Nei kewe Achengicheng Fopun

Seni Bonnie H. Cordon

Presetenin Fopun Unus

Unusechun ach fofor ren ekkewe Fopun ach mwochen anisi kemi ami oupwe awateno ami nukunuk non ewe Samon Jises Kraist.

Pwi achengicheng, ua men fokkun pwapwa ai nonnom remi! Sia kuna ei wachemuken pwarata a pwano pwe me ruu ngunun awateno ika anapano me ekinamwei.

Ren ach sipwe poputa, ua mochen upwe aporousa ngeni kemi ekkoch chienei; ir kukun fopun ramen nipwakoch, mi wor ar oreni, me nonomun emon me emon me famini. Emon me emon neir, usun chok ami, oua wineni ngasangasei.

Aewin, ua churi Bella. Amen fokkun pochokun i chok akanaemon fopun me non an we pranch non Iceland.

Ua churi Josepine seni Africa, ewe a pwon sefan pwe epwe aneani ewe Puken Mormon iteitan ran. Ii a kuna ewe manaman me feioch a feito seni ei mecheresin, foforun nuku.

Iwe ua pwan churi Ashtyn, emon fopun murino a mano mwirin ierin fiu ngeni ewe semwenin cancer. An pechekunen kapasen pwarata usun ewe Achasefan an Jises Kraist mi chok nonom non ngasangasei.

En emon ekkei murinon fopun. Kamen unusen sokono, ren ew me ew omw tongeni me met mi fis ngeni mi fokkun unusen auchea me an esemuch.

En emon ekkewe ngun noun ekkewe Sam me In non Nang nengin, me ese wor met epwe tongeni eimu kono seni Ar we Tong me ewe tong an om we Chon Amanau. Nupwen ka arap ngeni Ii, ika fori ewe kukun anen om kopwe feino ren, kopwe mefi kinamwe fochofoch epwe tonong non manauom usun emon chon kuno mi nukuchar non ach we Chon Amanau, Jises Kraist.

Preseten Russell M. Nelson a tingor pwe upwe aea ekkoch mettoch epwe anisi me pesei kemi epwe “anapano [ami] pusin fefeita mi pin” me awateno ami fofor murino. Upwe kapas won ruanu kinikinin ekesiwinn mettoch nepwinei.

Itenapen Mwichen Ekkewe Fopun Unus

Aewin, non netipach meinisin ren met sia fori non mwichen Ekkewe Fopun sia mochen sipwe anisikemi ami oupwe nukuchar non ewe Samon Jises Kraist me sinei fichi usun auchean nonnomum pwe en noun Kot fopun.

Nepwinei, ua mochen upwe apasa ewe ekis ekesiwin ren porousen ewe mwichen Ekkewe Fopun. Ua iotek oupwe mefi ewe Ngun mi Fel epwe pwarata ewe ennetin ekkei kapas nupwen upwe apasa ewe minefon mwich:

Ngang noun semei me inei non nang achengichengin fopun, fiti napanapan nang me manau esemuch.

Usun emon noun Jises Kraist chon kuno, ua achocho upwe winiti usun Ii. Ua kuta me fori ren ai pusin pwarata me iamwir ngeni ekkoch non Itan mi pin.

Upwe uta ren emon chon pwarata Kot non fansoun meinisin me non mettoch meinisin me non neni meinisin.

Ua achocho ai upwe tufich ngeni ewe manau fefeita, ua pwapwaiti ewe nifangen paptais me kuta ai upwe fefeita iteiten ran. Ren nuku, upwe apochokuna imwei me ai famini, fori me aponueta ekkewe annuk, me angei ekkewe anuk mi pin me feioch seni ewe tempel mi pin.

