Nongonong me Pwon
Amo ita sipwe tumunu inisich kewe ren ach aponueta ekkewe nongonong mi katou me ren ewe Kapasen Emirit, ew kokkot mi kefin.
Non ei pwinin ua ani iotek pwe Semach won Nang epwe emweniei ren ai ua poraus ngeni kemi.
Non ewe ier 1833 ewe Samon a pwarata ngeni ewe Soufous Joseph Smith, ew kokkotun manau pochokun. Ena kokkot a mak non sopun 89 non ewe Doctrine and Covenants me sia eita ngeni ewe Kapasen Emirit. A ngeni kich aurur usun ekkewe sokkun mongo sipwe ani, me mi annuk pwe sisap ani och mettoch epwe afeiengaua kich.
Ekkewe ir ra anneasosich ngeni ewe annukun Kot me ra aponueta ewe Kapasen Emirit ra ani pwonun ekkoch feioch, me nein ekkana feioch mi pachenong pochokun me nikitun inis.
Ekkoch fansoun a no ua anneani ew porausen ekkei pwon. Emon chon ewe Mwichefen mi tupwen, itan John A. Larsen a emon soufiun Merika non ewe World War II i emon chon Coast Guard won ewe siip itan USS Cambria. Outun ra maun non Philippines, poraus a feito pwe a wor ew mwichen sepenin ra uwo pakutang me sepenin kamikaze. Ra angei annuk pwe repwe suu seni ewe neni. Nge pokiten ewe USS Cambria a fen feino, John me unumon chiechian kewe ra angei pisikir kewe me ra feino nepii ne kutta war mota. Ra feioch pun a wor efoch kukkun siip a uweir ngeni ekkewe siip ra saino. Ekkewe mwan won ewe siip ra fokkun achocho ne feino mwitir iwe ra chok tufichin monei saan pwe ekkewe foemon repwe tota.
John, fiti ewe ratio mi chou me won sekurun, a chok kamoch won ewe saan a 40-feet (12 meter) taman me non epekin ewe siip mi chok saino won sat. A poputa ne weita pwisin inisin, poun me poun, ren an sinei pwe ika pwe ewe saan a mitini seni epwe ennetin mano. Non an chok tota ew ne unungat won ewe saan poun kewe ra fokkun metek. A fokkun pekus a ekieki esap tongeni sopweno.
Ren an pochokun a fen wesino, a ekieki usun an mano mi ariaffou, John a sio non mosonoson ngeni Kot, a ereni pwe mi chok aponueta ewe Kapasen Emirit me a manaueni ew manau mi nimoch—me iei a wesen namwot ekkewe feiochun repwe pwa.
Mwirin John a apasa pwe nupwen a awesano an iotek, a mefi ew watten pochokun a tori inisin. A poputa ne tota sefan me usun a fen chok changeta me won ewe saan. Nupwen a tori won ewe siipmi chok kinamwe an ngasangas ese pwan mwii. Ekkewe feiochun pochokun me nikitun inis, mi pwon me ren ewe Kapasen Emirit, ra tori i. A pwarata an Kinisou ngeni Semach won Nang non ena ran me non unusan manauan, fan itan penuan an iotekin aninnis.
Pwi kewe, amo ita sipwe tumunu inisich kewe ren ach aponueta ekkewe nongonong mi katou me ren ewe Kapasen Emirit, ew kokkot mi kefin. Ren unusan netipei me nguni, ua pwarata usun ekkewe feioch mi ning ra witi kich ika pwe sia aponeuta. Amo ita epwe ina, ua ani iotek non itan ach we Samon me Chon Amanau, Jises Kraist, amen.