Kopwe Nukunuk, Nge Kosapw Nukunukumang
Sipwe oumwano fansoun iteiten ran ach sipwe umuno seni ewe fonufan me pachengeni nang.
Esamwo tam fansoun a no uwa neno ren ai upwe kaeo ewe pukfel. Uwa angei neiwe fon me uwa mwotetiw won ew sea nukun ai we pet ren ai mwochen upwe suki ewe Gospel Library app. Uwa suki neiwe fon me upwene keran pwopwuta ne kaeo nupwen uwa kuna esopw unus minen text me email rafen feito non ewe pwinin. Uwa ekieki, “Upwe cheki ekkewe pworous, iwe mwurin upwap no ngeni ekkewe pukfel.” Iwe, ruu awa mwurin ngang mei chiwen aneani ekkewe pworousen text, emails, pworous won news, me makken won social media. Nupwen uwa esina ika a kunok fite, uwa mwutir ne amonata ngeni ewe raan. Non ena raan use chiwen kaeo ewe pukfel, me use angei ewe aninisin ngun uwa aneanei.
Aninisin Ngun
Ngang mei nuku pwe chommong ami mei pwan iei usun. Pekin kampiuter me fon ikenai mei efeichukich non sokopaten wewe. Ra tongeni ochufengenikich ngeni chiechiach me famini, ren pworous, me news fan iten mettoch a fis non unusen fonufan. Inamwo, rapwan tongeni osukosuka kich seni ewe auchean chufengen: ach chu ngeni nang.
Ua anniwini met nouch soufos, Preseten Russell M. Nelson, a fen apasa: “Sia nom non ew fonufan mi fitikoko me mi napeno aosukosukan. Ekkewe chommongun social media me ruwe me ruanu awa news a pakutangeikich ngeni ekkei pworous ese wor keukun. Ika epwe wor ach apinukunuk ach sipwe kaimwu non ewe watten mwichen ngingi me ewe angangen kutta pwung an aramas ewe a atai mi pwung, mei euchea sipwe kaeo ach sipwe angei ewe pwarata.”
Preseten Nelson sopweno ne fonou kich pwe,“non ekkewe ran epwe feito, esap tufich sipwe manau ren ngunuch ika esap wor emwen, nemenem, echip, nonnomochun ewe Ngun mi Fel fansoun meinisin.”1
Ekkewe ier a no, Preseten Boyd K. Packer a kapas usun ew watten mwichen chia ewe, pwokiten watten pungun snow, ra nomw nukun ewe imwen maan me repwe kuna ar echik. Ekkoch aramas mei wewe och, non ar angangen tumunu ekkewe chia, ra ninatiw fite fetin nukun ewe neni—esapw ina met ekkewe chia rekan mwongo, nge ra anean pwe epwe anisi ekkewe chia non ewe fansoun patapat. Osupwangan, chommong ekkewe chia ra mano mwurin. Rafen enei ewe fetin, nge ese ochureno, iwe ra echik tori mano fiti nuker mei meet.2
Chommong ekkei pworous ra pakutangeikich non ewe fansoun ra nenengeni ngun ar amwongoni fetin ngeni chia—sia tongeni mwongo non unusen raan, nge esapw echukicheno.
Ian sipwe kuna meia ochunon ngunuch? Napengeni, esap nonomw non social media. Sia kuna nupwen sia “nikitu ne feinno [mwach]” non ewe anen pwon, “kamwochuno nesopun ewe wokun mecha,” me angei ewe foun iran manau.3 Iei wewen pwe sipwe oumwano fansoun iteiten ran ach sipwe utikich seni ewe fonufan me fotukich ngeni nang.
Non an tan, Liai a kuna ekkewe aramas ra angei ewe foun ira nge ra peutano pwokiten fan asengesin ewe watten iimw, ewe eningen ewe fonufan.4 Mei fich ngeni kukun aramas repwe marita non ekkewe imwen aramas mi pin non fansoun sopwonon, fiti meinisin ekkewe mwich me sukun an Mwichefel, fen pwan fiti angangen non ewe tempel, me “rikino ngeni ekkewe aan mi annuk iwe ra monucheno.”5 Pwata a fis ei? Non chomong sokopaten nikinik pwokiten, nupwen ra fen fetan non mwokutukutun nuku mi pin, rese unusen ekkesiwin. Ra mwongo nge rese tumwun.
