Sinei, Tongei, me Mammarita
Awmo sipwe eto me weweiti wisach non ei auchean ach angangen iamwiri pwe sipwe usun chok Ii.
Non 2016 Ewe Tabernacle Choir won Temple Square ra sai ngeni ekkewe fonuen Netherlands me Belgium. Me Pokiten mi wor wisei ne aninis non ewe mwich mi apwapwa, uwa tongeni katon ar we mwichen kon fan ruu.
Otun ar we kon ngang ua ekieki usun weiresin ne sai fetan ren eu mwichen chon kon ren ukukun watten. Ai we ekiek a feinno ngeni ewe foummongun gong, minne a weires me momong ne tinano ngeni ekkana fonu nap seni ekkewe kukkun pisekin for kon usun ekkewe violin, me trumpet, a mecheres om kopwe chok uwei fan poum. Nupwen uwa nengefichi ewe mwokutukutun ewe gong ,ua kuna pwe ra chok nechei fan fitu, nge ekkewe kukkun pisekin for kon ra nounou non unusen ar kon. Nge uwa esinna pwe ika ewe gong, ese nom ar we kon esap unus me a fokkun auchea ar repwe uwei ewe foummongun gong ngeni epek ewe sat.
Fan ekkoch sia tongeni mefi pwe kich, usun ewe gong, sia chok tongeni aninis non ewe angang fan fitu chok non ewe mwokutukut. Nge upwe erenuk pwe mongungum a fokkun namwot pwe epwe unus.
Meinisin pisekin for kon mi namwot. Ekkoch me neich sia tipachem non sukkun me mecheres ngenikich, me pwan ekkoch ra sineioch mettoch usun chunga me kon. Ekkoch ra forata mettoch me ekkoch ra tumunu, mammasa, me akkaiiti pwan emon. O kich meinisin a namwot pwe sipwe awora sokopaten onuwan me wewen ngeni ei fonufan.
Ekkewe ir mi mefi pwe ese wor met ra tongeni aninis ren are ra nuku pwe rese auchea ika ir mi namwotangaw ngeni pwan ekkoch, me pwan ngeni ekkoch meni ra mefi ir mi nampa eu, tori meinisin ekkewe mi nom nefiner, iwe uwa mochen afanafan ngeni kemi.
Ekis ia ka nom ia won ewe aanen manau, ekkoch me neimi meni oupwe fen choou ren weiresin manuach oupwe fen mefi ouse chiwen nom won ewe aan. Uwa mochen tingoreikemi pwe oupwe tou seni ewe rochopwak me tonong non ewe saram. Ewe saramen ewe kapas allim epwe akara me echikara manauomw me anisuk om kopwe weweiti ennetin en io me popun manauomw.
Ekkoch me neich ra fen fein fetan won och aan mi sokono me ngaw ren ar repwe kutta pwapwa non.
Semach won Nang mi tongeikich a fen etiwa ngenikich meinisin pwe sipwe fetan won ewe aanen minne nikinikin chon kuno me niwin ngeni I. A tongek ren eu tong mi unusoch.1
Ifa ewe aan? Ewe aanen ach sipwe aninis fengen ne weweiti kich io non ach iamwir ngeni ekkoch.
Ngeniei iamwir a wewe ngeni angangen ena tong mi pin.2 Non na wewe sipwe fori ew nenien mine me rueomon ewe chon niffang me ewe chon angei repwee mochen aier. Are sia tongeni era, pwe sia ekkisiwini pwisin kich me kaneto ngeni me winiti usun ach Chon Amanau, Jises Kraist.
Awewe, ese wor namwoten ach sipwe ereni punuwach me nouch kewe ifa usun repwe fen achocho ne siwini non manauer; ra fen sinei. Iwe iei ika sipwe fori ei napanap nefinach mi uur ren tong ina met epwe apechekuner ne siwini manauer me winiti aramas murino.
Non ei napanap aier epwe fiis iteitan ran ne siwin ekis me ekis, mi pwan tongeni fiti omusomus fan iten foffor mi mwan. Uwa chechemeni me a pwan chiwen wor och fansoun minne uwa fen mwitir ne apungu are uwa maang ne ausening och. Me soponon ewe ran, otun ai iotek, ua mefi ewe auraur ren tong seni nang pwe upwe aier me siwin ngeni murino. Ewe napanapen tong fengen a ewin nefinen semei me inei me pwii me fefinei kewe, me mwirin nefinen punuwei me nei kewe, me chienei kewe a men anisiei ne winiti emon aramas murino.
Kich meinisin sia fen sinei ifa usun sia tongeni anapano ach achocho. Ese wor namwoten ach sipwe achema ngeni emon fansoun meinisin ren apwapwangan, nge a wor namwoten tong me iamwir fengen, me non ei napanap, epwe wor pwisin an emon mochen ne siwin.
