Ewe Sakrament a Tongeni Anisi Kich ach Sipwe Pin

Seni Elter Peter F. Meurs

Seni ekkewe Fik

Ekieki nimu an epwe tongeni awateno manamanen me pochokunen ewe fenin sakrament mi pin.

Ew mettoch mi fis ngeni ei usun fenin sakrament a fis non imwem ewe non Warrnambool, Australia. A ukukun engon ika engon me nimen aramas ra fiti am we pranch, me semei we, I emon me nein kewe unumon mi wor rer ewe pristut, iteitan a wor ar fansoun ar repwe efeiochu ewe sakrament. Uwa chechemeni ewe memef uwa mefi nupwen a aneaniochu kewe kapasen ewe iotekin sakrament. Usun a kan ekis chechech neuwan ika a mefi ewe ngun mi fel. Fan ekkoch a ekis kouno me fori an esap kechiw pwe epwe tongeni awesano ewe iotek.

Ren emon mi chok ier nimu, use kon weweochuti wewen kewe kapas ra apasa ika met a fis; nge, uwa fen sinei ew mettoch mi fokkun auchea. Ngang mi mefi kinamwe usun ewe ngun mi fel fansoun semei a ekieki usun an we Chon Amanau tong ngeni kich.

Ewe Chon Amanau a aiti: “Iwe ei oupwe fori fansoun meinisin ngeni ekkewe ir ra aier me papataisino non itei; iwe oupwe fori non achechemenien chai, minne ua fen asuratiw fan itemi, pwe oupwe tongeni pwari ngeni ewe Sam pwe oua chechemeniei fansoun meinisin. Iwe ika oua chechemeniei fansoun meinisin oupwe annomu Nguni remi” (3 Nephi 18:11).

Uwa tungor ngeni kich sipwe kuta nimu an epwe awateno manamanen me pochokunen ewe fenin sakrament, ew annuk epwe tongeni anisikich ach sipwe pin.

1. Amwonata me Mwan

Kich mi tongeni amwonata me mwen an epwe poputa fenin sakrament. Amwon epwe ew ran mi eoch ach sipwe ekieki usun ngunuch an epwe mwoneta.

Manauach iei ew nifang non ach sai ne winiti usun samach Kot won nang. Mi pwan namot ach sipwe churi sosot me osukosuk pwe sipwe tongeni siwin me mamarita. Usun King Benjamin a apasa pwe “ewe inisin aramas i ewe chon koum ngeni Kot … me epwe chok fis,feinfeino me esemuch, tiwenon chok ika a fang ngeni ekkewe pesepesen ewe Ngun mi Fel, me poutano ewe inisin aramas me winiti emon souneng seni ewe achasefanin Kraist ewe Samon” (Mosaia 3:19). Fori me fiti ewe fenin sakrament a pwan ngeni kich ach sipwe ounusanong netipach me ngunuch ngeni Kot.

Non ach fansoun amwonata, netipach mi netipechou me netip niamam nupwen sia kinisou ren an Kraist we Achasefan, me aier seni ach kewe mwanino me nipwakingaw, me tungor an ewe Sam aninis me sopweno manauach ach sipwe tongeni usun I. Sipwe pwan sopweno ne neneno mwach ngeni ekkewe feiochun sakrament a fen wor ngeni kich ach sipwe chechemeni An we fang manauan me achechema sefani ach kewe pwon meinisin sia fen fori.

2. Mutir Ngeni

Ach ewe angangen sakrament epwe tongeni wateno eochun nupwen sia mutir me mwen ewe fenin sakrament me ekiek nupwen ewe kon a tik.

Presiten Boyd K. Packer a kapas: “Konun mwen mwich, ra tik non mwosonoson, ra ngenikich ach pechekun seni ewe ngunu pin. A aworato ach nipwakeoch.” Esap chok ew fansoun,” Preseten Russell M. Nelson a awewei, usun ach kakapas ika ekesiwin nin ewe kapas nge a ew fansoun an ekewe neuwis me ekewe souleng repwe iotek me amwonereta ngeni ewe sakrament mi fokun pin me auchea.”

3. Kon me Kaeo seni kewe Kapasen ewe Konun Sakrament

Ewe konun sakrament pwan ew mettoch mi auchea ngeni kich. Kon a ekinamwei are awateno ach ekiek me memef. Ewe konun sakrament amen wate an angang nupwen sia rongorongoch kewe kapas me ekewe pwon sia kaeo. Sia men sineoch seni ekewe kapas usun ren “Nupuchon, me kupw, me tatakis fan itach,” “Sipwe fokun chechemeni me forochu netipach me peuch epwe fokun nimenimoch,” me “Ekewe epwe wor kinamwe, tong, me umoumoch repwe chufengen non ew!”

Nupwen sia konun sakrament fansoun ra fori ewe sakrament, ekewe kapasan mi tongeni pwan ach foforun pwon .Usun, awewe, “Sia fokun tongei ach, Chon Amanau; netipach a fokun uur. Sipwe fetan non ewe an a fen finita.”

4. Fiti ewe Iotekin Sakrament non Pekin Ngun (Nengeni Moronai 4–5)

Ren ach sise rongorong eoch ekewe fosun ewe iotekin sakrament, kich mi tongeni kaeo sokopat, me mefi sokopatun memef, nupwen sia fiti me fori usun ewe ekiek ach kewe pwon me ekewe sokopaten nifang a nomw non ewe iotek mi pin.

