Kuta Pwapwa non Ach Aporausa ewe Kapas Allim
Mi wor Semach won Nang mi tongei kich a witikich ach sipwe niwin ngeni I an epwe efeiochu manauach me manauen ekkewe aramas unukuch.
Echo konun Kinter ua men sani a poputa ren ekkei foufoun kapas:
Met ren mecheresin me ningan ei fos mi ennet kich mi nuku!
Ren Kich chon Ewe Mwichefenin Jises Kraist ren Aramas mi Pin non Fansoun Soponon, sia sinei ion kich. Sia sinei pwe “Kot I Seman ngunuch. Kich … Noun kewe semirit, me a tongei kich. Sia nom [ren I non nang] me mwen sia [feito] fonufan.”
Sia sinei an Kot we kokot. Nupen sia nom ren I a aitikich usun ewe kokkot. An Semach won Nang “popun—An angang me An ning—pwe epwe otufichikich ach sipwe angei an kewe feioch meinisin. A … ammonata eu unusochun kokot fan itach an Epwe aponuweta an popun. Sia weweiti me etiwa ei kokkotun … pwapwa, … manau, me … manau ese much” me mwen sia feito fonufan.
“Jises Kraist I ewe masowan an Kot kokkot. Me ren An Achasefan, Jises Kraist A aponueta An Seman we popun me a otufichikich ach sipwe angei manau esemuch me fefeita. Setan, are ewe tefin, i ewe chon ungeni an Kot kokkot” me a fen iei usun seni nepoputan.
“Pungun finata, are ewe tufich ne fini, mi ew niffang mi nap seni Kot ngeni Noun kewe. Sipwe fokun finata ika sipwe tapweno mwirin Jises Kraist are mwirin Setan.”
Iei mettoch mi ennet minne sia tongeni aporausa ngeni ekkoch.
Upwe aporausa eu fansoun inei a aporausa ekkei mettoch mi ennet ren chok an mochen suki netipan ne aporaus, me a kuna och tufich a tongeni anisi ewe emon.
Chommong ier a no, inei a niwiniti Argentina an epwe churi mwongeei we. Inei ese sani fiti sepenin, iwe a tingorei emon nei kewe at an epwe ngeni ewe efeiochun kinamwe me tumun. A angei memmef an epwe pwan efeiochu inen inan we an epwe kuna emwen seni ewe Ngun mi Fel an epwe apochokuna me ku netipan chommong aramas minne ra mochen keao usun ewe kapas allim.
Non ewe Salt Lake ermaik, inei me mwongiei we a churi emon nengin mi fisu ierin a niwin sefan ngeni imwan mwirin an feino ski fiti an famini. Inan me seman we nengin ra kuna pwe a nakatam an kapas ngeni inei me mwongei we iwe, ra pwan mochen repwe fitir. Ra apasa pwe iter Eduardo, me Maria Susan, me Giada Pol. Ra mefi kinamwe me pwapwa ren ar kukuno ren ei famini mi murrino.
Ekkei ru famini ra pwapwa ar chu ne sai me fiti fengen ewe sepenin ngeni Buenos Aires, Argentina. Nupwen ra sopweno ar poraus fengen, inei a esina pwe tori iei, rese mo rongorong usun ewe Mwichefenin Jises Kraist mi niwinsefan.
Eu nein ekkewe aewin kapas eis Susan a eisini, “Kose mochen ereni ei usun ewe imwen pisek mi ning mi or ewe nios mi kolt asan?”
Inei a awewei pwe ewe imw mi ning esap eu imwen pisek nge eu tempel an ewe Samon ian sia tongeni fori pwon mi pin ren Kot pwe sipwe tongeni niwin ngeni I. Susan a afata ngeni inei we pwe me mwen an feito Salt Lake, a iotek an epwe kuna och mettoch an epwe apochokuna ngunun.
Atun ar sasa won ewe sepenin, inei we a apasa ekkis chok an kapasen pwarata nge mi fiti pochokunen ewe kapas allim me a tingorei Susan an epwe kutta ekkewe misineri non nenian we. Susan a kapas eis ngeni ineiwe, “Ifa usun upwe kutter?”
Ineiwe a apasa, “Mi mecheres om kopwe esiner; epwe wor ruemon anuen mi uffouf seech mi pwech fiti nek tai, are ruemon fopun mi ufoufoch, me mi wor eu esinesin mi pacheta won ufer ren iter me pwan ‘Ewe Mwichefenin Jises Kraist ren Aramas mi Pin non Fansoun Soponon.’”
Ekkewe famini ra ekesiwin numpan nour fon me ra imufesen non ewe ermaik non Buenos Aires. Susana, seni ena fansoun amen chiechioch ngeniei, a ereniei fan chommong pwe a mefi netipengau ren an imuseni ineiwe non ewe ermaik. A apasa, “Inomuwe a saramaram. Use tongeni awewei, nge a wor an saram minne use mochen suu seni.”
Nupwen Susana a niwin ngeni nenian we, i me noun we, Giada, ra feino ar repwe aporausa met a fis ngeniir ren inen Susana, a nom karap ngeni imwer. Nupwen ra chiwen sa won aan, Susana a kuna ruemon anuen ra fetan won ewe aan me ra uffof non ewe napanap minne inei we a awewei. A akouono wan we nukunapan ewe aan, a tou, me a eisini ekkewe anuen, “Ami chon ewe Mwichefenin Jises Kraist?”
Ra apasa, “Ewer.”
“Misineri?” a kapas eis.
