Nenengeni ewe Puk, Nenengeni ewe Samon
Oua tongeni kuna ewe Puken Mormon pwe ami foun nongonong, nukanapen ami pochokun non pekin ngun?
Mary Elizabeth Rollins
Non ai ekiek, ua anchangei pwe ami ewe maritan tappin aramas oua katon are ausening ngeni ei mwichen mwichenap ekkis meinisin won fonufan. Ua mochen aporausa ngeni kemi ew poraus mi ennet, oupwe tufichin appiru o kaeo seni. Epwe pwar ngeni kemi ifa usun oupwe tufichin arap ngeni ewe Samon me angei pochokun ne pworacho ngeni sossot.
Ei poraus usun emon fopun, a nomnon New York, nge mwen a tori unungat ierin seman we a mano nupwen wan ewe mota a kokkotiw non ewe konik. I, inan we, mongean, me pwin kukkun ra mokut ngeni pwan ew teninimw non ewe fonu ar repwe nom ren pwin inan we me punuan we. Ekkis fansoun mwirin ewe famini a wareto, misineri me chon mwichefen seni ew minefon mwichefen ra eto ngeni nenier we ren ew poraus mi ning usun ewe Niwinsefaniton ewe kapas allim. Ra aporausa usun emon chon nang a wato ew uruo seni nom ngeni emon anuon itan Joseph Smith, ei uruo a wisen chiakuni ren ewe manamanen Kot. Ruemon nein ekkewe wasona, Oliver Cowdery me John Whitmer, ra wesen kuna ren pwisin meser ekkewe seleich kolt mi makk won, me Whitmer a pwarata pwe a wesen komoch ekkewe seleich non poun kewe. Ei uruo ra keran printini non puk, me Brother Whitmer a uwei ekkoch an epwe ngeni aramas. Itan ewe puk, ewer, ewe Puken Mormon.
Nupwen a 12 ier Mary a rongorong ekkewe misineri ra poraus usun ewe puk, a uor an murinnon memmef non netipan. Ina mwo ika ewe Puken Mormon a manun ren chommongun ekkewe peich, Mary a fokkun mochen anneani. Nupwen Brother Whitmer a feino seni nenier, a ngeni Brother Isaac Morley ew kapin ewe puk, ewe a chok chiechien tettenin seman Mary ewe me emon sou emwen non ewe mwichefen minefo.
Murin Mary a makketiw: “Ua feino ngeni imwan [Brother Morley] ewe … o ua tingor ai upwe katon ewe Puk; [atewe] a wanong non pei, [me] nupwen ua nennengeni, ua mefi ew mochen ai upwe anneani, o use tongeni kouno ne tingor ngeni an epwe mut ngeni ei ai upwe uwei ewe puk ngeni imwei ai upwe anneani. … A apasa … ese wor an fansoun an epwe tongeni pwisin anneani ew sopun me non, nge ekkoch chok mwan ir mi kukkuna ewe puk, nge ai tingor mi fiti unusen netipei, o a apasa ʻnengin, ika kopwe aniwini ewe puk ngeni ei nesesorun nesor, ka tongeni angei.’”
Mary a sa ngeni imwan o a ing ren masouan ewe puk iwe a neno arapakan unusen ewe pwin an a anneani ewe puk. Soratan ewe ran, nupwen a aniwini ewe puk, Brother Morley a apasa, “Uwa ekieki ese watte met ka anneani me non ewe puk” me “use nuku pwe en mi tongeni aporausa ngeni ei ew kapas seni ewe puk.” Mary a uwenewenita o a apasa ewe aewin wokison seni ewe Puken Mormon. A pwan aporausa usun ewe porausen Nifai. Mwirin Mary a makketiw, “Anewenewen ngeniei, o a apasa, ʻnengin, angei ei puk uweano ngeni imwom o awesano ne anneani unusen ewe puk, ua tongeni witiwit.’”
Ekis fansoun mwirin, Mary a amuchunon ne anneani ewe puk me i ewe aemonun aramas non nenian ewe a akkom ne anneani unusen ewe puk. A sinei pwe mi ennet o a feito seni Semach won Nang. Nupwen a nenengeni ewe puk, a nenengeni ewe Samon.
