![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F2d%2Fe7%2F2de72175a00c9ba67b3f776eba56d66d53efb83e%2F2de72175a00c9ba67b3f776eba56d66d53efb83e.jpeg/full/!250,/0/default)
Ewe Samon Jises Kraist a Aitikich Ach Sipwe Iotek
Nupwen ka iotek, en mi wesen iotek are ka chok apasa kapasen iotek?
Non 1977, ua fori ai angangen misineri non Cusco, Peru. Ngang me chienei we auwa angei mwumwuta am aupwe uwei meinisin kewe misineri non ewe Cusco zone ngeni ewe Machu Picchu mei unusen ningech.
Arapakan ngeni wesin am ewe churri ewe neni, ekkoch kewe misineri ra mochen repwe no ngeni ewe Inca Bridge, kinikinin anen ewe chuk. Mwitir chok, ua mefi non ngasangasei pwe ewe Ngun mi Fel a epeti ai usapw no ikewe. Ewe aan a nomw nepekin ewe chuk 2,000 – fit (610 m) tekian. Non ekkoch neni ewe aan a chok ukukun emon aramas an epwe asai non fan ew. Ngang me chieneiwe auwa ureniir pwe ausapw no ngeni ewe Inca Bridge.
Nge, ekkewe misineri ra chok mochen aupwe chok no. Kewe poraus ra pochokuneno, me nukun met ewe Ngun mi Fel afen aiti ngeniei, uwa fangeta ren ar pesepes me fitireno me uwa apasa ngenir pwe aupwe no ngeni ewe piris ika aupwe tumunoch.
Auwa tori ewe aan ngeni ewe Inca Bridge ngang uwa saingoni ewe mwich, me mwan, me akkomw meinisin ra chok fetanemang, usun met auwa tipeew won. Iwe mwurin kewe misineri ra pwopwuta ne asai mwutir me pwan sa. Rese ekieki ai we tungor ngenir are repwe amangono. Uwa mefi ai mochen upwe mwitirita mwirir, ai upwe erenir pwe aupwene niwin. Ngang uwa towaw mwirir, me ngang upwe mwutir ne sa pwe upwe tikerir.
Nupwen uwa tori ew opworopwor, non ew aan mi kukun ren ruemon repwe asai, uwa kuna emon misineri a chok uta sekurun ngeni ewe fau. Uwa eisini pwata ka uta ikei. A apasa ngeniei a tori ew memef an epwe chok nomw non ewe neni nge ngang upwe chok no.
Ngang uwa mefi ai upwe tori ekewe ra akkomw mwem, iwe a anisiei ai upwe pasini, uwa tongeni ne ekis towawetiw non ewe aan. Uwa kuna pwe ewe pwun a uur ren ira. Ngang uwa fotukiir pechei peniemwan won ewe pwun, uwa sinei, nge uwa mefi, pwe ese wor pwun fan kewe ira. Uwa nuokus ne kamwoch ekkoch panen ira ra nomw fan ewe aan. Ren ew fansoun uwa tongeni kuna faan, ekkoch ruu ngorou fit faan seniei, ewe Chonupupu Urubamba, minne a puputiw won ewe Sacred Valley non Incas. Uwa mefi pwe ai pochokun a suseniei, iwe a chok ew arapakan ngeni ai usapw chiwen kamwoch. Non na atun, uwa iotek pochokun. Mi chok mwochomwoch. Uwa suki awei me apasa, “Semei, anisiei!”
Ekkewe panen ira rese pochokun ar repwe tongeni amwochu choun inisi. Ngang uwa sinei ewe amwuchunon a akarapoto. Non ewe chok fansoun ita upwene turutiw, ngang uwa mefi efoch paw a angei pei me weitieita. Ren na aninis ngang uwa tongeni ne sopwosopwono ne achocho ngeni ai upwe tota sefan won ewe aan. Ewe misineri ewe e nomwetiw mwuri ii ewe a tumunuei.
Nge ennetin semach non Nang ewe a tumwunuwei. A rongorong ngeni neuwei. Uwa fen rongorong neuwen ewe Ngun mi Fel fan unungat memwan, a ureniei usapw nongeni ewe Inca Bridge, nge use rongorong ngeni. Uwa nuwokus, a sokono nikinikii, me use sinei met upwe era. Iwe uwa chechemeni pwe kewe ekoch misinari ra akomw mwemw, iwe auwa no kuteer tori auwa kuner iwe auwa ureniir met a fis ngeniei.
Auwa niwin ngeni Machu Picchu ren am tumwuneech me mosonoson. Am auwa niwin sefan, ngang uwa chok mosonoson, me ew ekiek a toriei pwe ii michok rongorong ngeniei nge use rongorong ngeni. A wor ew watten metek non ngangasangei ren ai use rongorong ngeni me pwan ai watten kinisow ren an kirekiroch. Ese fori niwnin tipis ngeniei, a tumwunu manawei (nengeni Alma 26:20).
