Ion Am Aupwe Feino Ren?
Nesoponon, emon me emon kich sipwe ponueni an ewe Chon Amanau we kapaseis: “Nge ami, oua mochen oupwe pwan su seni ei?”
Ekkoch ier a no ngang me ai famini aua churi ewe Fonu mi Pin. Ew ekkewe mettoch ua fokkun chemeni seni ai we sai ina ai churi ewe rum asan non Jerusalem, ewe nenien ewe Amuchunon Mwongon Faf.
Nupwen aua uta non na neni, ua anea ngeni ir seni John 17, ikewe Jises a sio ngeni Seman we fan iten noun kewe chon kuno:
“Ua iotekir … pwe ir meinisin repwe ew chok. …
“Ua iotekir nge esap ir chok, pwe pwan ir ekkewe mi nuku ei pokiten ar kapas;
“Pwe ir meinisin repwe ew chok. Amo repwe ew chok non kich, ussun chok en non ngang o ngang non en.”
A ku netipei nupwen ua aneani ekkei kapas me ua kuna pwe ua pwisin iotek non ena neni mi pin pwe aupwe tongeni ew chok me ai famini me Semei won Nang me Noun we.
Nefinach mi auchea ren famini, chiechiach, ewe Samon, me An we Mwichefen mi niwinsefanito ir ekkoch ekkewe mettoch mi kon auchea non manau. Pokiten nefiner ra fokkun auchea, repwe achengicheng, sipwe mamasa me tumunu.
Ew me nein ekkewe tutunap mi aweiresi netip non pukefel a fis nupwen “chommng me nein chienan [ewe samon] kewe” rese chiwen atiwa An afanafan me nongonong, iwe ra su seni, me rese chiwen fiti.”
Nupwen ekkei chon kuno ra suno, Jises a kun ngeni ekkewe Engon me Ruemon me eis. “Nge ami, oua mochen oupwe pwan su seni ei?”
Peter a ponueni:
“Samol, ion am aupwe feinno ren? En chok a wor reom ekkewe kapasen manau ese much.
“Iwe am aua nuku o sinei pwe en ewe Emon Mi pin a fen feito seni God.”
Non na fansoun, nupwen ekkoch ra anonga ar ekiek won met rese tongeni etiwa, ekkewe Aposel ra finata ne anonga ar ekiek won met ir mi fen nuku me sinei, iwe pung, ra nomwetiw ren Kraist.
Mwirin, won ewe ranin Pentecost, ekkewe Engon me Ruemon ra angei ewe niffangen ewe Ngun mi Fel. Ra winiti mi pwaracho non ar pwarata usun Kraist me poputa ne weweochuti an Jises afanafan.
Ikenai ese sokkono. Ren ekkoch, an Kraist tingor ne nuku me nom ren mi soposopono ne weires—ika weires ne etiwa. Ekkoch chon kuno ra weires ne weweiti ew an Mwichefen annuk ika afanafan. Ekkoch ra aureki uruon ach Mwichefen ika nipwakingawan ekkoch memper me sou emwen, akkom me iei. Pwan ekkoch ra kuna pwe mi weires ne manaueni ew manaman a auchani ach sipwe fangeno. Saingonon, ekkoch ra chipwang ne fofforoch.” Ren ekkei me ekkoch popun, ekkoch chon Mwichefen ra tipemwaramarei ar nuku, ra ekieki ika menin repwe tapweno mwirin ekkewe ra suseni me rese chiwen fiti Jises.
Ika emon neimi a tipemwaramar non an nuku, ua aisi kemi ewe pwan chok kapasei Peter a eis: “Ion [oupwe] feinno ren?” Ika oua finata oupwe patapateno ika suseni ewe Mwichefenin Jises Kraist ren Aramas mi Pin non Fansoun Soponon, ian oupwe feino ia? Met oupwe fori? Ami oupwe finata pwe ousap chiwen fetan ren chon ewe Mwichefen me noun ewe Samon sou emwen epwe wor mwirimwirin sise tongeni kuna iei. Menin epwe wor ekkoch nongonong, ekkoch annuk, ekis uruo esap nonno ngeni om nuku, me eni kopwe mefi pwe ewe chok anen om kopwe atawei ena osukosuk iei ina pwe kosap chiwen fetan ren ekkewe souneng. Ika kopwe manauetam usui, kopwe sinei pwe mettoch ir mi kan pwisin fisiochuno. Ew ekiek mi murino ika pwarata epwe aweweochu ew osukosuk. Chemeni, ewe Niwinsefanito esap ew mettoch a chok fis, nge a soposopono ne watteno.
