Kot me Neich
Kot a nom neich—me mi pwisin nom non manauach me a emweni Noun kewe.
Non uruon fonufan, Kot a kapas ngeni Noun chon angang, ekkewe soufos.1 Nesosorei sia kinisou ne rongorong ekkewe soufosun Kot ra kapas ngeni unusen fonufan. Am mi tongeok, Preseten Nelson, me ua pesei meinisin ekis meinisin repwe ausening me kaeo om kapas.
Mwen upwene tori engon me ruen uputiwei we, am famini aua su seni imwem fan ru me poputa sefan pokiten a wor osukosuk, noninen, me nukunukumang fan iten ewe maun me ekkewe sou emwen ra anini fengen. Ua men tipemwaramwar non ei fansoun, nge meni a men watte ewe noninen ren inei me semei.
Inei me semei ra chok ureni kem ekis usun ar chou ngeni kem am nour kewe femen. Ra aninis fengen won ar weires me riafou ren ukukun ar tongeni. Ewe nonien a men chou rer, a ani ar fansoun me angawa ar epinukunuk.
Ei fansoun rochopwak mwirin ewe Oruen Maunen Fonufan a eweiresi unusan fonufan. A aweiresiei.
Non ewe fansoun, non ai mefi akanaemon, ua ekieki, “Mi fen chiwen wor epinukunuk non fonufan?”
Chon nang Neich
Ren ai ekieki ei kapas eis, ua chechemeni ekkewe misineri seni Merika ra aninis neich non ekkana ier. Ra no seni ar kinamwe me imwer mi tumun me pwenni esop fonufan ngeni Germany—fonuen chon fiu ngenir—pwe repwe awora och epinukunuk ngeni chon fonuem. Rese feito ar repwe esita, kakapas, ika turunufasei. Ra pwisin finita repwe fangeno nge resap ekieki moni, ra chok mochen anisi aramas repwe kuna ewe sokkun pwapwa me kinamwe ra fen kuna.
Me rei, ekkei anuon me fopun mi unusoch. Mei pung a wor ar mwan, nge esap me rei. Fansoun meinisin upwe chechemenir usun ir mi watte seni manau—chon nang mi uren saram me ning, chon aninisin kirekiroch, murinno me ennet.
Non atun ewe fonufan a kokotiw ren koput, song, me netipechou, ewe fofforoch me afanafan seni ekkei anuon me fopun a auraei ren epinukunuk. Ewe kapas allim ra uwei a watte seni muu, uruo, netipengau me mochenin aramas. A wato ponuen kapaseis mi feito seni nang non atun am nom non fansoun riaffou.
Ewe poraus pwe Kot a manau me a tongei kich, ika mwo fansoun riaffou, osukosuk, me nikotupotup. Pwe I a ennetin pwato non ach fansoun pwe epwe eniwinato ennet me saram—An kapas allim me Mwichefen. Pwe A fos ngeni soufos sefan; pwe Kot a nom neich—me poun a nom non manauach me a emweni Noun kewe.
Mi amwarar met sipwe kaeo ika sipwe nengeniochu an Semach won Nang kokkotun manau ese much me fefeita, ewe kokkotun pwapwa, ren Noun kewe. Ika sia mefi pwe sise auchea, nikitino, me monnukuno, sia kaeo sefan pwe Kot ese nikitikicheno; ennet, I a ngeni Noun kewe och mettoch sise tongeni weweiti: pwe sipwe “angei minne Kot a isoni fanasengesin, sipwe pwan fiti Kraist non an we ning.”2
Met wewen ei?
Pwe sipwe manau feinfeino, angei unusan an pwapwa,3 me sipwe tufichin animwiri nenien motun king, muu, me manaman.4
Mi atekisonaei ren ai sinei pwe iei usun fansoun mwach mi amwarar me tekia mi tufich—esap pokiten kich io nge pokiten ion Kot.
Ren ach sinei ekkei mettoch, ifa usun sipwe netipengau ika songotam? Ifa usun sipwe netiw won ewe puun nupwen ewe Kingen ekkewe king a pesei kich sipwe sai ngeni fansoun mwach mi uren ennetin pwapwan nang?5
Manau ese Much Neich
Pokiten an Kot tong mi unusoch fan itach me ewe fangenon Jises Kraist, tipisich—kukun are watte—repwe tottonuno me esap chiwen chechemeni.6 Sipwe uta fan Mesan nimenimoch, monnota, me epinipin.
