Ekesiwin ren Opochokunen Sarafo

Seni Elter Quentin L. Cook

Seni ewe Mwichen Engon me Ruemon Aposel

Aua nuku pwe chommong anuon me fopun repwe tongeni pwaracho ngeni ei koko me soposopono won ewe aanen pwon ren pochokunen ekiek mi ennetin fot wor nouch kei serafo.

Kinisou ngonuk, Preseten Nelson, ren ena apwapwan fatochun aurour fan asengesin chon pwarata atun papatais me ewe emwen ka tingorei kem aupwe aporousa an epwe anisi ne apochokunata serafo me amari ar tufichin feifeita mi pin.

Me mwen upwe aporousa ekkei ekkesiwin, sia apasa ach ennetin kinisou chapur ren amwararen an chon ewe mwichefen etiwa ngeni minafon mwokutukut non ewe soposoponon niwinsefaniton ewe kapas allim. Usun Preseten Nelson a pesei non ewe ier a no, en ka angei unumom vitamin!

Ka pwapwaiti ne kaeo Come, Follow Me non imw. Ka pwan etiwa ekkewe akkasiwin non fan. Chon ewe mwichen elter me ekewe Fin Anisi ra tipechu ne fori ewe angangen amanau.

Ach kapasen kinisou a fokkun ureno. Auwa konnien kinisou pwe nouch kewe serafo mi soposopono ne pochokun me nikitu.

Nouch kewe serafo ra nom non ew fansoun kunok mi amwarar ngo pwan aweires. Ekkewe mettochun finata mi wor ra kon fen senukunuk. Ew awewe: ewe fon non ach ei fansoun a awora ewe tufich ngeni porous mi auchea me apwapwa, mi pachenong uruon famini me pukefel. Nge pwan non ew pekin, mi pwan masoweni mettoch mi puch, manauangaw, me mettoch mi ngaw ese mecheres me nom.

Ach sipwe anisi nouch serafo ne finioch ren ekkei sokopwatun finata, ewe Mwichefen a amwonata unungat mwirinon me unusochon kokkot. Aewin, booken kinikinin kaeo a fen pochokununo me watteno ngeni ewe imw. Aruwan, an semirit me sarafo prokram mi pachenong ekewe urumot mi apwapwa me amarin inis a keran katou non ewe Raninfel seni Preseten Russell M. Nelson, President M. Russell Ballard, me ekkewe Sou nemenem mi Nap. Ew aunungatin kokkot ren ekkesiwini non kewe kinikinin mwich an epwe wanong serafo pwe epwe kon ina auchean met pisop me ekkoch sou emwen repwe anonga. Ei ionap epwe fokun pochokun non pekin ngun me epwe anisata nouch serafo ne winiti ewe mwichen sounfiun serafo Preseten Nelson a tingor repwe winiti.

Tetten mi wewefengen

Ekkei angang, chufengen me ekkewe ra fen tou non ekkewe fitu ier ano, esap ekkesiwin mi keimufesen. Ew me ew ekkei ekkesiwin mi auchea namot ngeni ew tetten usun ew mangaku mi pochokun tetein ne efeiochu ekkewe Souneng me amwonareta repwe kuna Kot.

Ew kinikinin ewe tetten mi wewengeni ewe maritan tappin aramas. Nouch kei serafo ra pesepes ar repwe pwisin fori wiser non ar ierin kukkun—me nukun an sam me iin me souemwen angei senir met ururun ekkewe sarafo mi pwisin tongeni fori.

Esinesin

Ikenai sia esinei ekkesiwin non ekkewe kinikinin mwich ren serafo non kinikinin wart me steik. Usun an Preseten Nelson a awewei, Sister Bonnie H. Cordon epwe aporousa ekkoch ekkesiwin ren Ekkewe Fopun non ei nekunionei. Ew popun ekkewe ekkesiwin iei upwene porous usun ina ewe apochokunen chon amwochu ewe Pristut seni Aaron, mwich, me mwichen presetensi. Ekkei ekkewisin mi wenengeni ach mwokutukut ren Doctrine and Covenants 107:15, minne a apasa pwe “Ewe mwichen pisop ina ewe presetensin ei Pristut seni Aaron, me ir mi amwochu ekkewe kii ika ewe mumuta.”

Ew me nein wisen pisop mi mak non pukefel ren ar repwe nemenem won ekkewe pris me epwe nom non mwichen aurour rer, pwe epwe aitir wiser non ar kinikin. Pwan, mi wor ren ewe aemonun chon aninis non ewe mwichen pisop wisen ekkewe sense me ewe aruemonun chon aninis ngeni ekkewe tiken.

Pungochun, an epwe wenengeni ei pwarata non ewe Doctrine and Covenants, presetensin Ekkewe Anuon non kinikinin ward epwe kouno. Ekkei nikitun mwan a fen murino watten ar angang, me sia ennetin kinisou ngenir.