Ir me ruemon ra apasa, “Ewer, am misineri!”
Iwe a apasa, “Tonong non wai en; oupwe ne feito neim me aitiei.”
Ru maram mwirin, Maria Susana a papatais. Noun we nengin, Giada, a pwan papatais nupwen a tiu ierin. Am mi chok sopweno am angang won Eduardo, am tongei esap tongeni siwin ren mettoch.
Seni ena fansoun, Susana a winiti emon wesen achuporun misineri ngang mi ennetin sine non manawei. A usun ekkewe noun Mosaia, ren an emweni chommong aramas ngeni Kraist.
Non eu fansoun aua poraus fengen, ua eisini, “Met ewe ka for mi sokono? Ifa usun ka aiti ekkoch usun ewe kapas allim?”
A ereniei, “Mi mecheres. Iteiten ran me mwen ai tou seni imwei, ua iotek, ua tingor ngeni Semach won Nang An epwe emweniei ngeni emon mi mochen ewe kapas allim non manauer. Fan ekkoch ua uwei eu Puken Mormon ai upwe ngeniir are kukkun taropwe seni ekkewe misineri—me nupwen ua poputa ai upwe kapas ren emon, ua chok kapas eis ika ra fen rongorong usun ewe Mwichefen.”
Susana a pwan apasa, “Pwan fan ekkoch ua chok emenimen nupwen ua uti ewe train. Eu ran emon mwan a nenengeniei me apasa, ‘Met ke emenimen ren?’ Ua mairu ren met a apasa.
“Ua apasa, ‘Ua emenimen pokiten ngang mi pwapwa!’
“Iwe a apasa, ‘Iwe met ke pwapwa ren?’
“Ua ponueni, ‘Ngang emon chon Ewe Mwichefenin Jises Kraist ren Aramas mi Pin non Fansoun Soponon, iwe ena popun ua pwapwa. Ka fen rongorong usun?’”
Nupwen a apasa apw, a ngeni echo kukkun taropwe me a tingorei an epwe fiti fan non Raninfel. Non ewe Raninfel a feito, a etiwa i me peen ewe asam.
Preseten Dallin H. Oaks a aitikich:
“Mei wor unungat mettoch mine meinisin chon Mwichefen ra tongeni fori ar repwe aninis ne aporausa ewe kapas allim. …
“Aewin, sia tongeni iotek ren epwe or ach mochenin anisi ei kinikinin ewe angangen manau ese much. …
“Aruan, sipwe apwonueta ekkewe annuk. … Ngunun ewe Chon Amanau epwe nonnom ren chon Mwichefen mi nukuchar fansoun meinisin pwe epwe emwenir non ar achocho ne fiti ewe angang aporausa ewe kapas allim mi niwinsefan an Jises Kraist.
“Unungatin,sia tongeni iotek pwe sipwe angei emwen usun met sipwe tongeni fori ne aporausa ewe kapas allim ngeni ekkoch … [me] iotek fiti ewe tipe ewin fofor won ewe pwarata oua angei.”
Mwongeei, pwi, semirit, me sarafo, sa tongeni apiru chienei we Susana me aiti ekkoch usun ewe kapas allim? Sia tongeni tingorei chienach ese choni ach namanam an epwe fitikich ne fan non Raninfel? Are sia tongeni ngeni emon chon ach famini are chienach ew Puken Mormon? Sia tongeni anisi ekkoch ar repwe kuta ar kewe neou won FamilySearch are aporausa met sia keao usun non ewe wik ren ach anneani puken Feito, Tapweno Mwiri? Met sia tongeni usun chok ach Chon Amanau, Jises Kraist me aporausa ewe mettoch awora pwapwa non manauach ren pwan ekkoch aramas? Ponuen ekkei kapas eis ewer! Sia tongeni fori!
Non ekkewe pukefel sia anneani pwe “chon ewe Mwichefenin Jises Kraist ra feino o angang non an ewe attake ren amanauen ngunun meinisin.”(Doctrine and Covenants 138:56). Angangen manau esemuch mi or angangen misineri, anisi ekkewe mi keran papatais, apochokuna ekkewe mi patapatano, angang non tempel me ren uruon famini, me afanafana ewe kapas allim mi pachenong non ei angangen amanau.”
Chienei achengicheng, ewe Samon a mochen sipwe ochufengeni ewe muun Israel Non ewe Doctrine Covenants, A fen apasa, “Pwe sisap ekieki met sipwe apasa; nge sipwe sopweno ne keao ekkewe kapasen manau fansoun meinisin, me epwe ngeni kich met mi namwot ngenikich.”
A pwan, pwon ngenikich:
“Ika sipwe angang unusen manauach ren ach aiti aramas usun aier, me sia chok emweni emon chok ngeni I, sipwe ennetin pwapwa ren i non muun Seman we!
“Me iei, ika ach pwapwa epwe napano ren emon ngun sia emweni ngeni I me non ewe muun Seman we, epwe ifa ukukun ach pwapwa ika sia tongeni emweni chommong ngun ngeni I!”
Ewe konun Kinter ua poputa ren upwe asopwano ren ekkei kapas:
Ua pwarata pwe ekkei kapas mi ennet me mi wor Semach won Nang mi tongei kich a witikich ach sipwe niwin ngeni I an epwe efeiochu manauach me manauen ekkewe aramas unukuch. Amo ita sipwe mochen emweni mwongeach me pwich kewe ngeni Kriast iei ai iotek non iten Jises Kriast, amen.