Apworausa ewe Kapas Allim

Seni Elter Dallin H. Oaks

Seni ewe Mwichen Engon me Ruemon Aposel

Met sia iteni “angangen misinerin chon Mwichefen” esap tetenin angang nge ew namanamen tongei me apechekununa chon unukuch.

I.

Me nesoponon An angangen souleng won fonufan ach Chon Amanau, Jises Kraist, a annuku ngeni noun kewe chon kuna: “Oupwe feinno ren aramas meinisin won fonufan”(Matthew 28:19) me “Oupwe feinno won unusan fonufan, iwe oupwe afanafana ewe kapas allim ngeni aramas meinisin” (Mark 16:15). Meinisin chon nuku Kraist ra nom fan ekkei annuk ne apworausa ewe kapas allim ngeni aramas meinisin. Chommong ra iteni ei ewe “kokor mi nap.”

Usun Neil L. Andersen awewe non ewe mwichen nesessor, Aramas mi Pin non Fansoun Soponon ir nein ekkewe mi wesewesen nukuchar ngeni ei wis. Amo epwe fen usuch, pun sia sinei pwe Kot a tongei Noun kewe meinisin me me non ekkei fansoun soponon I a eniwinato sine me manaman mi auchea ne afanafan ngenir meinisin. Ewe Chon Amanau a aitikich pwe sipwe tongei meinisin pwich me fefinach, me sia asamounu ei ren ach afanafana me apworausa ewe pwaratan me esinesinen ewe kapas allim mi niwinsefanito nein muu, einang, fosun fonu, me aramas meinisin(D&C 112:1). Iei ew kinikin mi nom nukanapan manauen emon Aramas mi Pin non Fansoun soponon. Sia nengeniei pwe iei ach feioch mi apwapwa. Met epwe awora pwapwame ren ach sipwe apworausanewe ennet ese much ngeni noun Kot aramas?

Ikkenai mei wor chommong napanap sia tongeni apworausa ewe kapas allim non rese nom non tettenin aramas me nom. Mei wor TV, internet, me pekin chiechi won internet. Mei wor chommong pworaus mi auchea mi fich ngeni ach esinesinne ewe kapas alim. Mei wor itefounon ewe Mwichefen non chommong muu. Mei wor tepetepenon misineri. Nge, kich mi aea ekkei non napanap mi nap? Ua nuku pwe napangeni kich sipwe apasa apw. Sia mochen pwe sipwe nipwakochuno non ach apwonueta wisach mi pin ne apworausa ewe kapas allim ngeni unusan fonufan.

Mei wor chommong ekkiekin apworausa ewe kapas allim mi fich non pwisin ew me ew steik me muu. Nge, pokiten kich ew Mwichefen non unusan fonufan, ua mochen fos usun ekkiek mi fich ngeni ekkis meinisn, ngeni ekkewe pranch minafo tori ekkewe minen nom, ngeni ekkewe ereni iei mi etiwa ewe kapas allimen Jises Kraist tori ekkewe ereni me muu mi ungeni namanam. Ua mochen kapas usun ekkiek ami mi tongeni fori ren aramas mi tipepwos non ar nuku non Jises Kraist fiti ekkewe pwan aramas rese mo rong Itan, ren aramas mi menemenoch ren manauer iei fiti pwan ekkewe mi retin kuta tufichin aochu manauer.

Met ua tufichin era pwe epwe anisikemi ne apworausa ewe kappas allim, ikamwo nonnomun manauemi? Aninnisin chon Mwichefen meinisin mi namwot, me meinisin mi tonengi aninnis, pun mei wor chommong angang sipwe fori non ach apworausa ewe kapas allim mi niwinsefanito ngeni muu, einang, kapasen fonu, me aramas meinisn.

Preseten Monson a pesei memper me misineri repwe aninnis fengen

Kich meinisn sia sinei pwe an chon Mwichifen aninnis non angangen misineri mi namwot ngeni ekkesiwinin aramas me ioniochun aramas. Presiten Thomas S. Monson a apasa: “Iei ewe fansoun pwe chon Mwichefen me misineri repwe chufengen … [me] angang non an ach chon amanaw we atakke ne panano ngun ngeni I. I a amonata kofichin ach sipwe apworausa ewe kapas allim non sokopatten napanap, me I epwe anisikich ika sipwe apwonueta An angang non nuku.”

Wisach me ach feioch non unusan manauach pun kich souleng pwe sipwe apworausa ewe kapas allim mi niwinsefanito. Elder Quintin L. Cook a achema ngenikich, “Angangen misineri ese chok efoch kiien oroken sise titiki fan chommong; mi fen ki mi auchea non ew kon mi ningoch mi namwot sipwe titiki unusan manauach ika sipwe fiti konen ach nukunuk ngeni namanamen Kraist me ewe kapas allimen Jises Kraist.”

II.

