Ang Dios taliwala Kanato
Ang Dios ania taliwala kanato—ug personal nga nalambigit sa atong mga kinabuhi ug aktibong naggiya sa Iyang mga anak.
Sa tibuok kasaysayan, ang Dios misulti pinaagi sa Iyang mga sulugoon, ang mga propeta.1 Karong buntaga kita adunay kahigayonan nga maminaw sa propeta sa Dios nga moistorya ngadto sa tanang kalibotan. Kami nahigugma kanimo, Presidente Nelson, ug akong giawhag ang tanan sa bisan asa nga dapit sa pagtuon ug pagsunod sa imong mga pulong.
Sa wala pa ko moabot sa akong ika-12 nga adlawng natawhan, ang among pamilya kaduha napugos nga mobiya sa among panimalay ug magsugod na usab diha sa usa ka bag-o nga dapit taliwala sa kagubot, kahadlok, ug kawalay mga kaseguradohan tungod sa gubat ug politikal nga panagbangi. Usa kadto ka makapabalaka nga panahon alang kanako, apan tingali kadto makalilisang kaayo alang sa akong minahal nga mga ginikanan.
Ang akong inahan ug amahan mipakigbahin og gamay ra niini nga alantoson namong upat ka mga anak. Gipas-an nila ang kalisod ug pag-antos kutob sa ilang mahimo. Ang kahadlok tingali makapaluya gayod, mihurot sa ilang mga oras ug nakapamenos sa ilang paglaom.
Kini nga panahon sa kawalay paglaom human sa Ikaduhang Gubat sa Kalibotan adunay dako kaayo nga epekto sa kalibotan. Dako kini og epekto kanako.
Kaniadto, sa pag-inusara atol sa akong labing masulub-on nga mga oras, kanunay ko nga mangutana, “Aduna pa bay paglaom nga nahibilin sa kalibotan?”
Mga Anghel taliwala Kanamo
Samtang namalandong ko niini nga pangutana, naghunahuna ko kabahin sa among batan-on nga Amerikanong mga misyonaryo kinsa miserbisyo taliwala kanamo atol niadto nga mga katuigan. Gibiyaan nila ang kahilwasan sa ilang kaugalingong mga panimalay gikan sa layo kaayo nga dapit ug mibiyahe padulong sa Germany—yuta sa ilang kasamtangan nga mga kaaway—aron motanyag og balaanong paglaom ngadto sa among katawhan. Sila miabot dili aron mobasol, motudlo, o mopakauwaw. Sila andam nga mihatag sa ilang batan-on nga mga kinabuhi nga wala maghunahuna sa kalibotanon nga ganti, gusto lang nga motabang sa uban nga makakita sa hingpit nga kalipay ug kalinaw nga ilang nasinati.
Alang kanako, mga hingpit kini nga batan-on nga mga lalaki ug mga babaye. Segurado ko nga naa silay mga kakulangan, apan wala nako kini makita. Ako kanunay nga maghunahuna nila isip adunay mas lig-on, mas dalaygon nga mga kinaiya—mga anghel sa kahayag ug himaya, mga tigpangalagad sa kalooy, kamaayo, ug kamatuoran.
Samtang ang kalibotan nag-antos sa pagka negatibo, kapait, kasilag, ug kahadlok, ang ehemplo ug mga pagtulon-an niining batan-ong mga tawo mipuno kanako sa paglaom. Ang mensahe sa ebanghelyo nga ilang gitanyag milabaw pa sa politika, kasaysayan, mga kahiubos, mga reklamo, ug personal nga mga katuyoan. Kini naghatag og balaanong mga tubag sa importante namo nga mga pangutana atol niining malisod nga mga panahon.
Ang mensahe mao nga ang Dios buhi ug naghunahuna kanato, bisan pa man niining mga higayon sa kagubot, kalibog, ug kaguliyang. Nga Siya mipakita gayod sa atong panahon karon aron sa pagpahiuli sa kamatuoran ug kahayag—ang Iyang ebanghelyo ug ang Iyang Simbahan. Nga Siya nakig-istorya pag-usab ngadto sa mga propeta; nga ang Dios ania taliwala kanato—ug personal nga nalambigit sa atong mga kinabuhi ug aktibong naggiya sa Iyang mga anak.
