Kosap Otupuwei
Nupwen sipwe anneasosichi an Kot annuk, sipwe emwen non ewe aan mi ennet me sisap tupuno.
Ikenai, upwe awora ekkoch kapasen aninis ngeni meinisin, nge akaewin fan iten ewe minefon tapin aramas—Semiritin Kinter, sarafo at me nengin. A wor anononun tong an noun ewe Samon ewe soufos ikenai, Preseten Russell M. Nelson—a watte ina minne a porous ngeni chommong ami non ew auchean mwichen sarafo non unusen fonufan a tou non asapwan non ewe ier. “An Israel Epinukunuk.” Fan chommong sia rong Preseten Nelson a keer ngenikemi ena—ewe “an Israel epinukunuk,“ ewe tappin aramas mi marita me ewe fansoun mwan ewe Mwichefen mi niwinsefanito an Jises Kraist.
Chinei kan onuwon me fopun, ua mochen poputani ne aporousa ru porousen ai famini.
Ewe 102 Dalmation
Chommong ier ra no, ua tori neimw sari ne angang me mairu ai uwa kuna peinit mi pwech a paras fetan—won ewe pun, won asamen ewe nenien taraku, me won imwem ewe imwesimen mi par. Ua nengenochu met ewe a fis, me uwa kuna pwe ewe peinit mi chok chochonuto. Rasen ewe peinit a feino ngeni nukunupen ewe imw iwe uwa tapwei. Ikewe, ua kuna nei we at nimu ierin ren ew pirosun peinit non poun, a tapwei noum we konak. Noum ewe murinon konak Labrador mi chon a peinit esop ngeni mi pwech.
“Metena ka fori?” Ua eis non ew ngingin meseik.
Nei ewe at a kouno, a nengeniei, nengeni ewe konak, nengeni ewe pirosun peinit mi suruti peinit seni, me apasa, “Ua chok mochen ewe konak epwe ussun ekkewe konak non kachito mi tikichonochon—ka sinei, ewe ren 101 Dalmatians.”
Ua tongei noum we konak. Ai ekiek pwe mi unusoch, nge non ena ran nei we att a wor an ekiek mi sokkono.
Ewe kattu mi nikarier
Oruwen ai ei porous a usun porousen emon pwin semen Semei itan Grover, ewe a nom non ew imw mi towaweno, non ew imw a towaw seni teninim. Uncle Grover a fein ngeni an chinnap. Sia ekieki pwe nouch ewe epwe churi me mwen epwe ma. Iwe, ew neanowasun, sia angei ew nakatamen sa won taraku ngeni imwan ewe. Sia mot fengen ne churi me aua ureni iten noum kewe at. Ese mo tam am ewe poporous, neum kewe ruemon at, ina epwe nimu me onu ierir ra mochen repwe etiu nukun repwe kukunou.
Tetenin semem ewe Grover, a rong ar kewe tingor, ra chapetiw won mesan. Mesan ew a pwach me rese sisinei ina pwata kewe at ra ekis niweiti. A apasa ngenir, non ew ngingin ese urumot, “Oupwe tumunoch—a chommong skunk nukun na.” Ar rong ei, Ngang me Lesa aua kon mairu; aua aurek ika repwe paras me ren emon skunk! Mwitir chok kewe at ra tou nukun ra kukunou nupwen am ouwa sopweno ne churi atewe.
Mwirin, nupwen am ouwa tonong nefon ewe taraku ren am oupwene no neim, uwa eisini ekkewe at, “Ami mi kunokun skunk?” Emon me neir a ponueni, “Apw, ause kunokun, nge aua kuna emon kattu mi chon mi wor nikarier mi pwech won sokurun!”
Ewe Chon Otuputup mi Napanap
Ekkei porous ussun semirit resemo kon wewe ra kuna mettoch ussun manauach me ennetin mettoch epwe fori an emon me emon kch sipwe emenimen, nge ra pwan fori awewen non ekkoch napanapen ew anononun ekiek.
