Ese Wor Pwapwa Nap Seni Ach Sinei pwe Nouch kewe Semirit mi Sinei
Use sinei ika mi wor mettoch non fonufan epwe tongeni awora pwapwa nap seni ach sinei pwe nouch kewe semirit mi sinei ewe Chon Amanau.
Pwich me fefinach, ua ekieki usun ei kapas eis: “Ika noumi kewe semirit ra chok sinei met oua aitir usun ewe kapas allim—ami chok ekkewe oua aitir—ufa ukukun ar sinei?” Ei kapas eis epwe katou ngeni aramas meinisin mi tongei, aiti, me anisi semirit.
Mi wor eu niffang mi nap seni ach anisi nouch kewe semirit ar repwe chechemeni non unusen netiper pwe sia sinei pwe ach Chon Amanau mi manau? Ir mi sinei pwe sia sinei? Mi auchean, ra pwan poputa ne kaeo ar repwe pwisin sinei pwe I mi manau?
Nupwen ngang emon at, inei a fokkun osukosuk ren an tumunu ei ren ai nukumach. A fokkun watte ai pochokun. Inei a ereniei pwe a nuokus pwe usap manau tori ua watte. Ua fokkun mesepat.
Ua chechemeni ne kukuni atun ai mommot non eu mwichen sakrament ren ai famini. Inei a keren angei ew noun kewe pukefel minafo. Meinisin ekkewe pukefel mi kapach fengen non echo puk, me non ewe puk mi wor taropwe pwe ka tongeni makei mettoch.
Non ewe mwich, ua eiseni inei ika ua tongeni komoch noun kewe pukefel. A apinukunuk pwe epwe anisi ei ai upwe mosonoson, iwe a ngeniei ewe puk. Nupwen ua suki ewe puk, ua kuna pwe a makei eu mettoch a mochen fori non ewe nenien mak. Ren ai upwe awewe met a mochen fori, upwe afata pwe ngang ewe oruan semirit nein wanimon me itei Brett. Inei a fen makei, non parapar, eu chok mettoch: “Usap songokai ren Brett!”
Ren ai upwe pwan awewei ewe osukosuk inei me semei mi kuna ren ar tumunu am famini, upwe pwan erenikemi usun am anneani ekkewe pukefel non am famini. Iteiten nessesor, inei a anneani ewe Puken Mormon ngeni kem nupwen aua mongo. Non ei fansoun, pwi watte, Dave, me ngang aua mommot non mosonoson nge aua mesepat. Ennet, ause ausening. Aua anneani ewe mak won ekkewe porun mongo.
Iwe, eu sossoran, ua finata ai upwe kapas wenechar ngeni inei. Ua pwarata, “Mama, pwata ka fori ei ngenikem? Pwata ka anneani ewe Puken Mormon iteiten nessosor?” Mwirin ua apasa eu mettoch minne ua sau ai upwe pwarata. Ennet, use nuku pwe ua fen apasa. Ua apasa, “Mama, use anusening!”
Met a apasa ngeniei a siwini manauei. A apasa, “Nei at, fan eu ua fiti eu mwich me Preseten Marion G. Romney a aitikem usun ekkewe feioch sia angei nupwen sia anneani ekkewe pukefel. Non ei mwich, ua angei eu pwon pwe ika a anneanei ewe Puken Mormon ngeni nei kewe iteiten ran resap pout seniei.” Iwe a nenong non mesei me, ren unusan an pochokun, a apasa, “Me usap mut ngeni om kopwe pout seniei!”
An kapas a ku netipei. Ina mwo ai nipwakingau, ngang mi auchea me a mochen amanaua ei! A aitiei ewe nongonong mi ennet pwe ngang emon noun Semach won Nang mi uren tong. Ua kaeo pwe ese nifinifin met a fis, ngang mi auchea. Mi eu fansoun mi unusoch fan iten emon at kukkun ese unusoch.
Ua ennetin kinisou ngeni inei me ekkewe ekkoch aramas mi usun chon nang minne ra unusen tongei semirit, ina mwo ar kewe nipwakingau. Ua ennetin nuku pwe fefin meinisin—upwe eita ngenir “chon nang”—ir in non Saion, ese nifinifin ika ra pupunu are mi wor nour kewe semirit won ei fonufan.
Fitu ir a no ewe Aewin Presetensi a apasa: “Wisen in mi eu wisen nang. Wisen in mi nap me pin seni wis meinisin minne aramas mi tongeni fori. A anenia ewe emon a sufoniti ei wis me angang ren ekkewe chon nang.”
Ua kinisou ren ekkewe chon nang non ewe Mwichefen mi pochokun me uren tong ren ar pwarata ewe kapas allim ngeni noun Semach won Nang kewe.
Ua kinisou ren ewe niffangen ewe Puken Mormon. Ua sinei pwe mi ennet! A masoweni unusen ewe kapas allimen Jises Kraist. Use sinei emon mi tiniken ne anneani ewe Puken Mormon iteiten ran ren ennetin netipan me nuku non Kraist minne an kapasen pwarata a poutuno are a patapatano. An ewe soufos Moronai pwon a ngeni kich ekkewe ki ne sinei ennetin mettoch meinisin—a pwan ngenikich ewe tufich ne weweiti me suseni ekkewe sossotun setan. (Nengeni Moronai 10:4–5.)