Makapatingala nga kita makakat-on kon kita motan-aw og mas maayo sa plano sa kaluwasan ug kahimayaan sa atong Langitnong Amahan, ang plano sa kalipay, alang sa Iyang mga anak. Kon kita mobati nga walay ayo, gisalikway, ug gikalimtan, atong makat-onan nga kita makalaom nga ang Dios wala makalimot kanato—gani, Siya mitanyag ngadto sa tanan Niyang mga anak og usa ka butang nga dili katuohan: ang mamahimong “manununod sa Dios, ug isig ka manununod uban ni Kristo.”2
Unsay ipasabot niini?
Nga kita mabuhi hangtod sa kahangtoran, makaangkon og kahingpitan sa kalipay,3 ug adunay potensyal nga “makapanunod og mga trono, mga gingharian, ug mga kagamhanan.”4
Makapatandog nga mahibaloan nga kini nga halangdon ug balaanon nga kaugmaon posible—dili tungod kon si kinsa kita apan tungod kon si kinsa ang Dios.
Kay nakahibalo na niini, ngano nga kita magbagutbot o magpabiling naglain ang buot? Ngano nga kita magpabiling ubos ra kaayo og pagtan-aw sa atong kaugalingon kon ang Hari sa mga hari nagdapit kanato nga tumanon ang atong mga potensyal ngadto sa usa ka dili katuohan nga umaabot nga adunay balaanong kalipay?5
Kaluwasan taliwala Kanato
Tungod sa hingpit nga gugma sa Dios alang kanato ug sa walay kataposang sakripisyo ni Jesukristo, ang atong mga sala—dagko ug gagmay—mahimong mapapas ug dili na mahinumdoman.6 Makabarog kita atubangan Niya nga putli, takos, ug nabalaan.
Ang akong kasingkasing napuno sa pasalamat alang sa akong Langitnong Amahan. Ako nakaamgo nga Siya wala molaglag sa Iyang mga anak aron nga maglisod sa mortalidad nga walay paglaom alang sa usa ka hayag ug walay kataposan nga kaugmaon. Siya naghatag og mga panudlo nga mipadayag sa dalan balik ngadto Kaniya. Ug ang sentro niining tanan mao ang Iyang Pinalanggang Anak, si Jesukristo,7 ug ang Iyang sakripisyo alang kanato.
Ang walay kinutoban nga Pag-ula sa Manluluwas hingpit nga miusab sa paagi sa atong pagtan-aw sa atong mga kalapasan ug mga diperensya. Imbes nga magsige og hunahuna niini ug mobati nga wala nay katubsanan o wala nay paglaom, makakat-on kita gikan niini ug mobati nga malaomon.8 Ang makalimpyo nga gasa sa paghinulsol nakatugot kanato nga makabiya sa atong mga sala ug motumaw nga bag-o nga binuhat.9
Tungod ni Jesukristo, ang atong mga kapakyasan dili kinahanglan nga maoy modeterminar kanato. Kini makapahimo nato nga mas maayo.
Sama sa usa ka musikero nga nagpraktis sa mga eskala [scale], mahimong makita nato ang atong mga kasaypanan, mga depekto, ug mga sala isip mga oportunidad alang sa mas dako nga pagkaamgo sa kaugalingon, mas lawom ug mas matinuoron nga gugma alang sa uban, ug pagkahimong mas balaan pinaagi sa paghinulsol.
Kon kita maghinulsol, ang mga kasaypanan dili makapawala sa atong puwesto. Kini kabahin sa atong paglambo.
Kitang tanan mga bata pa kon ikumparar sa mga nilalang sa himaya ug kahalangdon nga diin kita gidesinyo nga mamahimo. Walay mortal nga mga paglambo sa tawo gikan sa pagkamang ngadto sa paglakaw ngadto sa pagdagan nga walay kanunay nga mga pagkadagma, mga pagkabangga ug mga bun-og. Sa ingon niana kita makat-on.
Kon kita matinuoron nga magpadayon sa pagpraktis, kanunay nga maninguha sa pagsunod sa mga sugo sa Dios, ug mogahin sa atong mga paningkamot sa paghinulsol, paglahutay, ug paggamit sa unsay atong nakat-onan, pagtulun-an human sa usa ka pagtulun-an, kita makapundo og kahayag ngadto sa atong mga kalag.10 Ug bisan kita dili hingpit nga makasabot sa atong tibuok nga potensyal karon, “kita nasayod nga, inig abot [sa Manluluwas],” mahisama kita Kaniya, ug “makita nato Siya sa Iya gayong pagkasiya.”11
Pagkanindot nga saad!
