga manuglaygay nga magtutok sa ila labing importante nga mga responsibilidad sa mga lamharon kag Primary nga kabataan.

• Magapahamtang sang gahum kag mga tulumanon sang Aaronic Priesthood sa sentro sang personal nga kabuhi kag mga tinutuyo sang tagsa ka lamharon nga lalaki.

Ini nga mga pagbag-o:

• Nagahatag man importansya sa mga responsibilidad sang mga pangulohan sang korum sang Aaronic Priesthood kag sa paagi sang ila pagreport sing direkta sa bishopric.

• Nagapahulag man sang hamtong nga mga lider sa pagbulig kag pagtudlo sa mga pangulohan sang korum sang Aaronic Priesthood sa pagpadako sang gahum kag awtoridad sang ila palangakoan.

Subong sang makita, ining mga pagbag-o wala nagabuhin sang responsibilidad sang bishopric para sa lamharon nga mga babayi. Subong sang bag-o lang gintudlo ni President Nelson, “[Ang iya ka bishop] nga pinakaimportante nga responsibilidad amo nga atipanon ang lamharon nga mga lalaki kag lamharon nga mga babayi sang iya ward.”

Paano bala matuman sang aton pinalangga kag mapisan nga mga bishop ining responsibilidad? Madumduman ninyo, sang 2018 ang mga korum sang Melchizedek Priesthood ginbag-o sa bagay nga makahikot sila sing mas maayo upod sa mga Relief Society agud nga ang mga elders quorum kag mga Relief Society, sa idalom sang direksyon sang bishop, sarang makabulig sa pagsalo sing importante nga mga responsibilidad nga sang una nagakaon sang kalabanan sang iya tiempo. Ining mga responsibilidad nagalakip sang pangmisyonaryo nga buluhaton kag buluhaton sa templo kag family history sa ward—amo man ang kalabanan sang ministering sa mga miyembro sang ward.

Ang bishop indi makatugyan sing pila ka mga responsibilidad, subong sang pagpabakod sang mga lamharon, pagmangin komon nga hukom, pag-atipan sang mga nagakinahanglan, kag pagdumala sang mga hilikuton nga pinansyal kag temporal. Apang, ang mga ini mas diutay sangsa naintiendihan naton sang una. Suno sa ginpaathag ni Elder Jeffrey R. Holland sang nagligad nga tuig sang ang mga pagbag-o sa mga korum sang Melchizedek Priesthood gin-anunsyo: “Ang bishop nagapabilin, siyempre, nga nagapangulo nga high priest sang ward. Ining bag-o nga pagpasanto [sang mga elders quorum kag mga Relief Society] dapat magtugot sa iya sa pagpangulo sa buluhaton sang Melchizedek Priesthood kag sang Relief Society nga wala ginapangayo sa iya nga himuon ang buluhaton sang bisan diin sining mga grupo.”

Halimbawa, ang pangulo sang Relief Society kag pangulo sang elders quorum, subong nga gin-asayn, makasalo sing mas dako nga papel sa paglaygay sang mga hamtong—subong man nga ang pangulo sang Young Women makalaygay sang lamharon nga mga babayi. Samtang ang bishop lamang ang makaalagad bilang komon nga hukom, ining iban nga lider awtorisado man sa pagbaton sang rebelasyon halin sa langit agud makabulig sa mga hangkat nga wala nagakinahanglan sing komon nga hukom ukon nagalakip sing bisan ano nga klase sang abuso.

Wala ina nagakahulugan nga ang isa ka lamharon nga babayi indi puwede ukon indi dapat maghambal sa bishop ukon sa iya mga ginikanan. Ang ila ginatutokan amo ang mga lamharon! Pero nagakahulugan ini nga ang lider sang Young Women mahimo nga makabulig gid sa mga panginahanglan sang indibidwal nga lamharon nga babayi. Ang bishopric nagakabalaka sa lamharon nga mga babayi kag amo man sa lamharon nga mga lalaki, pero makita namon ang kusog tungod sa mabakod, aktibo, kag nakatutok nga mga lider sang Young Women nga nagapalangga kag nagagiya, nga wala nagasalo sang mga papel sang mga pangulohan sang klase kundi nagabulig sa mga lamharon nga magmadinalag-on sa sinang mga papel.

