Met Kich Mi Kakaeo me Sise Tongeni Monnukano
Ika ke nengeni manaom non om ikiotek, Uwa nuku kopwe kuna sokopaten anen non menni ewe Samon a fen emwenuk non ei fansoun weires.
Pwi achengicheng, Ua men atapwana ei fansoun mwich ai upwe churi kemi. Saingon ach chufengen non ewe fansoun mwichen pristut ren ewe mwichenap non ewe April 2019. Chommong mettoch mi fis non ekkewe ruu ier ra no! Ekkoch me neimi oua nusuni aramasemi oua men tongei. Ekkoch oua nusuni ami angang, nonnomumi, me pochokunemi. Ekkoch oua mi chiwen tipemwaramwar ren kinamwe ika epinukunuk ren ekan fansoun mwach. Netipei a nonom ren emon me emon ami oua mefi ekkei sokkun riafou ika ekkoch weires. Ua iotek iteitan fansoun meinisin pwe ewe Samon epwe oururu kemi. Iwe ren kopwe sopweno ne mut ngeni Kot epwe nemeni manauom, Ua sinei pwe A wor an kokkot ngeni manauom non kan fansoun mwach pwe efen sinei.
Me non met ekkewe sia nusuni minne sia fen weri, mi pwan wor mettoch sia fen kuna Ekkoch ra kuna anononun ar nuku non Samach won Nang me Noun we At, Jises Kraist. Chommong ra kuna eu minefon kokot non manauer—pwan ewe kokotun manau ese much. Kopwe pwan kuna pochokunen nefinemi me ekkewe oua tonger me ewe Samon. Me ua aneanei ouwa fen kuna waten tufichin ami ousening ngeni Ii me angei ami pusin pwarata. Weiresin sosot a ngeni kemi ami tufichin oupwe fefeita ese chok fissita seni ekkoch wewe.
Ekieki sefani ekkewe ruu ier ra no. Ifa usun ami fefeita? Met oua kaeo? Ina opwe fen anean opwe niwinsefaniti ewe ier 2019 opwe nonom ie! Nge ika pwe oua nengen fichi manauemi ren iotek, ua nuku pwe oupwe kuna chommong anen an ewe Samon emweni kemi non ei fansoun weires, anisi kemi ami oupwe enetin pochokun, wesewesen emon a osen ekesiwin—ennetin emon noun Kot aramas.
Ua sinei pwe mi wor an ewe Samon watten me murinon kokot fan itach—emon me emon me kich meinisin. Ren tong me nikitu, A apasa:
“En kukun semirit, me kose mwo kon nien weweiti usun watten feioch ewe Sam a … amonata fan itom;
“Me sise mo tongeni pworacho ngeni mettoch meinisin ikenai; nge, sipwe chok pwapwa, pwe I epwe emweni kich.”1
Ami pwi achengicheng, Ua pwarata pwe A fen, me mi ennetin emweni kich, nupwen sia kuta me ausening ngeni Ii. A mochen sipwe fefeita me kaeo, usun chok—sipwe fori akaewin non—sosotuch.
Weires ew murinon sense. Met ka fen kaeo non ekkewe ru ier ano ka chok mochen kopwe chechemeni? Ponuwan epwe sokkono pwisin ngonuk, nge kose mochen upwe apasa ruanu nesen ua anean amwo sia kaeo me sisapw tongeni monnukano.
Nesen 1: Ewe Imw ewe Nongonongun Nuku me Pin
Iteitan nupwen ewe Samon epwe esinengeni kich usun ewe fansoun osukosuk chapur ren ewe saingonon ran, Epwe apachanong ei pesepes: “Kopwe uta non ekkewe neni mi pin, me kosapw mokut.”2 Ekkei “neni mi pin” kapachenong an ewe Samon kewe tempel me imwen chufengen. Nge me ren ach tufichin mwichefengen non ekkei neni mi kan keuk non ach sokkun napanap, sia kaeo pwe eu me nein ekkewe neni mi pin non fonufan iwe ewe imw—ewer, mi pung imwom ewe.
