Sipwe Tuppwen fan itan Kraist.
Sia tuppwen fan itan Kraist nupwen sia angang non nuku, etiwa non tekison, nikituoch, iotek non ennet, me angei ewe sakrament non nimoch.
Pwi me fefinei achengicheng, ikenai ua mochen kapas ngeni ekkewe serafon ewe Mwichefen, fiti nouch kewe misineri mi murrino. Nge ewer, pwii me fefinei kena ion mei chok serafo me non netipan, oupe eusening.
Non ewe August 21, Preseten Russel M. Nelson a epinano ewe tempel mi ningoch non Sapporo—ewe aunungatin tempel non Japan. Ewe Tempel non Sapporo a nom non eor non Japan non ew neni itan Hokkaido. Usun Utah, Hokkaido a foruta me ren aramas mi tiniken, achocho, chon sai akkom.
Non ewe ier 1876, emon sense itan Dr. William Clark a etiwetiw ngeni Hokkaido pwe epwe osukun. A nonnom non Japan ukukkun chok wanu maram, nge ngunun we mi nuku non Kraist a watiw ew memmef won noun chon sukun esap ir chon nuku Kraist. Me mwen a feino, a ngeni noun chon sukun ew kapwongen feino mi chok nom fochofoch non ei nios minen bronze. A apasa, “Anuon, oupwe tuppwen!”—“Oupwe tuppwen fan itan Kraist.” An kapasen aurur pwe “Sipwe tuppwen fan itan Kraist” mi tongeni aninnis ne emweni Aramas mi Pin non Fansoun Soponon.
Met wewen sipwe “tuppwen fan itan Kraist”? Ach sipwe tuppwen fan itan Kraist a wewen sipwe mochen, achocho, me tichik non an angnang. Nape ngeni fasoun ach sipwe tuppwen fan itan Kraist esap wewen pwe sipwe itefouno. Ach tuppwen fan itan Kraist wewen pwe sipwe angang non nuku me tiniken non ach kewe wart me pranch me sisap amunungau, me sipwe fori ren netipach mi pwapwa.
Nouch kewe misineri ra angang won unusan fonufan ir wesen nenien appiru usun chon tuppwen fan itan Kraist. Ekkoch ier a no, am me Sister Yamashita am aua angang non ewe Japan Nagoya Misin. Noum kewe misineri ra fokkun tuppwen fan itan Kraist. Emon ekkewe misineri i emon anuon itan Elter Cowan.
Elter Cowan ese wor pechen won peniamwanin pokiten a feingau otun a turutiw won pasiken nekukunun. Murin fituw week an tori ewe misin, ua angei ew kokko won fon seni chienan we. Ewe siwinin pechen ewe a ta otun an wawa wan we pasiken. Am aua uwei ngeni ew nenien for siwinin peche mi och, me non ewe rumw ina aewin fansoun ua kuna pechan ewe. Ua esinna ukukun watten an riaffou. Ra fori sefan pechen ewe, iwe a niwin ngeni nenian ewe.
Nge, nupwen murin fituw wiik, siwinin pechan ewe mi chok sou ta. Ewe chon wisen aururun safei non ewe neni a apasa pwe epwe och ika a niwino ngeni fonuan ewe pwe epwe siwini an misin. Ua ekkis u ngeni ei aurour pun Elter Cowan i emon Elter mi fokkun murinno me a fokkun pochokun an mochen epwe nonnom non Japan. Nge ekis me ekis, usun a iteno an tufichin inis. Ina inamo, ese ngunungun are fosun ekiekingau.
Nge iwe, apwan wor aurour ngeni ei pwe epwe mumuta an Elter Cowan epwe no anninis non ew neni minne esap chiwen namwot epwe wawa pasiken. Ua ekipwichi usun nonnomun. Ua ekieki usun Elter Cowan me manauan, me ua iotek usun. Ua mefi pwe, ewer, Elter Cowan epwe niwino ngeni fonuan me witi are repwe siwini an misin. Ua kori won fon me ua ereni usun ai tong me mochen pwan met minne ua finata. Ese pwan foseto. Ua chok tongeni rong an kechiw me won ewe fon. Ua apasa, “Elter Cowan, ese namwot kopwe penueni iei chok. Upwap koruk nesor. Kose mochen kopwe ekieki usun ai pesepes non om ennetin iotek.”
Nupwen ua kokori non ewe soran, a apasa non tekison pwe epwe aponueta ai aurour.
Otun ai saingonan kapas fengen ren i, ua eisini ei kapas eis: “Elter Cowan, en mi tungor non om taropwen misineri pwe kopwe feino ngeni ew neni minne esap namwot kopwe fiti pasiken?”
A apasa, “Ewer, Preseten, ua fen tungor.”
