Pishop—Chon Masen Mwicheichen noun ewe Samon
Auchean wisen ewe pishop pwe epwe wisen mamaasa me emweni ewe tappin sarafo ngeni Jises Kraist.
Pwii mi achengicheng non ewe pristut, ew ren ewe wokisin mi itefouno-konun fan a eis, “Iwe met ekkewe sarafon Sion repwe turutiw?”1 Seni netipei me wesewesen watten ai upwe wau ren ponuwan ena kapaseis “Apw!”
Ren pungun ai penuweni, Uwa pwarata ikenai pwe aninis ngeni ewe tappin sarafo non ei fansoun mi wor och sokkun weires me sossot ina eu auchean wiis ngeni sam me in me ekkewe pishop fiti nour chon aninnis seni Semach won Nang.2 Upwe awewei auchean ewe pishop me noun chon aninnis ren eu mettoch a fis ngeniei pwisin.
Atun ngang emon tiiken, ai famini a mokut ngeni ew minafon imw non pwan eu wart mi sokono. Uwa karen poputa ne fiti sukkunen high school, iwe uwa pwan fiti ew minafon sukkun. Mi wor ew amwararen mwichen ekkewe at non ewe mwichen tiiken. Napengeni semer me iner kewe ra pochokun non fan. Inei we a pwan pochokun non mwichefen; semei we a amwarar non mettoch meinisin nge ese pochokun ne fifiti fan.
Ewe aruemonun chon aninnis non ewe pisoprik,3Brother Dean Eyre, a emon sou emwen mi achocho. Atun ngang mi chiwen minafoto non ewe wart, eu fansoun mwicheich faniten sam-nau a katou esinesin ren Bear Lake—a ukukun 40 mwain (65 km) towawan. Use ekieki upwe fiti ika semei ese pwan fiti. Nge Brother Eyre a pwisin etiwa ngeniei pwe upwe fiti i. A mwareiti me sufoniti semei we me a awewe pwe a kan aucheani ewe fansoun ai upwe fiti ekkewe chon ewe mwichen tiiken. Iwe uwa fini pwe upwe fiti Brother Eyre, me ua fokkun sani ewe fansoun chufengen.
Brother Eyre a fokkun eu nenien apiru usun an Kraist tong ren an apwonueta wisan ewe pisoprik ne anisi sam me in ne mamasa me tumunu ekkewe sarafo. A kan anisiei ne ngeni ew mwirinon fansoun poputa sefan non ei minafon wart me a kan tumunu ei.
Fitu maram me mwen uwa feinno won ai we mission non ewe ier 1960, Brother Eyre a mano ren ewe semwen cancer otun an a chok 39 ierin. A nikitatiw punuwan me nour kewe nimon semirit, minne meinisin ierir mi kukkun seni 16 ier. Noun kewe at watte, Richard me Chris Eyre, ra ereniei ren semer we a mano, ekkewe pisoprik ra kan tutumunur me mamaser me pwir me fefiner kewe kukun ren an Kraist tong, minne uwa kan kinisou ren.
Sam me in ir akkom wisen chon tumunu ar kewe famini.4 Presetensin mwich repwe pwan awora aninnis mi auchea me emwen ngeni chon fiti ar sokopaten mwich me ren ar anisir ne aucheani wiser me ar manamanan ewe Pristut seni Aaron epwe nom non nukanapwen manauer.5
Ikenai ai we popun a nongonong won ekkewe pishop me nour kewe chon aninnis, minne mi och sipwe kokkori “chon masen mwicheichen noun ewe Samon”— me auchean won wiser chon mas ngeni ekkewe sarafo.6 A auchea pwe ewe Aposen Peter a iteni Jises Kraist “ewe Chon Masa me Pishop ren ngunumi.”7
Ewe pishop a wor nimu auchean kinikinin wisan ne emweni eu wart.
