Ewe Poraus, ewe Wewe, me ewe Mwicheichen Aramas
Ren ekkei mettoch ese kouno okurangan me pungupungun drumun ach kei ran, amo sipwe achocho ngeni ach sipwe kuna Kraist nukanapan manauach, ach nuku, me ach angang.
Pwi me fefinei, iei i Sammy Ho Ching, fisu maramen, a katon mwichenapen mwchefen won TV me non imwan ewe non ewe April a no.
Nupwen a tori ewe fansoun finata me etiwa Preseten Russell M. Nelson me ekewe ekkoch Meinap Unus, poun Sammy kewe ra osukosuken ne kamoch an ewe titi. Iwe a fori ew mettoch a kon murinnono.
Sammy a awora ew minefon awewen finita a fiti ren pechem.
Sa etiwa ami ngeni ei oruen mwichenapen mwichefen mi fis fan ru iteiten ier an Ewe Mwichefenin Jises Kraist ren Aramas mi Pin non Fansoun Soponon. Ren monetan ngeni ei kinikin ren eu porousen awewen ekkei chufengen fan ruu-non-ew ier, ua mochen kopwe ekieki ei atun seni ewe uruo non Luke non Testament Mi Fo:
“Nupwen Jisus a arapakan ngeni Jericho, emon mwan mi chuun a mommot pen ewe ann, a kan tingor fetan.
“… Nupwen a rong ewe pwiin aramas ra feinno, a eis, met ei.
“… Ra ereni, pwe Jisus ewe re Nazareth a fetanno.
“Iwe a puchoruta, Jisus noun Davit, kopwe umoumoch ngeniei.”
Mairu ren mochenin we, ekkewe aramas ra achocho ne fori an ewe mwan epwe faneno, nge “a fen neuomongeta ne puchor.” a apasa. Pokitan an siongaw, ra emwenono ngeni Jisus, ewe a rongorong an we tingor mi uren-nukunuk ren an epwe kunasefani me a echikarata i.
Ekkan ku netipei ei fatofatochun mwochan uruo iteiten ai aneani. Sia tongeni mefi an ewe mwan riaffou. Sia tongeni ekis rong an puchorun an ewe Chon Amanau epwe eteneki. Sia emenimen ren an ese mochen epwe fanafaneno—ennetin, nge a mochen osomongeta nupwen meinisin ra ureni epwe osokukunutiw. Ewer i, ese pwan or met epwe pwan kapach ngeni, ew murinon porous mi fokkun apochokuna nuku. Nge ren ussun meinisin pukefen, nupwen sipwe anapano ach annea, epwe pwan napeno ach kuna.
Ew ekiek a karan chok toriei ewe murinon memef an ewe mwan a awora memefin ewe ngun mi fel ngeni kewe aramas unukun. Ewe akauchean ei porous mi anongonong ngeni ekkewe tepan mwan me fefin ese fat iter nupwen chiener kewe ra kapas eis ngenir, “Met wewen ei osukosuk?” ra fen angei ar tipachem, sipwe chok era, ren ar esinna Kraist pwe popun ewe akakurang; I ewe Popun ewe Akkurang. Mi wor met sipwe kaeo seni non ei kukkunun porous usun fan itach meinisin. Non pekin nukunuk me nukuchar, a anisi an epwe emweni ami kapaseis ren ekkewe mei wor ekkoch rer. “Emon mi chuun mi tongeni emweni pwan emon mi chuun?” Jises a fen eis. “[Ika epwe ina,] ir me ruemon resap ne turutiw non ewe pwang?”
Ren kutten nukunuk me nukuchar ne fini met mi pung ina ach na popun non ekkei mwichenapen mwichefen, me ren ami fitikich ikenai, kopwe ne kunaochu pwe ei mettoch si kukuta mi ew popun kich mi aea fengen. Nee fetan unukuch. Ikei won ekkei pun ouwa kuna famini ren meinisin sais ra feitto seni meinisin neni. Minenomun chiechi ra turufengen ren pwapwan chusefan fengen, ew mwirinon mwichen koon ra asosot, me chon rese tipeew ngeni ra puchor seni nenier kewe nenien kapas osomong. Misineri ekkewe ra wes ra kukkuta chiener minen nom, nupwen ekkewe misineri re keran awesi ar misin ra kukuta meinisin chiener minefo (ika ke sinei met ei u fosun!). Me sasing? Nang anisikich! Fiti cell fon non pau meinisin, sia tonok non ekesiwin seni “meinisin member ra misineri” ngeni “meinisin member chon fich sasing.” Non nukanapen ei apwapwan opurfengen, emon a tongeni eis ren auchean popun, “Met wewen ei?”
