Panghingapos nga Pamulong-pulong

Ni Pangulong Russell M. Nelson

Ang indibidwal nga katakos nagakinahanglan sang bug-os nga pagbag-o sang hunahuna kag tagipusuon nga mangin mas pareho sa Ginuo.

Pinalangga ko nga mga kauturan, sa paglab-ot naton sa katapusan sining makasaysayan nga komperensya, nagapasalamat kita sa Ginuo sa pag-inspirar sang mga mensahe kag sang musika nga nagpabakod sa aton. Matuod gid kita nga nagpaayaw sa espirituhanon.

Nakahibalo kita nga ang ginpanumbalik nga ebanghelyo ni Jesucristo magadala sang paglaum kag kalipay sa mga tawo nga magapamati kag magasunod sang Iya doktrina. Nakahibalo man kita nga ang tagsa ka puluy-an sarang nga mangin matuod-tuod nga palasilungan sang pagtuo, kon sa diin ang kalinong, pagpalangga, kag ang Espiritu sang Ginuo mahimo nga magpuyo.

Siyempre, ang tampok nga hiyas sang Pagpanumbalik amo ang balaan nga templo. Ang sagrado nga mga ordinansa kag kasugtanan diri importante kaayo sa paghanda sang katawhan nga handa sa pagsugat sa Manluluwas sa Iya Ika-duhang Pagkari. Sa karon may ara kita sang 166 ka gindedikar nga mga templo, kag madamo pa ang maabot.

Isa ka open house ang pagahiwaton antes sang dedikasyon sang tagsa ka bag-o kag ginkay-o nga templo. Madamo nga mga abyan sa gwa sang aton pagtuluohan ang magapartisipar sa paglibot sa sinang mga templo kag makatuon sang isa ka butang parte sa mga bugay sang templo. Kag ang pila sinang mga bisita matandog sa paghibalo pa gid.sing dugang Ang iban sinsero nga magapamangkot kon paano sila mangin kalipikado para sa mga bugay sang templo.

Bilang mga miyembro sang Simbahan, kinahanglan naton nga mangin handa sa pagsabat sang ila mga pamangkot. Pwede naton ipaathag nga ang mga bugay sang templo para sa bisan sin-o kag sa tanan nga tawo nga magahanda sang ila mga kaugalingon. Pero antes sila makasulod sa gindedikar nga templo, kinahanglan nila nga mangin kalipikado. Gusto sang Ginuo nga ang tanan Niya nga kabataan makaambit sang wala katapusan nga mga bugay nga maangkon sa sulod sang Iya templo. Ginpahamtang Niya kon ano ang kinahanglan himuon sang tagsa ka tawo agud mangin kalipikado sa pagsulod sa Iya balaan nga balay.

Isa ka maayo nga lugar agud aton sugdan ang amo nga oportunidad sa pagpanudlo amo ang pagtalupangod sa mga tinaga nga nasulat sa gwa sang templo: “Holiness to the Lord: The House of the Lord.” Ang mensahe ni Pangulong Henry B. Eyring sa karon kag sang madamo nga iban pa ang nag-inspirar sa aton nga mangin mas balaan. Ang tagsa ka templo isa ka sagrado nga lugar; ang tagsa ka nagasulod sa templo nagatinguha nga mangin mas balaan.

Ang tanan nga mga rekisito sa pagsulod sa templo may kaangtanan sa personal nga pagkabalaan. Para mahibal-an ang inang kahanda, ang tagsa ka tawo nga gusto magbaton sang mga bugay sang templo maagi sa duha ka interbyu: una sa bishop, sa manuglaygay sa bishopric, ukon branch president; ika-duha sa pangulo sang stake ukon misyon ukon sa isa sang iya mga manuglaygay. Sa sinang mga interbyu, may pila ka mga pamangkot .

Ang pila sinang mga pamangkot ginliwat sining karon lang para mas klaro. Gusto ko ini rebyuhon para sa inyo karon:

May pagtuo ka bala kag panaksihon sa Dios, ang Wala’y Katapusan nga Amay; sa Iya Anak nga si Jesucristo; kag sa Balaan nga Espiritu?
May panaksihon ka bala sa Pagbayad-Sala ni Jesucristo kag sa Iya papel bilang imo Manluluwas kag Manunubos?
May panaksihon ka bala sa Pagpanumbalik sang ebanghelyo ni Jesucristo?
Ginatib-ong mo bala ang Pangulo sang Ang Simbahan ni Jesucristo sang mga Santos sa Ulihing mga Adlaw bilang propeta, manugpanan-aw, kag manugpahayag sang rebelasyon kag bilang ang solo nga tawo sa kalibutan nga awtorisado sa paggamit sang tanan nga yabi sang priesthood?

