![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F2d%2Fe3%2F2de36a486b6479d1941ea2eccf92eb51d1fd3ad7%2F2de36a486b6479d1941ea2eccf92eb51d1fd3ad7.jpeg/full/!250,/0/default)
Tufich ren Pekin Ngun
Fanitan ami Noun chon kuno mi tupwon, oua tongeni angei ami pwisin saram me pwarata mi fiti An annuk, me a pwan fich ngenikemi.
Nupwen ua sar seni Camp ren Mwichen Fopun non ewe summer, emon fopun a ngeniei echo taropwe. Me non, a eisiniei, “Ifa usun ua tongeni esinna nupwen Kot a achocho ne ereniei och mettoch?” Ua men tongei an na kapaseis. Ngunuch kewe mi kan mochen sinei imwach won nang. Sia mochen mefi pwe kich mi auchea me nipwakoch. Nge fan ekoch a weires ach sipwe esinna nefinan pwisin ach ekkiek me pwan mongungun ewe Ngun mi Fel. Soufos, seni nom pwan ikkenai, ra aitikich pwe ika och mettoch mi “tingor me pessei ngonuk kopwe foforoch, a feito me ren Kraist.”1
Presiten Russell M. Nelson a esineto ew tingor mi pwetete me manaman: “Pwi me fefinei achengicheng, ua pese ngenikemi oupwe anapano ami tufich non pekin ngun pwe oupwe angei pwarata. ... Oupwe fini pwe oupwe fori ewe angang non pekin ngun mi namwot pwe oupwe tongeni pwapwaiti ewe nifangen ewe Ngun mi Fel me anapano fisinon me fatochun oua rongorong ewe mongungun ewe Ngun mi Fel.”2
Ai mochen non ei nesosor pewe upwe kapas seni netipei usun ruanu napanap minne oua tongeni anapano ami tufich ren pekin ngun pwe oupwe angei pwarata.
1. Oupwe Tiniken ne Akota Fansoun me Neni minne Oupwe Rongorong Nouwan Kot
Nupwen oua aea ami pungun finata pwe oupwe fana me aucheani fansoun iteitan ran pwe oupwe arapakan ngeni nouwan Kot, tekian neir ewe Puken Mormon, ekkis me ekkis, Nouwan epwe fatochuno ngonuk.
Non napanapan, ekkewe fitikoko me ekurang mi aura ewe fonufan me imwach mi tongeni eweiresikich sipwe tongeni rong ngeni nouwan. Ekkei weiresin ei manau mi tongeni osukosuka tupuwach me netipach iwe sise etiwa ewe mwongungun ewe Ngun mi Fel we.
Ewe Soufos Joseph Smith a aitikich pwe napangeni fansoun Kot mi pwisin pwa “ngeni aramas nupwen a pwisin nom anaemon chok, non rumwer, nein petewen are atake, me napangeni ese wor ekurang are chopunap.”3
Setan a mochen amuni kich seni kapasen Kot ren an epeti kich seni ekkewe neni mi mosonoson. Ika Kot mi fos non ew mongungu mi kinamwe me kisikis, wewen mi namwot sipwe akanakicheto ngeni I. Ekkieki met epwe fis ika pwe sipwe tiniken ne poporaus ren nang usun chok sia poporaus won Wi-Fi! Fini ew fansoun me neni ikkeweia, oupwe ausening ngeni nouwan Kot iteitan ran. Oupwe chok tichik ne fiti ei mwich mi pin iteitan, mi kan aucheanap!
2. Ousap Amangano ami Fofor
Nupwen oua mefi mongungun ngun me aucheani met a auchea ngeni kemi, ewe Samon a tongeni nounoukemi ne angang. Iteitan fansoun oua fofor, a anapano ami chiechi ngeni ewe Ngun mi Fel. Epwe anapano om esinna emwenien Kot me I a “mochen… pwari An ekkiek me netipan.”4 Ika oua amangeno, mi tufich oupwe monnuki ewe mongungu are nuno ewe tufichin anisi emon fanesengesin Kot.