Mei wor unungat mettoch meinisin chon Mwichefen mi tongeni ne anisi ewe apworausan ewe kapas allim, ikamwo nonnomun manauer are ar angang. Meinisin kich sipwe fori ekkei.

Aewin, sia tongeni iotek ren ewe mochenin anisi ei kinikinen ewe angangen amanau mi auchea. Achocho meinisin a pop seni mochen.

Aruan, sia pwisin tongeni apwonueta ekkewe annuk. Chon Mwichefen mi nukuchar me anneasochis ir ewe pisekin pwarata mi nap usun ennetin me auchean ewe kapas allim mi niwinsefan. A pwan auchea me en, pwe Ngunun epwe nonnom ren chon Mwichefen mi nukuchar fansoun meinisin pwe sipwe emwenir non ar achocho ne fiti ewe angang minapen apworausa ewe kapas allim mi niwinsefan an Jises Kraist.

Aunungatin, sipwe iotek ren asaraman met kich sia tongeni fori non pwisin manauach ne aprorausa ewe kapas allim ngeni ekkoch. ei a sokkono seni ach iotek ren ekkewe misineri are iotek usun met ekkoch ra tongeni fori. Sipwe iotek usun met sia tongeni pusin fori. Nupwen sia iotek, sipwe chechemeni pwe iotek ren ei sokkun pwarata epwe penu ika a fiti tipew—ew mettoch ekkewe pukfel mi iteni “ennetin popun” are “unusen netip.” Iotek fiti ewe tipewen fofor won ewe pwarata oua angei, me pwon ngeni ewe Samon pwe ika I epwe auroura ngeni kemi pwe oupwe kapas ngeni emon usun ewe kapas allim, oupwe chok fori.

Emwenien ewe Samon mi namwot ngeni kich fan itan ese nifinifin kunok mei wor ekkoch mi monnata—me ekkoch rese mwo—ar repwe pwan angei ekkewe ennetin ewe kapas allim mi niwinsefan. Kich sisap wisin sou kapung ika emon mi monnata are ese mwo. Ewe Samon mi sinei netipan meinsin Noun, me ika sipwe iotek ren asaram, I epwe anisikich ne kuna ewe aramas I mi sinei pwe “ra monneta ar repwe rongorongo ewe kapas” (Alma 32:6).

Fan itan ngang emon noun ewe Samon Aposel, ua pese ngeni aramas me famini meinisin non ewe Mwichefen pwe repwe iotek pwe ewe Samon epwe anisiir ne kuta ekkewe aramas ra monneta ar repwe angei pworausen an Jises Kraist we kapas allim mi niwinsefan. Elter M. Russell Ballard a ngenikich ei kapasen aurur mi auchea, minne ua tipew: “Nuku ewe Samon. I ewe Chon Masen Siip mi echupwer. A sinei Noun siip. … Ika sise fiti ewe angang, ita mei wor chommong repwe ausening ngeni pworausen ewe Aniwinsefanito nge sipwe emenungauaireno. … Ekkewe nongonong mi mecheres—iotek, ami pwisin pwan non ami famini, ren tufichin misineri.” Nupwen sia pwari ach nuku, ekkei tufich repwe torikich me esapw wor “chimw are … mwaken. Epwe mokutu kinamwe pungun niwinin ach tongei pwich me fefinach.”

Ua sinei pwe ekkei mi ennet. Ua pwan apachenong ai pwon pwe fiti aninnisin ewe Samon, sipwe emwen, asaram, me kuna pwapwa wachemuk non ei angangen tong mi auchea esemuch. Sipwe poputa ne weweiti pwe winnan ewe kapas allim a eto seni ach tingor ngeni aramas ren netipach me ennetin popun pwe sipwe anisir, ese nifinifin penuer.

III.

Iei ekkoch mettoch sia tongeni fori ne forochu ach apworausa ewe kapas allim:

