Kaeo seni Alma me Amulek
Pwe ina ai nuku pwe ekkena ir ra riki seni ewe anen chon kuno repwe tongeni kuna ren netiper me kaeo seni Alma me Amulek.
Alma ewe Kukkun
Alma ewe Kukkun i emon nein ekkewe aramas mi kan itefouno non ewe pukefel. Ika mwo pwe i noun emon soufos mi napanap, i a poutano ewe an ren och fansoun me a winiti “emon mwan mi fokkun ngaw me a fen ngeni niosun anu muan.” Ren och popun sise weweiti, i a ungeni saman me a achocho ne ataieno ewe Mwichefen. Me fan itan an angochun kapas me ening, a watte fetanochun.1
Nge a ekesiwin manauan Alma nupwen emon chon nangen ewe Samon a pwa ngeni i a kapas ren neuwan pach. Unungat ran me unungat pwin, Alma a “riaffou ren metek esemuch, … pwan mwo ren ekkewe metekin emon ngun mi poutmwanino.” Me mwirin, amwararan, ew kukun mettoch a ku chechemenian—ew mettoch mi ennet ese much, a kaeo me ren seman: pwe Jises Kraist epwe eto “pwe epwe achasefani ekkewe tipisin fonufan.” Me nom Alma a fen amam ekkan ekkiek, nge iei an “ekiek a komochuno ei ekiek,” me non an tipetekison, tipepechekun a anomu an nuku non an Kraist we manamanen achasefan.2
Nupwen Alma a pwato seni ei napanap, manauan a ekesiwin. Seni ena fansoun feino, a asoreni manauan pwe epwe apunguno ekkewe osukosuk i a esinepato. I ew nenian appiru mi manaman non aier, omusomus, me nukuchar.
Alma a kefin ne seikita ngeni wisan seman ewe meinapen ewe Mwichefenin Kot.
Ita eururun pwe meinisin chon ewe muun Nifai repwe sinei porausan Alma. Ekkewe pekin Twitter, Instagram, me Facebook non an fansoun repwe uruno ren sasingin me pworausan. Ita sasingin epwe nom won mesan ewe Zarahemla Weekly me i epwe itenapan ekkewe taropwe non. Iwe, usun i a fokkun itefouno non an fansoun.
Nge nupwen Alma a kuna pwe aramasan ra monnukano Kot me ra namanam tekia me songokai, i a fini epwe tou me wisan non muu me epinano “unusen ukkukun an tongeni ngeni ewe pristut mi nap seni ewe tetten mi fel an Kot,”3 pwe epwe afanafana aier ngeni ekkewe chon Nifai.
Akkomw, a kon watte fetanochun Alma—nge, ese pwan pung nupwen a tori ewe sopw Ammonaia. Chon enan sopw ra kan sinei pwe Alma ese chiwen ewe meinapen muu, me rese sufoniti an mwumwutan pristut. Ra osukosuka i, amwangaua i, me aturau i seni sopwur we.
Non an netipeta, Alma a okunnu nesokurun ngeni Ammonaia.4
Nge emon chon nang a ereni an epwe niwin.
Oune ekieki usun ena: a ereni pwe epwe niwin ngeni ekkewe aramas mi oput i me rochongau ngeni ewe Mwichefen. A fokkun efeiengau, iwe meni usun mi tufich pwe ita repwe nieno. Nge Alma ese tipemwaramwar. “A mwitir niwin.”5
Alma a echikipin chommong ran nupwen i a tonong non ewe sopw. Ikewe ia a tingor ngeni emon aramas ika “[ese] mochen ngeni emon noun Kot chon angang mi tipetekison och mettoch pwe epwe mwongo?”6
Amulek
Itan ei mwan Amulek.
