Ren ach Kaeo me Fefeita non Pekin Ngun
Ekkewe monomonen Kot repwe pwa ngenikich ika ina Netipan me ren manamanen ewe Ngun mi Fel.
Nupwen ngang emon anuon, inei me semei ra angei ew niffang me am me pwi David aua fakkun ingeiti. Ewe niffang ew kukkun niousun ekkewe seleichen kolt an ewe Soufos Joseph Smith a angei me ren ewe chon nang Moronai. Ren ai chechemeni, ewe niousun seleich ra mak won ekkewe 10 seleichen mecha. Nge, ekkana seleich esap met aua nenengeni.
Aua marita non am rong porausen ewe Niwinsefaniton ewe kapas allim. Aua sinei usun me kon non Kinter usun ekkewe seleichen kolt mi op nepekin ewe chuuk me ewe Chon Nang Moronai a uweireto ngeni Joseph Smith. Am kewe ekiek mi kukkun ra anchangei, me a wor ew mettoch aua mochen kuna: met a mak won ewe niousun ekkewe seleich mi fot ren pwan och mecha?
Ekkewe seleich ra nom won ew chepel non ekkoch ran mwen am mochen sinei a amwokutukem. Ika mo aua sinei pwe esap iei ekkewe seleich seni Moronai, aua mochen kuna ewe kinikin mi kesip. Fan ekkoch, ngang me pwi aua sotuni sar, sipun, me met chok aua tongeni pwe aupwe tipweni ekkewe peich mi kesip aukukun aupwe tongei anneani—nge aua tumunu pwe ausap kupi ewe mecha mi fot ngeni. Aua weweiti pwe ausap pwarano met aua fori non nukumach. Ren am netipengau me song, am sotuni “tipweni ekkewe seleich” nge ause tufich.
Use chok sinei iei—ika mi wor—met a opono non ekkana seleich mi kesip. Nge sonapen ei poraus pwe tori ikenai use pwan sinei met mi mak won ekkewe peich mi suk pwe aupwe anneani. Ua weweiti pwe ekkana peich naman ra masou ren porausun ewe Niwinsefaniton kapas allim me kapas pwarata seni Joseph Smith me ekkewe unumon me wanimon chon pwarata, ekkewe ra ennetin kuna ekkewe seleich seni Moronai.
Seni Foratan ei fonufan, Semach won Nang a pwarata an menemen, emwen, me aurour ngeni Noun kewe me ren ekkewe soufos. An kapas ra poporaus seni ekkei soufos me ra nom non pukefel ren ach aochuno me kaeo. Iei usun an Nifai awewe:
“Pokiten nguni a pwapwaiti ekkewe pukefel, me netipei a ekipwichir, ra pwan makketiw pwe pisekin kaeo me tufich fan iten mwirimwiri meinisin.
“Nengeni, nguni a pwapwa ren ekkewe mettochun ewe Samon; me netipei a soposopono ne ekipwichi ekkei mettoch ua kuner me rongorong usur.”
Pwan pachenong pwe, non ekkewe kinikinin fansoun noom, pwan non ei fansoun kinikin a unus, chon an ewe Samon Mwichefen ra feioch ren ewe chiechien ewe Ngun mi Fel, ewe a anisikich non ach fefeita me kaeo non pekin ngun.
Pun ua sinei usun an pwi achocho, ua nuku pwe naman I a anneani unusan ekkewe kapas mi mak won ewe niosun ekkewe seleich non imwem. Nge, ngang, use afanni ekkewe kapasen ennet mi fatoch me auchea nge ua chok kukutta ekkewe mettoch resap mwo pwano ngenikich.
Sonapen, pwe ach fefeita me kaeo a tongeni mang ika kouno pokiten ach mochen ne “tipweni ekkewe seleich” mi namwotengau. Ekkei foffor ra tongeni emwenikich pwe sipwe kutta mettoch sisap mo weweiti, nge non ei napanap sia nusuno ekkewe ennet mi namwot non ena fansoun—ekkewe ennet Nifai a apasa pwe mi mak ren sipwe kaeo me aochuno senir.
