O Ifa Usun Auchean ewe Kokkot an Ach Kot!
Kich sia epweninong ren pisekisekin saram me ennet iwe ua ekkieki ika pwe sise wesewesen kinisou ren feiochuch.
Sia fokkun feioch ren ach tufichin mwich fengen sefan non ei mwichenapen unusan fonufan fan aururun me emwenin nouch we soufous me Preseten mi achengicheng Thomas S. Monson, am aua tongek me tipeew ngonuk ren unusen netipem!
Non ai angang chon uwou sepenin, ua aucheani tichikin me wenecharan ekkewe kampiuter nge use kan nounou pwisin nei we kampiuter. Nupwen ua wisen meinap non ofes a wor nei kewe chon aninnis ra kan anisiei ren ai kewe angang.
Mi chok siwin mettoch meinisin non ewe ier 1994, nupwen ua angei wisei emon Meinap Unusen. Wisei a masoueni chommong tufichi ne aninnis, nge a pwan fiti chommong angang non Ofes—nuseni met wa nukku mi tufich akkom.
Ua mairu pun piseki pisekin angang ne pworacho ngeni ai angang non ofes mi ewe kampiuter.
Iei ewe aewin fansoun non manauei, mi namwot ngeniei upwe tonong non ei sokkun manau mi fokkun ameseik me aoksukosuk.
Akkomwan, use kan chiechi ngeni ewe kampiuter.
Aramas mi sisinei ra achocho ne nounou kampiuter. Ra wesewesen uta nesokuri, ra isenong pour nukanapan ngang me ewe kampiuter, pour kewe mi kan mwitir ne tiki ekkewe kii.
“Ke kuna?” repwe apasa non ar pwapwa. “Ina usun ka fori.”
Use kuna. A kan osukosuk ngeniei.
A kan fokkun weires ngnei ne kaeo me pworacho.
Mwirin chommong fansoun, achocho, engino, me watten apinukunuk me nuku, kapasen aurour seni punuei, me chommong unumach sof tiring usap apasa itan.
Iei, 22 ier me mwirin, pekkin kampiuter a kan pwenniei. Mei wor ai E-mail, Twitter, me Facebook. Mei wor nei selfon, aipat, laptop, me kamera. Nge ikamwo ai tipachem won pekkin kampiuter mi chok usun chok emon semirit, nein ekkewe mi kan chinnap, ngang mi ekkis sinei.
Nge ua essina ew mettoch mi amwarar. Fiti wattenon ai sinei pekkin kampiuter, a pwan watteino ai use pwan kinisou ngeni.
Non napengeni fansoun fonufan, ach kapas epwe fiti mwitirin orris. Ach sipwe tinano pworaus me angei penuan a tongeni fis mwirin fitu ran are pwan maram. Ikenai ach pworaus a sata fitu ngeru mwain fan nang are pwan fite puku fit fan sat ne tori pwan emon won fonu towau, nge ika a mang fitu chok sekken, sia kan feita cha me chipwang.
Ina fen namanamen aramas meinisin: nupwen sia kan ngeni och mettoch fan chommong, ikamwo ika a amwarar me amairu, sia poutano ach mairu me sise chiwen tepereni feiochun.
Kich Sise Tepereni Feiochun ekkewe Ennetin Pekin Ngun?
Usun ach sise tepereni feiochun pisekin kampiuter me mettoch mi mecheres esap ew osukosuk mi watte. Nge, sonapan, fan ekkoch ina usun netipach ngeni ekkewe nongonongen ewe kapas allimen Jises Kraist ese much me a ewatteino ngunuch. Non ei Mwichefen, sia angei chommong mettoch. Kich sia pwennino ren pisekisekin saram me ennet iwe ua ekkieki ika pwe sise wesewesen kinisou ren feiochuch.
Ekieki usun ekkewe chon kunon nom mi fetan me kapas ren ewe Chon Amanau non An angang won fonufan. Anchangei ar kinisou me sufon mi aurano netiper me aurutata ar ekiek nupwen ra kuna pwe I a pwata seni ewe peias, nupwen ra atapa kinasan poun me nepekin. Manauer mi siwin fochofoch!
Ekieki usun ekkewe Sounengin ei fansoun soponon mi sisinei ewe Soufos Joseph Smith me ausening ngeni an afanafana ewe kapas allim mi niwin. Anchangei usun mefier ne sinei pwe ewe mangak nefinan fonufan me nang a suk sefan, o a asaramatiw me esinesinetiw won fonufan seni imwach nang.
Nge napanapan, ekieki ifan mefiemi nupwen oua akkomwan nuku me weweiti pwe ami wesewesen noun Kot; pwe Jises Kraist a etipew an epwe riaffou fan itan tipisimi pwe oupwe nimoch sefan; pwe ewe manamanen ewe pristut mi ennet me a tongeni ririkemi ngeni ami famini ren fansoun fochofoch; pwe mei wor emon soufos mi manau won fonufan ikenai. Mi fokkun amwarar, ika met?