3. Angei Om Sekining me ren ewe Samon
Ewe iotek minne Samach won Nang a kan mochen penueni ina ach tingor pwe epwe emwenikich ngeni emon mi auchea sipwe anisi. Preseten Henry B. Eyring a aitikich pwe sipwe kuta pwarata ren ach sipwe tingor ngeni Kot ion sia tongeni anisi fanasengesin. “Ika oua apasata ekkan sokkun tingor, ewe Ngun mi Fel epwe eto remi me oupwe mefi mongungun usun och mettoch oua tongeni fori ne anisi pwan ekkoch. Nupwen oua feinno o fori ekkan mettoch, oua nom won an ewe Samon we sekining, me nupwen oua nom won an ewe Samon we sekining, oua kofichin angei ewe nifangen ewe Ngun mi Fel.”5
Oua tongeni iotek o tingorei ewe Samon ren och sekining. Nupwen oupwe fori, I epwe aea ami kukkun nipwakoch ne apwonueta An angang mi amwarar.
Semei we chinap, Fritz Hjalmar Lundgren, a feito ikkei me Sweeden nupwen a chok 19 ierin. A tori Merika, anaemon chok, fiti ew kiwifer me achok onu ierin non sukkun. Ikamwo ese sinei fosun Merika, a sai ngeni Oregon o a ani angangen osomwuch o, fiti inan inei me inei, ra choni ewe Mwichefen. Ese wisen emweni ew wart, nge ren wisan sensen famini, i a uwei nuseni 50 famini ne niwin ngeni Mwichefen. Ifa usun a fori ena?
Mwirin Papachi a mano, ua nenengeni ew porun an kewe taropwe o ua kuna echo taropwe emon mwan a makkei mi niwin ngeni mwichefen fan itan an Papachi tong ngeni. A mak non ewe taropwe, “An Brother Fritz we monomon, ua nuku, pwe fansoun meinisin i a chok fori an Samach won Nang we sekining.”
Ena taropwe a mak seni Brother Wayne Simonis. Papachi a churi me a chieneni meinisin chon famini. Ekkis me ekkis, Papachi a erenir pwe ir mi auchea o a tingor repwe fiti fan. Nge non ena Raninifel, Brother Simonis a neno ren ew osukosuk—i ese mwo wes ne fori ossen imwanewe me epwene pung ran non ena wiik. A fini pwe epwe feino fan, kapwong ngeni Papachi, nge mwirin epwe tou me feinno ngeni imwanewe o awesano ewe os. An famini repwe fiti fan nge i esap fitiir.
An na kokkot a chok fisioch tori, won ewe os, a rong pwe emon a tota won ewe nate. Non pwisin an kapas: “Nupwen ua sacheta, ... Brother Fritz a uta won ewe nate. A chok emenimen ngeniei. Akkomw, ua saw o ua mefi usun emon semirit mi tou seni sukkun. Mwirin ... ua mefi song. [Nge Brother Fritz a chok] pwiniti ufan we sekit o a watiw won ewe nate. Nupwen a minata poun ufan kewe, a kunnu ngeniei o apasa, ‘Brother Simonis, mei wor pwan effoch om amma? Wewen pwe ei angang a kon auchea are kesap su seni om famini, me ika ina auchean, ua mochen anisuk.’ Nupwen ua nenenong non mesan, ua chok kuna umoumoch me tongen Kraist. Use chiwen song. ... Ua watiw piseki kewe pisekin angang o ua tapweno mwirin chienei ne totiw won ewe nate o niwiniti ewe fan.”
Papachi a angei an sekining me ren ewe Samon, me i mi sinei pwe i epwe kuta ekkewe siip mi mwanecheno. Usun chok ekkewe fomon mwan mi mwareieta chiener mi mwok won ewe os o minatiw pwe epwe tongeni chikar ren Jises Kraist,6 ina usun pwan Papachi ne fiti an sekining won ewe os. Ewe Samon a tinatiw pwarata ngeni ekkewe mi kuta repwe anisi aramas.