Ousap tongeni nikitano ekkewe ennet mi auchea ra pwano me ren ewe Soufos Joseph Smith. Ousap kouno ne anea, ekiek, me aea ekkewe nongonongen Kraist mi nom non ewe Puken Mormon.
Ousap kouno ne anono poku ami fansoun ngeni ewe Samon non wenecharen ami achocho ne weweiti met ewe Samon a pwarano. Usun chienei achengicheng me chienei akkom non angang, Elter A. Maxwell, a apasa, “Sisap chok efisata … pwe pokiten sise tongeni awewei och mettoch, iwe ese tongeni an epwe wor wewen.”
Iwe me mwen kopwe fori ena efeiengawen ngun om finata su seni ewe mwichefen, ua pese ngonuk kopwe kouno me ekiekoch me mwen kopwe fangeta met ewe a akkom uwei ngonuk om kapasen pwaratan ewe Mwichefenin Jises Kraist mi niwinsefanito. Kouno me ekiek usun met ka fen mefi ikei me pwata ka mefi. Ekieki usun ewe fansoun nupwen ewe Ngun mi Fel a pwarata ngonuk usun ennet esemuch.
Ian kopwe feino ia ne kutta ekkoch ir mi pwan nuku met ka nuku non, Samach me Inach non Nang ekkewe ra aitikich ifa usun sipwe niwin mwen meser esemuch?
Ian oupwe feino ia pwe oupwe kaeo usun emon Chon Amanau I chiechiochumi, ewe ese riaffouni chok ami tipis nge a pwan riaffouni “metek me riaffou me sokopaten sossot meinisin” pun “nenukan epwe tongeni ureno ren umoumoch, anongonong won ewe pekin aion, pwe i epwe tongeni sinei anongonong won ewe pekin aion ifa usun an epwe anisi noun kewe aramas anongonong won ar apwangapwang,” mi pachenong, I nuku, apwangapwangen ekkewe ese wor ar nuku?
Ian oupwe feino ian pwe oupwe kaeo usun an Samach won Nang kokkoten ach pwapwa esemuch me kinamwe, ew kokkot mi uren amwarar, afanafan, me emwenin manauach won fonufan me manau esemuch? Chechemeni, ewe kokkoten manau esemuch a awora popun manauach won fonufan me emwen.
Ian oupwe feino ian ne kutta ew Mwichefen mi fatoch tettenochun me mi aurour seni nang ren minne sia kaeo seni me aninis seni mwan me fefin ekkewe ir mi ennetin achocho ne angang ngeni ewe Samon ren ar angang ngonuk me om famini?
Ian oupwe feino ia ne kutta soufos me aposel mi manau, ekkewe ra kokko me ren Kot pwe repwe ngenikemi pwan pekin aurour, wewe, kinamwe, me aninis ren ekkewe osukosuken ranich kei?
Ian oupwe feino ia ne kutta aramas mi manaueni ekkoch nonnomun manau mi auchea me nongonong kich mi annuk sipwe manauenir ekkewe sia aea ngeni me mochen ngeni nouch me noun nouch?
Me ian kopwe feino ian ne mefi ewe pwapwa a feito seni ekkewe nongonongen amanau me pwonen ewe tempel mi pin?
Pwi me fefinei, ach etiwa me manaueni ewe kapas allimen Christ mi tongeni epwe weires. A fen weires akkom, me epwe weires fansoun meinisin. Manau mi tongeni epwe usun chon toki aanen won chuk ra feita won ew aan mi pan me weires. Mi chok ina usun me och mettoch ese sokkono ach sipwe asoso won ewe aan ne ngasangas, atonaochu ewe aan, me ekieki sefani fetanich. Esap meinisin repwe kouno won ewe aan, nge ese wor ngawan ach sipwe fori nupwen mi auchea ngeni nonnomuch. Ennetin, mi ew mettoch mi och ngeni ekkewe repwe angei tufichin ar repwe asosoi inisir ren ewe konikin manauen ewe kapas allimen Kraist.
