Ua Fokkun Sani ai upwe Kuna ewe Tempel
Non ewe tempel ikewe ie sipwe angei enukunukun tongen ochufengenin famini kewe repwe sopwosopwono mwirin mano tori ese much.
Pwii me fefinei achengicheng, uwa unusen kinisou ren ai nomw remi non ei aewin kinikinin mwichenap. Kewe chon afanafan, kewe kon, me kewe iotek ra uweiato ewe Ngun mi fel—me pwan memefin saram me epinukunuk.
Ena memef a fen uweisefanieto ai chemeni ewe aewin ran ua fetanong non ewe Salt Lake Tempel. Ngang ua chok emon anuon. Inei me semei kewe ikanair chok chienei non ena ran. Non, ra kouno ren ekis fansoun ren an kewe chon angangen ewe tempel etiwetiw. Uwa anamon ne fetano mwer, ren ekis fansoun.
Uwa ketiw meren emon fefin mi pwech mekuran non ufan mi ning ufoufen non tempel mi pwech. A neta rei emenimen me a neukukun me apasa, “Uwa etiwok ngeni ewe temple, Brother Eyring.” Uwa ekieki ren ekis fansoun pwe ii emon chon nang pwokiten a sinei itei. Use tepereni pwe mi wor ew kukun kart mi mak itei won a nomw won ufei we sekit.
Uwa ipwe seni me uwa kouno. Uwa neta ngeni ewe tencho mi saram ewe a asarama unusen ewe rum usun nge ita mi suk ngeni ewe kuchu. Me non ena fansoun, ewe ekiek a tonong non ai ekiek ren kei kapas mi fatoch: “Uwa fen pin nomw non ei neni mi saram memwan.” Nge mwitir chok mwirin ra feito ngeni ai ekiek, esapw pwisin ngingi, ekkei kapas: “Apw, kese mwo pin nomw ikei memwan. Ka chechemeni ew fansoun me mwen ka uputiw. Ka nom non ew neni mi pin usun ei.”
Nukun ach kewe tempel, sia anomwu kewe kapas “Pin ngeni ewe Samon.” Uwa pwisin sinei pwe kena kapas mi ennet. Ewe tempel ew neni mi pin ikewe pwarata a feito ngenikich non mecheres ika netipach mi suk ngeni me kich mi nimenimoch ngeni.
Mwirinon ena ewin ran uwa pwan mefi pwan ena chok Ngun. Ewe afanafanen ewe tempel fiti ekkoch kapas ekewe ra uweato ew memef mi pwichikar non netipei, a apungano pwe met kewe uwa mefi mi ennet. Met ua mefi a auchea ngeni ei faniten manauaei non fansoun mwei, me a fisi ngeni ei mwirin 40 ier nupwen ua angang ngeni ewe Samon.
Uwa pwan mefi ei memef nupwen uwa epupunu non ewe Logan Utah Tempel. Preseten Spencer W. Kimball a fori ewe epinipinin riri. Non kewe fitu kapas a apasa, a watiw an eureur, “Hal me Kathy, manaw pwe nupwen ewe koko a war, oupwe tongeni fetan seni non mecheres.”
Nupwen an a apasa ekkena fitu kapas, uwa kunaochu non ai ekiek, non unusen onuan , ew chuk mi kukuta me efoch aan mi aneta ngeni asan. Ew tit mi pwech a sa won peniefefinen ewe aan me a morono an a tikenong nein kewe ira won ewe chukuchukuta. Ew imw mi pwech ese kon pwaechuno nein kewe ira.
Ew ier mwirin, uwa esina ena chuk nupwen semen punuwei we a uweikemita won ewe aan. Mi nomw non tichikin met uwa kuna nupwen an Preseten Kimball a ngeni kem an eurour me non ewe tempel.
Nupwen auwa tori won ewe chukuchukuta, semen punuwei we a kouno nukun ewe imw mi pwech. A urenikem pwe iir me punuwan ewe repwene meoni ewe neni me ra mochen neur we nengin me ngang aupwe nomw non ewe imwen wasona. Repwe nom non ewe imwe watte, fitu chok fit towawan Iwe, non ekkewe 10 ier auwa nomw non ena sokkun murinon famini, ngang me pwunuwei we upwe ara iteiten ran, “Sipwe fen anamota non pwapwa ei, pwokiten sisapw nomwotam ikei.”