Ua penueni, “Elter Cowan, ka angei koko ngeni ewe Japan Nagoya Misin, minne epwe namwot kopwe fiti pasiken. En mi ereni noum we presetenin steik?”
Ua mairu ren an kapas. A apasa, “Apw, use ereni. Ua finata pwe ika ina ewe neni ewe Samon a koko ai upwe feino, upwe feino ngeni ewe nenien taiso pwe inis epwe tongeni wawa pasiken.”
Nesoponon am ewe kapas fengen, a eis ini ei non an kechiw, “Preseten Yamashita, pwata ua feito Japan? Pwata ua nom ikei?
Ua mwitir penueni: “Elter Cowan, ua sinei ew popun ka feito ikei. Ka feito fan itei. Iei ua fen weweiti pwe ua angang ren emon anuon a fokkun murrino. Ua feioch ren ai ua churruk.”
Ua pwapwa pwe upwe aporausa pwe Elter Cowan a niwino ngeni fonuan me a pwan angei minafon koko pwe epwe angang non ew neni epwe wor wan taraku. Ua fokkun pwapwa ren Elter Cowan pwan ekkewe misineri meinisin won unusan fonufan, ra angang me rese ngunungun are fosun ekiekingau. Kinisou, elter me sister, ren ami nuku, ami achocho, me ami tuppwen fan itan Kraist.
Ewe Puken Mormon a masoueni chommong poraus usun ekkewe ra tuppwen fan itan Kraist. Alma ewe kukkun, neanuonun, a esita ewe Mwichefen me ekkewe ra chonni. Mwirin a watte siwinin netipan me a winiti emon misineri mi manaman. A kutta emwen seni ewe Samon, me a efeiochu chienan kewe chon angang nupwen a fitir. Ewe Samon a apochokuna i me a pworacho ngeni an kewe sossot.
Alma a aururu noun we at Ilaman ren ekkei kapas:
“Ion chok epwe wanong ar apinukunuk non Kot repwe angei aninis me non ar kewe sossot, me ar osukosuk, me ar riaffou. …
“… Aneasochisi ekkewe annukun Kot. …
“Aurour ngeni ewe Samon non om foffor meinisin, iwe i epwe emmwenuk non öch.”
Neum we at numpa ruu a manau towaw seni ewe Mwichefen neanuonun. Nupwen a rue ierin, a fis ew mettoch a esenipato an mochen siwini manauan. Ren tong, iotek, me aninnis seni an famini me chon ewe Mwichefen, me napenon ewe tong me chenin ewe Samon, a niwin ngeni ewe Mwichefen.
Iwe Mwirin a angei ewe koko pwe epwe angang non ewe Washington Seattle Misin. Akkoman a fokkun netipengau. Iteitan pwinin non ukukun unugnat maram, a chok sou tonong non ewe nenien tutu me a chok kechiw. Usun chok Elter Cowan a kutta penuen ewe kapas eis “Pwata ua nom ikei?”
Mwirin a angang ukukkun ew ier, am aua angei ew email minne a penuen am kewe iotek. A makkei: “Iei ua wesen mefi ewe tongen Kot me Jises. Upwe achocho pwe upwe usun ekkewe soufosun nom. Ina mwo a pwan chommong ai kewe weires, ua wesen pwapwa. Angang fan itan Jises ina ewe angang mi nap. Ese wor och mettoch a murrino nap seni ei. Ua fokkun pwapwa.”
A mefi usun chok Alma a mefi: “Iwe oh, met pwapwa, me met amwararen saram ua kuna; ewer, nguni a ureno ren pwapwa usun chok watten ai metek!”
Non manauach sipwe kuna sossot, nge ika sipwe tuppwen fan itan Kraist, sipwe tongeni ne foch ngeni i me mefi pwapwa ina mwo ika a wor ach sossot. Ach Chon Angaseno i ewe nenien appiru mi nap. A weweiti an popun mi pin me a aneasosich ngeni ewe netipan Kot ewe Sam. A fokkun ew feioch mi nap pwe sipwe chemeni an nenien appiru iteitan wiik otun sia angei ewe sakrament.
Achengicheng pwi me fefinei, sia tuppwen fan itan Kraist nupwen sia angang non nuku, etiwa non tekison, nikituoch, iotek non ennet, me angei ewe sakrament non nimoch.
Amo ita sipwe tuppwen fan itan Kraist ren ach etiwa ach kewe weires me sossot ren engino me nuku me sipwe kuna pwapwa non ach annen pwon.
Ua pwarata pwe ewe Samon a sinei kemi. A sinei ami kewe weires me noninen. A sinei usun ami mochen ennetin achocho me tuppwen ne angang fan itan. Amo ita epwe emweni me efeiochukemi ren ami angang. Non itan Jises Kraist, amen.