Nesopwonon ewe ran, nupwen a tori ai upwe iotek, uwa iotek seni non ngasangasei ngeni “Semach Kot me ach Samol Jises Kraist repwe ngeni [kich] kinamwe” (2 Corinth 1:3). Ngang uwa iotek “ren ew ennetin netip, ren ennetin popun, fiti nuku non Kraist” (Moronai 10:4).
Non ewe sosoran non na ran, uwa iotek ren tumun awei, me nupwen upwe mano, uwa iotek seni ngasangasei ngeni I. Uwa ekieki usun manawei tori na fansoun. Uwa kuna pwe non sokopaten fansoun, semach non nang mi unusen kirekirech ngeniei. A aiti ngeniei chommong wewe non ewe ran non Machu Picchu me non Cusco, Peru. Ew watten awewe ai upwe iotek iteitan ren “ew ennetin netip, ren ennetin popun, fiti nuku non Kraist.”
Non ew fansoun ewe samon Jesus Christ “a iotek non ew neni,” me “nupwen a wes, emon noun kewe chon kaeo a apasa, ‘Samol, kopwe aiti kem iotek” (Luke 11:1). Iwe a aiti neun kewe chon kaeo ar repwe iotek. Me ikanai a aiti en me ngang sipwe iotek usun ach kuna non ach ekiek a iotek non Gethsemane me apasa, “Nge esapw netipei, pwe netipom epwe ponueta” (Luke 22:42). Nupwen ka iotek, ka unusen, ennetin, mochen pwe “esapw netipei, pwe netipom epwe ponueta”?
Paul a awewei usun an Jesus iotek “non manauan won fonufan,” akaewin non Gethsemane: “a iotek o tungor non an neuommong ne puchor o assuratiw chonun mesan ngeni Kot, ewe mi tongeni amanaua i seni mano. Iwe pokiten an tipetekison me nikiitu, Kot a ausening ngeni i” (Hebrew 5:7). Nupwen ka iotek, en mi wesen iotek are ka chok apasa kapasen iotek? Met omw iotek ren nukun netipom?
Jesus a iotek watte me kapas ngeni saman. “Iwe murin an ekkewe aramas meinisin papatais, Jises a pwan papatais. Nupwen a iotek, nang a sukkuno” (Luke 3:21). Nupwen ka iotek, en mi mefi pwe nang a suuk? Inet ewe saingonon fansoun ka mefi nefinowm me nang?
Jesus a amonata inisin an epwe fori eechun finata seni an iotek ngeni saman.
A nongeni ewe chuuk an epwe iotek, me sopwosopwono iteiten pwin me iotek ngeni Kot.
“Nge nupwen a ranino, iwe a kori noun kewe chon kaeo o a finata engon-me-ruomon neir” (Luke 6:12–13).
En mi amonata inisumw omw kopwe fori eechun finata ren omw iotek ngeni semom won nang? En mi amonata inisumw ren omw fansoun iotek?
Nupwen Jesus a wareto ngeni kewe fenuwen non Merika, a aiti kewe aramas ar repwe iotek. “Iwe Jises a apasa ngeni ir: Soposopono ne iotek; nge inamo rese kouno ne iotek” (3 Nifai 19:26).
Jesus a mochen sipwe iotek iteitan (D&C 10:5). Jesus a sinei pwe Semach non Nang a rongorong me wato met mi eech ngenikich. Pwata fan ekkoch sise mochen sipwe angei? Pwata?
Non ewe atun sia apasa, “Semem non nang,” mi rongorong ach iotek me a eteneki ach kewe mochen. Iwe mesan me seningan ra suuk ngonuk. Mei sinei omw ekiek, me mei mefi ngasangasach. En kosapw tongeni opano mettoch seni. Iei, ewe ochun mettoch ii epwe kunok ren maas ren tong me kirekiroch—tong me kirekiroch kiich sisapw weweiti. Nge tong me kirekiroch ra nomw ren non ewe atun ka apasa, “Semei non Nang.”
Iwe ew atun iotek a ew fansoun mi pin. Ii esapw emon epwe apasa, “Apw, usapw rongorong ngonuk iei, pwokiten en kachok eto rei fansoun omw osukosuk.” Aramas chok ra fori na. Ii esapw emon epwe apasa, “O, en kose tongeni sinei ifa ukukun ai osukosuk iei.” Aramas chok ra apasa ena.
Pwe kich meinisin sipwe iotek usun Jises a aiti kich sipwe iotek ina ai apinukunuk me ai iotek non iten ewe Samon Jises Kraist, amen.