Amulek i emon chon Ammonaia mi pisekisek me itefouno. Ikamwo i mwirimwirin chon nuku, i a patapateno non an souneng. Mwirin a pwarata, “ua fen kokko chommong fansoun me use rongorong; iei minne ua sinei usun ekkei mettoch, nge inamo use mochen [nuku]; iei minne ua no fetan ne ungeni Kot.”7
Nge Kot a amonnata Amulek, me nupwen Amulek a churi Alma, i a etiwanong noun ewe Samon chon angang ngeni imwan, me Alma a nom chommong ran.8 Non ena fansoun, Amulek a suki netipan ngeni an Alma poraus, me ew ekesiwin mi amwarar a fis ngeni i. Iwe seni ena fansoun, I ese chok nuku, nge i pwan winiti emon sounfiun nuku.
Nupwen Alma a afanafan fetan nein ekkewe chon Ammonaia, mei wor pwan emon chon pwarata unukun—Amulek, emon aramaser.
Met a fis mwirin a amasoua ew uruo mi kan pwapwa me enetipechou nein wokisin pukefel meinisin. Oupwe tongeni anneani usun non Alma sopun 8–16.
Ikenai, Upwe tingor pwe oupwe chechemeni ekkei ru kapas eis:
Aewin “Met ua tongeni kaeo me ren Alma?”
Aruwan: “Ifa usun ngang mi usun Amulek?”
Met Ua Tongeni Kaeo me ren Alma?
Upwe poputa ren ei kapaseis ngeni meinisin chon emwen seni nomw, ikkenei, me nessor non ewe Mwichifenin Jises Kraist, ua apasa, “Met ami oua pwisin tongeni kaeo me ren Alma?”
Alma i emon a fokkun tipachem me nipwakoch. Ita a mecheres pwe sipwe ekieki pwe ese wor namwotan emon epwe anisi. Nge met Alma a fori nupwen a niwin ngeni Ammonaia?
Alma a kuna Amulek o a tingorei aninnisin.
Me Alma a angei aninnis.
Ika mwo pwata, fan ekkoch kich nouwis sia tipemang ne kuna me tingor nouch Amulek. Usun sia ekieki pwe sia tongeni pwisin fori, are sia tipefesen pwe ika sipwe osukosuka aramas, are sia ekieki pwe pwan ekkoch resap mochen fiti. Napangeni fansoun sia tipemwaramwar ne eisini aramas ar resap aea ar nipwakoch me fiti ewe angangen amanau.
Ekkieki usun ewe Chon Amanau—I a anaemon ne forata An Mwichefen?
Apw.
Esap An kapas pwe, “Tirowomi. Iwe ngang upwe pwisin mina.” Nge I a apasa “Feito rei.”9 I a asarama, pesepes, afanafan, me mwirin a nuku pwe chon tapweno mwirin repwe “fori met mine oua kuna pwe ua fori.”10 Non ei napanap, Jises Kraist ese chok apochokuna An mwichefen nge a apochokuna Noun chon angang.
Ese nifinifin wisemi non ei fansoun—ikamwo pwe ami presitenin mwichen sounkowa, presetenin steik, are Presetenin Area—ika oupwe foruchu wisemi, oupwe kuna noumi Amulek.
Amo epwe emon ese tekurara are itefouno nein ekkewe chon fan. Amo epwe emon oupwe ekieki pwe ese mochen are ese tufich aninnis. Noumi kewe Amulek mi tongeni kukkun are chinap, mwan are fefin, nipwakingau, pekus, are patapateno seni ewe Mwichefen. Nge ita ami ouse kuna akkomw pwe i ra mochen ne ausening ngenikemi nupwen oua apasa “Ami mi auchea ngeni ewe Samon! Ami mi auchea ngeniei!”
Seni anononun inisir, chommong ra mochen anisi ar Kot. Ra mochen winiti pisekin angang non Poun. Ra mochen ar repwe atteri ewe kama me achocho ren ar pochokun ne ammonata ewe fonufan ren niwinsefaniton ach Chon Amanau. Ra mochen forata An Mwichefen. Nge ra tipemwaramwar ne poputa. Napangeni fansoun ra chok souni emon epwe tingorer.