Fiti ach ekieki usun meinisin ekkei, ifa usun epwe tufich pwe kich nein aramas meinisin sisap meseik ren ach sipwe fiti Fan? Are sipwe chipwang ren ach anneani ekkewe pukefel? Ua ekieki pwe ei epwe tufich ika pwe netipach mi nuno seni ach sipwe mefi kinisou me mairu ngeni ekkewe niffang mi pin me amwarar me ren Kot. Ennet mi ekkisiwini manauach mi nom fan mesach me kan ngeni autun pouch, nge fan ekkoch sia nisopopo won ewe anen souneng. Fan chommong sia pwisin mutata ngenikich pwe sipwe osukosuk ren met ese unusoch non chienach memper nge sise tapweno appirun ewe Masta. Sia fetan won anen chaimon, sise tongeni esinna nefiner me foun piru.
Pworaus Kich mi Sisine
Nupwen ngang emon anuan, chienei kewe rakan eiseniei usun ai namanam. Fan chommong upwe poputa ne awewei sokkofesenir, usun ewe Kapasen Emmirit. Fan ekkoch uwa afata nennen ngeni ekkoch namanamen chon nuku Kraist. Ekkei rese amairu ngenir. Nge nupwen ua kapas usun ewe kokotun pwapwa an Samach won Nang a awora ngeni kich Noun semerit, ra kan auseningoch ngeniei.
Ua chechemeni nupwen ua achocho ne chungani ewe kokotun manau ese much won ewe pap non ewe nenian osukkun am we fan non Frankfurt, Germany. Ua chungani fitu kukkumwos mi wewe ngeni manau mwen uputiw, ei manau, me ach niwin ngeni Samach me Inach me nang mwirin ei manau.
Nupwen uwa emon serafo, ua kan pwapwa ne aporousa ei pworaus mi meseik. Nupwen ua awewei usun ekkei nongonong non ai kapas ese tekurara, netipei a kasas ren kinisou ren emon Kot mi tongei Noun, me emon Chon Amanau mi amanauakich meinisin seni mano me hell. Ua kan pwapwa ren ei pworausen tong, pwapwa, me apinukunuk.
Ekkoch nein chienei repwe apasa pwe mi usun ra fen ekis sinei ei pworaus, ikamwo rese mwo kaeo ekkei non manauer non souneng. Usun ra fen sinei seni chok nom pwe ekkei mettoch mi ennet; usun pwe ua chok asarama och metoch mi fen fot non netiper.
Mei wor Ach Penuen Kapaseis!
Ngang ua nuku pwe a nom non netipan aramas meinisin napanapan ekkewe kapaseis usun nongongongen manau. Ia ua feito me ia? Pwata ua nom ikei? Met epwe fis mwirin ua mano?
Aramas ra akkani ekkei kapaseis seni nepoputan fansoun. Soun mirit, soun kaeo, me souwak ra achocho ren unusan manauer me pisekisekir ne kutta penuen ekkei kapaseis.
Ua kinisou pwe ewe kapas allimen Jises Kraist mi niwinsefanito mi awora penuen ekkewe kapas mi weires non manau. Ekkei ponuen ekkewe kapaseis kich mi kaeo me non Ewe Mwichefenin Jises Kraist ren Aramas mi Pin non Fansoun Soponon. Ir mi ennet, fatafatoch, wenechar me mecheres ne weweiti. Ir mi aurour, me sia aiti ngenir ngeni nouch kewe unungat ierir non klasin kukkunun Kinter.
Pwi me fefinei kana, kich aramas esemuch, ese wor nepoputach me ese wor nesoponoch. Sia manau fochofoch. Kich wesewesen noun Samach me Inach won nang mi pin, rese much, me mi unusoch non ngun!
Sia feito seni ekkewe imwan king an ewe Samon Kot mi Napanap. Kich chon ewe imwan kingen Elohim, ewe Kot Tekia. Sia fetan ren i non manauach me mwen ach uputiw. Sia ausening ngeni an kapas, kuna Ningan, me kaeo Mokutukutun.
Sia fiti ewe Mwichenap mi Nap ikeweia Samach mi achengicheng a pwari An kokkot fan itach—pwe sipwe feito fonufan, angei inisich, kaeo miritin met mi pung me mi mwan, me fefeita non napanap ese tufich me akkom.
Nupwen sia pwerenong ewe mangak pwonupwon me tonong non ei manau, sia sinei sisap chiwen chechemeni manauach me mwen. Epwe wor apunu me weires me sosot. Nge sia pwan sinei pwe ach sipwe angei inisich mi kan aucheanap. O, sia kan apinukunuk pwe sipwe mwitir kaeo ne fini met mi pung, pworacho ngeni sosotun Setan, me sipwe tongeni niwin ngeni inach me samach mi achengicheng won nang.
