![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F76%2Fb1%2F76b1c0291c14570896c884970d86de0304d910ab%2F76b1c0291c14570896c884970d86de0304d910ab.jpeg/full/!250,/0/default)
Ewe Aruwen Annuk mi Napanap
Ach watten pwapwa a feitto nupwen sia anisi pwiich me fefinach kewe.
Pwii me fefinei kewe mi achengicheng, kinisou ngenikemi ren meinisin met ami mi fori ne aninis non ewe chusefanin Israel won ir me ruu epekin ewe minen epet, ne apechekuna ami kewe famini, me efeiochu manauen ekkewe ir mi osupwang. Kiniso ngenikemi ren ami manaueni manauen ennetin chon tapweno mwirin Jises Kraist.1 Ami sinei me tongei ami oupwe anneasochisi An kewe ruu annuk mi napanap, ne tongei Kot me tongei chon orum.2
Non ekkei wonu maram a karen fiis, am me Sister Nelson aua churi fite ngerou ekkewe Sounang non am sai non Central me South Amerika, ekkewe fonuen nesetin Pacific, me sokopaten sopw non ewe United States. Non am sai, am we apinukunuk ita pwe ami nuku epwe watteno. Nge iteitan fansoun aua niwin me am nuku a fen watteno me ren ekkewe chon ewe Mwichefen me chienam kewe aua churi. Ouse mochen ai upwe kan aporousa usun unugat mettoch mi fiis non am sai kewe mi karen fiis?
Non May, am me Sister Nelson aua sai fengen ren Elter Gerrit W. me Sister Susan Gong ngeni ewe South Pacific. Atun aua nom non Auckland, New Zealand, aua pwapwaiti am tongeni ne chufengen ren ekkewe imam seni ruu mosques non Christchurch, New Zealand, ia ruu maram chok mwen, chon fen esor tipisir ra pekieno non eu osukosuken watte feingaw.
Aua ngeni ekkei pwipwi seni pwan eu namanam am tong me asefesafni am achocho ne angang fengen fan iten angasan namanam.
Aua pwan anisir won pekin angang me pwan ekkis aninis won pekin mon ne auetasefani ar kewe imwen fan. Am we chufengen ren ekkewe chon emwenin Muslim a ur ren ennetin tongen pwipwi.
Non August, am me Sister Nelson, fiti ren Elter Quentin L. me Sister Mary Cook, aua chufengen ren aramas non Buenos Aires, Argentina—napengeni ir rese chon ach ei mwichefen—minne manauer kewe ra fen feioch me ren ekkewe wiincher ir mi angei seni ach ewe Latter-day Saint Charities. Aua apechekun won pekin ngun seni ar apasata ar kinsou ren ar tufichin sai fetan sefan.
Eu eunugatin mettoch mi amwarar mi fiis fitu chok wiik a no ikei non Salt Lake City. A fiis ren eu taropwe mi sokono uwa angei won ranin uputiwei seni emon foupun upwe iteni Mary—a 14 ierin.
Mary a makkei usun mettoch am me i aua nonnofengen won: “A wor 10 noum. Mi pwai wor 10 noum semirit. Ka sinei fosun Mandarin. Fuemon me nein ekkewe semerit non ai ei famini, ngang emon, aua feitto seni China, iwe Madarin ina aewin am foos. En emon chon rei ngasangans non piwong. Fefinei a fen wor ruu fansoun rei ngasangasan non piwong. Ka sani mwichen fan epwe ruu ouwa chok. Aua sani mwichen fan epwe ruu ouwa chok. Ka tongeni nginin kon mi unusoch. Mongei a tongeni nginin kon mi unusoch. A pwan chuun usun chok ngang.”
Kapasen Mary a men kuu netipei, a pwari napanapen ngunun me pwan ewe angangochun inan me seman we.
Aramas mi Pin non Fansoun Soponon, fiti fengen ren pwan ekkoch chon tapweno mwirin Jises Kraist, ra kutta tufichir fansoun meinisin pwe repwe anisi, apechekuna me tongei ekkoch. Ekkewe ir minne ra mochen repwe iteni noun ewe Samon “mochen mwarei fengeni an emon me emon chou, … netipeta ren ekkewe ra netipeta; … me [repwe] aururu ekkewe ra mochen auru.”3
Ir mi ennetin achocho ne manaueni ewe aewin me aruwen annuk mi napanap. Nupwen sia tongei Kot ren unusen netipach, I a akkuna netipach ngeni nonnomun ekkoch non eu ningochun me nimenimochun napanap.