Ew maram murin, emon uasona mi auchea a feito ngeni imwan we. Iei met Mary a makkei usun achechemenien ena ran: “Nupwen [Joseph Smith] a kunaei a nenengeniei non mosonoson. … Mwirin ekkis fansoun a … efeiochu ei … o a nifang ngeni ei ew ewe puk, o a apasa pwe epwe ngeni Brother Morley pwan ew [kapi]. … Am meinisin mi mefi pwe i emon noun Kot chon angang, pwe a kapas fiti manaman, pwan usun emon a wor ren mumuta.”
Ei fopun, Mary Elizabeth Rollins, a kuna chommong sokkun manaman non manauan o aponueta an kapasen pwarata usun ewe Puken Mormon.1 Ei poraus mi auchea ngeni ei pun i ai aruanun tetten ren tettenin inei . Me ren an Mary minen appirun , pwan ren ekkoch foffor mi fis ngeni non manauei, ua kaeo pwe ese wor emon mi kukkun esap tongeni kutta o angei an pwisin kapasen pwarata usun ewe Puken Mormon.
Ewe Foun Nongonongen Ami Kapasen Pwarata
A wor ew nesen oua tongeni kaeo seni porausen Mary. Emon me emon ami anuon, fopun, me semirit oua tongeni angei ekkewe sokkun memmef a angei. Nupwen oua anneani ewe Puken Mormon me iotek fiti ami mochen sinei ika mi ennet, oua pwan tongeni angei ekkewe sokkun memmef non netipemi usun Mary a angei. Oupwe pwan tongeni kuna pwe ika oua uta me pwarata usun ewe Puken Mormon, oupwe mefi ewe ngunun apungun ennet. Ewe Ngun mi Fel epwe fos ngeni netipemi. Oupwe pwan mefi ewe ngunun apunguano ennet nupwen oua rong pwan ekkoch ra apasa ar kapasen pwarata usun ewe Puken Mormon. Ew me ew ekkei minen pwarata non pekin ngun epwe emwen ngeni ewe Puken Mormon epwe winiti ewe Foun Nongonongen ami kapasen pwarata.
Mut ngeniei upwe awewei. Ewe Soufos Joseph Smith, ewe a chiakuni ewe Puken Mormon me ren ewe niffangen me ewe manamanen Kot, mi awewei pwe ewe Puken Mormon “a unusen pung me nein puk meinisin me won fonufan, me ewe efou foun nongonongen ach namanam.”2
Seni ewe fansoun ewe Puken Mormon a aewin for non 1830, nap seni 174 minion puk mi for non 110 sokkopatten fos, o a pwarata pwe ewe Puken Mormon mi chiwen ewe foun nongonongen ach namanam. Nge met wewen ena ngeni emon me emon ami?
Non pekin aueta imw efou foun nongonong mi ewe fau mi unusen auchea won ewe tit. Mi chok ew foun etieti mi nom nukanapen me non tekian ewe tit mi chipwechip. Mi chok ewe fau mi auchea pokiten a epeti nepekin ewe tit pwe esap turutiw. Me a pwan apungano pwe ewe tit, are pwangen ewe tit, aramas mi tongeni fetan fan.
Awewen non ewe kapas allim, mi chok ew niffang me feioch seni ewe Samon pwe ewe foun nongonongen ach namanam epwe ew mettoch sia tongeni komochuno are ekieta usun sia tongeni fori ren ewe Puken Mormon oua tongeni kamoch me anneani. Oupwe ekieki pwe ewe Puken Mormon mi ami foun nongonong, ewe nukanapen ami pochokun non pekin ngun?
Preseten Ezra Taft Benson a awewei ekkana osukun an Joseph Smith. A apasa: “A wor unungat napanap non minne ewe Puken Mormon mi ewe foun nongonongen ach namanam. Mi ewe foun nongonongen ach pwarata usun Kraist. Mi ewe foun nongonongen ach kewe annuk. Mi ewe foun nongonongen ach kapasen pwarata.”