Ginatib-ong mo bala ang mga miyembro sang Unang Panguluhan kag ang Korum sang Dose ka mga Apostoles bilang mga propeta, mga manugpanan-aw, kag mga manugpahayag sang rebelasyon?

Ginatib-ong mo bala ang iban pa nga mga General Authority kag lokal nga mga lider sang Simbahan?
Ang Ginuo nagsiling nga ang tanan nga butang dapat “himuon sa katinlo” sa Iya atubang (Doctrine and Covenants 42:41).

Ginatinguhaan mo bala ang moral nga katinlo sa imo kaisipan kag pamatasan?

Ginatuman mo bala ang layi sang kaputli?
Ginasunod mo bala ang mga pinanudlo sa Simbahan ni Jesucristo sa imo pribado kag pang-publiko nga pangginawi upod sa mga miyembro sang imo pamilya kag sa iban?
Nagasuporta ka bala ukon nagaduso sang bisan ano nga pinanudlo, pangginawi, ukon doktrina nga supak sa iya sang Ang Simbahan ni Jesucristo sang mga Santos sa Ulihing mga Adlaw?
Ginatinguhaan mo bala nga tipigan nga balaan ang Adlaw nga Inugpahuway, pareho sa puluy-an kag sa simbahan; nagatambong sa imo mga miting; nagahanda kag nagaambit sang sakramento nga takos; kag nagapangabuhi nga suno sa mga layi kag mga kasuguan sang ebanghelyo?
Ginatinguhaan mo bala nga mangin tampad sa tanan mo nga ginahimo?
Nagabayad ka bala sang bug-os nga ikapulo?
Naintiendihan mo bala kag ginasunod ang Pulong sang Kaalam?
May ara ka bala sang pinansyal ukon iban pa nga mga obligasyon sa asawa/bana sadto ukon mga kabataan?

Kon huo, ginatungdan mo bala inang mga obligasyon?
Ginatipigan mo bala ang mga kasugtanan nga imo ginhimo sa templo, lakip na ang pagsuksok sang temple garment suno sa ginpanulin sa endowment?
May seryoso bala nga mga sala sa imo kabuhi nga kinahanglan resolbahon upod sa mga awtoridad sa priesthood bilang parte sang imo paghinulsol?
Ginakabig mo bala ang imo kaugalingon nga takos sa pagsulod sa balay sang Ginuo kag pagpartisipar sa mga ordinansa sang templo?

Buwas, ang ining ginliwat nga mga pamangkot sa temple recommend ihatag sa mga lider sang Simbahan sa bilog nga kalibutan.

Dugang pa sa ila pagsabat sa mga pamangkot sing tampad, ginapaabot nga ang tagsa ka hamtong nga sumilimba sa templo nagasuksok sang sagrado nga garment sang priesthood sa idalom sang ila regular nga bayo. Simbolo ini sang espirituhanon nga pangako nga magtinguha tagsa ka adlaw nga mangin mas pareho sa Ginuo. Ginapadumdom man kita sini nga magpabilin nga matinuohon tagsa ka adlaw sa mga kasugtanan nga ginhimo kag sa paglakat sa dalan sang kasugtanan tagsa ka adlaw sa mas mataas kag mas balaan nga paagi.

Karon, sa makadali, gusto ko nga makighambal sa aton mga lamharon. Ginapaisog kamo namon nga mangin kalipikado para sa limitado-ang-gamit nga mga temple recommend. Pamangkuton lamang kamo sinang mga pamangkot nga bagay sa inyo sa inyo paghanda para sa mga ordinansa sang tal-os nga bunyag kag kumpirmasyon. Nagapasalamat gid kami sa inyo katakos kag kahanda sa pagpartisipar sa sinang sagrado nga buluhaton sa templo. Salamat gid!

Ang indibidwal nga katakos sa pagsulod sa balay sang Ginuo nagapangayo sang dako nga indibidwal nga espirituhanon nga paghanda. Pero upod ang bulig sang Ginuo, wala sang butang nga imposible. Sa pila ka bahin, mas mahapos ang magpatindog sang templo sangsa magtukod sang katawhan nga handa para sa templo. Ang indibidwal nga katakos nagakinahanglan sang bug-os nga pagbag-o sang hunahuna kag tagipusuon nga mangin mas pareho sa Ginuo, nga mangin tampad nga pumuluyo, nga mangin mas maayo nga ehemplo, kag mangin mas balaan nga tawo.

Nagapamatuod ako nga ang amo nga buluhaton sang paghanda nagadala sang indi maisip nga mga bugay sa sining kabuhi kag indi matungkad nga mga bugay sa kabuhi nga maabot, lakip na ang pagpadayon sang inyo yunit sang pamilya sa wala katapusan “sa isa ka kahimtangan sang di-matapos nga kalipayan.”