Netipei a ureno ren kinisou ren Semei won Nang. Ua weweiti pwe Ii ese nikitano Noun kewe repwe fetan fein non ei manau nge ese wor epinukunuk ren ewe fansoun mi saram me ese much. A awora an aurour mi aitikich ewe aan ngeni I. Me nukanapan meinisin ina Noun we Achengicheng, Jises Kraist,7 me met I a fori fan itach.
An ewe Samon angangen Achasefan a siwini ifa usun sia ekieki usun ach kewe tipis me nipwakingau. Sise chiwen ekieki pwe sisap manau ren I ika epinukunukungaw, nge sia kaeo senir me mefi epinukunuk.8 Ewe nifangen aier a mut ngeni kich pwe sipwe nikitano tipisich me sipwe winiti emon aramas minafo.9
Pokiten Jises Kraist, ach mwan esap ina wewen manauach. Nge ra tongeni apochokkuna kich.
Usun emon sou kon a achocho an epwe angoch, sipwe nengeni ach kewe mwan, tipis me nipwakingau pwe sipwe tufichin kaeo me weweiti pwisin kich, me anapano ach tong ngeni aramas, me pochokunsefan ren ach aier.
Ika sia aier, ach mwan esapw nemenikicheno. Ikkei kinikinin ach fefeita.
Kich meinisin monukon ika sia awewe ngeni ekkewe aramas mi ning me pin Kot a mochen sipwe winiti. Ese wor aramas epwe chok mwet seni to ngeni fetan ngeni sa nge esap akom weiresin kaeo, turutiw, me feiengau. Iei usun ach sia kaeo.
Ika sia ennetin achocho sefan, o achocho ne anneasochisi an Kot kewe annuk, me tiniken non ach aier, nikiitu, me manaueni mettoch sia kaeo, ekis me ekis, sipwe ioni saram non ngunuch.10 Ika mo sia ennetin weweiti ach tufich iei, “sia sinei pwe, nupwen [ewe Chon Amanau] a pwarano,” sipwe kuna mesemesan non kich, me “sipwe kuna ennetin I.”11
Ena pwon mi amwarar!
Ewer, ewe fonufan a nom non fitikoko. Me ewer, a wor ach nipwakingau. Nge sisap aporutiw chamwach non ach tipengaw, sipwe chok nuku non Kot, sipwe nuku non Noun We, Jises Kraist, me sipwe etiwa ewe niffangen ewe Ngun mi Fel pwe epwe emwenikich won ei aan pwe manauach epwe uren pwapwa me ennetin kinamwe.12
Jises me Neich
Fan ekkoch ua anchangei, Met ena Jises epwe afanafana ika A nom neich ikenai?
Mwirin an Manausefan, Jises Kraist a apwonueta An pwon epwe churi pwan Noun kewe “ekkoch siip.”13
Ewe Puken Mormon: Pwan Eu Kapasen Pwarata Usun Jises Kraist a aitikich usun eu atun a churi ekkewe aramas won ewe fonuen Merika. A wor rech ei puk mi auchea pwe epwe eu minen pwarata usun an ewe Chon Amanau angang.
Ekkewe aramas non ewe Puken Mormon ra manau won ewe epek fonufan—ar uruo, oreni, me muu mi sokono seni ekkewe aramas Jises a nom ren non atun a afanafan fetan non manauan. Nge I a chok pwan aitir ekkewe chok nongonong a aiti chon Jerusalem.
Pwata epwe fori iei usun?
Ewe Chon Amanau mi chok afanafana ekkewe ennet mi pung. Ir mi chok fich ngeni iteiten aramas meinisin ier me non nonnomur.
An poraus ew porousen epinukunuk me ketiw—eu kapasen pwarata pwe Kot Samach won Nang ese nikitano Noun kewe.
Pwe Kot a nom Neich!
Ruepuku ier a no, ewe Chon Amanau a niwin ngeni Fonufan. Ir me Kot ewe Sam, ra churi ewe anuon engon me ruanu ierin ina Joseph Smith me poputani ewe Niwinsefanton ewe kapas allim me ewe Mwichefenin Jises Kraist. Seni ena ran tori iei, nang mi suk, me chon nang ra feitiw seni nenier mi uren ning. Saram me mirit a feito seni ewe neniien mwotun nang.
Ewe Samon Jises Kraist a kapas sefan ngeni fonufan.
Met I a apasa?
Eu ach feioch, An kapas mi mak non Doctrine and Covenants—mi nom ren ion chok non fonufan a mochen anneani me kaeo ngenir. Ra fokkun auchea ekkei kapas ikenai!