Preseten Benson a pwan apasa: “Ewe Puken Mormon a aiti kich och sokkun ennet [o] a pwarata usun Kraist. … Nge a wor pwan och. A wor manaman non ewe puk epwe poputa ne puputiw non manauemi seni ewe fansoun oua poputa ne kaeo seni ewe puk. Oupwe kuna pochokun ne pworacho ngeni sossot. … Oupwe kuna ewe pochokun ren ami oupwe sopweno ne fetan won ewe an mi aukukkun me chokisikis.”3
Pwisin Ai Kapasen Pwarata
Non pwisin manauei ewe Puken Mormon a winiti ewe foun nongonongen ai kapasen pwarata non chommong ier pokiten ekkewe mettoch a fis ngeni ei. Ew mettoch mi fis ngeni ei a anisi an epwe awora ai kapasen pwarata mi fis nupwen ua ano fiti ai angangen misineri non ai neni akkom: itan Kumamoto, Japan. Ngang me ai we companion aua fichifich won asamen meinisin ekkewe imw ren am oupwe kutta ekkoch aupwe afanafan ngenir. Ua churi emon inenap chinnap a kan etiwa keminong non imwan ewe, ra iteni genkan non fosun Sapan. A ngeni kem unumem mi pat pun a pwichikar non ena ran. Ese tam ai nom Japan, o ua keran chok wes ai anneani ewe Puken Mormon o ua iotek ai upwe sinei pwe mi ennet.
Pokiten ua chiwen minafo ngeni Sapan, use angoch ne fos non fosun Sapan. Ennetin, use ekieki pwe ei fefin mi weweiti met ua ani kapas usun. Ua poputa ne afanafan ngeni usun ewe Puken Mormon, ua awewei ifa usun an Joseph Smith a angei ei uruo mi makk won seleich kolt seni emon chon nang pwan usun an chiakuni ei uruo me ren ewe manamanen Kot.
Nupwen ua apasa ai kapasen pwarata pwe ewe Puken Mormon mi ewe kapasen Kot o a pwan ew kapasen pwarata usun Jises Kraist, ua mefi ew memmef mi pochokun, a pwan fiti ew memmefin kinamwe me fanmwarei, mi awewei non ekkewe pukfel pwe fanmwarum mi pwichikar.4 Ei memmef mi apungano non pochokun me non netipei pwe ewe Puken Mormon mi ennetin kapasen Kot. Non ena fansoun mi pochokun ai kewe memmef ua kan kechiw non ai fos ngeni ei inenap chinap fin Sapan. Use monukano ewe memmef mi auchea ua mefi non ena ran.
Pwisin Omw Kapasen Pwarata
Emon me emon ami mi tongeni angei ami pwisin kapasen pwarata usun ei puk! Oua sinei pwe ewe Puken Mormon mi makk fan itemi—fan itan ami kei ran ikenai? Ei puk mi ew feiochun ach tufichin manau non ewe fansoun sia eita ngeni ewe fansoun kinikin a unus. Ina mwo ika ewe Puken Mormon mi makk seni chon angei pwarata me nom—chommong neir mi chok soufos—ir me ekkewe aramasen non ena fansoun rese tufich ar repwe angei unusen ewe puk. Mi kan mecheres ngeni kemi ne angei ekkei uruo mi pin chon soufos, pris, me king ra aucheani, komochuno, o pwan tumunu! A wor ami tufichin komoch non pwisin poumi kewe unusen ewe Puken Mormon. Mi pwan amwarar pwe emon soufos non ewe Puken Mormon, itan Moronai, a kuna ach kewe ran—ami kewe ran. A pwan kuna kemi, non nemasepwi, fite puku ier a no! Moronai a makk:
“Nengeni, ewe Samon a fen pwarano ngeniei auchean me amwararen mettoch usun … ena ran nupwen ekkei mettoch,” mi wewe ngeni ewe Puken Mormon, “repwe feito neimi.