Ina am apinukunuk pwe mwichen pisop repwe anapa ar pesei me anonga wisen pristut ren anuon me anisir non wiser kewe non ar kewe kinikin. Ekkewe angangochun chon repwe fonou Ekkewe Anuon repwe kokko ne anisi ewe presetensin ewe mwichen Pristut seni Aaron me ewe mwichen pisop non wiser kewe. Aua nuku pwe chommong ekewe anuon me ekewe fopun repwe tongeni pwaracho ngeni ei kokko me soposopono won ewe aanen pwon ren pochokunen ekiek mi ennetin fot wor nouch kei serafo.

Non an ewe Samon kokkot, an ewe pisop sekinin epwe ngeni meinisin chon non ewe wart. A efeiochu semen me inen ekkewe serafo me pwan ir ekkewe sarafo. Emon pisop a kuna pwe nupwen a fonou emon anuon mi weires ren an soun katon sassing mi ngaw, a tongeni anisi ewe anuon non an aier ika pwe mi pwan anisi ewe sam me in repwe ponuweni non tong me weweoch. An ewe anuon chikar a ew chikar fan iten an famini me a tufich ren an ewe pisop angang fan iten unusen ewe famini. Iei ewe anuon a winiti emon mi nimenimoch chon amwochu ewe Pristut seni Melkisetek me emon misineri.

Usun ei awewe a affata, ekkei ekkesiwin repwe:

Anisi pisop me nour chon aninis ne anonga ar ekiek won wiser mi kon auchea ngeni ekkewe serafo me semiriten Kinter.
Anomu ewe manaman me wisen ewe Pristut seni Aaron pwe epwe ina ionapen manauen anuon meinisin me ar kokkot.

Ekkei ekkesiwin repwe pwan:

Apochokuna wisen presetenisin ewe mwichen Pristut seni Aaron me ar aanen repot wenewen ngeni ewe pisop.
Pesei souemwen mi mwuk ne anisi me fonou ewe presetensin mwichen Pristut seni Aaron non ar anapano ewe manaman me mumutan ar kinikin.

Usun mi affat, ekkei ekkesiwin resap ekisano wisen ewe ekewe mwichen pisop fan iten ekkewe fopun. Usun Preseten Nelson a keran aitikich, “Aewin me auchean wisen [ewe pisop] pwe epwe tumunu ekkewe anuon me ekewe fopun non an we wart.”

Ifa usun nouch we achengicheng me angang weires pisop epwe apwonueta ei wis? Ika oupwe chechemeni, non 2018, mwichen Pristut seni Melkisetek mi ekesiwin ren ar repwe angang fengen me ekkewe Fin Anisi pwe mwichen elter me Fin Anisi repwe tongeni, fan emwenien ewe pisop, aninis fengen me fori ekkewe auchean sekinin an pisop mi angei unusan an fansoun. Ekkei sekinin mi pachenong angangen misineri me tempel me angangen uruon famini non ewe wart—pwan napengeni ewe iamwir ngeni chon ewe wart.

Ewe pisop ese tongeni ewisa ngeni emon ekkoch wis, ussun ekkewe serafo, sou apung, tumunun ekkewe mi osupwang, me tumunun mwokutukutun moni me tumunon nonomun ei fonufan. Nge, ekkei, ra chokukkun nap seni sipwe weweiti me akkom. Usun Elter Jeffrey R. Holland a awewei non ewe ier nupwen ekkesiwinin ewe mwichen Pristut seni Melkisetek ra katou: “Ewe pisop mi chok nomwetiw, ewer, ewe chon nemenem mi nap non ewe wart. Ei minafon etettenin [mwichen elter me Fin Anisi] epwe mut ngeni I epwe nemenem won angangen ewe Pristut seni Melkisetek me ewe Fin Anisi nge resap mut ngeni epwe pwan fori ekewe angangen ew me nein ekewe mwich.”

Ren awewe, emon presetenin Fin Anisi me emon presetenin mwichen elter, usun ir mi ewis ngeni, ir mi tongeni angei ew wis mi nap ne fonou mi mwuk—usun chok emon presetenin Ekkewe Fopun non an fonou fopun. Nupwen ewe chok pisop a tongeni wiseni ewe wisen sou apung, ekkei ekkoch souemwen ra pwan mumuta ne angei ar pwarata seni nang ne aninis ren ekkewe osukosuk ese auchea an epwe wor sou apung ika ese pachenong sokkun efeiengaw.

Ei esap wewen pwe emon fopun ese tongeni esap kapas ngeni ewe pisop ika ngeni seman me inan. Repwe anonga ar ekiek won ewe sarafo! Nge mi wewen pwe emon souemwenin Ekkewe Fopun mi tongeni awesochuona ren anisi osupwangen emon fopun. Ewe mwichen pisop mi aureki ekkewe fopun usun chok ar aureki ekkewe anuon, nge sia esinna ewe pochokun a feito seni an wor souemwenin Ekkewe Fopun mi pochokun, achocho, me nikitu ekkewe ra tong me emwen, rese nemeni wisen ewe presetensin ewe klas, nge ra anisi sarafo repwe murino non wiser kewe.