-
I ewe prist tekia mi nemeni non ewe wart.8
-
I ewe presetentin ewe Pristut seni Aaron.9
-
A wisen emweni ewe angangen amanawa me manau esemuch, fiti tumunun ekkewe mi osupwang.11
-
Me a nemeni ekkewe puk, moni me foffor mi fiis non ewe imwen fan.12
Non wisan prist tekia mi nemenem, ewe pishop i ewe “chon emwen won pekin ngun” ngeni ewe wart.13 I emon “chon angangen Jises Kraist mi nukuchar.”14
Me pwan, “ewe pisop a wisen emweni ewe angangen amanaua me manau esemuch non ewe wart.”15 Ewe pisop epwe ngeni ekkewe presetensin ewe mwichen elters me Fin Anisi wiser iteitan ran ne afanafana ewe kapas allim, apochokuna minafon me member mi niwinsefan, iamwiri, me angangen tempel me uruon famini. 16 Ewe pisop epwe wisen emweni ei angang non ourour fengenin ewe wart me sarafo non ewe wart.
Auchean wisen ewe pisop pwe epwe wisen mamaasa me emweni ewe tappin sarafo, tori pwan ekkewe sarafo watte rese mwo opupunu, ngeni Jises Kraist. 17 Preseten Russell M. Nelson a awewei auchean ewe wis napanap an ewe pishop me noun kewe chon aninnis. A aiti kich pwe ar “akkaewin me napanapen wis repwe tumunu ekkewe anuon me fopun non [ar] wart.”18 Ewe pisoprik a anisi sam me in ne mamasa me tumunu semerit me sarafo non ewe wart. Ewe pisop me presetenin Fopun non ewe wart ra ourour fengen. Ir ra achocho ne anisi ekkewe sarafo ne manaueni ekkewe nongonong non ewe Ren ewe Apochokunen Sarafo, amonatan angei ekkewe effeioch, me fori me apwonueta pwon mi pin.
Meni kopwe eis, “Pwata ewe pisoprik repwe kon angang ngeni ekkewe sarafo fan chommong?” Ewe Samon a ettetteni An Mwichefen ne apwonueta popun mi fokkun auchea. Iwe, ewe tettenin An Mwichefen a fori non eu napanap minne a wor ru angang an ewe pishop. A wor nongonongon wisan ngeni ewe wart ren unusan, nge a pwan awora tichikin nongonongon wis fan iten ewe mwichen prist.19
Ekkewe anuon minne ir mi wiseni pris me ekkewe fopun minne mi chok nono ierir fengen ra tori eu fansoun mi fokkun auchea non manauer me ar mamarita. Non ei kukkun fansoun, ir mi fini mettoch minne a fokkun auchea ngeni met epwe fiis non manauer. Ra fini ika repwe tongeni tonong non tempel, me fori angangen missionari,20 achocho ngeni opupunu non ewe tempel, me amonneta fan iten angangen manauer. Ei mettochun fini, mwirin ra fen fini, epwe efisi mettoch watte non pekin ngun me ososen met epwe fis ngenir non nusun ar manau. Ami pisop, ouse mochen oupwe sinei pwe och chok mwochomwochen ami fansoun ngeni emon sarafon pris, ika fopun mi tongeni anisir ne weweiti ewe manaman mi kawor ngenir me ren ewe Achasefan an Jises Kraist. A tongeni efisi eu tufichin kuna minne epwe fokkun anisir non unusen manauer.
Eu awewen mi fokkun och minne uwa fen kuna usun emon pisop a aninis ne awora eu tufichin kuna ngeni emon sarafo mi fiis ren Pisop Moa Mahe. I a koko ngeni epwe ewe akkaewin pisop non ewe San Francisco Tongan Wart.21 A mamarita me mwokut seni Vava‘u, Tonga. An wart a arapakan ngeni ewe San Francisco, kasoro, ia a angang ie.
Ewe wart a wor chommong sarafo, chommong me neir ir mi nom non famini ra keran mwokut ngeni United States. Pishop Mahe ese chok aitir ren kapas me nenien appiru ifa usun repwe chon kuno mi nukuchar ngeni Jises Kraist, nge a pwan anisir ne kuna met repwe tongeni winiti me anisir ne ammoneta fan iten ewe tempel, mission, sukkun, me angang. A angang arapakan wanu ier, me an kewe mochen fan iten ekkewe sarafo a ponueta.