“Nengeni, ua kapas ngenikemi usun ita ami mi nom ikei, iwe inamo ouse fen nom. Nge nengeni, Jises Kraist a fen pwarikemi ngeniei, iwe ngang mi sinei ami foffor.”5
Ren an epwe anisi ewe Puken Mormon an epwe winiti ewe foun nongonongen ami kapasen pwarata, upwe ngenikemi ew tingor. Ua keran kaeo pwe non sokkpatten fonu non fonufan, serafo ra onusano arapakan ukukun 10 awa ew ran ne katon tifi, nom won computer, ika nengeni nour kewe fon.6 Pokiten ei, mi tufich oupwe ekkisiwini manauemi? Oupwe aea ekkis fansoun seni ekkei aua—akkom ami fansoun nom ika urumot won computer, internet, are ami katon tifi—o siwini ren ami oupwe anneani ewe Puken Mormon? Ika mi pung ekkei nampa ua awora usun ami foffor, epwe mecheres ami oupwe awora ami fansoun kaeo seni ewe Puken Mormon inamo ika epwe chok ren 10 minich iteiten ran. Oua tongeni fini napanapan ami kaeo pwe epwe apwapwa kemi me oupwe tufichin weweiti met oua kaeo—ese nifinifin ika oua anneani seni ami kewe fon ika oua annea seni ekkewe pukefel. Preseten Russell M. Nelson a aururu kich pwe, “Sisap chok mut ngeni ach anneani ewe Puken Mormon epwe winiti ew angang mi achipwang, usun ach unumi seafi mi nengau pwe ita sipwe chok mwitir fori pwe sipwe tongeni chok fen ataweno.”7
Ngeni ami kewe semirit, menni oua fiti sememi me inemi ika, sememi chinap me inenmi chinap ne anneani, are emon atongemi i. Ika ew sopun, wokison, are kinikin mi weires o a akounokemi ne anneani, oupwe chok mweteseni ena o mwetengeni pwan ew o sopweno ne anneani. Ua anchangei pwe oua appiruw ewe minen appiru an Mary. Ua anchangei pwe oua kan achocho ne awora ami fansoun o kutta ew neni mi mosonoson ami oupwe anneani ewe Puken Mormon ie. Ua kuna pwe oua kuna ponuen ami kapas eis, angei emwen, me oua angei pwisin ami kapasen pwarata usun ewe Puken Mormon pwan usun Jises Kraist. Nupwen oua nenengeni ewe Puk, oua nenengeni ewe Samon
Oupwe anneani porausen ei puk mi auchea me oupwe kuna ami Chon Amanau mi achengicheng, ewe Samon Jises Kraist, pun napanapan mi nom won ekkewe page meinisin. Sia anneani pwe Itan mi makk ukukkun iteiten 1.7 wokison.8 Pwisin Kraist a pwarata usun ennetin ei puk non ekkei fansoun soponon, nupwen a apasa pwe usun ami Samon me ami Kot mi manau mi ennet.9
Ua kinisou ren ewe pesepes me pwon ewe Samon mi awora me ren ewe soufos Moronai ngeni emon me emon ami—pwan ngeni meinisin mi anneani ewe Puken Mormon. Upwe osupwano ren ai upwe anneani ei pesepes me pwon o upwe apachenong ai kapasen pwarata: “Iwe nupwen oupwe angei ekkei mettoch, ua mochen pesei kemi pwe oupwe tingor ren Kot, ewe Sam Esemuch, non iten Kraist, ika ekkei mettoch rese ennet; iwe ika oupwe tingor ren ew ennetin netip, ren ennetin popun, fiti nuku non Kraist, i epwe pwarano ennetin ngenikemi, me ren manamanen ewe Ngun mi Fel.”10
Ua pwarata usun ewe Niwinsefaniton ewe kapas allim non ranin soponon me ewe Puken Mormon pwe pisekin pwarata usun ewe Niwinsefanito. Usun chok ekkei kapas ran esenipato emon nengin a 12 ierin epwe etiwa ewe Mwichefenin Jises Kraist ruu puku ier a no, ekkewe ennet oupwe kuna non repwe apochokunakemi non ena chok napanap. Repwe apochokuna ami nuku, me aurano ngunumi ren saram, me amonnakemi ngeni fansoun mwach minne sise tufichin wewe.
Non ekkewe peichin ewe puk, oupwe kuna tong ese much me ewe chenin Kot sise weweiti. Non ami achocho ne manaueni ekkewe nongonong oua anneani usun, ami weweiti epwe napeno, me ekkewe ponuen ekkewe chommongun osukosuken non manauemi oua kutta repwe pwa ngeni kemi. Non ami nenengeni ewe puk, oua nenengeni ewe Samon. Ewe Puken Mormon mi Kapasen Kot. Usun ekkei ua pwarata, ren unusen netipei me nguni, non itan Jises Kraist, amen.