Ese tongeni sipwe sinei ifan ukukun an ekkewe Aramas mi Pin non Fansoun Soponon angang ngeni ekkoch minne ra fori iteitan ran non iteitan ier won unusen ewe fonufan, nge mi tufich sipwe sinei ewe aninisochun ewe Mwichefen unus ren met a fori ne efeiochu mwan me fefin—at me nengin—minne ra mochen ekkis aninis.
An ewe Mwichefen kinikinin aninis ngeni ekkoch mi osupwang a poputa non 1984 [engoru tiwepuku wanik me ruanu]. Non na atun ewe echikefen a fiis ren unusen ewe Mwichefen pwe repwe awora tufich won pekin pisekin aninis ngeni aramas non ewe otiw epekin Africa minne a nangatem ese pungupung ran. Chon ewe Mwichefen ra asorano $6.4 million won ena ranin echikifen chok.
Ena atun-Elter M. Russell Ballard me Brother Glenn L. Pace ra feinno ngeni Ethiopia pwe repwe sinei ifa usun ena monin aninis mi piin epwe ennetin atufichi aninis. Ei atun ne achocho ne aninis a ewe nepoputan met ikenai a iteni ewe Latter-day Saint Charities.
Seni ena fansoun, Latter-day Saint Charities a fen awora 2 billion chana non aninis ngeni ekkewe mi osupwang won ewe fonufan. Ewe aninis a ngeni aramas ese nefinifin ir chon minne mwichefen, muun, uruo, ion ra tongei, mwan ika fefin, ika ion ra sani ren wis non muun.
Nge esap ina meinisin. Ach sipwe anisi ekkewe chon fiti an ewe Samon ewe Mwichefen minne ra osupwang, sia tongei me manaueni ewe annukun noom pwe sipwe echikifen.4 Sise mwongo pwe sipwe anisi ekkoch minne ra echik. Eu ran iteitan maram, sise mwongo anech me asoreno niwinin anech na (me pwan ekkis) ngeni ekkewe mi osupwang.
Usap tongeni mennukano ai we aewin sai ngeni Notoun Africa non 1986. Ekkewe Sounang ra mwicheto ngenikem non watte mwichen aramas. Ina mwo ir ra osupwang won pekin pisek, napengeni ir meinisin ra feitto me ra ufeno uf mi ennetin pwech mi nimenimoch.
Uwa eiseni ewe presetenin steik ifa usun a tumunu chon ewe mwichefen minne ra osupwang. A penuweni pwe ekkewe pisop ra ennetin sinei aramaser kewe repwe tumunu. Ika chon ewe mwichefen ra tongeni moni mwongo fan iten ruu fansoun mwongo iteitan ran, rese mochen aninis. Nge ika ra chok tongeni moni mwongo fan iten eu fansoun mwongo ika esor mwongo—mwirin ra angei aninis seni ar famini—ekkewe pisop repwe awora mwongo, minne a kamo ren asoren echikifen. Iwe a pwan apasata ekkei kapas mi amwarar: ar kewe asoren echikifen napengeni a napseni met repwe kamo. Met mi nussun seni ar kewe asoren echikifen a tinano ngeni aramas non pwan eu neni minne ar osupwang a watte seni ir. Ekkana Sounang non Africa mi tipepos ra ennetin aitiei usun ewe pechekunen ewe annuk me ewe ngunun ewe echikifen.