Nengeni ewe ekesiwin seni “kich” ngeni “ngang.” Ekkei ennet kopwe pusin nounou non manauom. En emon noun Semom me Inom non Nang achengichengin fopun. En emon noun ach Chon Amanau, Jises Kraist chon kuno mi pin. Ua etiwok om kopwe kaeo me ekipwichi ekkei kapas. Ngang mi sinei pwe omw ka fori, kopwe angei om kapasen pwarata usun ekkei ennet. Weweiti ekkei ennet epwe ekesiwini anen om kuna sosot. Sinei manauom me aucheam epwe anisuk om kopwe sinei wisom ren ewe Chon Amanau.

Kinamwe me emwen epwe nonom reom ika pwe ke tapweno mwirin Jises Kraist.

An Ekkewe Fopun Klas

Ewe oruen kinikinin ekesiwin ngeni klasin Ekkewe Fopun. Elder Neal A. Maxwell a apasa, “Napengeni met aramas rakon aucheani repwe openo seni asepwanin ei manau non ewe neni mi pochokun faniter.” Ach kewe klass repwe neni mi pochokun seni ewe asepwan, neni mi wor tong me a wor fanitach. Non tongeniach ne fori eu watten chufengen non eu, apochokun, chiechioch, me anapano ena memef pwe kich chochon Ekkewe Fopun, sia fori ekkoch ekesiwin ngeni aurouren klas.

Nap seni 100 ier, ekkewe fopun rafen inetitiw non unungat klas. Mwitir ne poputa, sipwe etiwa souemwenin Ekkewe Fopun me ekkewe pisop repwe nikitu ne iotek faniten met akon auchea ngeni emon me emon kewe fopun me atetenir ren ierir anongonong won kokoten ewe wart. Ikkei ekkoch awewe ren ifa usun nikinikin.

• Ika pwe mi wor fitemon noum ekkewe fopun, epwe wor eu om klassin Ekkewe Fopun pwe repwe chufengen meinisin.

• Nge ika pwe mi chommong noum ekkewe fopun 12 ierir me pwan eu kukun mwichen ekkewe fopun ra watte. Iwe kopwe finata ika kopwe ani ruu klas: Ekkewe Fopun 12 me Ekkewe Fopun 13–18.

• Ika pwe a wor eu waten wart mi wor 60 ekkewe fopun non, kopwe awora onu klas, eu ngeni eu ekkewe ier, kopwe ateteni ren ierir.

Iwe nengeni om kewe klass ra tetenoch, noum kewe fopun ramen fokkun auchea non ar angang fengen. Kopwe asarama ekkewe chon unukum. Kopwe chon ani tong me tumun mine ka ekieki kopwe angei seni ekkoch. Fiti iotek non netipom, sopweno ne anisi ekkoch me manauen kirekiroch. Ren omw ka fori ekkei, manauom epwe ur ren kirekiroch. Epwe wor omw netip kinamwe ngeni ekkoch me kopwe poputa ne kuna ar manauen umoumoch ngonuk.

Iten an Ekkewe Fopun Klas.

Aunungatin, ren ei minefon tetenin klas, meinisin klas repwe iteit seni ewe it ren “Ekkewe Fopun.” Sipwe awesano ekkewe it ren Beehive, Mia Maid, me Laurel.

Apochokuna Klas Presetensi

Ewe saingonon kinikin ua anean ai upwe apasa ewe auchean klas presetensi. Ese nifinifin ifa usun tetenin klasin Ekkewe Fopun, eu me eu klas epwe wor eu presetensi! Epwe pwarata me esisinata pwe ekkewe fopun ra koko ngeni ar repwe emweni nour kewe serafo.

Ewe wis me popun eu presetensin klas mi fen apochokunata me afata. Ewe angangen manau esemuch ena eu nein ekkewe wis mi nap, akaewin non ewe kinikinin iamwir, angangen misineri, asounengano, me tempel me angangen uruon famini Ewer, iei usun ach sipwe ochu safani Israel—ew amwararen angang fan iten Ekkewe Fopun memperun an ewe Samol mwichen Sarafo.