Pwi kenan, mi wor reom ewe pristut an Kot. “Ewe pochokunen ewe pristut a chok fokkun riri ngeni ewe manaman seni nang.”3 En me chon non omwe famini ouwa fen angei ekkewe efeiochun pristut. Mi wor “non ekkewe efeiochun [ren ewe pristut ina] ewe manamanen Kot a pwapwano.”4 Ena manaman mi wor fanitom me om famini non pusin imwom nupwen ka aneasosichi ekkewe pwon ka fori.5
Ewe chok ier 185 a no, non ei ososen ran, April 3,1836, Elijah a fen eniwinisefani ewe kiien ewe pristut ena a mut ngeni famini repwe riri fengen feifeino chok. Ina ren popun a men fokun ochupor epwe or angangen ewe Sakrament non imwom. Ifa usun om mefi an anisi chon om we famini ar nengonuk—semer, semer chinap, punuwan, noun at, ika pwin—fori ei efeioch mi pin? Met kopwe fori an epwe chok nonom ena memef mi pin non om we famini?
Enip kopwe mefi pwe mi chiwen pwan wor ekkoch mettoch mi namot kopwe fori epwe anisi imwom we epwe ennetin pin ren nuku. Ika mi tufich, kose mochen kopwe fori! Ika pwe en mi pupunu, kapas ngeni punuwom chienom ami mi chok taitap non ei angang mi auchea. Mi wor chommong mettoch met mi kon auchea nap seni ei. Nefinen ei fansoun me ewe fansoun ewe Samon epwe niwinsefanito, a namot ngeni kich meinisin an imwach epwe eu nenien umoumoch me tumun.6
Mokutukut me foffor a etiwa ewe Ngun mi Fel epwe anapano ewe pin non imwom. A namot epwe chok taitap pwe epwe wor nimenimoch ika pwe mi wor mettoch non manauom me unukum epwe tongeni atowawano ewe Ngun mi Fel, pun ina “ewe nang epwe pusin utau ika atowawareno.”7
En mi mwo ekieki ika pwata ewe Samon a mochen sipwe fori imwach kewe repwe akaewin eu nenien kaeo ewe kapas allim me manaueni ewe kapas allim? Ese chok amonakicheta, me anisi kich seni, ewe eu pandemic. Ekkei annukun chufengen mi wor ikenai epwene sopw. Nge nengeni, om kewe pwon ren om kopwe imwom nenien kinter angangen nuku esapw tongeni epwe much. Nupwen nuku me nimenimoch epwe kisino non ei fonuen turutiw, a namot ngonuk eu neni mi pin epwe wateno. Upwe pesengonuk kopwe sopweno ne fori imwom epwe ennetin eu neni mi pin “me kosapw mokut”8 seni ena kokkot amen auchea.
Nesen 2: Sipwe Auchean Fengeni Kich
Kot a mochen sipwe angang fengen me aninis fengen. Ina popun A tinikicheto won fonufan non famini me ochufengeni kich non wart me steik. Ina popun a tingorei kich sipwe anisi me imwari fengeni kich. Ina popun A tingorei kich sipwe manau non ewe fonufan nge sisapw chon ewe fonufan.9 Sia tongeni chufengen ne aponueta chommong mettoch nap seni ach sipwe akanaemon.10 An Kot kokotun pwapwa esapw fisioch ika pwe Noun semirit rese angang fengen.
Ewe pandemic mi chok fis a fokkun watte angangan ngeni emon me emon non ewe fonufan non ewe chok fansoun. Nupwen ekkoch ra kon wesen weires nap seni ekkoch, sia fokkun kuna riafou non ekkoch wewe. Pokiten ei, sosotuch meinisin mi tufich epwe ochufengeni noun Kot semirit usun ese fis me mwan. Nge, iwe uwa eis, ei riafou tori kich meinisin a anisuk om kopwe arap ngeni chon orum—ngeni pwim me fefinom ewe esop aan non unusen fonufan?
Non ekkei wewe, ekkewe ruu waten annuk a tongeni emweni kich: aewin, sipwe tongei Kot, oruwan, sipwe tongei chon oruch.11 Sia pwarano ach tong seni ach aninis.
