![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F02%2Fb2%2F02b2e6d789f95e14eb86ae79457abd21d1879fad%2F02b2e6d789f95e14eb86ae79457abd21d1879fad.jpeg/full/!250,/0/default)
Non Kuchu me Tinen Akar, Samon, Nonomw Rei!
Uwa pwarata ngeni kemi pwe “non kuchu me tinen akar” ewe Samon mei nomw rech, pwe ach “riaffou [repwe tongeni] nemenemeno non pwapwan Kraist.”
Echo ach kewe kon a pwari usun ew tungor “Non kuchu me tinen akar, Samon, mei chok nonomw rei!”1 Fan ew ua nomw won efoch sepenin nupwen a tori ew watten asapwan. Uwa neu non ewe asamwacho, uwa kuna ew manunun kuchu faam. Saramen ewe akar an a tetiw a tineiti kewe kuchu, a efisata ar repwe unusen saramaram. Mwutir chok, ewe sepenin a sanong non ewe manunun kuchu, iwe auwa nomw non ewe kuchu mei unusen kiroch ewe auwa mamasaroch ren pechekunen ewe saram auwa keran chok kuna me mwan.2
Kuchu chon mei tongeni fisita non manawach, minne mei tongeni ochunakich seni saramen Kot me epwe fen pwan fori ach sipwe kapas eis ika ena saram mei chiwen nomw rech. Ekkoch ekena kuchu ir tipechou, nuokus, me pwan ekoch sokkun riafoun ekiek me memef. Repwe tongeni angawa ach kuna manawach, ekoch, me pwan Kot. Ra osukosuka fefin me mwan ese nifinifin ierir non ususen fonufan.
Usun chok angawa ina ew kuchun nukunukumang pwe epwe pwan osukosuka ekoch ekewe resemwo kuna ekei sokkun weires. Usun kinikinin ewe inis, ewe tupu epwe tori sokun samwaw, samwaw weires, me mettoch esapw nenepek. Nupwen ach ekiek a weires, mi och ach sipwe tungor aninis seni Kot, seni menun unukuch, me seni sounsafei.
“Aramas meinsin—mwan me fefin—fa för non nikinikin Kot. Emon me emon mi eu ngun mi achengicheng aat me nengin noun emon sam me in won nang, me … emon me emon a wor an fetanin napanap me tufich napanap.”3 Usun inach me samach non lang me ach chon Amanau, a wor inisich4 me sa sine foffor.5
Pwi achengicheng, ese wor ngawen ami oupwe neipechow ika ekipwich fan ew non ew fansoun. Netipechow me nuokus ikena met an aramas memef.6 Nge, ika sia song iteitan me ika ach weires a epeti ach tongeni mefi ewe tong an Samach non lang me Neun ewe me ewe memefin ewe Ngun mi Fel, iwe sipwe riafoun tipechou, nuokus, ika pwan ekoch nonomwun inis.
Neiwe nengin a makei fan ew: “Mei wor ew fansoun...[nupwen] uwa netipechow iteiten fansoun meinisin. Uwa ekieki pwe netipechow eoch mettoch sipwe sawasini, me ina ew esisinen apwangapwang. Iwe uwa anomwu ai netipechow ngeni inisi. ... Uwa unusen mefi pwe ese wor namwotei.”7
Emon chienei a awewei ren ei: “Seni nekukunui, iteitan uwa fiu ngeni ai mefi pwe ese chiwen wor ai apinukunuk, kiroch, akanaemon, me nuokus me ewe memef pwe uwa tatakis me ngawono. Uwa fori meinisin ren ai opano ai kewe riafow me use mwochen upwe pwari pwan och me nukun ngang mei achocho me pechekun.”8
Chiechiei achengicheng, mei tongeni fis ngeni emon me neich—akaewin nupwen, ren chon nuku non ewe kokkoten pwapwa, sia wata chow ese wor namwotan won inisich ren ach ekieki pwe sipwe unusech iei. Ei ekiek epwe tongeni aweiresikich. Ach sipwe unusech ew fofor epwe fis non unusen manawach iei me pwan mwurin—me ren chok an Jises Kraist umeumech.9
Are, nupwen sia kapas usun ach weiresin memef, sia pwarata pwe sise unusech, sia ngeni ekoch mwumwuta ar repwe pworous usun ar nipwakingaw. Sia kuna pwe mei wor apinukunuk me sisapw riafow won winikapach.10
Ren neun Jises Kraist chon kuno, sia pwon ngeni Kot pwe sia “mwochen sipwe mwarei an emon chow” me “sipwe netipechow fengen me ekkewe ra netipechow.”11 Naman mi namwot sipwe keao usun samwaun ekichow, kutta pekin aninis epwe anisi ekei sokkun nipwakingaw, me uwei safanikich me ekoch ngeni Kraist, ewe Mastan Chon Echikar.12 Ika mwo sise weweit met ekoch ra nomw non, anetaechu pwe ar riafow mei enet ina ew kinikin mei namwot ach sipwe weweiti me echikarer.13
Fan ekoch, ekewe metoch ra pwopwutani tipechou me nuokus kich mi tongeni siner, nge fan ekoch epwe weires ach sipwe esinna.14 Tupuach epwe riafow pwokiten ekichow15 ika apwangapwang,16 nge mei tongeni echuno ren ach sia tumunu anach, ach meur, me angangen epechekunen inis. Fan ekkoch, safei me aninis meren ekewe mei sinenap mei pwan tongeni aninis.