Ren ami ouwa sinei, non eu me eu kinikinin Mwichefel, ewe Samon a kokori presetensi ar repwe emweni Noun aramas. Ekkewe Fopun, ami choni ewe klass presetensi ina epwe ina ami akaewin tufichin anisi non ei anen souemwen. Souemwenin ekkewe watte, ra fori ei kokon klass presetensi pwe eu mettoch akon auchea ngenir nap seni meinisin epek-ngeni-epek, aitir me emwenir pwe repwe sinei me repwe fori. Met sokkun kinikin ekkewe souemwen ra fori usun ren ewe klassin presetensi, a poputa me ian epwe anisir ar repwe anapano ar sine me tongeni pwe epwe efeiochur ren wiser we souemwen. Arapakan ngenir, nge kosapw siwinir. Ewe Ngun mi Fel epwe emwenuk ika ka emwenir.

Anapanapa usun wisen sam me in me ekkewe souemwen ra aiti kich, mut ngeni ei upwe aposa eu porous. Chloe a koko an epwe aninis ren presetenin klass. Noun we souemwenin pristut mi tipachem a apochokuna ngeni an epwe tingor ngeni Kot epwe ait ngeni ekkoch it ren an we presetensi. Chloe a iotek me a mwitir ne angei an aninis ren ion epwe fini pwe noun chon aninis. Nupwen a soposopono ne ekipwichi me iotek faniten emon chon mak, ewe Ngun mi fel a pwan eniwini me achema ngeni emon ekkewe fopun a fokkun mairu ren—emon a fiti fan ika urumot fan ekkoch.

A ekkis tipemwaramwar ren ewe memef, Chloe a kapas ngeni inan we, ewe a awewei pwe ina eu anen ach sipwe angei ach pwarata seni met sia kan ekekieki. Fiti ekesiwinin an nukunuk, Chloe a mefi pwe epwe fini ei fopun. Ewe pisop a fori ewe koko, me ewe fopun a etiwa ewe koko. Mwirin an a efeioch, ewe murinon chon mak a apasa,“En mi sinei, use mwo ekieki nge mi wor neniei ika fen namot me ian. Use mefi pwe fitinong ikei. Nge pokiten ei wis, ua mefi pwe Samach won Nang mi aucheaniei me awora eu neni fanitei.” Nupwen Chloe me inan we ra no seni ewe mwich, Chloe a kunungeni inan we me a apasa fiti surun mesan, “Pwarata mi wesen ennet! Pwarata mi wesen tufich!”

Presetensien klas, kafen koko seni Kot me nuku pwe kopwe emweni eu mwichen Noun kewe fopun. “Ewe Samon mi sinek. … A finuketa.” Kafen efeioch seni emon mi wor ren mwumwutan pristut; wewen ei ka fori ewe angang ren wisom we, ka anganga ewe mwumwutan pristut. Mi wor om angang mi napanap kopwe föri. Kopwe rongesich me angang won amefien ewe Ngun mi Fel. Ika pwe ka fori ekkei, ka tongeni angang non epinukunuk, pwe kose angang akanaemon!

Presetensien klas, sia aucheani om tipachem, nouwom, me pochokun non ewe minefon wart mwichen serafo ewe Elter Quentin L. Cook a aporousa ikeani. Kamen unusen auchea me non ei kokot ren om kopwe anisi pwim kewe me mongeom.

Ekkei ekesiwin non tetenin klas me souemwen epwe mwitir ne poputa inet chok ekkewe wart me pranch ra moneta nge epwe wesen poputa non January 1, 2020.

Pwi achengicheng, ua pwarata pwe ekkei ekesiwin ua kapas usun ikenai ra feito seni ewe Samon. Ren ach nikitu ne fori ekkei ekesiwin, ose mochen sisapw fangeta won auchean: sipwe fen apochokuna ne tapweno mwirin Jises Kraist me anisi ekkoch repwe feito ren Ii. Ua pwarata pwe iei An mwichefel. Ua men unusen kinisou chapur ren An mut ngeni kich pwe kich auchean kinikin me non An we angang mi pin.