Akarap ngeni 90 ukukun ekkewe anuon non ewe Pristut seni Aaron ra fen fori ar angangen mission. Me non 1987, 15 anuon me fopun ir ekkewe ra akkom ne fiti college non ar kewe famini.23 A churi ewe meinapen ewe high school non nenian (esap chon ei mwichefen), me ra poputa eu chiechifengen me angang fengen ren ifa usun repwe anisi meinisin ekkewe sarafo repwe apwonueta mwirinon mochen me pworacho ngeni mettochun osukosuk. Ewe meinap a apasata pwe Pisop Mahe a anisi i non an angang ren ekkewe ra feito seni ekkis meinisin seni sokopaten mwichefen minne ir mi osukosuk. Ekkewe sarafo ra fen sinei pwe ewe pisop a men wesen tonger.
Netipengaw, Pisop Mahe a mano nupwen mi chok chiwen emon pisop. Use tongeni menukano an attun peias mi ku netipei me mi asaramano ekieki. A fokkun chommong aramas. Ekkewe chon kon ir mi fiti ir mi nap seni 35 member sarafo mi tupwen minne ra fen awesi ar angangen mission ika ra fiti college me ir ekkewe sarafo atun an we emon pisop. Emon chon afanafan a fos usun ewe watten memmefin kinisou chapur seni ekkewe sarafo me serafo watte non ewe wart. A achema usun an Pisop Mahe atufichir ne kuna ifa usun repwe ammoneta fan iten manauar me ar angang mi pin. Nge akkaewin auchean, Pisop Mahe a anisir ne apochokuna ar nuku non ewe Samon Jises Kraist epwe nongonongun manauer.
Iei, pisop, ia mo ke angang ia, non ami kewe interfiu me pwan ekkoch fansoun chiechi fengen, ami mi tongeni ei sokun tufichin awora kuna me apochokuna nuku non Jises Kraist. Ka tongeni wau pochokunen tungor pwe aramas repwe siwin, amonatar fan iten manauer, me asarama ir repwe nonnom won ewe aanen pwon mi pin.
Pwan kapacheta, meni ami oupwe anisi ekkoch sarafo minne ir chon aninifengen ren semer me iner kewe usun mettoch mi kukkun auchean.24 Non eu atun minne sarafo ra sou anini ngeni semer me iner kewe, ewe emon ion a nemeni ar mwichen pristut me ion ir mi fos ngeni usun pekin ngun i chok ewe emon minne semer me iner kewe ra feinno ngeni fan iten nour kewe taropwen tempel. Ei a atufichiochu ewe pisop pwe epwe tongeni ourourfengen ren ewe sarafo me seman me inan we nupwen osukosuk a efisi kaimufesen. Ekkewe pishop ir mi tongeni anisir meinisin repwe kuna mettoch non napanapan fansoun ese muuch me awesano ar osukosuk watte ika kukkun. Aiwa etiwa pwe ekkewe pisop resap angei wisen iamwir ngeni ekkoch famini pwe repwe tongeni aea ar fansoun me tufich ne iamwir ngeni ekkei sarafo me ar kewe famini non ei sokkun napanap.25
Ngang mi sinei usun emon pisop minne a awesano eu watten osukosuk nefinen emon at me seman me inan we, a awora kinamwe non imwer me awatteno achocho non ewe kapas allim. Ewe pisop a anisi ewe sam me in pwe repwe weweiti pwe an emon achocho ne tapweno mwirin Jises Kraist a auchea nap seni inet me ifa usun angangen imw epwe wes.