Kich chon ewe Mwichefen, sia mefi pwe mi wor nefinach me ion ekkewe ra riaffou ese nefinifin ren met.5 Pokiten kich at me nengin noun Kot, kich meinisin pwipwi. Sia anneasochisi ewe annuk seni ewe Testamen Noom pwe: “Fansoun meinisin epwe wor ekkoch chon Israel repwe woungaw o osupwang, iei minne upwe ereni kemi pwe oupwe kisaseu ngenir.”6
Sia pwan achocho ne manaueni met ewe Samon Jises Kraist a aiti minne a mak non Matthew 25:
“Pun uwa echik, nge oua amongoni ei, ua kaka, nge ouwa aunu ei, ua emon wasona, nge oua etiwa ei,
“ua seneno, nge oua aufoufa ei, ua semwen nge oua tumunu ei. …
“… Fansoun meinisin oua fori ei napanap ngeni emon pwii kei mi kisifochofoch, oua pwan for ngeni ei!”7
Upwe erenikemi fitu chok mettochun awewe ifa usun ewe Mwichefen a aponueta ekkei afanafanin ewe Chon Amanau.
Pwe sipwe ekkisano echik, ewe Mwichefen a efisata 124 imwen aninis an ewe bishop won unusen ewe fonufan. Me ren ekkei imw, ukukun 400,000 tingor ren mwongo a fangeno seni iteitan ier ngeni aramas mi osupwang. Non ekkewe neni minne ese wor eu imwen aninis, bishop me branch preseten kewe ra angei moni seni ewe asoren echikifen non ewe Mwichefen me kamo mwongo me pisek fan iten nour kewe memper mi osupwang.
Ina mwo, ewe osupwangen echik mi wateno esap chon non kinikin ewe fan. A napono non unusen fonufan. Eu taropwe seni ewe United Nations a mak pwe eu ukukun aramas ese naf aner mwongo won ewe fonufan a napseni 820 million iei—ika chipu epwe emon non iteitan tiwemon aramas won fonufan.8
Iwe ei numpa a netipengawa! Sia men kinisou ren ami asor me aninis. Pokiten ami asor ren ennetin netip, fite million aramas won ewe fonufan repwe angei mwongo, uf, pisekin imw, wiincher, safei, konik mi nimenimoch, me pwan ekkoch ir mi kan osupwang ren.
Watte semwen won ewe fonufan a fiis pokiten konik mi nimengaw. Tori ikenai, ewe an ewe Mwichefen angangen aninis a awora konik mi nimenimoch non fitepuku sopw non 76 muun.
Eu angangen aninis non Luputa, non ewe Democratic Republic non ewe Congo, a eu fiisin awewe mi och. Chochon ewe sopw a watte seni 100,000 aramas, esor konik mi kuus non imw non ewe sopw. Chon ewe sopw repwe fetan towau ne tunufi konik mi nimenimoch. Eu kuusitiwin konik non eu chukuchukura a 18 mile (29 km) seni ewe sopw, nge chon ewe sopw rese tongeni tunufi konik seni fan iteitan ran.
Nupwen nouch kewe missinerin aninis ra kaeo usun ei weires, ra angang fengen ren ekkewe chon emwenin Luputa me awora pisek me sinei usun ar repwe akussetiw ewe konik non pipe ngeni ewe sopw. Ekkewe chon Luputa ra tuu fan unugat ier eu aanen ewe pipe a eu meter anonnon non fau me petiwen. Ren ar angang fengen, ewe ranin pwapwa a war pwe konik mi nimenimoch a kussetiw fan iten meinisin non ewe sopw.
Ewe Mwichefen a pwan anisi ekkewe chon ekkis mi su seni fonuer, fan iten osukosukun maun, osukosukun monumon me fonu, are esit pokiten namanamer. Iei nap seni 70 million aramas ra suseni nenier.9
Non ewe ier 2018 chok, ewe Mwichefen a awora pisekin aninis ngeni chon ekkis mi su seni nenier non 56 muun. Pwan, chommong chon ewe Mwichefen ra asoreno ar fansoun ne anisi ekkewe chon ekkis pwe repwe kaeo ururun ar kewe neni minafo. Sia kinisou ngeni ami kewe meinisin minne oua achocho ne anisi ekkewe ra minafo ngeni nenier.
Me ren watte asoren pisek ngeni Deseret Industries non ewe United States, fite million pountin uf a ionfengen me akinikini iteitan ier. Me ina mwo bishop non ekkewe neni pwisin ra ineti ekkoch ekkei chommongun uf ngeni ar kewe memper mi osupwang, ewe watten kinikinin a fang ngeni ekkoch mwichen aninis minne repwe ineti ewe pisek ngeni ekkewe mi osupwang won unusen fonufan.