Ussun porousen non nouch Testament Mi Fo, ekkana mi angei feiochun kuna repwe esinna ena, ikamo pwe mettoch meinisin orunien ei mwichenap epwe awora, epwe chok ekkis auchean ika esap fen wor auchean chinon chok ika sia kuna Jises pwe I a nom nukanapen meinisin. Ach sipwe komochunuk won ewe nemesepwi sia kukkuta, ewe echikara a pwonei, ewe auchean sia sinei mi nom ikei, sipwe mwittir tou seni ewe osukesuken akakurang—pwapwa usun mi pwano—me fori ach sipwe eteneki I. Ewe iotek an ekkewe chon afanafan, ewe epinukunuk an kewe ra kon, osufonun kewe chon wasona—meinisin ra achocho ngeni ar repwe kokori ewe Ngunupin ren I ewe minne an ei Mwichefen—ewe Kraist mi manau, ewe Lamen Kot, ewe Kingen Kinamwe.
Nge esap chok ren ach sipwe nom non ewe nenien mwichenap ach sipwe kuna I. Nupwen emon semirit a akaewin aneani ewe Puken Mormon me a ur ren ewe memefin tong ren an Abinadai pworacho ika ewe maas an ekkewe 2,000 onuon sounfiu, sia tongeni apasa pwe Jises a nom nukanapen ei amwararen porous mi maketiw, a uta ussun ew watten nios a ureno non meinisin peichin ewe book me awora ewe akoko nefinen meinisin ekkewe ekkoch chon anapano nuku non ewe emon mi itefouno.
Ussun chok, nupwen emon chienom a kaeo ussun ach nuku, neminewe ika atewe a tongeni ekis chouwasini ren ekkoch ekkewe mettoch ese sin ren me kapasen ach namanam rese sisinei non ach mokutukut usun—kaukun mongo, om pisekin aora ren pwisin om tufich, ewe nenien fetan an ekkewe akaewin chon ei mwichefen, forun neon family a fis won computer, fiti ukukun ekkewe steik center mi tepetep ekkoch ra era pwe repwe ne ochoch steak, ewe futuken kou mi kapwich ese kon mwotono. Iwe, attun chienach kewe ra satuni mokutukutun chammongen minefon kuna me rong, sipwe onuseni ewe akurang me osukosuken fonufan me otumunochur won wewen meinisin, won ewe pichipichin ngasangasen ewe kapas allim ese much—ewe tong an Inach me Samach non Nang, ewe nifangen ewe achasefan an noun Kot ewe At, ewe ekinamwein emwen an ewe Ngun mi Fel, ewe niwinsefaniton kei ennet me pwan chommong ekkoch ren fansoun soponon.
Nupwen emon epwe karan no non ewe tempel mi pin, neminena ika atena meni epwe mairu ren met ena a fis. Wisach sipwe tumunochu pwe ekkewe esisin mi pin me angangen namanam mi pwapwano, ewe fouten non nenian we me ekkewe kachito kich me kakaton, esap fori met sipwe tumunungaw seni nge kopwe feino ngeni ewe Chon Amanau, ewe sia nom pwe sipwe fen ngeni. Ewe tempel ina imwan, me I epwe nom asanapan me non ach ekiek me netipach—ewe auchean me osufonun annuk an Kraist a chou ngeni kich me chou ngeni ekkewe annukun tempel—seni ewe fansoun sia anneani maken won ewe asamen tonong tori ewe amuchunon fansoun sia nom non ewe imw. Nukanapen meinisin ekkewe mettoch sise kon weweochuti, sipwe kuna, asanapen mettoch meinisin, wewen Jises me non ewe tempel.