Ew kokko a feito seni ewe Church Commissioner of Education, Neal A. Maxwell. Ewe esinesin seni Preseten Kimball ren ai upwe tongeni “fetan seni non mecheres” a pwenueta. Ew kokon aupwe peutano met usun mi unusech ngeni nonomwumw ren aupwe angang non ew neni use sinei mwo ekis ussun. Am ewe famini a monota an epwe nikitano ewe fansoun me neni mi feioch pokiten emon soufos, non ewe tempel mi pin, ew nenien pwarata, a kuna ew fansoun mwach ewe auwa monota ngeni.
Ngang mi sinei pwe tempel an ewe Samon neni mi pin. Popun ai afanafan ikenai ren kewe tempel an epwe awateno omw mochen me ai ai upwe nimenimoch me monota ngeni kewe wattenon foforun tempel repwe waroto ngenikich.
Ren ngang, ewe watten epechekun ren ai upwe nimenimoch ren kewe foforun non tempel usun met ewe Samon afen apasa usun Imwan kewe mi pin:
“Ika nei aramas ra euweta ewe imw fan itei non iten ewe Samon, me rese mutata och mettoch mi nimengaw ar repwe tonong non, pwe esapw nimengaw, an ning epwe nonomw won;
“Ewer, ai nonom epwe nomw ikena, pwe upwe tonong non, me meinisin kewe mi nimenimoch non manauer repwe tongeni tonong non repwe kuna Kot.
“Nge ika ewe imw epwe nimengaw Usap tonong non, me ai ning esapw nom non ikena; pwe usap tonong non kewe tempel ese pin.”1
Preseten Russell M. Nelson a afata ngenikich pwe sipwe tongeni “kuna” ewe Chon Amanaw non ewe tempel non ew nikinik esapw chiwen usun ach sise sisinei. Preseten Nelson a apasa ei: “Kich sia weweiti I. Sia weweiti An angang me An ning. Me sia poputa me mefi pechekunan esemuch ren manawan ese wor tapin.”2
Ika en me ngang sipwe feino ngeni ewe tempel nge sise unusech, sisapw tongeni kuna, ren manamanen ewe Ngun mi Fel, ewe afanafan usun ewe Chon Amanau sia angei non ewe tempel.
Nupwen sia nimenimoch ach sipwe angei ei pekin kaeo, repwe tongeni marita non ach nonom non tempel, pwapwa, me nukunuk non unusen manawach. Ena epinukunuk, pwapwa, me nukunuk ra nomw chok non kewe angang sia fori non kewe tempel mi pin. Non ewe tempel ikewe ie sipwe angei enukunukun tongen ochufengenin famini kewe repwe sopwosopwono mwirin mano tori ese much.
Chommong ier a no, nupwen ngang emon pisop, emon enuwen ese mwochen ai tungorei an epwe winiti emon mi nomw ren Kot non famini feinfeino. A opworousa ngeniei usun kewe fansoun mi och an ngeni chiechian kewe. Uwa mwut ngeni epwe kapas. Iwe a oporousa ngeniei ew fansoun non ew an kewe pari, nukanapen ewe ekurang, nupwen a mwitir apareni pwe a mefi an akanamon. Uwa eisini atewe ika met a fen fis. A apasa pwe a chechemeni ew fansoun nupwen ichok emon kukun aat, a momot won pechen inan ewe, fiti peeun inan ewe kewe mi kamoch ii. Ren ena fansoun nupwen atewe a ureniei ena porous, a nonou me non mesan. Uwa apasa ngeni met uwa sinei mi pwung: “Ew chok anen epwe wor remw ena memefin famini feinfeino ren omw kopwe nimenimoch won winikapom me anisi ekoch ar repwe angei kewe epinipinin riri fengen non ewe tempel.”
Sise sinei tichikin famini non ewe nenien ngun ika met epwe feito mwirin sia manausefan. Nge sia sinei pwe ewe soufos Elijah a war usun afen pwon epwe ekesiwini netipen kewe semenap ngeni kewe semirit me kewe semirit ngeni kewe semenap.3 Me sia sinei pwe ach pwapwa esemwuch ra anongonong won ach fori mi och ren an epwe kawor ewe pwapwa ese mwuch ngeni ese pwan nifinifin usun kich mi tongeni.
Uwa mefi ei memef ai upwe tungorei chon famini ar repwe nimenimoch pwe repwe angei me asamwonu kewe angangepinen riri fengen non ewe tempel. Ina masowen ewe pwonen ochufengeni Israel non ewe ranin soponon won me ruepek ewe epet.