Si Sister Cordon magapaambit sing dugang nga makalilipay nga mga pagbag-o para sa lamharon nga mga babayi karon nga gab-i. Apang, ginaanunsyo ko nga ang mga pangulo sang Young Women sang ward magareport na sa bishop kag magasugilanon sing direkta sa bishop sang ward. Sang una, ini nga asaynment puwede itugyan sa isa ka manuglaygay, pero sugod subong, ang lamharon nga mga babayi mangin direkta nga responsibilidad sang isa nga nagakapot sang nagapangulo nga mga yabi para sa ward. Ang pangulo sang Relief Society magapadayon sa pagreport sing direkta sa bishop.

Sa pangkabilogan kag sa stake, padayon sa gihapon ang mga pangulohan sang Young Men. Sa stake, ang isa ka high councilor ang mangin pangulo sang Young Men kag, nga ang mga high councilor naasayn sa Young Women kag Primary, mangin bahin sang Komite sang Aaronic Priesthood-Young Women sa stake. Ining mga kauturan magahikot upod sa pangulohan sang Young Women sa stake sa sini nga komite. Kon may manuglaygay sang pangulo sang stake nga nagapanguna sining komite, ini nga komite mangin mas importante bangod madamo sang mga programa kag mga kahiwatan sa bag-o nga inisyatibo para sa mga Kabataan kag Lamharon mangin sa stake na.

Ining mga high councilor, sa idalom sang direksyon sang pangulohan sang stake, makaalagad bilang bulig sa bishop kag mga korum sang Aaronic Priesthood sa paagi nga anggid sa pag-alagad nga ginahatag sang mga high councilor sa mga elders quorum sang ward.

Angot sa sini, isa pa ka high councilor magaalagad bilang pangulo sang Sunday School sa stake kag, subong nga kinahanglanon, puwede mag-alagad sa komite sang Aaronic Priesthood–Young Women sa stake.

Ang dugang nga mga pagbag-o sa organisasyon igapaathag pa gid sa impormasyon nga ginpadala sa mga lider. Ini nga mga pagbag-o nagalakip sang masunod:

• Ang miting sang komite sang bishopric kag mga lamharon pagabuslan sang konseho sang mga lamharon sang ward.

• Ang tinaga nga “Mutual” indi na paggamiton pa kag mangin “mga kahiwatan sang Young Women,” “mga kahiwatan sang korum sang Aaronic Priesthood,” ukon “mga kahiwatan sang mga lamharon” nga pagahiwaton kada semana kon posible.

• Ang badyet sang ward para sa mga kahiwatan sang mga lamharon pagatungaon sing palareho sa lamharon nga mga lalaki kag babayi suno sa kadamuon sang mga lamharon sa tagsa ka organisasyon. Igapatigayon ang supisyente nga kantidad para sa mga kahiwatan sa Primary.

• Sa tanan nga lebel—ward, stake, kag pangkabilogan—gamiton na naton ang tinaga nga “organisasyon” sangsa tinaga nga “auxiliary.” Ang mga nagapanguna sang mga organisasyon sang Pangkabilogan nga Relief Society, Young Women, Young Men, Primary, kag Sunday School tawagon bilang “Pangkabilogan nga mga Opisyal.” Ang mga nagapanguna sang mga organisasyon sa ward kag stake tawagon bilang “mga opisyal sang ward” kag “mga opisyal sang stake.”