Me sisap mairu ne kuna pwe ewe Samon a aitikich sefan ekkewe nongonongen An kapas allim: “Oupwe tongei ewe Samon Kot ren unusen netipemi, o ami pochokkun, ekiek me pochokkun; me non iten Jises Kraist oupwe angang ngeni I.”14 A pesei kich sipwe kutta Kot15 me manau ren ekkewe nongonong a aitikich ren Noun kewe chon angang, ekkewe soufos.16
A aitikich sipwe tongfengen nefinach17 me “uren tonge ennet ngeni aramas meinisin.”18
A tingoreikich sipwe winiti Poun kewe, me fofforoch ekis meinisin. “Sisap chok tong non kapas … nge epwe ren pungun me non ennetin.”
A pesei kich meinisin sipwe aneasochisi An ourour: ne tong, ne aea fengen, ne etiwa meinisin ngeni An kapas allim me Mwichefen.21
A annuku kich sipwe forata tempel mi pin me sipwe tonong me angang non.22
A aiti kich pwe sipwe winiti Noun chon kuno—pwe netipach resap mochenia ren pwisin nemenem, moni, tipeu ika wis. A aitikich sipwe “nikitano pisekin ei fonufan, me kutta ekkewe mettoch minen manau murinno.”23
A pesei kich sipwe kuta pwapwa, saram, kinamwe, ennet, tipachem,24 me ewe pwon ren manau fochofoch me manau ese much.25
Sipwe pwan ekis sopweno. Anean pwe Jises a feito ngeni ami wart, ngeni ami pranch ika imwemi ikenai. Epwe ifa sokkun?
I epwe kuna non ennetin netipom. Epwe nus mwan met a nom nukun. Epwe sinei ika met sokkun aramas sia winiti. Epwe pwan sipwe mochenin netipach.
Ekkewe mi tipetekison me mosonoson Epwe seikireta.
Ekkewe mi semwen Epwe echikara.
Ekkewe tipemwaramwar Epwe ngeni nuku me pcohokkunen nuku.
Epwe aitikich sipwe suki netipach ngeni Kot me eitieu pouch ngeni aramas.
Epwe esinna me sufoniti wenechar, tipetekison, nukuchar, umoumoch, me tong ennet.
Sipwe chok nengeni non mesan me sisap pwan ususun we chok. Sipwe ekkesiwin feinfeino chok. Ekkesiwin a feito seni ach weweiti pwe, ennet, Kot a nom neich.
Met Sipwe Fori?26
Ua nesefaniti ren umoumoch won ewe anuon me ne anuwonuwe. Ika pwe mi tufich ai upwe niwisefaniti ewe fansoun, upwe echipa i me ereni epwe chok nonom non ewe aan mi pung me sopweno ne kutta. Me upwe tingorei epwe etiwa Jises Kraist non manauan, pun Kot a nom neich!
Ngeni ami, pwii me fefinei, chiechiei achengicheng, me ekkewe meinisin mi kutta ponuen kapas eis, me pwapwa, ua pwan pesei kemi: Sopweno ne kutta ren nuku me tipepwos.27
Tingor, me oupwe angei. Fichifich, iwe epwe suk ngenikemi.28 Nuku non ewe Samon.29
Non manauach iteiten ran mi watte wisach nge pwan watte feioch pwe sipwe churi Kot.
Ika sipwe nikiti tipepochokkun me feino ren an nenien mwotun king ren netipach mi suk me tekisoson,30 I epwe arap ngeni kich.31
Ika sipwe achocho ne tapweno mwirin Jises Kraist me fetan won aanen ekkewe mi tupwon, ekis me ekis, ewe ran epwe feito pwe sipwe kuna eu sokkun feioch pwapwa sisap tongeni weweiti.
Chienai achengicheng, Sememi won Nang a tongei emon me emon ami non unusoch. I a fen pwarano an tong non sokkopaten aan, nge mwen mettoch meinisin a fangeno Noun we Anaemon pwe niffangen Noun kewe pwe repwe niwinsefan ngeni nang.
Ua pwarata pwe Samach won Nang mi manau, pwe Jises Kraist a nemeni An Mwichefen, me Preseten Russell M. Nelson i Noun soufos.
Upwe anapano ai tong me feioch ngeni kemi non ei fansoun pwapwan Paska. Suki netipemi ngeni ach Chon Amanau me Chon Angasano, ese nifinifin ami meinisin, sossot, riaffou ika muan, oupwe sinei pwe I mi manau, A tongei kemi, me ena pokiten I, esap wor emon mi anaemon.
Kot a nom neich
Ren ei ua affata me pwarata non ewe it mi pin iten Jises Kraist, amen.