Ua tingor ngenikemi pwe oupwe ekieki usun ekkewe non ami pranch me wart, non ami kewe nenien misineri me steik, ekkewe ra chok souni kokor ar repwe mwokutukut. Ewe Samon a angang rer—a amonnareta, apweteteno netiper. Oune kutair ren mesan netipemi.
Kapong ngeniir. Aitiir. Apechekunair. Pese ngeniir ar repwe achocho.
Ereniir ekkewe kapasen ewe chon nang ngeni Amulek—pwe ewe feiochun ewe Samon epwe tinatiw wor me me imwer.11 Mi tufich oupwe mairu ne kuna emon chon angangen ewe Samon mi tipepechekun ika ouse kuna epwe chok nonnom non monomon.
Ifa Usun Ngang mi Usun Amulek?
Nupwen ekkoch me neich ra achocho ne kuta Amulek, ekkoch repwe ani ewe kapaseis, “Ifa usun ngang mi usun Amulek?”
Eni pwe ami, non ekkei ier, oua ekis apwangapwangeno non ami souneng. Menin pwe ewe ekkein ami kapasen pwarata a kukunnetiw. Menin pwe oua pwisin atouauekemi seni ewe inisin Kraist. Menin pwe ami mi tipemwaramwar are song. Usun ekkoch non ewe Mwichefen non Ephesus me nom, oua nikiti met ami oua tongei akkomw”12—ekkewe ennet mi apwapwa, ese much non ewe kapas allimen Jises Kraist.
Ita, usun Amulek, oua sinei non netipemi pwe ewe Samon a “kokori [kemi] fan chommong,” nge “ouse mochen rong.”
Ina chok, ewe Samon a kuna non ami met I a kuna non Amulek—ewe tufich pwe oupwe winiti chon angang mi pechekun ren och angang mi auchea oupwe fori fengen ren eu kapasen pwarata ne aea. Mei wor aramas mi namwot pwe oupwe pwarata ngeniir. Mei wor angang ami mi tongeni fori ese pwan wor emon a tongeni pwan fori. Ewe Samon a nuku pwe ami ren An pristiut mi pin, ewe minne a nom ewe kofich mi pin ne efeiochu aramas. Ausening ren netipemi me apwonueta mongungun ewe Ngun mi Fel.
An Emon Memper Sai
Pworausen emon memper a ku netipei nupwen i a pwisin eisini, “Nupwen ewe Samon a kokoriei, upwe rong? Upwe eita ngeni pwich ei David.
David a choni ewe Mwichefen ukukun 30 ier me nom. I emon misineri me mwirin a fiti sukkunen annuk. Nupwen i a sukkun me angang ne tutumunu an famini, i a tori och pworaus usun ewe Mwichefen mi osukosuka atewe. Nupwen a anneani ekkan taropwe mi rochongau, a awateieno an osukosuk. Ekis me ekis a finata an epwe tingor pwe itan epwe totonuno seni uruon ewe Mwichefen.
Seni ena fansoun feino, usun Alma non an ungeni ewe mwichefen, a chommong fansoun David a anini ren chon ewe Mwichefen, a fos ngeniir won internet, ren ewe popun me a ungeni ar nuku.
A fokkun nipwakoch non ei.
Emon ekkewe memper i a anini ren upwe eita ngeni Jacob. Jacob a fokkun aramasoch me sufon ngeni David, nge a nukuchar non an epeti ewe Mwichefen.
Non ekkewe ier, David me Jacob ekis me ekis ra sufonfengen me chiechi. Nge David ese sinei pwe Jacob a iotek fan itan David me a fofori ei nuseni engon ier. I a wanong itan chienan non ekkewe tempele an ewe Samon pwe repwe ioteki me a apinukunuk pwe netipan David epwe pweteteno.