Me ewe ier a no chok, ewe Mwichefen a wora aninisin tumunun mes fan iten nap seni 300,000 aramas non 35 muun, aninisin tumunu monukon fan iten fite ngeroun in me monukon non 39 muun, me wiincher ngeni nap seni 50,000 aramas mi nom non fite fite muun.
Ewe Mwichefen a itefouno fan iten fan chommong a nom nein ekkewe aewin chon aninis nupwen watte osukosuk a fiis. Iwe me mwen eu typhoon epwe fiis, chon emwenin Mwichefen me chon angang non ewe neni ra fen kokkot ren ifa usun repwe awora pisekin aninis me angang aninis ngeni ekkewe repwe osukosuk me osupwang.
Non ewe ier a no chok, ewe Mwichefen a efiiseta aninis fan iten nap seni 100 angangen aninis won unusen ewe fonufan, ne anisi aramas mi riaffou pokiten typhoon, ekkei watte, kunnetan konik watte, chechin fonu, me pwan ekkoch watten osukosuk. Ia a tufich ia, nouch chon ewe Mwichefen non ekkewe uf mi on fan iten Helping Hands ra chommongeno ne feinno ne anisi ekkewe ra riaffou pokiten ewe osukosuk. Ei sokkun angang ngeni ekkoch, chommong me neimi oua fori, a ewe ennetin weiwen iamwir.
Pwi me fefinei kewe mi achengicheng, ekkewe foffor uwa foos usun ra chok eu kukkun kinikin non ewe kinikinin awora aninis me pisek an Ewe Mwichefenin Jises Kraist ren Aramas mi Pin non Fansoun Soponon.10 Me ami ekkewe minne oua atufichi ekkei mettoch. Pokiten manauemi kewe mi och, netipemi mi ennetin kirekireoch, me poumi kewe ngeni aninis, ese weires ne kuna pwata chommong chon emwenin muun me sopw ra mwareiti ami achocho.11
Seni ewe atun uwa winiti Presetenin ewe Mwichefen, uwa fen mairu usun fite preseten, prime minister, me ambassador ra ngeniei ar ennetin kinisou fan iten ewe angang me pisekin aninis kich sia ngeni aramaser kewe. Ra pwan apasa ar kinisou ren pochokun ra angei pokiten an ekewe souneng achocho ne uweiato ngeni fonuwer ren nikitu, me chochon cho remi fokun aniniseoch.
Uwa pwan ingeiti atun chon emwenin fonufan ra churi ewe Aeiwin Presetensi me pwarata ar mochen pwe ewe Mwichefen epwe tori fonuer kewe. Pwata? Pokiten ra sinie pwe aramas mi pin non fansoun soponon repwe aninis ar repwe opochokunano famini me cho, ne anisi ekoch an manawer epwe ochunoian ra nomw ian.
Ina mwo ia sia nom ia, chon ewe Mwichefen ra ennetin mefi auchean semanapen Kot me ewe pwipwin aramas. Iwe ina, ach watten pwapwa a feitto nupwen sia anisi pwiich me fefinach kewe, ese nefinifin ia sia nom ia non ei fonufan mi amwarar.
Angagnen aninis ngeni ekoch—fori ar amwararen aninis ne ekieki ekoch ren wate ika pwan ekoch nap seni ach pusin ekieki kich—ina ach pwapwa. Akkaewin, upwe pwan apasa, nupwen ese mecheres me a fori pwe sise nom non napanapen kinamwe ngeni kich. Manauen ena aruwen annuk mi napanap ina ewe kii ne winiti eu ennetin chon kuno an Jises Kraist.
Pwi me fefinei kewe mi achengicheng, ami ewe ennetin wewen ewe foun ira minne a uwa seni emon epwe manaueni ekkewe mettoch Jises Kraist a aiti. Ai kinisou ngenikemi! Ngang ua tongeikemi!
Ua sinei pwe Kot mi manau. Jises ii ewe Kraist. An Mwichefen a aniwinsefanito non ekkei ranin soponon ne aponueta an ennetin popun. Ua pwarata non iten Jises Kraist, amen.