Pwiin Nifai, itan Jacob, a aiti: “Nengeni, ekkewe angangen ewe Samon mi auchea me amwarar. Ifa ukukun weiresin aramas repwe weweiti anonnonun ekkewe monomon usun I; iwe ese tufich pwe aramas repwe sinei usun an kewe eereni meinisin.”
An Jacob kapas ra aitikich pwe sise tongeni pworacho non ach “tipweni ekkewe seleich” ika umwesi ekkewe monomonen Kot repwe pwa ngenikich. Nge, ekkewe monomonen Kot repwe pwa ngenikich ika epwe Netipan pwan me ren manamanen ewe Ngun mi Fel.
Jacob a sopweno:
“Iwe ese wor emon aramas a sinei usun an eereni tiwenon chok ika epwe pwano ngeni i; ina minne, pwi, ousap oput ekkewe pwarata an Kot.
“Pun nengeni, seni ewe manamanen an kapas aramas ra feito won unusen fonufan, minne fonufan a for seni pochokunen an kapas. Ina minne, ika Kot a tongeni kapas iwe ewe fonufan a fis, me kapas me aramas ra fis, O iwe, pwata esap tongeni annuku ewe fonufan, ika fofforun poun won unungan we, anongonong won an mochen me met epwe fich ngeni netipan?
“Ina minne, pwi, ousap achocho ne auroura ewe Samon, nge oupwe angei aurour seni poun.”
Ika sipwe weweiti monomonen Kot, ika ekkewe mettoch sipwe weweiti ren chok pwarata, sipwe tapweno ekkewe fofforun Nifai, ewe a apasa, “A fokkun kukkun ieri, nge inamo ua watte non pekin inis, me ua pwan ennetin mochen ai upwe sinei ekkewe monomonen Kot, ina minne, ua sio ngeni ewe Samon; iwe nengeni i a churiei, me a apwetetei netipei pwe upwe nuku meinisin ekkewe kapas minne semei we a apasa.” Ewe Samon a pwan sopweno ne apasa pwe Nifai a anganga an nuku, me a kutta i non ennetin mosonosonun netipan, me a anneasosichi An kewe annuk.
Fofforun Nifai ren an kutta mirit a pachenong ekkei (1) ennetin mochen, (2) tipetekison, (3) iotek, (4) nuku non ekkewe soufos, me anganga ach (5) nuku, (6) achocho, me (7) anneasochis. Ei napanapan kutta mi watte sokofesenin ai “tipweni ekkewe seleich” ika achocho ne umwesi ai upwe weweiti mettoch epwap pwarano non an Kot fansoun me ren manamanen ewe Ngun mi Fel.
Non ach kei ran, sia mochen me nuku pwe mirit epwe feito iei chok; nupwen poraus ika mirit ese mecheres ne angei, napengeni repwe poutano ika resap chiwin nuku. Pokiten chommongun aanen ach sipwe kaeo poraus, ekkoch ra nuku och poraus ese pung seni ese nifinifin napseni ar repwe anongonong won an Kot napanapan angei pwisin pwarata. Meni Jacob a awewe ach kei ran nupwen a apasa: “Nge nengeni, ekkewe [aramas] ir aramas mi nukumach; iwe ra epinengaw seni ekkewe kapasen fatafatoch … me kutta ekkewe mettoch rese tongeni weweiti. Ina minne, pokiten ar chun, minne ewe chun a feito seni nunon ar neno seni ewe esisin, mi auchea repwe turutiw non ngun; pun Kot a angeiano an fatafatoch seni ir, me ngeni ir chommong mettoch minne rese tongeni weweiti, pokiten ina met ra mochen.”
Nge mi sokofesen aurourun Preseten Dieter F. Uchtdor. A poraus usun misineri, nge an kapas pwan mi tongeni weweoch ngeni meinisin chon kutta ewe ennet. “Ika … misineri a wor ar nuku non Jises Kraist,” a apasa, “repwe nuku non ewe Samon me anneasochisi An kewe annuk—ika mo rese weweiti pwata ra forir. Ar nuku epwe pwarano non ar nipwakoch non ar angang.”