Non ewe aewin porous, noum we kukkun at a wor noun konak mi ning; nge, a angei ew kanon painit me, puros non poun, a finata epwe fori pwisin met a ekieki pwe epwe punguno.
Non ewe oruwen porous, ekkewe at ra pwapwa rese pwan ekieki ewe feiengaw repwe weri seni emon skunk. Ese pungupungoch met ewe ra anapanapa re sereni, a mwaren fisi ngenir och mettoch repwe osukosuk ren. Ekkei porous ra mwanino ne anapanapa—ekiekin ewe wesewesen mettoch ngeni pwan ew sokkun. Ew me ew napanap, pungunon mi chok kukun namotan.
Nge, chommong ikenai ra ungeni ekkei chok sokkun osukosuk nge ra kon nap. Menin rese tongeni kuna mettoch non wesewesen ennetir ika rese menemenoch ren ewe ennet. Pwan, mi wor pochokun ra fis ikenai ar repwe emwenikicheno seni ennet. Ekkei mokutukutun otuputup me mwaken a nuno seni mwaan ese tipisich ra pwarano me anapano pwe esap kukunun osukosuk.
Setan, i semenapen chofona me ewe chon otuputup mi napanap, epwe fori ach sipwe aneta mettoch pwe ir wesewesan me omonungaw seni ekkewe ennet ese much ika ekesiwinir ngeni mettoch mi nikinikin apwapwa. “A fori ew maun ngeni ekkewe sounengin Kot”} me non fansoun nangatam a otota me kaeo ewe tufich ne pesei noun Kot kewe ne nuku pwe och mi ngaw me ngaw mi och.
I a fen fori ew itefounon inisin ne otupwata aramas pwe skunk ir chok kattu ika met, ew angangen peinit, ouwa tongeni ekesiwini emon konak Labrador ngeni emon Dalmatian!
Sipwene kun ngeni ew awewe ren ei nongonong a pwa me non ekkewe pukefel, nupwen noun ewe Samon soufos Moses a weri ewe chok pwan sokkun osukosuk. “Moses a mochuno won ewe tekian chuk, … a kuna Kot ra nenefengen, me a fos ngeni.” Kot a aiti Moses ussun ew anapanap ese much. Inamo Moses mi tongeni mano me ese unusoch, Kot a a aitikich me Moses “a nom non napanapen Noun we Anamon: me Noun we Anamon … epwe Chon Amanau.”
Ach sipwe achufengeni meinisin, non ei nemasepwi mi amwarar, Moses a kuna Kot, me a pwan kaeo och mettoch mi auchea usun pwisin i: I ennetin emon noun Kot.
Rongorong och ngeni met a fis nupwen ei amwararen nemwesepwi epwe oppunguno. “Iwe non ewe fansoun … Setan a feitto pwe epwe sotuni i,” a apasa, “Moses, noun aramas, fel ngeniei!” Moses a pwaracho ne ponueni: “En ion? Iwe nengeni, ngang emon noun Kot, at ussun chok Noun ewe Anamon; me ifa om ning, pwe upwe fel ngonuk?”
Non ew ititin kapas, Moses a apasa: “Kose tongeni otupuwei, pun uwa sinei ika ngang ion. Ua foruta non ununun Kot. Ese wor reom an saram me an ning. Nge pwata upwe fel ngonuk ika sonono ren om nikotuputup?”
Iei kopwe tumunoch ngeni ifa ussun an moses soposopono ne poueni. A afata, “Suseniei Setan; kosap otupuwei.”
Mei wor watten met sia tongeni kaeo seni an Moses pochokunen ponueni sosot seni ewe chon u ngeni. Ua tingor ngenikemi oupwe ponueni ussun chok ei nupwen ouwa mefi pwe a fis sosot ngenikemi. Annuku ngeni ewe chon u ngeni ngunum ren om apasa, “Suno towaw! Ese wor om ning. Kosap sotuni om kopwe mwaken ngeniei! Pun ua sinei ngang emon noun Kot. Me upwe kori ai Kot teitan ren an aninis.”