Sia sinei pwe sipwe tipis me mwanino—fan ekkoch repwe wate. Nge sia pwan sinei pwe ach Chon Amanau, Jises Kraist, a etipew an epwe etiw fonufan, manaueni ew manau mi unusoch, me pwisin watiw Manauan non ew asor ese much. Sia sinei ika sia asorata netipach ngeni I, nuku non I, me achocho ren unusan pechekunan ngunuch ne fetan won ewe anen souneng, sipwe tongeni nimenimochuno me tonong sefan fan mesan Samach won Nang mi achengicheng.
Iwe, fiti ach nuku non ewe asoren Jises Kraist, kich sia pwisin etiwa non ach pungun finata ewe kokkot an Samach won Nang.
Ina pwata sia nom ikei won ei fonufan mi ningoch—fan itan Kot a awora ngneikich ewe tufich, me sia finata sipwe etiwa. Nge manauach non futuk, inamo, mi chok kisikis me epwe muchuno ren manon inisich. Nge wesewesen napanapan manauach esap tongeni tano. Ngunuch epwe sopweno ne manau me awitiwiti ewe Manaueta—ew niffang ngeni kich meinisin seni Samach won Nang mi tongekich me Noun we, Jises Kraist. Otun ewe Manausefan, ngunuch me inisich repwe chusefan, esap chiwen wor metek are ngauenon inisich.
Mwirin ewe Manausefan, epwe wor ew Ranin Kapung. Mi pung pwe kich meinisin sipwe amanau me weri ew muun ning, nge ekkewe mi nuku non Kot me achocho ne apwonueta An annuk me angang mi pin repwe weri manau ese much non ningoch me amwarar napanap.
Ewe Ranin Kapung epwe ew ranin umoumoch me tong—ew ran nupwen netip mi ta repwe chikar, nupwen kechiwan ekkewe mi riaffou repwe ekkisiwin ren kechiwan kinisou, nupwen mettoch meinisin epwe awenechareno.
Ewer, sipwe mefi weires anonnon ren tipis. Ewer, epwe wor niamam me netipeta fanitan mwanich, ach nikotupotup, me ach namanam tekia mi esinepato ach sise esinna tufichin ach feioch.
Nge a wor ai apinukunuk pwe sisap chok menemenoch ren an Kot kapung ngenikich; sipwe pwan mairu me mwar ren An chen mi nap, kirokiroch, umoumuch, me tong ngeni kich, Noun kewe. Ika netipach me fofforuch mi echupwer, ika sia nuku non ewe Kot mi manau, iwe sipwe tongeni apinukunuku met Moronai a eita ngeni “ewe nenian kapung an ewe Jehovah mi napanap, Ewe Sou apung Esemuch.”
Pro Tanto Quid Retribuamus
Pwi me fefinei mi achengicheng, chienei kewe mi achengicheng, ouse kan amwarar me mairu ne ekieki usun ewe kokotun pwapwa mi napanap Samach won Nang mi achengicheng a amonata fan itach? Ouse kan ur ren pwapwa mi napanap ne sinei usun met epwe fis minne Kot a amonata fan itan ekkewe ra epinukunuku ewe Samon?
Ika pwe ouse fen mefi ei sokkun mairu me pwapwa, ua pese ngeni kemi oupwe kuta, stati, me ekkipwichi ekkewe ennetin ewe kapas allim mi niwinsefan. Ekieki usun ekkewe ennetin manau esemuch. Mwutata ar repwe pwarata ngenikemi usun ewe kokkotun manau mi pin.
Ika pwe oua fen mefi ekkei, ua eisenikemi, “Ami mi tongeni mefi iei?”
Non ekkewe chok ran a wesino mei wor ai tufich ne sai ngeni Belfast, Ireland. Nupwen ua nom ikewe, ua kuna ewe Esisinnan Belfast, a mak won ekkewe kapas “Pro tanto quid retribuamus.” Ika, “Met [sipwe] tongeni asora ngeni ewe Samon ren an kirokiroch ngeni [kich]?”
Ua tingorekich meinisin ne ekkipwichi ei kapaseis. Met sipwe asor fan itan niwinin ewe awatten saram me ennet Kot a ninatiu woch?
Samach mi achengicheng a chok tingorekich pwe sipwe manau non ewe ennet sia angei pwe sipwe fetan won ewe an I a awora ngenikich. Iwe sipwe tipepochokun, nuku non emwenin ewe Ngun. Non kapas me foffor sipwe aporausa ngeni aramas usun an Kot kokkotun manau ese much mi ning me murrino, Ach mochen epwe ach tong ngeni Kot me noun kewe aramas, pun ir pwich me feinach. Iei poputan met sia tongeni aniwini fan itan watten ach feioch.
Epwap fis pwe, “pwuku meinisin repwe chappetiw, me channaw meinisin repwe pwarata” pwe mokutukutun Kot mi pung me An kokot mi unusoch.Fan itan kich me ngang, amwo pwe ikenai ena ran. Sipwe esinnata, fiti Jacob me nom, “O ifa usun auchean ewe kokkot an ach Kot!”
Iei ai kapasen pwarata ren ennetin kinisou ngeni Semach won Nang, fiti ai efeioch ngenikemi, non itan Jises Kraist, amen.