Ang mga pagbag-o nga gin-anunsyo subong nga adlaw mahimo magsugod sa tion nga ang mga branch, mga ward, mga distrito, kag mga stake handa na pero dapat mapahamtang na sa Enero 1, 2020. Ining mga pagbag-o, kon tingbon kag iupod sa nagligad nga mga pagbag-o, nagarepresentar sang espirituwal kag pang-organisasyon nga panikasog nga nagasanto sa doktrina nga bugayan kag pabakuron ang tagsa ka lalaki, babayi, lamharon, kag bata, nga ginabuligan ang tagsa nga sundon ang halimbawa sang aton Manluluwas nga si Jesucristo samtang nagauswag kita sa banas sang kasugtanan.

Mahal kong mga kauturan, ginapromisa ko kag ginapamatud-an nga ining komprehensibo nga mga pagbag-o, sa idalom sang direksyon sang inspirado nga pangulo kag propeta nga si Russell M. Nelson, magahatag sang gahum sa kag magapabakod sang tagsa ka miyembro sang Simbahan. Ang aton mga lamharon magapatubo sing mas dako nga pagtuo sa Manluluwas, maamligan gikan sa mga tentasyon sang kaaway, kag mangin handa sa pag-atubang sa mga hangkat sang kabuhi. Sa sagrado nga ngalan ni Jesucristo, amen.

Mga Tanda

1. Tan-awa sa Russell M. Nelson, sa “Latter-day Saint Prophet, Wife and Apostle Share Insights of Global Ministry,” Newsroom, Okt. 30, 2018, newsroom.ChurchofJesusChrist.org.

2. Dugang pa, nagtinguha gid kamo sa paggamit sang husto nga ngalan sang Simbahan suno sa gintudlo ni President Russell M. Nelson kag sa pagdumdom sang aton Manluluwas nga may gugma kag pagtahod.

3. “Ang mga miyembro sang Simbahan ni Jesucristo ginpadala ‘agud magpangabudlay sa iya ulubasan para sa kaluwasan sang mga kalag sang katawhan’ (Doctrine and Covenants 138:56). Ining buluhaton sang kaluwasan nagalakip sang pangmisyonaryo nga buluhaton, pagpabilin nga aktibo sang hinaylo, pagpabalik sa Simbahan sang di-gawa aktibo nga mga miyembro, buluhaton sa templo kag family history, kag pagtudlo sang ebanghelyo. Ang bishopric nagadirekta sining buluhaton sa ward, nga ginabuligan sang iban pa nga mga miyembro sang konseho sang ward” (Handbook 2: Administering the Church, 5.0, ChurchofJesusChrist.org).

4. Bilang mga lider, palangga namon ang mga miyembro sang Simbahan ni Jesucristo sang mga Santos sa Ulihing mga Adlaw tungod sa inyo kaayo kag inyo pagkadisipulo. Ginadayaw namon ang mga indibidwal, mga nanay, mga tatay, mga lamharon, kag mga kabataan nga nagalakat sa banas sang kasugtanan—kag nagahimo sini nga may kaukod kag kalipay.

5. Sang 2019, ang 11 katuig nga mga deacon nagsugod sa pagpasa sang sakramento, kag ang 11 katuig nga lamharon nga mga babayi kag lalaki nagbaton sang limitado-nga-paggamit nga mga temple recommend. Sang nagligad nga tuig, si President Nelson naghangkat sang aton lamharon nga mga lalaki kag lamharon nga mga babayi nga mangin bahin sang batalyon sang mga lamharon agud magtipon sang naglinapta nga Israel sa alangay nga bahin sang belo (tan-awa sa “Hope of Israel” [bug-os kalibutan nga devotional para sa mga lamharon, Hunyo 3, 2018], HopeofIsrael.ChurchofJesusChrist.org). Grabe gid ang ila nangin reaksion diri.

   Ang full-time nga mga misyonero nagaalagad na sa karon sing labing maayo sa mas lamharon nga edad. Halin sang Oktubre 6, 2012, ang lamharon nga mga lalaki puwede na makaalagad sa edad nga 18 katuig kag ang lamharon nga mga babayi sa edad nga 19 katuig.