Ese mecheres an ewe chon u ngeni an epwe nikitano an angangen mochen otupu me eitengawa kich. I ese fori ngeni Moses, nge a mochen epwe fori an Moses epwe monnukano i ion feinfeino.
Ussun ita emon semirit a song, “Setan a puchor fiti neuomongun neuwan, me puchor fetan won fonufan, me annuku ne ura: Ngang Noun we Anamon, fel ngeniei.”
Sia katon sefan. Ami mi rong met a karan chok ura? “Ngang Noun Anamon. Pin ngeniei!”
Ewe chon otuputup mi napanap a apasa, “Kosap nuokus; usap efeiengawok—Esap ngang emon skunk; ngang chok emon kattu mi nikarier pwech me chon mi mirit.”
Mwirin chok Moses a kori Kot me a angei an pochokun seni nang. Inamo ika ewe chon u ngeni a chechech me fonufan a chech, Moses ese afangafang. Ngingin a fokkun fatafatoch. “Suseniei, Setan,” a afata, “pun ei chok emon Kot upwe pin ngeni, minne ewe Koten ning.”
Iwe nesoponon, ii “a suno … seni fan mesen Moses.”
Mwirin ewe Samon a pwato me a efeiochu Moses ren an aneasosich, ewe Samon a apasa:
“Ka feioch Moses, pun … kopwe fokkun pochokun seni chommong konik. …
“Iwe nengeni, ngang uwa nonom remw, tori omuchunon manauom.”
An Moses ewe pochokun ngeni ewe chon u ngeni ew pochokunen memef me pwar ngenikich ew minen apiru ngeni emon me emon kich, ese nifinifin sokkun nonomuch non ei manau. Ew pochokunen porous ngeni pusin ami—ami oupwe sinei met oupwe fori nupwen ii a otupukemi. Ren en, ussun Moses a fokkun feioch ren ewe niffang aninis seni nang.
Annuk me Feioch
Ifa ussun om kopwe kuna ei aninis seni nang, ussun Moses a kuna, me esap tupuno ika turunong non sossot? Ew aan mi fokkun fat ren murinon aninis a afat sefan non ei fansoun met mi auchea ren ewe Samon pusin I a affata: “Ina minne, Ngang ewe Samon, ua sinei ewe wachimuken osukosuk ewe epwe feitto won ekkewe chon nom fonufan, ua kori nei ewe chon angang Joseph Smith, Jun., me porous ngeni seni Nang, me ngeni I ekkewe annuk.” Ua nounou kewe kapas mi mecheres, sipwe ura pwe ewe Samon, ewe a sinei “ewe nesoponon seni ewe nepoputan,” a sinei ekkewe osukosuken ach kei fansoun. Ina minne, I a awora ew aan ach sipwe ungeni kewe okkuf me sosot, chommong me neir minne ra torikich ussun pwe pungun ewe angangen nikotuputup an ewe chon u ngeni me an kewe maun.
Ewe aan mi mecheres. Seni noun kewe chon angang, Kot a kapas ngeni kich, noun kewe me ngenikich kewe annuk. Sia tongeni apasa sefani ekkana uokisin me apasa sefani ne apasa, “Ngang ewe Samon … ua kori nei chon angang [Preseten Russell M. Nelson], me porous ngeni seni nang, me ngeni kewe annuk.” Esap ina ew amwararen ennet?
Ua ennetin pwarata pwe we Samon a ennetin kapas ngeni Joseph Smith seni nang, a poputa ren ewe Aewin Nemasepwi. I a pwan kapas ngeni Preseten Nelson non ach ei fansoun. Ua pwarata pwe Kot mi porous ngeni kewe soufos me nom me a ngenir kewe annuk mi foruta pwe repwe emweni noun kewe arams ngeni pwapwa non ei manau me ningeno non en mwirin.