Sister Cordon epwe aporous pwan ekkoch ekkesiwin mi apwapwa fan iten ekkewe fopun nepwinei. Nge, ngang, upwe esinei pwe presetenin Ekkewe Fopun iei repwene repot ngeni me angei aurour ngeni ewe pisopun ewe wart. Me akkom, ei wis mi tongeni epwe ewis ngeni emon chon aninis, nge seni iei, ekkewe fopun epwene ina wisen ewe emon mi amwochu ekkewe kien nemenem non ewe wart. Ewe Presetenin Fin Anisi epwe soposopono ne repot ngeni ewe pisop.

Ren kinikinin mwichenap me steik, epwe soposopono ne wor presetensin Ekkewe Anuon. Ren ewe kinikinin steik, emon chon founou mi napanap epwene presetenin Ekkewe Anuonme, ren an ewe chon fonou mi napanap a ewis ngeni Ekkewe Fopun me Kinter, epwene nom non kinikinin ewe Mwichen steik Pristut seni Aaron–Ekkewe mwichen Fopun. Ekkei mwan repwe angang fengen me ewe presetensin Ekkewe Fopun ren ewe steik won ei mwich. Ren emon chon aninis ngeni ewe presetenin steik mi emweni ei mwich, ei mwich epwe napeno auchean pokiten chommongun ekkewe prokram me urumot non ewe minafon kokkoten Semirit me Sarafo epwe nom non kinikinin steik.

Ekkei chon fonou mi napanap, fan emwenien ewe presetensin steik, ra tongeni repwe anisi ewe pisop me ewe mwichen Pristut seni Aaron non ew napanap mi nonno ngeni ewe angang mi kawor me ren chon fonou mi napanap ngeni ewe mwichen elter non wart.

Ew mettoch mi wewengeni, pwan emon chon fonou mi napanap epwe wiseni presetenin Sukunen Raninfel non ewe steik me, ika ian a pwan namot, mi tongeni angang won ewe Mwichen steik Pristut seni Aaron–Ekkewe mwicheichen ekewe Fopun.

Pwan ekkoch ekkeseiwin non ekkewe kinikinin mwich epwap awewetiw non porous a fen titino ngeni souemwen. Ekkei ekesiwin mi pachenong:

Ewe chufengen an mwichen pisop me sarafo epwe ekkesiwin me ren ew mwichen sarafo non ewe wart.
Ewe kapas “Mutual” epwene kouno me winiti “an Ekkewe Fopun urumot,” “an Pristut mwicheich seni Aaron urumot” ika “urumot an sarafo” me epwe fis iteiten wiik inet chok a tufich.
Ewe monien wart fan iten an serafo urumot epwe nonno pok ne keimufesen nefinen ekkewe anuon me fopun anongonong won chochon serafo non ew me ew kinikin. Och moni mi naf epwe kawor fan iten an Kinter urumot.
Non kinikin meinisin—wart, steik, me mwichenap—sipwene nounou ewe kapas “kinikinin mwicheich” nap seni ewe kapas “kinikinin mwichen aninis.” Ekkewe mi emweni kinikinin mwichen Fin Anisi Unus, Ekkewe Fopun, Ekkewe Anuon, Kinter, me Sukunen Raninfel repwene iteni “Chon Nemenem Unus.” Ekkewe ra emweni kinikinin mwicheich ren kinikinin wart me steik repwene iteni “chon nemenemen wart” “chon nemenemen steik.”

Ekkei ekkesiwin esinesin mi katou ikenai repwe poputan inet chok pranch, wart, tischrik, me steik ra mwoneta, nge epwe foruno non January 1, 2020. Ekkei ekkesiwin, nupwen repwe achufengen me fiti ekkesiwinin akkom, repwe esisinata ew mwokutukutun ngun me kinikinin mwicheich mi nonno ngeni annuk ar repwe efeiochu me apochokuna mwan, fefin, serafo, me semirit meinisin, me anisir ne tapweno mwirin ach Chon Amanau, Jises Kraist, nupwen sia fetanoch won ewe aanen pwon.

Pwi me fefinei achengicheng, ua pwon me pwarata pwe ekkei ekkesiwin mi unus, fan emwenien emon preseten me soufos, Russell M. Nelson, repwe apochokuna emon me emon chon ewe Mwichefen. Nouch kewe serafo repwe awora watten nuku non ewe Chon Amanau, repwe tumun seni sossotun ewe chon koum, me repwe mwoneta ne ungeni osukosuken manau. Non iten Jises Kraist mi pin, amen.