![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1f%2F5d%2F1f5d8e59c799650bfa56fe16794c65c25f4a5c9b%2Frussell_m_nelson_welcome_message.jpeg/full/!250,/0/default)
Aatin sa’ xtiklajik
Sahil k’ulunik eere sa’ li jolomil ch’utub’aj-ib’ re rab’inkil lix yaab’ xkux li Qaawa’.
Ex was wiitz’in ut wamiiw chiru li ruchich’och’, nink’e sahil k’ulunik eere sa’ li jolomil ch’utub’aj-ib’ a’in. Naqach’utub’ qib’ jo’ jun nimla junkab’al re xloq’oninkil li Qaawa’, li qaKolonel Jesukristo. B’antiox eere naq wankex qik’in.
Naab’al li xk’ulman chiru li chihab’ a’in. Xqatzol k’iila na’leb’ li maji’ xqanaw. Wan li na’leb’ li ak ninnaw chaq junxil a’ut tz’iib’anb’il chik chiru inch’ool li na’leb’ a’an chi ak’il.
Anajwan, laa’in ninnaw chik naq li Qaawa’ naxb’eresi lix k’anjel lix Iglees. A’an kixye, “Tink’ut [cheru] naq ninru chixb’aanunkil tz’aqal ink’anjel.”1
K’iila sut, laa’in ut eb’ lin tenq’ aj k’ehol na’leb’ xqil rik’in xya’al li qu naq a’an xchal re qatenq’ankil sa’ li ninqi ch’a’ajkilal, chirix naq ak xqab’aanu li jo’ kihal naru chiqu ut maak’a’ chik xooru chixb’aanunkil qajunes. Sachso nokokana chi yaal.
Nintaw chik ru chi us lix yaalalil li raatin naq kixye, “K’ehomaq reetal, laa’in tinseeb’a lin k’anjel sa’ xq’ehil.”2 K’iila sut xsaho’ inch’ool naq a’an xb’eresi ut xseeb’a lix k’anjel—us ta yoo jun nimla yajel sa’ ruchich’och’.
Ex was wiitz’in, lix metz’ew li Iglees nachal rik’in lix yalb’aleb’ xq’e ut lix nawomeb’ xch’ool lix komon. K’a’jo’ naq naniman li xnawom ch’oolej sa’ li ochoch. Chiru li chihab’ a’in, naab’al eere xetzol li evangelio chi kaw sa’ lee rochoch, mas wi’chik chiru li xeb’aanu junxil. Ninb’antioxi eere, ut lee kok’al te’b’antioxinq ajwi’ cheru.
Toj yoo chi ak’ob’resimank li santil ochoch re Lago Salado. Sa’ lin oficina nawil li k’anjel yookeb’ xb’aanunkil sa’ xsutam li santil ochoch.
Naq xe’wil laj k’anjel chirisinkil li k’a’aq re ru q’eel aran, xink’oxla naq aajel ru naq taqisi, chi tenq’anb’ilo xb’aan li Kolonel, li k’a’ru q’eel sa’ li qayu’am.
Lix evangelio li Jesukristo, a’an jun evangelio re jalb’a-k’a’uxlej.3 Rik’in lix tojb’al rix li maak xb’aan li Kolonel, lix evangelio nokoxb’oq chi jalaak, chi chaab’ilo’k, ut chi saqob’resiik qu. A’an jun evangelio re yo’onink, k’irtesink, ut chaab’ilo’k. Chi jo’kan, a’an jun evangelio re sahil ch’oolejil! Nasaho’ xch’ool li qamusiq’ rik’in li junjunq yokb’ naqak’e chi uub’ej.
Jun raqal lix ch’utub’ankil Israel, li jwal nim ru, a’an li taqlahom naq jo’ tenamit taawanq qak’ulub’il ut taawanq qach’ool re tenq’ank chixkawresinkil li ruchich’och’ choq’ re li xkab’ xk’ulunik li Qaawa’.
Naq taqab’i li aatin li xe’xkawresi li qajolominel chi b’eresinb’ileb’ xb’aan li Santil Musiq’ej, nekexinb’oq chi tijok re teenaw k’a’ru teerisi sa’ lee yu’am, re naq taanimanq lee k’ulub’il.
Nekexinra, ex was wiitz’in, ut ninch’olob’ xyaalal naq li qaChoxahil Yuwa’ ut li Ralal raaro xb’aan neke’xnaw anihex ut neke’xra li junjunq eere. Yo’on wankeb’ chetenq’ankil sa’ lee b’eenik chi uub’ej. Sahil k’ulunik eere sa’ li jolomil ch’utub’aj-ib’ re rab’inkil lix yaab’ xkux li Qaawa’. Sa’ xk’ab’a’ li Jesukristo, amen.