Non ei chok napanap sia pwan kaeo ennetin ion kich me met wisach non ei ewe saigon kinikinin fansoun won fonufan me mwen ewe Aruwen Wareton ewe Chon Amanau.
Ika ka osukosuk ren met wisiom, uwa mochen tingorek kopwe kutta eu neni ka tongeni anaemon chok me eisini Semach won Nang epwe esinei ngonuk minne wisom kepwe ani. Napengeni ponuan epwe wareto ekkis me ekkis me mwirin sia pechekun me uta won ewe aanen pwon mi pin me iamwir epwe wor fatafatochun.
Kich sia osukosuk ren och osukosuk minne Joseph Smith a pwan osukosuk ren nupwen a nom “non ewe fansoun minne a wor watte fiu fengen ren kapas me ekiek mi sokkofesen ne aninifengen.” Usun sia aneani non pwisin an kapas, a apasa fan chommong: “Met upwe fori? Menni me nein ekkei mwicheich mi ennet; are, ir meinisin mi mwan? Ika eu me neir mi ennet, menni, [ew] me ifa usun ai upwe sinei?”3
Ren ewe mirit a kaeo non ewe Puken James, minne a mak, “Ika emon me neimi ese mirit, epwe tingor ngeni Kot, iwe Kot epwe Ngeni I, pun Kot mi kisasew o kirokiroch ngeni aramas meinisin”4 Joseph “non ekkis fansoun a fini pwe epwe ‘tingor ngeni Kot’”5
Sia pwan anneani pwe “ina ewe aewin fansoun non manuan an epwe fori ena sokkun kapas eis, pwe non an osukosuk ese mwo fan eu me mwen epwe achocho ne iotek neuomwong.”6
Iwe a chok pwan usun ach aewin iotek ngeni ewe Chon Fori Kich non eu anapanap ren ach sise mwo fori me akomwan.
Pokiten an Joseph achocho, Semach won Nang me Noun we, Jises Kraist, ra pwa ngenii, me kokkori i ren itan we, me seni ena mi wor ach fatochun weweiti usun kich ion me mi wor ennetin popun me namwotach.
Sia pwan anneani pwe ne anuonun Joseph “mi esit me koput me ren ekkewe ita ururun repwe fen chienan me ion ekewe ita repwe kirekiroch ngeni.”7 Iwe sipwe pwan tongeni kuna weires me essit me non ach manaueni ewe nikinikin emon chon kuno.
Ika pwe iei ka mefi pwe kese tongeni aninis non ewe mwichen chon kon me ewe aanen aier a weires ngonuk, kese kan mochen kepwe sinei pwe ika sipwe nikitu, ewe chou epwe paneta seni affarom me epwe wor saram sefan. Semach won Nang esap tongeni feinno seni kich nupwen sia eitieu pouch ngeni I. Sia tongeni tur me uta sefan, me I epwe anisikich ne nimeti ewe puun seni pwasukuuch.
Ekkoch me neich sia kinas, nge me non ewe pisekin safei an ewe Samon mi wor mangaku mi tongeni tukumi kinas meinisin.
Iwe iei ena tong, ewe tong mi unusoch sia pwan era tong ennet ika “ewe nimenimochun tong an Kraist,”6 mi kan namwot non imwach kewe ewe neni minne sam me in ra iamwiri nour kewe me pwan semirit ngeni semer me iner kewe. Me ren ena tong, epwe wor siwinin netip me mochenin fori An mochen.
Ina ewe tong mi namwot non met epwe fiis nefinach noun Samach won Nang me kich chon An Mwichefen pun me met epwe atufichi pwe meinisin ekkewe pisekin for kon repwe aninis fengen non ach ei mwichen chon kon pwe sia tongeni monneta ne fiti non ewe amwararan konun chon nang nupwen ewe Samon a wareto sefan.
Ina ewe tong, ewe saram mi namwot ne tiin me asarama manauch iteitan ran. Aramas repwe esinna ewe saram me repwe feitto ngeni. Ina usun ewe angang misin epwe anisi ekoch ngeni ar repwe “eto me kuna, feito me aninis, eto me nomw.”9 Kose mochen, nupwen ka angei omw pwarata usun ekei auchean angang me ka choni, eto sipwe pwapwa fengen fiti nouch we auchean soufos Joseph Smith, me apasa, “Pokiten uwa fen kuna ew nemwasepwi; uwa fen sinei, me uwa sinei pwe kot mi sinei, me use tongeni upwe opwuta.”10
Uwa pwarata ngonuk pwe ngang mi sinei ngang io, me uwa sinei en io. Kich meinisin noun Semach won Nang semirit minne a men tongeikich. I ese tina kicheto pwe sipwe poutmwanino pwe sipwe niwin ngeni I non ning. Pwe kich meinisin sipwe tongeni weweiti wisach non ei angangen iamwir mi echipwer pwe sia tongeni winiti usun I nupwen A feito sefan ina ai iotek non iten Jises Kraist, amen.