Ew watten ach tufich nupwen chon non ach famini mi chiwen kukun. Ra upwutiw fiti ewe nifangen Saramen Kraist ussun ew niffang. Epwe atufichir ar repwe mefi met mi eoch me met mi ngaw. Ren ena wewe, ar kuna ew tempel ika niosun ew tempel epwe tongeni awora ew mwochen rer pwe fan ew repwe tonong non.
Ewe ran a tongeni waroto nupwen, ussun emon sarafo, ra angei neur toropwen mumuta non tempel ar repwe papatais fan iten ekkoch non ewe tempel. Non ena wewe, ar memef epwe wateno, pwe kewe angangepin non ewe tempel, repwe itingeni ewe Chon Amanau me and An Achasafan. Ren ar mefi pwe ra mwut ngeni emon aramas non ewe nenien ngun ewe tufichin nimoch seni an tipis, mefier epwe watteno ren ar anisi ewe Chon Amanau non An angang mi pin, ren efeiechun emon neun Samach non Nang kewe.
Ngang uwa fen kuna pechekunen ei foffor a ekesiwini manawen emon sarafo. Ekkoch ier a no, uwa fiti emon nei nengin non ewe tempel non ew kunionun. I ewe saingon chon fori pekin papatais non ewe nenien papatais. Ra eisini nei nengin ika mi tongeni nomwotamono an epwe awesi ewe angangepin fan iten ekkewe aramas iter rafen monota. A apasa, “Ewer.”
Uwa katon ren an neiwe nengin a tonong non ewe nenien papatais. Ewe papatais a poputa. Neiwe kukun nengin a wor konik a pwuutiw won mesan iteiten a tuta seni ewe konik. Ra eniwin me eisini safan, “Ka tongeni fori pwan ekoch?” Iteitan a apasa, “Ewer.”
Ren emon sam mi nuokus, uwa poputa ne anean pwe epwene wes ne fori pwan ekkoch. Nge uwa chechemeni an nikitu nupwen ra eisini ika mi chiwen tongeni fori pwan ekkoch me an penuweni non ngingin mi kukun, “Ewer.” A nomw tori ewe saingonon aramas won ewe taropwen iit non ena ran a angei ewe efeiechun papatais non iten Jises Kraist.
Nupwen auwa fetaneu seni ewe tempel non ena pwinin, uwa ekieki usun met uwa fen kuna. Emon semirit a kekita me siwin memwen mesei ren an angang fan iten ewe Samon non Imwan ewe. Ngang mi chiwen chechemeni ewe memefin saram me kinamwe nupwen auwa fetan seni ewe tempel.
Chommong ier rafen no. I mei chiwen apasa ewer ngeni ewe kapas eis seni ewe Samon ika epwe chiwen fori ekoch fan Itan ika mwo mi weires. Ina met angangen tempel epwe tongeni fori an epwe ekesiwini me ekikicheta. Ina pwopwun ai anean fan itom me atongeom chon famini meinisin pwe kopwe awateno omw mochen me achocho ngeni omw kopwe nimenimoch omw kopwe tonong non ewe imwen ewe Samon iteitan ren nonomwun mi mwut ngonuk.
I a mwochen epwe etiwokonong. Uwa iotek pwe kopwe achocho ngeni me fori omw mochen non netipen neun Samach won Nang kewe ar repwe feino ikena, ikewe repwe mefi ar arap ngeni, me kopwe pwan tungorei om kewe neuo ar repwe tongeni nomw Ren me remw feineino.
Ekkei porous repwe tongeni ach:
Ua ennetin sani ai upwe kuna ewe tempel.
Upwe feino ikena non ekoch ran.
Ai upwe mefi ewe Ngun mi Fel,
Upwe eusening me iotek.
Ren ewe tempel eu imwen Kot,
Ew nenien tong me ning.
Upwe ammonata manawei nupwen ua chiwen kukkun;
Iei wisei mi pin.4
Ua pwarata pwe kich noun Samach won Nang mi tong. A finata Noun we Anamon, Jises Kraist, epwe ach Chon Amanau me Chon Angasano. Ew chok aanen ach sipwe niwin me nomw Rer me ach famini ren angangen non kewe tempel mi pin. Uwa pwarata pwe Russell M. Nelson mi komoch me fori ekewe kien pristut meinisin kewe ra mwut ngeni manau fochofoch epwe tufich ren neun Kot kewe. Ua pwarata non itan Jises Kraist mi pin, amen.