Pwe repwe tongeni chiechi fengen ngeni sarafo, ia mo ra nom ian, tori pwan fofforun sukkun, a fen ourour ngeni ekkewe pisoprik pwe repwe ngeni ekkoch ekkewe wisen mwich me kunokun mwichen ourour a fis ngeni ekkewe sarafo watte. Fansoun mo pisop mi tongeni ourour won mettoch mi aweires me mettoch atapwanapwan, aiwa mochen pwe ekkena mettochun ourour ren met mi chok fifis, ese kon atapwanapwan me ekkena ese pwan tonong non pekin nimenimochun ngun ekkei a tongeni ngeni ewe mwichen elters ika Fin Anisi —napengeni ekkewe presetensi ika ekkewe chon iamwir. Ewe Ngun epwe emweni ekkewe souemwen26pwe repwe finioch minne memper epwe fori ewe angangen ourour. Ekkewe ra angei ei sokkun wis ne ourour ngeni emon ir mi tongeni angei ar pwisin pwarata. Ir, mi chok fokun, repwe chok amon fansoun meinisin mettoch mi monomon.
Souemwen mi mirit ra men soun fori angangen fangeno fan iten ekkewe sarafo. Iei ewe neni ian ekkewe chon pisoprik repwe fangeno napen ar fansoun angangen aninisin-Mwichefen.
Iei uwa mochen apasa ekkoch mettoch wene ngeni ekkewe sarafo pwisin me mwirin ngeni nouch kewe pishop.
Chommong me neimi ekkewe sarafo mi achengicheng meni ouse mwo tongeni kunafatei ami ion me ion oupwe winiti. Nge iwe oua nom ren mesen asamen ekkewe auchean mettochun fini oupwe kuna non manauemi. Ouse mochen oupwe angei me ruu ami ourour seni sememi me inemi kewe me noumi kewe pisop usun auchean mettoch oupwe fini minne mi nom mwemi. Mut ngeni ewe pisop epwe emon chiechiom me chon ourourok.
Aua sinei pwe epwe wor weires me sossot a torikemi seni ekis meinisin. Kich meinisin mi namwot sipwe aier iteitan ran usun Preseten Nelson a aiti kich. Ouse kan mochen oupwe foos ngeni noumi kewe pishop usun mettoch meinisin emon chon kapungun neniom pwe epwe anisikemi ne etetteni manauemi ren ewe Samon fan iten ewe “angang mi napanap” I a fen ammoneta fan itemi non ei saigon kinikinin fansoun.27 Usun Preseten Nelson a etiwakemi, ouse kan mochen oupwe animenimochu manauemi pwe oupwe tongeni sou fiu sarafo noun ewe Samon!28
Iei eu kapas ngeni noumi pisop mi achengicheng seni ekkewe chon emwen me memperun ewe Mwichefen. Aua apasa am watte kinisou fan itemi. Ren ekkewe ekkesiwin oua tingor ren non ekkei ier a keran no, kewe pisop mi achengecheng, ouse kan mochen oupwe sinei ukkukun watten am tongeikemi. Ami angang ngeni ewe muu sise tongeni tufichin awewei. Non ewe Mwichefen a wor 30,900 pisop me presetenin pranch ir mi angang won fonufan.29 Sia mwareiti emon me emon ami meinisin.
Ekkoch kapas me ekkewe wis mi pin ra awewe ren memmefin ngun, mi fokkun watten auchean. Ewe wisen pisop ennetin pwe eu watten kapas seni ekkei kapas. Ne angang ngeni ewe Samon non ei wis a fokkun och non chommong napanap. Ewe kokkon, apungano, me epinano emon pishop a eu -mettoch- sisapw tongeni monukano. Ngeniei, a nom non eu kukkun mettoch mi fokkun amwarar ren watten me anononon ekkewe memmef a efisita. A nom fengen non ewe kinikinin ren mettoch usun opupunu me winiti emon sam me ese tufich ne awewe non fitu chok kapas.30
Ekkewe pisop, aiwa apungukemino! Ekkewe pisop, aiwa tongeikemi! Ami ennetin noun ewe Samon chon mamaasa Noun kewe aramas. Ewe Chon Amanau esap togeni nikitukuno non ekkei wis. Usun ei uwa pwarata, no ei ranin Paska, non iten Jises Kraist, amen.