Oo, ang kalibotan anaa sa kasamok. Ug oo, kita adunay mga kahuyang. Apan dili kita kinahanglan nga magsubo tungod sa kawalay paglaom, tungod kay kita makasalig sa Dios, kita makasalig sa Iyang Anak, si Jesukristo, ug kita makadawat sa gasa sa Espiritu nga mogiya kanato niini nga dalan padulong sa kinabuhi nga puno sa hingpit ug balaanon nga kalipay.12
Jesus taliwala Kanato
Ako kanunay nga maghunahuna, Unsa man ang itudlo ug buhaton ni Jesus kon Siya ania taliwala kanato karon?
Human sa Pagkabanhaw, si Jesukristo mituman sa Iyang saad sa pagbisita sa Iyang “ubang mga karnero.”13
Ang Basahon ni Mormon: Lain nga Tugon ni Jesukristo naghisgot niana nga pagpakita ngadto sa katawhan sa kontinente sa Amerika. Kita aduna niini nga bililhong rekord isip mahikap nga saksi sa buhat sa Manluluwas.
Ang katawhan sa Basahon ni Mormon nagpuyo sa pikas nga bahin sa kalibotan—ang ilang mga kasaysayan, mga kultura, ug politikal nga mga kahimtang dako kaayo og kalainan gikan sa katawhan nga gitudloan ni Jesus atol sa Iyang mortal nga pangalagad. Apan sa gihapon Siya mitudlo nila og daghan sa sama nga mga butang nga Iyang gitudlo sa Balaan nga Yuta.
Nganong buhaton man Niya kana?
Ang Manluluwas sa kanunay nagtudlo og walay kausaban nga mga kamatuoran. Kini magamit sa katawhan sa bisan unsang panahon ug sa bisan unsang kahimtang.
Ang Iyang mensahe kaniadto ug karon mao ang usa ka mensahe sa paglaom ug pagkahisakop—usa ka pagpamatuod nga ang Dios nga atong Langitnong Amahan wala mobiya sa Iyang mga anak.
Nga ang Dios ania taliwala kanato!
Duha ka gatos ka tuig na ang milabay, ang Manluluwas mibalik pag-usab sa kalibotan. Kauban sa Dios nga Amahan, Siya mipakita sa 14-anyos nga si Joseph Smith ug misugod sa Pagpahiuli sa ebanghelyo ug sa Simbahan ni Jesukristo. Sukad nianang adlawa ug sa misunod pa, ang kalangitan naabli, ug ang langitnong mga mensahero nanaog gikan sa mga hawanan sa imortal nga kahimayaan. Ang kahayag ug kahibalo gihatag ngadto sa katawhan sa yuta gikan sa langit.
Ang Ginoong Jesukristo misulti pag-usab ngadto sa kalibotan.
Unsay Iyang gisulti?
Kini usa ka panalangin kanato, daghan sa Iyang mga pulong narekord diha sa Doktrina ug mga Pakigsaad—anaa alang ni bisan kinsa sa kalibotan nga gusto nga mobasa ug magtuon niini. Kini nga mga pulong bililhon kaayo kanato karon!
Ug dili na kita angay nga matingala nga mahibalo nga ang Manluluwas nagtudlo na usab sa pinakasentro nga mensahe sa Iyang ebanghelyo: “Higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gah[o]m, hunahuna, ug kusog, ug sa ngalan ni Jesukristo kamo moalagad kaniya.”14 Siya nagdasig kanato sa pagpangita sa Dios15 ug mopuyo subay sa mga pagtulun-an nga Iyang gipadayag ngadto sa Iyang mga sulugoon, ang mga propeta.16
Siya nagtudlo kanato sa paghigugma sa usag usa17 ug nga “mapuno sa gugma ngadto sa tanan nga mga tawo.”18
Siya nagdapit kanato sa pagbuhat sa mga butang nga Iyang buhaton, ug moadto sa tanang dapit nga maghimo og maayong mga butang.19 “Kinahanglan maghigugma kita dili lamang pinaagi sa pulong … kondili pinaagi sa buhat ug sa tinuoray gay[o]d.”20
Siya mihagit kanato sa pagsunod sa Iyang dako nga mando: sa paghigugma, sa pagpaambit, sa pagdapit sa tanan ngadto sa Iyang ebanghelyo ug sa Iyang Simbahan.21
Siya nagsugo kanato sa pagtukod og balaan nga mga templo ug sa pagsulod ug pagserbisyo didto.22
Siya nagtudlo kanato nga mahimong Iyang mga disipulo—nga ang atong mga tinguha kinahanglan nga dili alang sa personal nga gahom, bahandi, pag-aprubar, o posisyon. Siya nagtudlo kanato sa “[pag]salikway sa mga butang niini nga kalib[o]tan, ug pangita[on] ang mga butang nga maayo.”23
Siya nag-awhag kanato sa pagpangita og hingpit nga kalipay, kalamdagan, kalinaw, kamatuoran, kalipay,24 ug sa saad sa imortalidad ug kinabuhing dayon.25
Ato kining ipasabot og maayo. Pananglitan si Jesus moanha sa inyong ward, sa inyong branch, o sa inyong panimalay karon. Unsa man kaha ang mahitabo niana?
