Emon Chon Pwarata ussun Kot
Upwe erenikemi pwe ousap niamam ren ami nipwakingau ne apworausa ewe kapas allim. Nge, oupwe iotek pwe “oupwe [chon pwarata] usun Kot.” Ei popun a pechekun nap seni niamam.
Napangeni ewe angangen Kot ese pwa ngeni chon fonufan. Wonupuku ier me mwen uputiwan Kraist mi wor chommong souwak mi amwarar usun Confucius non China me Buddha non India, nge ewe manamanen an Kot pristut a nom ren Daniel, ewe soufos a manau fan weiresin ewe muun Nebuchadnezzar me Babylon.
A osukosuk pun a ani ew tan non ewe pwin, King Nebuchadnezzar a annuku pwe noun kewe sou rong me sou peut repwe ereni an we tan pwan wewen. Iwe, ese wor emon mi tongeni ereni ewe king an we tan me ra anini. “Ese wor emon won fonufan epwe tongeni [foriei, me ese pwan wor emon king epwe tongeni aumwesi noun kewe ren ei sokkun]. King Nebuchadnezzar a men song rer o a annuku pwe meinisin noun kewe souwak repwe mano.
Daniel, emon nein noun ekkewe king souwaak, a iotek pwe ekkewe “chennin … Kot … usun ei monomon.”
Ew manaman a fis. Ewe monomonun an ewe king we tan a pwa ngeni Daniel.
Ra uweino Daniel fan me mwen ewe king. “Ka tongeni ereni ei met ua tana o met wewen?”
Daniel a penueni:
“Ese wor emon sou rong, sou pwe, are sou kaeo ngeni ekkewe fuu mi [tongeni erenuk met ka mochen]. …
“Nge mi wor emon Kot won nang [a tongeni pwarano ekkei, me I] esinei ngeni ai king met epwe fis non ekkewe fansoun repwe feito. …
Daniel a era, “ewe Koten nang epwe forata ew muu, [efou fau mwokut seni ewe achaw nge ese wor emon a amwokutu epwe winiti ew chuuk watte me epwe aura ewe fonufan] esap tano … [nge epwe] nonnom feinfeino.
“… Ewe tan, “ Daniel a apasa, “mi fat me ewe awewe mi pung.”
Pun an we tan a fateno o a pwan weweoch, ewe king a pwarata, “Om we Kot a tekia seni ekkewe kot meinisin, i Samonun ekkewe king.”
Seni ewe amwararan ewe manamanen Kot ngeni Daniel a tori tanen ewe osini usun ewe aniwinsefaniton ewe kapas allimen Jises Kraist ngeni fonufan, ew muu epwe aura ewe fonufan, “esap tano … [nge epwe] nonnom feinfeino.”
Nampan ekkewe chon ewe Mwichefen non ewe fansoun soponon epwe chon kukkun, usun met Nifai a osini usun, nge repwe nom won unusan fonufan, me ewe manamaen me angangen ewe pristut epwe kawor ngeni meinisin mi mochen, o epwe aura ewe fonufan usun osinien Daniel.
Non 1831 ewe Soufos Joseph Smith a angei ei pwarata: ewe kien ewe muun Kot me ewe ionifengenin Israel seni ekkewe ruanu kinikinin fonufan mi nifangetiw ngeni mwan won fonunfan, me seni ei ewe kapas allim epwe choufetan ngeni muchun fonufan, usun ewe efou fau mwokut seni ewe achaw nge ese wor emon a amwokutu epwe sasano, tori a aura unusan fonufan.”
Ew Wis a nom won Kich Meinisin
Ewe ionifengenin Israel mi manaman me a usun echo watten sasing mi kinetiw me kinikinin ewe nios repwe pungeno me mwen amwararan ewe Aruan Wareton. Usun chok kich sipwe osukosuk ren kinikinin sasing mi chukuchukuta non fitikoko, ekkewe Souleng me akkomw repwe kuna wiser ne achoufetanei ewe kapas allim mi niwinsefanito ngeni unusan fonufan esap tufich. Nge ra poputa, emon aramas, echo kinikin ewe sasing, kukutan ekkewe mi wenechar ne winiti nepekin ewe sasingen ei angang mi pin. Ekkis me ekkis, ewe efou fau mi mwokut seni ewe achau nge ese wor emon a mokutu a poputa ne sasano; seni fitupuku ngeni fitungeru, ngeni fitu minion Aramas mi Pin non Fansoun soponon mi apwonueta pwon mi pin seni muu meinisin ra aninisfengen ne apungu ekkewe kinikinin ewe sasingan ei angang mi amwarar.