Karon gusto ko maghambal parte sa iban nga topiko: mga plano para sa maabot nga tuig. Sa tigpamulak sang tuig 2020, mangin eksakto 200 katuig na halin sang naeksperiyensyahan ni Joseph Smith ang pagpakita sang Dios sa tawo nga ginakilala naton nga Unang Palanan-awon. Ang Dios nga Amay kag ang Iya Pinalangga nga Anak, nga si Jesucristo, nagpakita kay Joseph, isa ka 14-anyos nga lamharon. Inang hitabo nagsimbolo sang panugod sang Pagpanumbalik sang ebanghelyo ni Jesucristo sa iya kabug-osan, eksakto sa ginpahayag sa Balaan nga Biblia.

Dayon nag-abot ang sunod-sunod nga mga pagbisita sang langitnon nga mga mensahero, lakip na si Moroni, Juan Bautista, kag ang nauna nga mga Apostoles nga sanday Pedro, Santiago, kag Juan. Nagsunod ang iban pa, lakip na si Moises, Elias, kag Elijah. Ang kada isa nagdala sang diosnon nga awtoridad agud liwat nga bugayan ang mga anak sang Dios sa kalibutan.

Sa gahum sang Dios, nabaton man naton ang Libro ni Mormon: Isa pa ka Katipan nahanungod kay Jesucristo, isa ka kaupod nga balaan nga kasulatan sa Balaan nga Biblia. Ang mga rebelasyon nga nasulat sa Doctrine and Covenants [Doktrina kag mga Kasugtanan] kag sa Pearl of Great Price [Perlas nga Dako ang Bili] nagdugang sing dako sa aton pag-intiendi sang mga kasuguan sang Dios kag sang wala katapusan nga kamatuoran.

Ang mga yabi kag palangakuan sang priesthood ginpanumbalik, lakip na ang mga palangakuan sang Apostoles, Kapitoan, patriarka, mataas nga pari, elder, bishop, priest, teacher, kag deacon. Ang kababayin-an nga nagapalangga sa Ginuo nagaserbisyo sing matutom sa Relief Society, Primary, Young Women, Sunday School kag sa iban pa nga mga calling sa Simbahan—tanan importante nga bahin sang Pagpanumbalik sang ebanghelyo ni Jesucristo sa iya kabug-osan.

Gani, ang tuig 2020 idesignar bilang ika-duha ka gatos nga tuig. Ang pangkabilugan nga komperensya sa madason nga Abril mangin lain sangsa nagliligad nga mga komperensya. Sa madason nga anum ka bulan, kabay nga ang tagsa ka miyembro kag tagsa ka pamilya maghanda para sa isa ka pinasahi nga komperensya nga magadumdom sang mismo pundasyon sang ginpanumbalik nga ebanghelyo.

Mahimo nga gusto ninyo sugdan ang inyo pagpanghanda paagi sa pagbasa liwat sang panaysayon ni Joseph Smith sang Unang Palanan-awon nga nasulat sa Pearl of Great Price. Ang aton tulun-an sa madason nga tuig sa Dali, Magsunod sa Akon amo ang Libro ni Mormon. Mahimo nga gusto ninyo binagbinagon ang importante nga mga pamangkot pareho sang, “Ano ang mangin kinalain sang akon kabuhi kon ang akon ihibalo nga naagom sa Libro ni Mormon gulpi lang nga kuhaon?” ukon “Paano ang mga hitabo nga nagsunod sa Unang Palanan-awon nagtuga sang kinalain para sa akon kag sa akon mga pinalangga?” Dugang pa, bangud may ara na karon sang mga video sang Libro ni Mormon, mahimo nga idugang ninyo ang mga ini sa inyo indibidwal kag pang-pamilya nga pagtuon.

Magpili sang inyo kaugalingon nga mga pamangkot. Magdisenyo sang inyo kaugalingon nga plano. Magpaayaw sa mahimayaon nga kasanag sang Pagpanumbalik. Samtang ginahimo ninyo ini, ang pangkabilugan nga komperensya sa madason nga Abril indi lamang mangin halandumon; indi man ini malipatan.

Karon sa paghingapos, ginabilin ko sa inyo ang akon pagpalangga kag ang akon bendisyon nga ang tagsa sa inyo mangin mas malipayon kag mas balaan sa kada pagligad sang adlaw. Samtang, makasalig kamo nga ang rebelasyon nagapadayon sa Simbahan kag magapadayon sa idalom sang direksyon sang Ginuo tubtob nga “ang mga katuyuan sang Dios matuman, kag ang Dakong Jehova magasiling nga ang buluhaton natapos na.”

Ginabendisyunan ko kamo, nga ginapahayag liwat ang akon pagpalangga sa inyo, upod ang akon panaksihon nga ang Dios buhi! Si Jesus ang Cristo! Ini ang Iya Simbahan kag kita ang Iya katawhan. Sa sagrado nga ngalan ni Jesucristo, amen.