Ekieki chommongun porachon mokutukut me minefon esinesin non ewe Mwichefen non ekkei maram. Nupwen sia iamwiri fengenikich, ika enimenima ach Sabbath, ika etiwa ew minefon mokutukut an kewe semirit me sarafo, sipwene tumunungaw ngeni ewe ennetin popun ekkei ekesiwin seni Kot ika si kunar pwe ir mi sokono, ekkewe mettoch ese wor akoko fengen nefiner nge esap ussun ew tufichin akoko fengen an epwe anisi kich ne pochokun ne aueta pochokun won ewe Foun ach Manau Ese Much. Ennetin, ennetin iei met Preseten Russell M. Nelson a mochen pwe sipwe aea iten ewe Mwichefen mi pwano. Ika Jises—Itan, An annuk, An pisekin apiru, Nonomun ussun Kot—a tongeni nom nukapanen ach fen ngeni, sipwe apochokuna sefani ewe ennet Alma a afanafan usun me akkom: “Pwe epwe chommong mettoch repwe feitto [iwe] nengeni, mi wor ew mettoch minne mi kon auchea nap seni meinisin— … ewe Chon Angasa [ewe] mi manau me feitto nein noun kewe aramas.”
Ew soponon ekiek: Nenian Joseph Smith non ewe engon me tiuwen-ipuku ier fansoun mi watte osukosuken chommongan souneng ra ufengen. Nge non ewe okurangen osukosuk ra forata, ekkei chon fori ar fan mi ur ren pochokun me pwapwa rese nukufit, me ra fori weiresin ar repwe sinei ewe ennetin Chon Amanau kukunun Joseph a resin kukuta. Fiu ngeni met ewe a eita ngeni “rochopwak me osukosuk,” atewe a suno ngeni nein ekkoch ira ikewe a kuna me rong pwanon auchean an ewe Chon Amanau ionapei ewe kapas allim nap seni pwan och sia fen apasa ikei non ei sosoran. Fiti ewe niffangen kuna ese pwan ekieki me osukusuku pwe epwe fis, Joseph a kuna non akkomwan nemesepwi Saman ewe non Nang, ewe Koten unusen fonufan mi nap, me Jises Krast, noun ewe anamon mi unusoch. Iwe ewe Sam a fori ew minen apiru sia fen pwapwaiti non ei soran: A itini Jises, a apasa, “Iei i nei Achengicheng. Kopwe rongorong ngeni!” Ese wor och wachimuken memefin ingeiti ion ewe Jises, an auchea me non ewe kokkotun manau, me an uta mwen mesen Kot epwe tongeni nuseni ena mochomochen fisu mesen mak kapasen esinesin.
Akakurang me tipemwaremwar? Mwicheich me anini? Mi chommong ussun ekkena non ei fonufan. Ennetin, chon u ngeni me ekkewe chon nikitu ir mi chok anini ren ei nemesepwi me arapakan unusan met uwa fen porous won ikenai. Ika pwe en mi achocho ngeni om kopwe kunaochu fatan me om kopwe kuna wewen me non nukanapen ew chommongun memef, ua itin ngonuk pwan ewe chok Jises me wau an chon kuno kapasen pwarata ussun met ewe a fis ngeni Joseph Smith, feiton ren met a fis 1,800 ier mwirin chienach ewe mi chun a kunasefani me won ew annen Jericho. Ua pwarata fiti ekkei ruemon me pwan chammong ekkoch feitiwen non ewe fansoun ewe waten pwapwan kuna me rong non manau ren esap chok ren an Jises ewe fetaneno nge epwe feitto ngeni kich, kouno unukuch, me fori imwan ren kich.
Fefinei me pwii kanna, ren ekkei mettoch ese kouno okurangan me pungupungun drumun ach kei ran, amo sipwe achocho ngeni ach sipwe kuna Kraist nukanapechikin manauach, ach nuku, me ach angang. Ikana ia ewe ennetin wewe a nom ian. Iwe ika non ekkoch ran ach kokkot a oukuk ika ach apinukunuk a moreno ika ach nuku epwe kuna sossot me enimenim—usun epwe fis—iwe amo sipwe osomong ne puchoruta, “Jises noun David, kopwe umoumoch ngeniei.” Ua pwon fiti kinamwein an emon sou emwen kapas me chon oesini pwe I epwe rongorong me epwe apasa, epwe chok mwitir ika pwan ekiseno, “Iwe kopwe nenneno: om nuku a echikaroketa.” Feito ngeni mwichenapen mwichefen. Non iten Jises Kraist, amen.