Emon me emon kich ew kinikinin ewe sasing, me emon me emon kich sia aninisfengen ne apungu ekkewe pwan ekkoch kinikin. Ami mi namwot non ei angang mi napanap. A fat ewe aan mwach. Sia tongeni kuna ewe manaman mi sopweno me poun ewe Samon a emwenikich ne aura ekkewe pwang nusun. Iwe, “ewe Jehova mi Napanap epwe apasa pwe ewe angang a wes,” me I epwe niwin non an amwarar me ning.
Preseten Thomas S. Monson a apasa: “Iei ewe fansoun pwe chon ewe Mwichefen me misineri repwe chufengen, angang fengen … me panano ngun ngeni I. … I epwe anisikich non ach angang ika sipwe apwonueta An angang non nuku.”
Ewe wis mi pin minne ita rurun me nom a nom won afaran ekkewe mi wisen misineri fansoun meinisin iei a nom won kich meinisin. Kich meinisin sia mochen aporausa ewe kapas allim, me ua kinisou pwe fitungeru aramas ra paptais iteitan wiik. Nge ikamwo ei efeioch mi amwarar, ach tipe ngeni osukosukan pwich me fefinach me ach mochenin apwapwaiti Kot mi esinepato auchean ewe atepwanepwan ne apworausa me apechekuna ewe muun Kot ekkis meinisin won fonufan.
Ewe Pochokunen ach Niamam
Inamwo ika oua kan mefi ewe mochenin aporausa ewe kapas allim, mi tufich pwe ouse pwapwa ren fisiochun ami achocho akkomw. Oupwe mefi usun emon chienei a era, “Ua fen fos ngeni ai famini me chienei usun ewe Mwichefen, nge fitemon chok ra ekkis tipengeni, me fiti meinisin ar rese etiwa, a anapano ai sao. Ua sinei pwe mi auchea ai upwe fori pwan och, nge ua osukosuk, me ua mefi niamam wachemuk.”
Iwe sipwe kuna ika ua tongeni aninnis.
Niamam mi auchea ngeni kich pun a esinna ngenikich met mi namwot sipwe ekkesiwin, nge mei wor muchunon aninnisochun niamam.
Niamam mi usun efou pateri non efoch taraku. Epwe tongeni asarama ewe taraku, onne ewe mwasin, me etina ekkwe teingkin, nge esap awora kasin ewe sai me mwach. Ewe pateri, pwisin, ese nafoch. Ina usun chok niamam.
Upwe erenikemi pwe ousap niamam ren ami nipwakingau ne apworausa ewe kapas allim. Nge, oupwe iotek, usun Alma a aiti, pwe oupwe kuna ekkewe tufich pwe, “oupwe chon pwarata usun Kot fansoun meinisin me non mettoch meinisin, me non neni meinisin … pwe [ekkoch repwe] tongeni ngaseno ren Kot, me anneanong nein ekkewe chon aewin manausefan, [me] epwe tongeni wor [ar] manau esemuch.” Ei popun a pechekun nap seni niamam.
Ach winiti chon pwaratan Kot non fansoun meinisin me non neni meinisin mi pwa non manauach me ach kapas.
Oupwe ennetata ami nuku non Kraist. Nupwen ewe tufich a pwa, kapas usun Manauan, An afanafan, me An nifang mi napanap ngeni aramas meinisin. Apworausa An kapasen ennet mi manaman me non ewe Puken Mormon. I a ngenikich ei pwon: “Ika emon epwe pwarata mwen mesen aramas pwe i Nei, upwe … for ngeni usun chok me mwen mesen Semei won nang.” Ua pwon ngenikemi pwe nupwen oupwe ikiotek seni netipemi ren tufich ne “pwarata usun Kot,” ekkana fansoun repwe eto, me ekkewe mi kuta saram me sinei repwe nom mwemi. Nupwen oua apwonueta mwongungun ngun, ewe Ngun mi Fel epwe uwei ami kapas ngeni netiper, me ew ran ewe Chon Amanau epwe pwarata usumi me mwen Seman.
Ach Angang Meinisin
Ewe angangen ngun ne anisi emon ne anneanong non ewe muun Kot mi fen ach angang menisin. Tingor aninisin ekkewe misineri nupwen oua tawe, me iotek ren aninnisin nang. Nge chechemeni, an emon ewe fansoun ekesiwin esapw finiomw.
Kamla Persand i fin Mauritius island, a fiti sukunen safei non Bordeaux, France, nupwen aua churi non February 1991. Aua iotek non am famini pwe aupwe tufichin apworausa ewe kapas allim ngeni emon mi kuta ewe ennet, me aua aiti i non imwem. Ua feioch ne paptaisi, nge esap chok am pwisin mi winiti nenien apiru non an Kamla choni ewe Mwichefen. Chienan, misineri, me an famini ir “chon pwarata usun Kot” non fonuan, me ew ran non France, nupwen mi taweoch ngeni Kamla, i a finata an epwe paptais. Iei, 25 ier mwirin, ekkewe feiochun an finata mi nom ekkis meinisin unukun, me noun we at i emon misineri non Madagascar.