Kot a sopweno ne ngeni soufos mi manau ikenai kewe annuk. Mi chommong awewe—ew ukukochun kaeo non imw, mi aninis me ren ewe Mwichefen; ewe ekkesiwinin chon asukunen famini me chon amwa ngeni iwamir; ekkesiwinin mwokutukutun tempel me angangepin; me ewe minafon prokram ren Semirit me Serafo. Ua mwar ren ewe murinon me umoumochun ewe Sam won Nang mi uren tong me Noun we, Jises Kraist, ewe a eniwinato an ewe Chon Amanau Mwichefen ngeni fonufan me a kori emon soufos non ach ei fansoun. Ewe Niwinsefaniton ewe kapas allimen Jises Kraist pounei fengeni uren osukosuken fansoun ngeni unusochun ekkewe fansoun.
Fofforungaw Ese Tongeni Epwe Pwapwa
Anneasosich ngeni kewe annuk nouch kewe soufos ra fen angei ina ew kii esap chok ren ach amonungaw seni fofforun me nikotuputup an ewe chon nikoupotup nge ach sipwe pwan sinei ewe pwapwa me ekinamwe feinfeino. Ei kokkot mi mecheres: wenechar, ika anneasochis ngeni annuk, ra wato feioch, me feioch ra wato pwapwa, non manauach.
Nge, non ewe chok pwan an ewe chon u ngeni a sotuni ne otupu Moses, a kukuta an epwe otupukemi. Fansoun meinisin a kan tipitipin fori pwe i och mettoch nge esap. Fansoun meinisin a chok opa ennetin i ion. I a forano pwe pungun pwe anneasosich epwe fori met manauom epwe osukosuk ren me epwe sonani om pwapwa.
Ka tongeni ekieki ekkoch me nein an kewe mwaken me nikotuputup? Awewe chok, a asokoano pwe ese wor ngawan safei mi ngau me un sakau nge a apasa pwe epwe ngonuk pwapwa. A annamu kich non sokopaten mettoch mi ngaw mi nom non social media, mi pachenong ach anono kich ngeni ekkoch. Pwan, a pwonano ekkoch mettoch mi ngaw, mettoch mi pwa me won kampiuter, usun sassing mi ngaw, namanam tekia won ekkoch, me awora mettoch mi muan an epwe awora tipemwaramwar me nuokus non netipach me ach ekiek. A michiketa ne mongunungunu, “Kopwe chok tapweto mwiri, me kopwe fokkun pwapwa.”
Ekkewe kapas ra maketiw chommong fansoun iera no seni emon soufosun ewe Puken Mormon a fokkun auchea ngeni ach kei ran: “Fofforungaw esap tongeni pwapwa.” Amo sipwe esinna an Setan kewe nikotuputup ika ifa ussur. Amo sipwe tipepos me esisinna chofona me angangen ewe emon a mochen ataeno ngunuch me sonani senikich ach ei pwapwa me ning non fansoun mwach.
Achengicheng pwi me fefinei, sipwe sopweno nukuchar me masaochu, pun iei chok ewe ew an ngeni ach sipwe esina ennet me ach sipwe rong mongungun ewe Samon seni noun kewe chon angang. “Pun ewe Ngun a kapas ennet me ese chofona. … Ekkei mettoch ra pwano ngenikich non fatafatoch, pokiten amanauan ngunuch. … Pun Kot a pwan kapas usur ngeni ekkewe soufosun nom.” Kich ekkewe Sounengin Kot mi Napanap, ewe apinukunukun Israel! Met sipwene apwangawangeno? “Sipwe okukunono ika omonungaw seni ewe fifiu? Apw! … Ngeni an Kot annuk, ngun, netip, kumwuch, nukunuk me enet sipwe uta non.”
Ua apasata ai kapasen pwarata ren ewe Emon Mi Pin seni Israel—pwan mo itan Jises Kraist. Ua pwarata usun An tong ese much, ennet, me pwapwa ra tufich seni an ewe asor ese nemuchun me feinfeino. Nupwen sipwe anneasosichi an kewe annuk, sipwe fetan non ewe an mi enet me sisap tupuno feinfeino. Non iten ach ewe Chon Amanau Jises Kraist mi pin, amen.