4. Nuku me Achifou
Non ewe, ua anneani non ekkewe puk fel usun emon misineri mi napanap mi angei an sekining me ren ewe Samon. Aaron a afanafan ngeni ewe kingen ekkwe re Laman, ina ewe a osukosuk pwata pwin Aaron we Ammon ese pwan eto afanafan ngeni. “Iwe Aaron a apasa ngeni ewe king: Nengeni, ewe Ngunun ewe Samon a fen kokkori i ngeni pwan ew neni.”7
Ewe Ngun mi Fel a apasa ngeni netipei: iteitan kich mei wor pwisin wisach sipwe fori, me fan ekkoch ewe Ngun mi Fel epwe kokorikich ngeni “pwan ew neni.” Mei wor chommon napanap minne sia tongeni aueta ewe muun Kot ren wisach chon kunon Jises Kraist mi fori pwon mi pin me apwonueta pwon mi pin. Fanitan ami Noun chon kuno mi tupwon, oua tongeni angei ami pwisin saram me pwarata mi fiti An annuk, me a pwan fich ngenikemi. Mei wor ami pwisin sekining me wisemi oupwe fori non ei manau me oupwe angei ami pwisin emwen minne oupwe apwonueta.
Nifai, ewe pwin Jared, me fen Moses pwan ir mei wor ew watten sat repwe sai non—me ir meinisin ra sokkono ne fori. Nifai a angang ren “ekkoch ira a fokkun murino fofforun.”8 Pwin Jared kewe ra aueta barges a fokkun “pochokun usun chok eu sepi.”9 Me Moses a “fetan won puun mi pwasaka nukanapen ewe sat.”10
Ir ra pwisin angei ar kewe emwen mi sokkono, mi kefin ngeniir pwisin, me ir ra nuku me apwonueta. Ewe Samon mi afanni ekkewe mi anneasochis me, non an Nifai kapas, a “amonnata ew an ngenir ar repwe apwonueta ewe mettoch minne i a annuku ngenir.”11 Nengeniochu pwe Nifai a apasa, “ew an”— esapw “ewe an.”
Sia misini are sirasini ekkewe sekining me ren ewe Samon pun I a ammonata “ew an” mi sokkono seni ewe sia afanni?
Semei papachi a emwen ngeni ew neni mi sokkono—non ufan suit, won ew os, non ew Raninifel. Nuku non Kot i epwe emwenuk, ikamwo ewe an mi sokkono seni met ka ekkieki are mi sokkono seni anen pwan ekkoch.
Aramas mi Pin non Fansoun Soponon mi sokkono non ar kewe napanap, “meinisin ra nonno chok ngeni Kot”—“chon me pwechepwech, chon fotek me chon ngaseno, mwan me fefin,” nipich me pupunu, pisekisek me osupwang, kukkun me chinnap, chon mwichefen seni nom are emon minafo.12 Ese nifinifin ia oua nonnom ia are met oua weiri, ewe Samon a tingor oupwe feito mommot ren an cheipen.13
Ren ami oupwe kuta me fori netipan ewe Samon a winiti mokutukutun ami ran iteitan, oupwe, ewer, oupwe angei emwen oupwe ekkesiwin me aier.
Ewe minafon prokram an ewe Mwichefen ngeni ekkewe semerit me serafo a kauta won ewe nongonongun kaeo ne kuta pwarata, kuna minne ewe Samon a mochen sipwe fori, me apwonueta ena emwen. Emon me emon kich, ikamwo ierich me nonnomuch, sia tongeni achocho ne kuta, angei, me apwonueta. Ren ami oupwe achocho ne apwonueta an kokkot mi kefin ngeni ach ei ran, oupwe kaneto ren Jises Kraist—An tong, An saram, An emwen, An kinamwe, me An chikar me manaman. Me oupwe anapano ami tufich non pekin ngun oupwe tongeni winiti ew pisekin angangen iteitan ran non Poun ren an epwe apwonueta An angang. Non iten Jises Kraist, amen.