Siya makahibalo sa inyong tinuod nga mga pagbati ug mga hunahuna. Ang panagway lang mawagtangan og importansiya. Siya makaila ninyo kon si kinsa gayod kamo. Siya makahibalo sa mga tinguha sa inyong kasingkasing.
Ang maaghop ug mapainubsanon Iyang agakon.
Ang masakiton Iyang ayohon.
Ang nagduha-duha Iyang patuhopan sa hugot nga pagtuo ug kaisog nga mosalig.
Siya motudlo kanato sa pag-abli sa atong mga kasingkasing ngadto sa Dios ug motabang sa uban.
Siya moila ug mopasidungog sa kamatinud-anon, kamapahiubsanon, kaligdong, kamatinuoron, kamanggiloloy-on, ug gugma nga putli.
Pinaagi sa pagtan-aw lamang sa Iyang mga mata ug dili na kita sama sa unsa kita kaniadto. Kita mausab sa kahangtoran. Kita mausab sa pagkahigmata nga, sa pagkatinuod, ang Dios ania taliwala kanato.
Unsay Atong Buhaton?26
Naghandom ko nga adunay kaaghop sa batan-ong lalaki nga mao ako atol sa mga tuig nga ako nagtubo. Kon mabalik pa lang unta nako ang panahon, ako siyang hupayon ug sultihan siya nga magpabilin sa sakto nga dalan ug magpadayon sa pagpangita. Ug ako siyang hangyoon nga dapiton si Jesukristo sa iyahang kinabuhi, kay ang Dios ania taliwala kanato!
Kaninyo, akong minahal nga kaigsoonan, akong minahal nga kahigalaan, ug ngadto sa tanan kinsa nangita og mga tubag, kamatuoran, ug kalipay, ako motanyag sa sama nga tambag: padayon sa pagpangita uban sa hugot nga pagtuo ug pailob.27
Pangayo, ug kamo hatagan. Panuktok, ug ang pultahan ablihan alang kaninyo.28 Salig sa Ginoo.29
Sa atong inadlaw-adlaw nga kinabuhi mahinungdanon kaayo nato nga buluhaton ug nindot nga oportunidad ang makaplagan ang Dios.
Samtang atong ipadaplin ang garbo ug moduol sa Iyang trono uban sa masulub-on nga kasingkasing ug mahinuls[o]lon nga espiritu,30 Siya mopaduol nganha kanato.31
Samtang kita magtinguha sa pagsunod ni Jesukristo ug maglakaw sa dalan sa pagkadisipulo, pagtulun-an human sa usa ka pagtulun-an, ang adlaw moabot nga kita makasinati nianang dili katuohan nga gasa sa pagdawat sa kahingpitan sa kalipay.
Akong hinigugma nga mga higala, ang inyong Langitnong Amahan nahigugma kaninyo sa usa ka hingpit nga gugma. Siya mipamatuod sa Iyang gugma sa walay kinutoban nga mga paagi, apan labaw sa tanan pinaagi sa paghatag sa Iyang Bugtong Anak isip usa ka sakripisyo ug isip usa ka gasa ngadto sa Iyang mga anak aron mahimong posible ang pagbalik nato ngadto sa atong langitnong mga ginikanan.
Ako mohatag og pagsaksi nga ang atong Langitnong Amahan buhi, nga si Jesukristo naggiya sa Iyang Simbahan, nga si Presidente Russell M. Nelson Iyang propeta.
Akong ipaabot kaninyo ang akong gugma ug panalangin niini nga malipayong panahon sa Pasko sa Pagkabanhaw. Ablihi ang inyong kasingkasing ngadto sa atong Manluluwas ug Manunubos, bisan unsa pa man ang inyong mga kahimtang, mga pagsulay, mga pag-antos, o mga sayop; kamo makahibalo nga Siya buhi, nga Siya nahigugma ninyo, ug nga tungod Kaniya, dili gayod kamo mag-inusara.
Ang Dios ania taliwala kanato.
Niini ako mopamatuod ug mohatag og pagsaksi diha sa sagradong ngalan ni Jesukristo, amen.