Ren sokofesenin, uwa fen churi chomong neimi ekewe kukun Aramas mi Pin non Fansoun Soponon ekkewe ra tipachem, pochokun, me nukunuk. Ami mei sinei pwe ami noun Kot aat me nengin me a wor an angang oupwe fori. Ka tongei Kot ren unusen netipwom, tongeni, ekiekum me pochokunomw.6 Ka aponueta om pwon mi pin me angang ngeni ekkoch akkomwan non imwom. Ka anganga om nuku, aier, me achocho iteiten ran, me a esenipato pwapwa ese much. Ka ammonata ren ekkewe feiochun tempel me pwan ekkoch tufich epwap feito pwe en emon chon tapweno mwirin ewe Chon Amanau. Me ka aninis ne amonata ewe fonufan fan iten ewe Oruwen Niwinsefan, tungorei aramas meinisin ar repwe feito ren Kraist me repwe kuna feiochun an angangen Achesefan. Ka riri ngeni nang.
Ewer, ka kuna osukosuk. Nge pwan usun meinisin kinikinin aramas. Ikkei ranich kewe, me sipwe nukuchar, sapw nukunukumang. Uwa pwarata pwe ewe Samon a sinei ach kewe osukosuk, me fan emwenien Preseten Nelson, A amonakich ach sipwe churir. Uwa nuku pwe an ewe Soufos a koko ren ew fan non imw, aninis seni met sia fori no ach kewe imwen fel,7 a for pwe epwe anisikich ach sipwe manaw—fen achocho—non ekei ranin ese ngunupin.
Imw Nongonong
Met wewen iimw-nongonongun mwichefel? Imw repwe tongeni sokofesen nikinikir non unusen fonufan. Eni kopwe tongeni nomw non ew famini a fen choni ewe Mwichefel non fitu kinikinin fansoun. Ika fen emon chok ka choni ewe Mwichefel me non omw famini. En mei pwan pwupwunu ika kose, mei wor ika ese wor noumw semirit non imwomw.
Inamwo met ka nomw non, ka tongeni fori iimwomw epwe nenien kaeon ewe kapas allim me nenien nonomw. Wewen pwe kopwe fori wisomw ren omw kopwe ekkesiwin me mamaritan ngunumw. Wewen sipwe tapwei an Preseten Nelson osukun “sipwe fori safani iimwach ngeni nenien nuku.”8
Ewe chon kopwut epwe achocho ne fori ach sipwe nuku pwe ngununpinin echuno ese wor namwotan, esapw pwano, mei tongeni awit. Ii ewe meinapen osukosuka me chon fori ach sisapw atapwanapwan. Epwe wato mettoch epwe nikinikin nge mei atapwanapwan nge ennet rese auchea. Epwe pwan fori omw kopwe “osukosuk ren chomong mettoch” iwe ka angawa ewe “och mettoch [mei]unusen euchea.”9
Uwa men unusen kinisow ren “inei me semei” mi murinno,10 ekkewe ra tumunu ar famini non imwer mei ochueno ngun mi pin fansoun meinisin, tong fengen, me urumwot fengen. Ar kait ngeniei a uweato non ai sarafo ra anisiei ai upwe nonomwech. In me Sam, ouse mwochen epochokuna nefinemi me neumi kewe. Ra mwochen watten omw fansoun, esapw kukunun.