Niwinin ekewe samwaun inis me ekiek mei watte, epwe awateno ach umwuno, wewengaw, atai nefin, efeiengawa-inis, ika pwan nimanaw. Uwa fen sinei ei, pwokiten pwukutan semei we a angei manawan chomong ier a no. An mano a amairu me netipeta ngeni ai we famini me ngang. A tori ier chomong ai wa netipechow, iwe uwa keran chok sinei pwe ai upwe kapas usun nimanaw non nikinikech a tongeni anisi an epwe epeti nge esapw awateno.17 Iei uwa fen pworous ngeni nei kewe usun an semei we mano me uwa pwarata usun an ewe Chon Amanau anisiei won me ruepek ewe eppet.18
Ngawan chok, chomong ra riafoun tipechou ra atowawa inisir seni cheicheir aramas mi pin pwokiten ra mefi pwe rese echun nomw nein ekoch. Sia tongeni anisir ar repwe sinei pwe iir chiechiach. Mei auchea ach sipwe sinei pwe tipechou esapw seni ach apwangapwang, ika pwungun ach tipis.19 Mei “sa non monomon nge kukun non chiechiech.”20 Kich fengen, sia tongeni tonong non ekewe kuchun akanaemon me nikinikingaw pwe ewe choun itengaw epwe wesino me ewe feiechun ngasono epwe fis.
Nupwen A afanafan won fonufan, Jises Kraist a echikara mei semwen me osukosuk, nge emon me emon epwe fori angangen nuku non Ii me fori ren An epwe echikarer. Ekoch ra fetan nakatam, ekoch ra eitieu peur repwe atapa ufan ewe, me ekoch ra keki ngeni ar repwe tongeni chikar.21 Ren pekin echikar, sise unusen mwochen an epwe anisikich? “Esap Kich Meinisin Chon Tungor?”22
Sipwe tapwei anen ach Chon Amanau me awateno ach kirekiroch, ekukunano ach eitengaw, me awesano ach cheki nukukachern ekkoch. Ach rongorong fiti tong ina ew watten nifang sia tongei aea, me sia tongeni uwei ika eki ekewe kuchu mei chow kewe ra nieno atongeach me chiechiach kewe23 pwe, non ach tong, repwe tongeni mefi ewe Ngun mi Fel me angei ewe saram me feito seni Jises Kraist.
Ika kachok nonomw ren “rochopwak,”24 kun ngeni Samach non Nang. Esapw wor metoch kafen fori epwe siwini ewe enet pwe en neun me I mei tongek.25 Chechemeni pwe Kraist ii omw Chon Amanau me Chon Angasono, me Kot ii Semwom. Iir mei weweiti. Ekieki pwe iir mei nomw unukumw, eusening me ngonuk aninis.26 “[Repwe] chacharikemi non ami riaffou.”27 Fori meinisin met en mei tongeni, me nuku an ewe Samon chen mi achasefani.
Omw nipwakingaw esapw aweweok, nge repwe tongeni forsefani en.28 Pokiten ew “ira fonufon non futuk,”29 kopwe tongeni omw kopwe ani kirekiroch ngeni ekoch. Fan emwenien ewe Ngun mi Fel, pworous usun pworousomw pwe epwe “anisi mi apwangapwang, ekieta ekewe pau mei turutiw, me epechekuna ekewe pwosuk mi pekus.”30
Ren kich ekewe mei nipwakingaw ika anisi emon mei nipwakingaw, sipwe chengenne fori an Kot kewe annuk pwe an Ngun mi Fel epwe nomw rech fansoun meinisin.31 Sipwe fori ewe “metoch mei kukkun me mecheres”32 ewe epwe ngenikich pechekunen ngunuch. Usun Preseten Russell M. Nelson said a apasa: “Ese wor met epwe suki nang usun watenon ach mirit, tupon, kutta, kametip won ewe kapasen Kraist non ewe Puken Mormon fansoun meinisin, me iteitan ach fansoun no ngeni tempel me angangen uruo.”33
Sipwe chechemeni pwe ach Chon Amanau, Jises Kraist, “[afen angei] won inisin [ach] apwangapwang, pwe nenukan epwe tongeni ureno ren umoumoch, anongonong won ewe pekin aion, pwe I epwe tongeni sinei … ifa usun an epwe anisi [kich] anongonong won [ach] pwangapwang.”34 A waroto “pwe epwe ochu ekewe mei netipengaw, … epwe achipa ekewe mei netipeta; … an epwe ngenir ning seni pwochoch, me oinen pwapwa ren netipechow, ewe garmenin eningano ewe ngunun nang.”35
Uwa pwarata ngeni kemi pwe “non kuchu me tinen akar” ewe Samon mei nomw rech, pwe ach “riaffou [repwe tongeni] nemenemeno non pwapwan Kraist,”36 iwe ina “pwe seni chen kich sia manau, mwirinon meinisin met sia fori.”37 Uwa pwarata pwe Jises Kraist epwe niwin ngeni fonufan “fiti ewe pochokunen chikar non peun.”38 Nge unusan, I “epwe tenu meinisin surun maas seni [pwusin] mesach; me esapw chiwen wor … netipengaw.”39 Ren meinisin ekewe repwe “feito ren Kraist, me oupwe unusochuno non i,”40 ewe “akar esapw chiwen tupwutiw...pwe ewe Samon epwe [ach]saram fochofoch, me ewe ranin [ach] netipeta epwe wesino.”41 Non iten Jises Kraist, amen.