Ika pwe mi wor emon mi chok akanaemon, tumunur—ina mwo ika en mi pwan mefi anaemon chok! Ese namot an epwe wor popun ika porous ika tufich om kopwe fori. Kopwe chok apasa ran anim me pwarano om tong. Teknonochi a tongeni anisuk. Pandemic ika esapw mine, emon me emon noun Kot semirit a namot repwe sinei pwe rese anaemon chok!
Nesen 3: Om Mwichen Pristut akon Auchea Nap Seni Chok eu Mwich
Non ei fansoun pandemic, mwichen Raninfel a kesip ren eu fansoun. Ekkoch mwich ra keran chok chusefan fengen. Nge nengeni, ewe angang an ewe Samon a ngeni ekkewe mwichen pristut ese tongeni an epwe kouno ar chufengen. Mwich eu chok kukunun kinikinin met auchean ewe mwich me met repwe tongeni fori.
Pwi kewe seni ewe Pristut seni Aaron me mwichen elter, awateno om weweiti pwata a wor ach mwich. Ifa usun ewe Samon a mochen kopwe aea om we mwich ne apwonueta An angang—iei? Kuta pwarata seni ewe Samon. Etekisona kotiw! Tingor! Ausening! Ika pwe kafen koko ngeni om kopwe emwen, auraur fengen ren ewe presetensi me ren chon ewe mwich. Met chok sokkun wisom me non pristut ika kokom, mut ngeni Kot epwe emwenuk non om angang usun emon memper non om we mwich me non om we angang. Manaueni ren pwapwa ewe nukuchar kopwe fori usun kafen fori kopwe fokkun nukuchar non om angang och.12 Mwichen pristut eu wis amen unusen auchea ne anganga me ochufengeni Israel non me ruepek ewe mangakun manau me mano.
Nesen 4: Sia Rongoch Jises Kraist Nupwen Sia Mosonoson.
Sia nom non ei manau usun afen osini me nom, nupwen “mettoch meinisin epwe oskosuk; me epwe fis, aramas meinisin repwe turutiw; nuokus epwe fis ngeni aramas meinisin.”13 Ena mi pung me mwen ewe pandemic, me epwe pwan ennet me mwirin. Osukosuken non ei fonufan epwe wateno. Ren sokofesenin, nouwen ewe Samon esapw “ew mongungun chopunap, nge … eu [chok] unusochun mongungu mi pwetete, [usun] ita ew neukukkunun mongungu, iwe a [pwereni] ngeni ewe fokkun ngun.”14 Anen ach sipwe tongeni rongorong ei noukukunun ngingi, a namot kopwe pwan mosonoson!15
Ren eu fansoun, ewe pandemic a akouono ekkewe mokutukut a anisi manauach. Ekis ngeni chok sipwe tongeni ach sipwe fini ach sipwe amasowa ewe fansoun sefan ren ewe nouomong me osukosuken ewe fonufan. Ika sia tongeni aea ach fansoun ach sipwe rongorong nouwen ewe Samon non An mongunungunun emwen, ourur, me kinamwe. Fansoun mosonoson eu fansoun mi pin—fansoun om kopwe suki netipom ren pusin om pwarata me mosonosonun kinamwe.
Awora om fansoun ngeni pusin en me ekkewe ka tonger. Suki netipom ngeni Kot non iotek. Awora fansoun om kopwe onomu manauom non ekkewe pukefen me pin non ewe tempel.
Pwi achengicheng, amen chommong mettoch minne ewe Samon a mochen sipwe kaeo seni met a fisi ngeni kich non ei pandemic. Ua atetenatiw fokkun ruanu chok. Upwe tingor ngonuk kopwe pusin fori eu om nis, ekieki fichi, me aiti ngeni ekkewe ka tonger.
Ekan fansoun mwach mi saram ren noun Kot aramas mine mi oponueta an kewe pwon.16 Ewe Samon epwe anapano an koko ngeni Noun kewe chon angang mine mi nukuchar ren ewe pristut ne efioch, ourur, me apochokuna aramas me anisir ar repwe amonata ewe fonufan me noun aramas ren An we Oruwen Wareto. A auchea ngeni kich ach sipwe awateno ach kewe angang mi pin mine sia fen angei. Sia tongeni fori ei! Ua unusen pwarata, ren ai tong ngeni emon me emon ami, non ewe it mi pin iten Jises Kraist, amen.