Non ewe Mwichenap non ewe April, Elter Dallin H. Oaks a awewe: “Ewe Mwichefen a akkachocho pwe epwe fatoch ren ach kewe rekot, nge ina mo sia awora chommong, fan ekkoch a wor kapas eisin chon mwichefen minne rese pwonu seni an stati. … Ekkoch mettoch sia chok tongeni kaeo ren ach nuku.”
Soufosun noom ra pwan aiti ei nongonong, me pwarata pwe ren ekis fansoun napanapan aramas ese siwin me an ewe Samon napanapan kaeo ese siwin. Ekieki usun ei wokisin seni ewe Testamen Noom non Proverbs: “Kopwe apinukunuku ewe Samon ren unusen netipom; Kosap apinukunuku met ka ekieki pwe ka sinei.”
Isaiah a awewe, non an kapas fan itan ewe Samon, “Usun chok tekian ekkewe nang seni fonufan, iwe a ina usun chok ai foffor me ai ekiek ra tekia seni ami kewe.”
Nifai a pwan apasata an kapasen pwarata nupwe a era, “O Samon, ua fen apinukunuk non en, iwe upwe wanong ai apinukunuk non en tori feinfeino chok.”
Ach nuku non ewe Samon epwe namwot pwe sipwe esinna pwe An tipachem mi tekia seni ach kewe. Sipwe pwan esinna pwe An kokkot a etufichikich ach sipwe fefeita me kaeo non pekin ngun.
Ese namwot rech pwe“epwe wor ew unusochun sinei mettoch” non ei manau. Nge, wisach pwe sipwe “apinukunuku mettoch minne [sise] kuna, minne ra ennet.”
Ika mo a pochokkun an Nifai nuku, a esinna an tiparoch nupwen a ponueni ngeni ewe chon nang a ani kapas eis, “Ka sinei ewe tekisosonun Kot?” Nifai a ponueni, “Ua sinei pwe i a tongei noun aramas; nge inamo, use sinei ewe wewen mettoch meinisin.”
Non ei napanap, Alma a pwan pwarata ngeni noun we itan Ilaman, “Iei ekkei monomon rese mwo unusen pwano ngeniei; iei minne upwe kouno.”
Ua pwarata ai sineiochu pwe Semach won Nang a tongei Noun kewe, nge, usun Nifai me Alma, use seni wewen mettoch meinisin. Nge ese namwot upwe sinei mettoch meinisin; Upwe pwan kouno me upwe tipepwos non ai witi ewe Samon, me ua sinei “mi wor rei mettoch meinisin pwe ew pwarata pwe ekkei mettoch ir mi ennet. …
“… Ekkewe pukefel ra kawor me mwom, ewer, me mettoch meinisin ra esisinata pwe mi wor emon Kot; ewer, pwan mwo ewe fonufan, me mettoch meinisin minne ra nom won unungan, ewer, me mwokutukutun, ewer, me pwan ekkewe fonufan meinisin minne ra mwokut non pwisin tettenochur ra pwarata pwe mi wor emon Chon Fori mi Napanap.”
Ika sipwe esinna pwe kich forien emon Sam mi tipachem me tiniken won Nang, “O, iwe,” pwata sisap mwut ngeni I epwe emweni ach fefeita me kaeo non pekin ngun o epwe “anongonong won an mochen me met epwe fich ngeni netipan” nge esap ren netipach?
I a manau. Jises Kraist I chok Noun we Anaemon me ewe Chon Amanauen aramas. Pokiten an Kraist Achasefan ese much, I a uwei ewe mirit me tipachem ne emwenikich non ekkei ran. Joseph Smith I Noun soufos, mi kefinita epwe Aniwinsefanitiw unusan Muun we won fonufan. Thomas S. Monson I ewe soufos mi manau ikenai. Ren ekkei ua pwarata ai seniochur non iten Jises Kraist, amen.