Ewe feiengaw a feito nupwen emon a finata ne rikino seni ekkewe aan mi emwen ngeni ewe iran manau. Fan ekkoch sia tongeni kaeo, stati, me sinei, me fan ekkoch sipwe nuku, me apinukunuk.
Nesoponon, emon me emon kich sipwe ponueni an ewe Chon Amanau kapaseis: “Nge ami, oua mochen oupwe pwan su seni ei?” Kich meinisin sipwe pwisin kutta ponuen ena kapaseis. Ren ekkoch, ponuan mi mecheres; ren ekkoch, mi weires. Usap tipen ara pwe ngang mi sinei pwata nuku mi mecheres ngeni ekkoch nap seni ekkoch. Ua chok kinisou ne sinei pwe ponuan kewe ir mi chok nonnom, me ika sia kutter—ennetin kutter ren ennetin popun me ren ennetin netip—sipwe kuna ponuen ach kapaseis nupwen sia soposopono won aanen ewe kapas allim. Non ai angang, ua fen sinei ekkewe ra fen rikino me niwin sefan mwirin ar weri sossotun nuku.
Ai ennetin apinukunuk pwe sipwe tingorei watten chochon noun Kot kewe semirit ne kutta me nonnom won ewe aanen kapas allim pwe repwe tongeni “ochoch seni ewe foun ira, minne [mi] fokkun anno seni meinisin foun ira.”
Ai ennetin tingor pwe sipwe pesei, etiwa, weweiti, me tongei ekkewe ra osukosuk non ar nuku. Sisap tongeni ponnuki emon me nein pwich me fefinach kewe. Kich meinisin sia nom non sokofesenin neni won ewe aan, me mi auchea sipwe angang ngeni emon me emon anongonong won ia ra nom ie.
Usun chok sipwe pwarano tong nupwen sia etiwa minafo chon ewe mwichefen, sipwe pwan etiwa me anisi ekkewe mi wor ar kapaseis me ra apwangapwang non ar nuku.
Upwe aea pwan ew kapas awewe kich mi sinei usun, Ua iotek pwe ion a ekieki an epwe suseni ewe “Sipwen Saion minen Nom,” ikewe Kot me Kraist ra kasini, epwe kouno me ekiekoch me mwen epwe fori.
Ouse mochen oupwe sinei pwe ika mwo epwe wor watten monumon me no repwe wichi ewe sipw minen nom, ewe Chon Amanau mi nom won me mi tongeni akouno ewe monumon ren An annuk Kinamwe, epwe nuano. Mwirin, sisap nuokus, me epwe wor ach nuku mi nukuchar pwe “ekkewe mo asepwan me no nge ra rongesich ngeni.”
Pwi me fefinei, ua pwon ngeni kemi non iten ewe Samon pwe I esap tongeni nikitano An Mwichefen me I esap tongeni nikitano emon neimi. Chechemeni an Peter ponueni an ewe Chon Amanau we kapaseis me foun kapas:
“Ion am aupwe feinno ren? En chok a wor reom ekkewe kapasen manau ese much.
“Iwe am aua nuku o sinei pe en ewe Emon Mi Pin a fen feito seni God.”
Ua pwarata pwe “esap wor pwan ew it epwe kawor are pwan ew aan are napanap ren minne amanau epwe tongeni feito ngeni ekkewe noun aramas, me nukun chok non me seni iten Kraist.”
Ua pwan pwarata pwe Jises Kraist a fen kokkori aposel me soufos non ranin fansouch me aniwinato An Mwichefen fiti afanafan me annuk pwe epwe ew nenien tumun seni ewe monumon me seni song minne repwe ennetin feito tiwenon chok ika aramasen ewe fonufan repwe aier me niwin ngeni I.
Ua sopweno ne pwarata pwe ewe Samon “a etiwer meinisin pwe repwe feito ngeni I me angei seni an kirekiroch; iwe ese amam emon epwe feito ngeni i, chon me pwechepwech, chon fotek me chon ngaseno, mwan me fefin; iwe i a chechemeni ewe ese sinei namanam; me meinisin ra nonno chok ngeni Kot.”
Jises I ach Chon Amanau me Chon Angasano, me An we kapas allim mi niwinsefanito epwe emwenikich sefan ngeni mwen mesen Samach me Inach won Nang ika sipwe nometiw won ewe aanen kapas allim me tapweno mwirin eipweipwan. Ua pwarata ei non iten Jises Kraist, amen.