Ewe pinewa me konik ra efeioch me epinipinino fan asengesin ngunuch. A achechemen an ewe Chon Amanau a fang manauan fan itach pwe sipwe tongeni winiti aramas pin.

Ewe iotek a awewei pwe nupwen sia angei ewe pinewa ren achechemen inisin ewe Nau, ren an fang manauan fanitach ach sipwe tongei manau sefan, me sia unumi ewe konik achechemen chan ewe Nau, a pupuno pwe sipwe tongeni aier sefan.

Ewe iotek a awewei usun ekkewe pwon non ewe kapas “Pwe ra mochen.”(Moronai 4:3). Ei neuneun fos amen fokun wor manamanan ngeni kich. Met kich mi mwochen sipwe angang me fiti? Sa mwochen sipwe ekesiwin? Sa tongeni sipwe anganga ach apwangapwang? Sia tongeni sipwe tumunu me efeiochu ekoch? Kich mi mwochen epinukunuk non ewe Chon Amanau?

Ren ekkewe pwon ra afatetiw me nupwen sia angei, sia pwon non netipach pwe sia mwochen sipwe:

Angei iten Jises Kraist wata woch.
Achocho ne apwonueta meinisin an kewe annuk
Chechemeni I fansoun meinisin.

Ewe iotek a asopwano ren tungor me pwon: “ Pwe Ngunun epwe nonnom rer fansoun meinisin” (Moronai 4:3).

Paul a makei, “Ekkewe uwan Ngunupin: tong, pwapwa, kinamwe, engino, umoumoch, manauoch, nikitu, tipetekison [me] nemeni mwochenin tipach” (Galatia 5:22–23). Ningochun feioch me nifang a wor ngeni kich nupwen sia fori ach kewe pwon.

5. Ekieki me Chechemeni I nupwen ra ineti ewe Sakrament

Ewe mosonosonun fansoun nupwen ekewe mwan mi wor rer ewe pristut ra ineti ewe sakrament ew mettoch mi auchea me pin ngeni kich.

Nupwen ra ineti ewe pinewa, sipwe tongeni ekiekifichi pwe, ren ewe anononun fororun an tong ngeni kich , ewe Chon Amanau a wata “won inisin mano, pwe epwe tongeni epichano ekkewe senin mano minne ra foti neun kewe aramas” (Alma 7:12).

Sipwe pwan chechemeni ewe amwararen feioch ren ewe Manausefan ewe epwe fis ngeni meinisin, … fotek me ngaseno, mwan me fefin, kewe mi tipis me wenechar; me metin mekurach kewe epwe ne wor esapw chiwen mworono; mettoch meinisin epwene unus (Alma 11:44).

Nupwen ewe konik a inet, sipwe chechemeni an we Chon Amanau tungor.

Ewe Chon Amanau a apasa pwe a fen weiresini ekkei metoch fan itach, pun resapw tongeni riafou nukun chok ika repwe aier; …

Ewe riafou mi tori inisin, ewe a tekia seni meinisin, nge mi riafou pokiten metek, me mwononen cha a sup seni , me riafou non inis me ngun. A tingor esap un seni ewe kap mi kipwin, me esapw fangeta” (D&C 19:16, 18).

Sia chechemeni pwe I a angei “wata won [ach] kewe apwangapwang, pwe nenukan epwe tongeni urono ren umoumoch, anongonong won ewe pekin aion, pwe I epwe tongeni sinei anongonong won pekin aion ifa usun an epwe anisi neun kewe aramas anongonong won ar apwangapwang.” (Alma 7:12).

Nupwen sia ekieki usun met siafen fori non sakrament, sipwe pusin eis sinei kich:

Met upwe fori non ei wik ai upwe mwoneta ai upwe angei ewe sakrament?
Met upwe sopweno ne aninis ren an epwe wor mosonoson me pwarata mwemwen ewe sakrament epwe poputa?
Met annuk sia kaeo me non kewe konun sakrament?
Met uwa rong me mefi nupwen uwa rongorong ngeni ewe iotekin sakrament?
Met uwa ekieki usun nupwen ra ineti ewe sakrament?

Elter David A. Bednar a afanafan usun: “Ewe anukun sakrament mi pin me tungor fan fitu usun enetin aier pwe sipwe tongeni nimenimoch non pekin ngun. Ewe foforun sakrament, a pusin nonom won pusin i, ese tongeni epwe amworano tipis. Nge ika sia mwoneta ekiekich me fiti ewe fenin sakrament mi pin fiti netipechou me netip niamam, iwe ewe pwon Ngunun epwe nonom rech fansoun meinisin. Me seni ewe manamanen ewe Ngun mi Fel epwe ii chienach, sipwe tongeni musono seni ach kewe tipis fansoun meinisin.”

Uwa pwarata usun ekewe waten feioch a wor ngeni kich nupwe sia awateno ach mwoneta ngunuch me fiti ewe anukun sakrament. Uwa pwan sopweno ne pwarata pwe ekkei feioch a worengenikich a seni an Samach Kot won Nang we tong me ewe Achasefan an Neun we Jises Kraist. Non itan we mi Pin, Jises Kraist, amen.