Ousap ekkieki pwe ami achocho ne pwari ewe tongen ewe Chon Amanau mi usun ew tes mi tufichin pass ika esap pass me niwinin ewe tes a nongonong won ifa usun chienemi mi etiwa mefiemi are ami tingor ngeniir ne churi misineri. Ren mesan inisich, sise tongeni kapung won esinepaton ach achocho, me sise tongeni sinei inet. Nupwen oua pwari ewe tongen ewe Chon Amanau ngeni pwan emon, oua foforoch fan mesan ewe Samon.
Ekkoch muu ra amuchu angangen misineri, me a esinepato pwe chon ach mwichefen mi amwarar ra pwari ar pochokun ne uta pwe ir “chon pwaratan Kot non fansoun meinisin me neni meinisin.”
Nadezhda seni Moscow a wanong ewe Puken Mormon non ew porun niffang ren chommong okkasi non pwan. “Ua ereniir,” a apasa, “pwe iei ewe nifang mi ngar mi nap ua tufichin nifang ngeniir.”
Fitu ran mwirin an paptais non Ukraine, Svetlana a mefi pwe i epwe apworausa ewe kapas allim ngeni emon mwan i a kukuna won pas. Nupwen ewe mwan a totiw me nenian, i a eiseni, “Ka mochen kaeo usun Kot?” Ewe mwan a apasa, “Ewer.” Misineri ra aiti Viktor, me i aa paptais. Och fansoun mwirin I me Svetlana ra ririfengen non ewe Tempel non Freiberg Germany.
Tumunuoch, ami feioch mi tongeni eto non napanap ouse fen ekkieki usun.
Fisu ier a no, Am me Kathy aua churi Diego Gomez me an famini mi ningoch non Salt Lake City. Ra fiti ew sukun Tempel rem nge rese etiwa am tingor pwe repwe pwan kaeo och usun ewe Mwichefen. Non ewe May, ua amairu pwe Diego a kokoriei won fon. Fisin manauan a emweni i an epwe fotupuku me iotek. I a pwisin kuna ekkewe misineri, ausening ngeni ekkewe afanfan, me i a monnata an epwe paptais. Non June 11, ua tonong ewe konikin paptais ren chienei me chienei chon nuku Diego Gomez. An ekkesiwin a fis non pwisn an fansoun me a feito ren ewe aninnisin me pennin chommong mi tori i non ar “chon pwarata usun Kot.”
Ew Pesepes Ngeni Serafo
Ngeni nouch kewe serafo me ekkewe mwan me fefin mi nipich won unusan fonufan, ua ngenikemi ew pesepes me tingor pwe oupwe winiti “chon pwarata usun Kot.” Ekkewe chon unukuch mi tawe ngeni kapaseisin pekin ngun. Oua chechemeni ewe sasing mi kinetiw? Ami ouse sewapun nge mei wor pekin kompiuter me minen chiechi won internet ami mi sinei. Ami mi auchea ngenikem; mi auchea ngeni ewe Samon pwe oupwe awatteno ami achocho non ei angang mi amwarar.
Ewe Chon Amanau a apasa, “Oupwe feinno ren aramas meinisin won fonufan, … oupwe paptaisir fan iten ewe Sam, ewe Nau, me ewe Ngun mi Fel.”
Ese nusmwan pwe ami mi nom non Africa; Asia; Europe; North, Central, are South America; ewe Pacific; are pwan ew neni won an Kot fonufan pun ewe kapas allim epwe tori muu meinisin, einang, sokopaten kapas, me aramas.”
“Ewe Koten nang epwe forata ew muu, [efou fau mwokut seni ewe achaw nge ese wor emon a amwokutu epwe winiti ew chuk wate me epwe aura ewe fonufan] esap tano … [nge epwe] nonnom feinfeino.
“… Ewe tan mi fat me ewe awewe … mi pung.”
Ua osupwano ei ren ekkei kapas seni ewe Doctrine and Covenants mi apasa pwe sipwe kokori ewe Samon, pwe An muu epwe choufetan won unusan fonufan, pwe ekkewe aramas meinisin repwe angei, me repwe monata ren ekkewe ran epwe feito, nupwen ewe Noun Mwan epwe etiw me nang, a ufouf non asaraman Ningan, ne churi ewe muun Kot won fonufan. Non itan Jises Kraist, amen.