Chon uwo taksi ren ewe Olympics non Brazil

Sipwe chechemeni “pwe aramas ra kaeo nupwen ra monnata kaeo, esap nupwen sia monnata aitir.” Met kich sia sani stati, usun ekkewe pwan ekkoch afanafanen nongonongen ewe Mwichefen mi niwinsefan mi auchea, napangeni fansoun esap met pwan ekkoch ra mochen kaeo. Napangeni ekkoch ra mochen sinei niwinin ekkewe nongonong, esap tichikin ekkwe nongonong. Nupwen ra apwonueta me manaueni niwinin ewe kapas allim mi niwinsefan an Jises Kraist non manauach, repwe mefi ewe Ngun mi Fel me poputa ne pwan mochen sinei ekkewe nongonong. Amwo repwe pwan mochen nupwen ra kuta anapanon ar pwapwa, ar akarapeto ngeni Kot, are anapanon ar weweiti popun manau. Iwe, sipwe tumunuochu me iotek ren miriti usun ifa usun sipwe eis usun an pwan emon mochen kaeo pwon och. Ei a nongonong won ekkoch mettoch, usun nonnomun manauan emon me ach chiechi ngeniir. Iei ew itenapen pworaus mi fich non mwichen chon emwen, pristut, me Fin Anisi.
Nupwen sia kapas ngeni ekkoch, sipwe chechemeni pwe ew tingor pwe repwe kaeo usun Jises Kraist me An kapas allim a pwetete seni ew tingor pwe repwe kaeo usun ach Mwichefen. Sia mochen pwe an aramas ekkisiwin epwe anongonong won ewe kapas allim. Ina ewe popunapen ewe Puken Mormon. Memmef usun ach Mwichefen a tapw mwirin ekkesiwin mi anongonong won Jises Kraist; ese akkomwa. Chommong ra osukosuk ren mwichefen ng era tongei ewe Chon Amanau. Fiti tetenin ekkei.
Nupwen sia achocho ne esinei aramas ngeni ewe kapas allim mi niwinsefan, sipwe fori non napanap mi ennet non tong me umoumoch ngenii. Ei a fis nupwen sia achocho ne anisi aramas ren osukosuk ra afatangenikich ika nupwen sia angang rer non angangen aochunon sopw, usun angasan ekkewe mi riaffou, tumunun ekkewe mi osupwang me torongau, are aochunon manauan ekkoch.
Ach achocho ne apworausa ewe kapas allim esapw chok fis nein chienach pwisin. Non fansoun ewe Olypic sia kaeo usun emon chon wawa taksi i emon souleng non Rio de Janeiro mi uwei fitecho Puken Mormon non fisu fosun fonu me a ineti ekkei ngeni meinisin mi etiwa. A pwisin iteni i ewe “misineri chon taksi.” A era, “Ekkewe an non Rio de Janeiro … ir ai nenian angangen misineri.”

Clayton M. Christensen, a fokkun ing an fori angangen misineri chon Mwichefen, a apasa pwe “seni rue ier me nom tor iei, aua kuna pwe an emon epwe mochen kaeo usun ewe kapas allim ese nongonong won pechekunan am chiechi ngeni akkomw.”
Ekkewe mwichen pisopen wart ra tongeni akota ew mwichen sakramen mi kefin minne ra pesei ngeni chon Mwichefen ne panato ir mi mochen kaeo. Chon wart resap tipemwaramwar ne panato chiener ngeni ei sokkun mwich pun repwe fat pwe masowan ewe mwich epwe kefinata an epwe apechekuna ar mochen me tupweniochu ewe Mwichefen.
Mei wor chommong tufichin apworausa ewe kapas allim. Usun iei, non ewe summer ua ange echo taropwe mi pwapwa seni emon chon Mwichefen minafo mi kaeo usun ewe kapas allim mi niwinsefan nupwen chienan chon sukkun me nom a kokori ne kapas ngeni usun ew emwen non manauan. A mak: “Ua asaram ren ewe napanap i a kapas ngeniei. Mwirin fitu maramen ai ua kaeo seni ekkewe misineri ua paptais. Manauei a ochuno seni ena.” Kich sia sinei chommong pwe manauer repwe ochuno ren ewe kapas allim mi niwinsefan. Sia achocho ne anisiir?
Nouch kewe sarafo pwapwaiti me nipwakoch ren pekin chiechi won internet a esinepato ar tufich mi feioch ne achocho ne anisi aramas pwe repwe mochen ewe kapas allim. Non an awewe usun an ewe Chon Amanau a pwa ngeni ekkewe chon Nifai, Mormon a makkei, “a aiti me angang ngeni ekkewe semirit …, iwe a apwetetei channawer pwe repwe tongeni kapas.” (3 Nifai 26:14). Ita pwe ikkenai epwe apasa “apwetetei [autenapen teks] pwe repwe tongeni kapas.” One fori, serafo!

Ach apworausa ewe kapas allim esap osach nge fen ach pwapwa. Met sia iteni “angangen misinerin chon Mwichefen” esap tetenin angang nge ew namanamen tongei me apechekununa chon unukuch. A pwan ew tufichin pwarata mefiach usun ewe kapas allim mi niwinsefan an ach Chon Amanau. Usun met Elter Ballard a aitikich, “Ewe pisekin pwarata mi nap usun ach ekkesiwin me mefiach usun ewe kapas allim non manauach a pwa non ach mochen apworausa ngeni ekkoch.”

Ua pwarata usun Jises Kraist, I ewe Saram me ewe Manauen fonufan (nengeni 3 Nifai 11:11).An kapas allim mi niwinsefan a asarama ewe anen manauach. An Achasefan a awora ngenikich ewe ennetatan manau mwirin mano me ewe manamanen nikitu tori manau esemuch. Me An Achasefan a awora ngenikich ewe tufichin angei omusomusen tipisich pwe, fan ningan an Kot kokotun manau esemuch, sipwe kofichin weri manau ese much, ewe nifang mi napanap me ren Kot (D&C 14:7).Non itan Jises Kraist, amen.