Aninis seni Mwichefen
Nupwen ka fori, ewe Mwichefen a nomw an epwe anisuk. Ach sinei non fan epwe tongeni epochokuna ewe ochunon ngun mi pin an epwe fis non imwach. Non ei ier, sia fen kuna ei sokkun aninis seni Mwichefen non Sukunen Raninfel me Kinter. Sipwe kuna watenon me non ewe Pristut seni Aaron me pwan mwichen Fopun. Non ei January, ekkewe nesenin ekkei mwich epwe ekis siwin. Epwe chiwen anongonong won itenapen ewe kapas allim, nge ekkewe itenap repwe wenefengen me Feito, tapwoto mwuri—Ren Emon me Emon me ekewe Famini. Iei ekis ekesiwin, nge a watte met epwe fori renoechunon ngun mi pin ren serafo.
Met ekkoch sokkun aninis ewe Mwichefen a pwan awora? Non fan sia angei ewe sakramen, minne a anisikich ach sipwe asofosefani ach pwon ngeni ese Chon Amanau iteiten wik. Me non fan sipwe chufengen me ekkoch chon nuku ekkewe ra fori pwan ena pwon mi pin. Ewe tongen chiechi sia awateno ngeni chiechiach noun Jises Kraist chon kuno epwe tongeni pochokun ne aninisi ach ewe pekin chiechi fengen non imw.
Nupwen uwa 14 ieri, aiwe famini a mokut ngeni ew minafon neni. Iei, meni ei esapw nikinikin ew mettoch mei ngaw a fis ngonuk, nge non ai ekiek, non ena fansoun, a men aweires. Wewen pwe uwa nomw nein aramas use sisinei. Wewen pwe ekkewe ekkoch kukun aat non aiwe wart repwe fiti sukun mei sokono seniei. Me non aiwe 14 ierin ekiek, uwa ekieki, “Ifa usun inei me semei kewe ra tongeni fori ei ngeniei?” Uwa mefi pwe manawei a fen tatakis.
Inamwo, ren non am kewe mwicheichen kukun aat, uwa tongeni ne forata ai chiechi ngeni ekkoch chon aiwe mwichen pristut, me rapwan winiti chiechiei. Pwan kapachonong, chon ewe pisoprik me chon aninis ren ewe Pristut seni Aaron ra pwopwuta ra pwopwuta ne chiechi ngeniei. Ra fiti aiwe mwichen urumwot. Ra mak ngeniei taropwen apochokun ekkewe ngang mei onomwu tori ikanai. Ra sopweno me mak ngeniei mwurin uwa no ngeni college me uwa no ngeni ai mission. Emon me neir mei fen nomw non ewe airport nupwen uwa niwin sefan ngeni imwei. Upwe kinisow fochofoch ngeni pwii kei me ar tong fiti watten ar mwochen ngeniei. Ra ekuna ngeniei nang, me manawei a saram, pwapwa, me meseik.
Ifa usun kich, in me sam me souemwen, sipwe anisi ekkewe sarafo ar repwe sinei pwe resapw iir chok non ar fetan non ewe anen pwon? Kapach ngeni ach ochueno nefinach, sia tungor ar repwe fiti watte me kukun chufengen—seni mwichen Apochokunen Serafo me camps tori mwichen tetten ika sukun chufengen. Kosapw urungaw ren ewe pochokun a feito seni ach angang fengen me ekkoch ekkewe rapwan achocho ngeni ar repwe pochokun. Pisop me ekkoch souemwen, ouse mwochen achocho ne echueno ekkewe semirit me sarafo non ami wart. Re mwochen watten ami fansoun, esapw kukunun.
Ikamwo en emon souemwen, emon chon orumw, emon chon mwichen pristut, ika fen pwan emon Aramas mi Pin, ika a wor ew fansoun omw kopwe atapa manawen emon kukun aramas, anisi atena ika nemina an epwe chungeni nang. Omw aninis epwe ina met ewe “aninisin Mwichefen” emon kukkun aramas a mwochen.
Pwii me fefinei, uwa pwarata pwe Jises Kraist ii a nomw won mokurenapen ei Mwichefen. A efeiochu nouch kewe souemwen me emwenikich ngeni ewe ngunun ochueno me sipwe tongeni manau me achocho non ewe ranin sopwonon. Ewe ngunun ochueno epwe anisikich ach sipwe nukuchar me sisapw nukunukumang. Non iten Jises Kraist, amen.