Ekiseno fansoun, ekis me ekis, David a ekkesiwin. A poputa ne chechemeni non achengichengin ekkewe amwararan mefien ngun a tori me nom, a checehemeni ewe pwapwa a mefi atun i emon memperin ewe Mwichefen.
Usun Alma, David ese wesewesen nemenano ennetin ewe kapas allim i a omwochu me nom. Me usun Amulek, David a mefi ewe Samon a eitau poun ngeni. Nge iei i emon meinap non ew kompenien sou annuk—ew angang mi ening me a watte niwinin. A fen itefouno pwe i emon chon ungeni ewe Mwichefen, me ese tingor an epwe tonong sefan fan itan an namanam tekia.
Ina mwo, i a sopweno ne mefi mokutukutun ewe Chon Masen Siip.
Ewe wokisin a tonong netipan, “Nge ika emon me neimi ese mirit, epwe tingor ngeni Kot, iwe Kot epwe ngeni i, pun Kot mi kisasew o kirokiroch ngeni aramas meinisin.”13 A iotek, “Maing Kot, ua mochen pwe upwe emon Aramas mi Pin non Fansoun Soponon sefan, nge mei wor ai kapaseis mi namwot epwe wor peneuan.”
A poputa ne ausening ngeni mongungun ewe Ngun mi Fel me penu mi eto me nang seni chienan, non ew napanap i ese mwo fori me nom. Ekis me ekis, an tipemwaramwar a winiti nuku, tori a esinna, sefan, pwe i a tongeni mefi ew kapasen pwarata usun Jises Kraist me An Mwichefen mi niwinsefanito.
Non ena fansoun, a sinei pwe epwe pworacho ngeni an namanam tekia me fori mettoch meinisin pwe epwe tufichin chonisefanni ewe Mwichefen.
Muchunon, David a tonong non ekkewe konikin paptais me a poputa ne anneani ekkewe ran tori epwe tufichin asofosefanni an kewe feioch.
Ua pwapwa ne apasa pwe non ewe summer, David a sofosefanni an kewe feioch. A pechekun sefan non ewe Mwichefen me i sensen Sunday Sukkun non an wart. A ereni aramas meinisin usun an ekkisiwin, ne echikara ekkewe mi feiengau i a esinepato, me apasata an kapasen pwarata usun ewe kapas allimen me ewe Mwichefenin Jises Kraist.
Nesoponon
Pwi angengicheng, me chienei achengicheng, sipwe kuta, kuna, apechekuna, me aucheani ekkewe Amulek non ach kewe wart me steik. Mei wor chommong Amulek non ewe Mwichefen ikenai.
Ita ami mi sinei emon. Ita fen ami emon.
Meni ewe samon a mongungu ngenikemi, me pese ngeni kemi ne niwiniti ami tong akkomw, wanong ami nipwakoch, angang ren ewe pristut non nimenimoch, me angangfengen ren chienemi Sounang ne akarapekemino ngeni Jises Kraist me forata ewe muun Kot ikei won fonufan.
Ach Chon Amanau a sinei ia oua nom ia. A sinei netipemi. A mochen an epwe cherikemi, me epwe eitau poun ngenikemi. Oupwe chok suki netipemi ngeni I. Ai anean pwe ekkewe mi ekis rikiseni ewe anen chon kuno—ikamwo ika ekisichok—repwe ekieki ewe kirokirochun me chenin Kot, kuna ren netiper, kaeo seni Alma me Amulek, me ausening ngeni ekkewe kapasen ekkisiwini manau me ren ewe Chon Amanau: “Feito rei.”
Ua pesei ngenikemi ne apwonueta an koko, pun mi ennet pwe nupwen oupwe fori ena oupwe angei ewe rasen nang. Ewe feiochun ewe samon epwe nom womi me won imwemi.14
Won ekkei ua pwarata me ngenikemi ai effeioch usun emon Aposelun ewe Samopn non itan Jises Kraist, amen.