Ua iotek pwe ewe chok pwan Ngun mi Fel ewe a emweni ekkei ekesiwin epwe pwan emwenuk nupwen ka feino mwom won ewe nanen ekkewe annuk. Ua pwarata non itan Jises Kraist, amen.

Esinesin

1. Nengeni Rome 8:35–39.

2. Russell M. Nelson, “Chon Pwarata, Mwichen Chon ewe Pristut seni Aaron, me Mwichen Fopun,” Liahona, Nov. 2019, 39.

3. Nengeni Proverbs 3:5–7; Jacob 7:5.

4. Nengeni Rome 8:16–17; Doctrine and Covenants 76:24; “Ewe Famini: Esinesin ngeni Unusen Fonufan,” Liahona, May 2017, 145.

5. Nengeni 2 Peter 1:3–4; Alma 37:44; Doctrine and Covenants 78:18; “Ewe Famini: Esinesin ngeni unusen Fonufan.”

6. Nengeni John 13:14–15, 35.

7. Nengeni Matthew 22:37–39; 25:40; 3 Nifai 12:48.

8. Nengeni John 16:13; 3 Nifai 14:7–8; Moronai 7:13; 10:5; Doctrine and Covenants 8:2; 9:8; 11:13.

9. Nengeni Matthew 20:26–28; 22:37–39; 25:34–40; 3 Nifai 26:19.

10. Nengeni Isaiah 43:10; Mosaia 18:9; Doctrine and Covenants 14:8.

11. Nengeni Rome 8:17; 2 Nifai 9:18; 31:20; Doctrine and Covenants 84:38; 132:49; Moses 1:39.

12. Nengeni Ilaman 12:23; Moronai10:33; Doctrine and Covenants 58:42.

13. Nengeni Alma 34:33; Doctrine and Covenants 82:18.

14. Nengeni Hebrews 11; 2 Nifai 31:19–20; Alma 32:21.

15. Nengeni Joshua 24:15; Doctrine and Covenants 109:8; 132:19.

16. Nengeni Exodus 19:5; 1 Nifai 14:14; 2 Nifai 11:5; Doctrine and Covenants 54:6; 66:2; 90:24.

17. Nengeni Mosaia 13:30; Alma 30:3; Doctrine and Covenants 84:20–22; Nongonongen Achifouwa 1:3.

18. Nengeni Psalm 24:3; Isaiah 2:3; Ezekiel 37:26.

19. Neal A. Maxwell, All These Things Shall Give Thee Experience (1979), 55.

20. Meinisin klass repwe iteit seni ewe it ren “Ekkewe Fopun.” Ren kefinitan eu me eu klas, pachenong ekkewe ier—ren awewe, “Ekkewe Fopun 12-14”; “Ekkewe Fopun 15-18” (nengeni Handbook 2: Administering the Church, 10.1.5, ChurchofJesusChrist.org).

21. Eu klas presetensi epwe wor ngeni eu me eu klassing Ekkewe Fopun. Ian a tufich, unusen ewe presetensi epwe wor, ren emon preseten, ruemon chon aninis, me emon chon mak. Ika mi pwan och, eu kukun presetensi epwe pwan kawor (nengeni Handbook 2, 10.3.5).

22. Nengeni Handbook 2, 10.3.5.

23. Nengeni Russell M. Nelson “Hope of Israel” (worldwide youth devotional, June 3, 2018), HopeofIsrael.ChurchofJesusChrist.org.

24. Pwan ekkoch awewe ra nomw ran iten Ekkewe souemwenin Fopun non Handbook 2, chapter 10.

25. Henry B. Eyring, “Rise to Your Call,” Liahona, Nov. 2002, 76.

26. Ika pwe achok eu om klas me eu klasin presetensi, ewe unusen presetensi epwe fiti ewe mwichen serafo non ewe wart ren ewe mwichen Pristut seni Aaron preseten pwe chocho ekkei fopun me ekkewe anuon (nengeni Handbook 2, 18.2.9).