6. “Kag ang tulumanon sang pangulo sa Pagkapari ni Aaron amo ang magpangulo sa [mga] pari, kag magmiting upod sa ila, kag magtudlo sa ila sang mga tulumanon sang ila palangakoan. … Ini nga pangulo dapat isa ka obispo; kay isa ini sang mga tulumanon sining pagkapari” (Doctrine and Covenants 107:87–88).

7. Ang hamtong nga mga lider pagatawgon man bilang mga espesyalista sang korum sang Aaronic Priesthood sa pagbulig sa mga programa kag mga kahiwatan kag sa pagtambong sa mga miting sang korum agud nga ang bishopric masunson nga makabisita sa mga klase kag kahiwatan sang Young Women kag panalagsa nga makabisita sa Primary. Ang pila ka mga espesyalista puwede matawag agud magbulig sa partikular nga kahiwatan, subong sang camp; ang iban puwede matawag sa mas malawig nga tion agud magbulig sa mga manuglaygay sang korum. Dapat may ara sang indi magnubo sa duha pirme ka hamtong nga lalaki sa tagsa ka miting, programa, ukon kahiwatan sang korum. Samtang ang mga papel kag mga titulo maliwat, wala kami nagapaabot sang pagbuhin sang kadamuon sang hamtong nga mga lalaki nga nagaalagad kag nagasuporta sa mga korum sang Aaronic Priesthood.

8. Russell M. Nelson, “Witnesses, Aaronic Priesthood Quorums, and Young Women Classes,” Liahona, Nob. 2019, 39, pagdagmit gindugang; tan-awa man sa Ezra Taft Benson, “To the Young Women of the Church,” Ensign, Nob. 1986, 85.

9. Nagalaygay man kami sa mga bishop nga maghinguyang sing mas dako nga tion sa mga miyembro nga lamharon nga single adult kag ila mga pamilya.

10. Jeffrey R. Holland, miting sang liderato sa pangkabilogan nga komperensya, Abr. 2018; tan-awa man sa “Effective Ministering,” ministering.ChurchofJesusChrist.org. Si Elder Holland nagtudlo nga ang mga responsibilidad nga indi puwede itugyan sang bishop amo ang pagpangulo sa mga korum sang Aaronic Priesthood kag sa lamharon nga mga babayi, pagmangin komon nga hukom, pagbantay sa mga hilikuton nga pinansyal kag temporal sang Simbahan, kag pag-atipan sang mga imol kag mga nagakinahanglan. Ang mga pangulohan sang elders quorum kag Relief Society kag iban pa makasalo sang tig-una nga responsibilidad para sa pangmisyonaryo nga buluhaton, buluhaton sa templo kag family history, kalidad sang pagtudlo sa ward, kag pagbantay kag pag-minister sa mga miyembro sang Simbahan.

11. Dugang pa sa mga sirkumstansya nga nagakinahanglan sang mga yabi sang komon nga hukom, ang mga isyu sing bisan ano nga klase sang abuso dapat uyatan sang mga bishop suno sa patakaran sang Simbahan.

12. Ang pangulo sang Relief Society sang stake magapadayon man sa pagreport sing direkta sa pangulo sang stake.

13. Ang mga manuglaygay sang pangulo sang Young Men sa stake mahimo matawag halin sa pagkamiyembro sa stake, ukon subong nga kinahanglanon, mahimo nga mangin high councilor nga i-asayn sa Young Women kag high councilor nga i-asayn sa Primary.

14. Ang brother nga nagaalagad bilang pangulo sang Sunday School may dako nga responsibilidad para sa kurikulum sang mga lamharon sa duha ka Domingo kada bulan.

15. Ang mga pangulohan sang Relief Society, Young Women, Young Men, Sunday School, kag Primary sa pangkabilogan kag sa stake Pangkabilogan nga mga Opisyal ukon mga opisyal sang stake. Sa ward, ang bishopric nagapanguna sang lamharon nga mga lalaki, gani ang mga manuglaygay sang korum sang Aaronic Priesthood indi mga opisyal sang ward.