Ua pwan kinisou ren Semach won Nang me Noun we, Jises Kraist ir mi uren tong. Ewe Chon Amanau a ngenikich eu unusochun nenien appiru ren ifa usun sipwe manau non eu fonufan ese unusuch me pung. “Sia sinei tong, pokiten God a akkom tongei kich” (1 John 4:19). Sise tongeni auku an tong. I chienach mi ennet. “Supun chcha a suputiw” fan itemi me pwan fan itei (Luke 22:44). A omusano ekkewe tipis ita rese tongeni mus. A tongei ekkewe ita aramas rese tongei. A fori met aramas rese tongeni fori: A awora ewe Achesefan ach sipwe pworacho ngeni ekkewe tipis, metek, me semwen an aramas meinisin.
Pokiten ewe Achasefanin Jises Kraist, sia tongeni manau ren ewe pwon pwe ese nifinifin ach kewe sossot, sia tongeni apinukunuk non I fansoun meinisin, “I ewe mi manaman ne amanaua kich” (2 Nifai 31:19). Pokiten An Achasefan, sia tongeni angei pwapwa, kinamwe, me manau ese much.
Preseten Boyd K. Packer a apasa: “Tiwenon chok ekkoch aramas mi fokkun ngau, ese wor eu mettoch sia sou fori, ese wor mon, ese wor fiu, ese wor tipis, ese wor rochopwak, ese wor atai annuk minne sise tongei angei omusomus seni. Ena ewe pwon seni ewe achasefanin Kraist.”
Eu nein ekkewe mettoch mi amwarar nap seni meinisin non uruon aramas mi fis nupwen ewe Chon Amanau a churi ekkewe aramas non Merika me nom. Ekieki usun met oupwe mefi ika oua nom ikewe. Nupwen ua ekeki usun An tongei me tumunu ekkewe Souneng mi chufengen non ewe tempel, ua ekieki usun ekkewe semirit minne ua tongei nap seni manauei. Ua achocho ne ekieki usun met upwe mefi ika ua kuna nouch kewe semirit, ika ua kuna ewe Chon Amanau ne tingorei ekkewe semitit ne feito ren I, ika ua kuna ewe Chon Amanau a eitieta poun, ika ua katon nupwen ekkewe semirit, emon me emon, a attapa ekkewe kinas non poun me pechan kewe, me ika ua kuna ir ne uta me pwarata pwe I mi manau! (Nengeni 3 Nifai 11:14–17; nengeni pwan 17:21; 18:25.) Ika ua kuna nouch kewe ra kun me apasa, “Mama, Papa, inai I!”
Use sinei ika mi wor mettoch non fonufan epwe tongei awora pwapwa nap seni ach sinei pwe nouch kewe semirit mi sinei ewe Chon Amanau, ach sinei pwe ra sinei “ngeni ian repwe apinukunuk won ren omusomusen ar kewe tipis.” Ina pwata kich chon ewe Mwichefen “aua kapas usun Kraist” me aua afanafan usun Kraist (2 Nifai 25:26).
-
Ina pwata sia iotek ren nouch kewe iteiten ran.
-
Ina pwata sia anneani ekkewe pukefel rer iteiten ran.
-
Ina pwata sia aitir ne angang ngeni ekkoch, pwe repwe tongeni pwisin angei ekkewe feiochun ar kaeo usun pwisin ir nupwen ra fangeno manauer non ar angang ngeni ekkoch (nengeni Mark 8:35; Mosaia 2:17).
Nupwen sia tiniken ne manaueni ekkewe napanapen chon kaeo, sia apochokuna nouch kewe ren ewe tongen ewe Chon Amanau me ren emwen seni nang me tumun nupwen ra kuna ekkewe asepwanin sossot an Setan.
Ewe kapas allim ennetin mi usun ewe emon aramas. A usun ewe emon siip mi monuchuno (nengeni Luke 15:3–7); a usun ewe emon fin-Samaria non ewe nenien tu konik (nengeni John 4:5–30); a usun ewe at mi monuchuno (nengeni Luke 15:11–32).
Me a usun ewe emon at mi apasa pwe ese ausening.
A usun kich meinisin—ina mwo pwe sise unusoch—ren ach winiti eu ren ewe Chon Amanau usun chok I mi eu ren Seman (nengeni John 17:21).
Ua pwarata pwe mi wor Semach won Nang mi uren tong, a sinei itach! Ua pwarata pwe Jises Krasit I Noun ewe Kot mi manau. I Noun we Anemon me ach chon Aninis ren ewe Sam. Ua pwan pwarata pwe manau ese much a feito non me ren Itan—me esap pwan wor eu an.
Ua iotek pwe sipwe fangano netipach me pouch ne anisi noun Semach won Nang kewe meinisin ar repwe sinei I me mefi An tong. Nupwen sia fori ei, A pwon pwe sipwe pwapwa ese much won ei fonufan me non ewe fonufan mwirin ei. Fan iten Jises Kraist, amen.