Pin me ewe Kokkoten Apwapwa
Unusochun pwapwa a feito seni ach unusen pin.
Pwi me fefinei achengicheng, ua fen iotek fan iten ewe manaman ai upwe anisi kemi non ami pwisin kutta pwapwa. Menin a naf an ekkoch mefi pwapwa, nge ennetin ese wor emon epwe poponi kaworen pwan och pwapwa. Emon epwe mwasangasang ne etiwa ew pwonen kaworen pwapwa esemuch.
Ina met Samach won Nang; Noun Achengicheng, Jises Kraist; me ewe Ngun mi Fel repwe fang ngeni noun Samach won Nang meinisin ngun mi manau iei, repwe manau, ika ra fen manau non ei fonufan. Ena fang fan ekkoch a iteni ewe kokkoten pwapwa. A iteni me ren ewe soufos Alma nupwen a aiti noun we aat, mi mwoch non riafoun tipis. Alma mi sinei pwe fofforungaw esap tongeni pwapwa ngeni noun at—ika ngeni emon noun Samach won Nang.
A aiti noun we at pwe ach napeno non pin ina ewe chok aan ngeni pwapwa. A affataochu pwe watten pin a tufich seni ewe Achasefanin Jises Kraist a nimeti me aunusochukicheno. Ren ach nuku chok non Jises Kraist, sopweno aier, me aneasochisi ach kewe pwon mi pin sia tongeni angei ewe pwapwa esemuch sia ennetin mochen mefi me annomu.
Ai iotek ikenai pwe amwo upwe anisikemi ne weweiti ewe watten pwapwa a feito seni watten pwisin ach pin pwe oupwe foffor won ena nuku. Mwirin upwe apasa met ngang mi pwisin sinei usun met kich mi tongeni fori ach sipwe tufich ngeni ena niffangen sipwe kon pinino.
Ekkewe pukefel ra aitikich pwe nein ekkoch mettoch, kich mi tongeni nimenimochuno me pinino nupwen sia aea nuku non Kraist, pwari ach aneasochis, aier, fangeno fan itan, angei angangepin, me apwonueta ach pwon mi pin ngeni I. An epwe tufich ngenikich ewe niffangen pinino mi auchea epwe wor tipetekison, mosonoson me engino.
Ewe mochenin ai upwe kon pinino a fis ngeniei me non ewe Salt Lake Tempel. Ua tonong non ewe tempel ren ewe aewin fansoun use kon sinei met upwe esuku. Ua fen kuna ekkewe kapas won ewe tempel: “Pin ngeni ewe Samon” me “Ewe Imwen ewe Samon.” Ua mefi watten memefin apinukunuk. Nge ua ekieki ika ua moneta ne tonong.
Inei me semei ra fetan akkom mwei nupwen aua tonong non ewe tempel. Ra eis aupwe pwari noum taropwen mumutan non tempel, apungano am nimenimoch.
Semei me inei ir mi sisinei ewe mwan ren ewe neenien toropwen mumutan non tempel. Iwe ra ekis nonnom ne kapas ngeni i. Ua feinno mwer non ew watten neni ikewe mettoch meinisin mi saramen pwech. Ua neta ren ewe tencho mi tekia seniei mi usun ew kuchu mi sukuno. Non ena fansoun, ew fatochun ekiek a toriei pwe ua fen pin nom ikewe akkom.
Iwe murin, uwa rongorong ew noukukunun ngingi—esap ngingii. A pwetete ne apasa ekkei kapas: “Ka fen pin nom ikei akkom. Ka chechemeni ew fansoun me mwen ka uputiw. Ka nom non ew neni mi pin usun ei. Ka fen mefi ewe Chon Amanau epwene feito ngeni ewe neni ikewe ka uta ie. Me ka mefi pwapwa pokiten ka chengen om kopwe kuna I.”
Met ewe a fis me non ewe Salt Lake Tempel a chok mochomoch fansoun. Nge ai chechemeni mi chiwen wato kinamwe, mwanek, me pwapwa mi monono.
Uwa kaeo chomong nesen non ewe ran. Ew iwe pwe ren ewe Ngun mi Fel a kapas non ew mongungu mi pwetete, me kukun. Ua tongeni rong I nupwen a wor kinamwein ngun non netipei. A wato ew memefin pwapwa me epinukunuk pwe ua winiti mi kon pin. Me ena a soun wato ewe pwapwa ua mefi non ekkena aewin fansoun non ew tempel an Kot.
Oua kuna non pwisin manauemi me manauen ekkoch ewe manamanen pwapwa a feito seni ach mamarino non ach pin, me usun chok ach we chon amanau. Non ekkewe chok wiik, uwa fen nomw unukun an nenien ekewe aramas remi semwen ekkewe remi tongeni weri mano ren unusochun ar nuku non ewe Chon Amanau me mesemesen pwapwa.
Emon mwan me neir an famini mi pwenieno. I me punuwan we ra porous neukukkun nupwen ngang me nei at aua tonong. Ua fen sisiner non chommong ier. Ua kuna ewe Achasefanin Jises Kraist a fis me non manauer me non manauen chochon ar famini.
Ra finata fengen ne awesano safei an epwe atamano manauan. Mi wor ew memef pwetete nupwen a kapas ngenikem. A emenimen nupwen a apasa an kinisou ren ewe kapas allim me an enimenimochu i me ew famini mi tongei. A kapas usun an kewe ierin angang mi apwapwa non ewe tempel. Ren an ei mwan tingor, nei we at a epiti mokuran ren ewe oinen efioch. Ua apungano ewe kepit. Nupwen ua fori, a fatoch ai ekiek ai upwe ereni pwe ii epwene mwitir kuna an Chon Amanau, repwene nenefengen.
Ua pwon ngeni pwe epwe mefi pwapwa, tong, me an ewe Chon Amanau tipew. A kirekiroch an emenimen nupwen aua no seni. An kewe saingonon kapas ngeniei pwe “Ureni Kathy ngang mi tongei.” Punuwei we, Kathleen, non chommong ier a pesei tappin an famini ne etiwa an ewe Chon Amanau tingor ne feito ren, fori me apwonueta pwon mi pin, me a fich ngeni ewe pwapwa a feito seni ewe mi pin.
A mano ekkoch awa mwirin. Non ekkewe wiiken an mano, punuwan we a wato ew niffang ngeniei me punuwei we. A emenimen nupwen aua porous. A apasa non pwapwa,“Ua esuku pwe upwe mefi netipengaw me anamon. Ua mefi pwapwa. Ami ekiek pwe mi och?”
Am sinei ukukun an tongei punuwan we me ukukun ar me ruemon sinei, tongei, me angang ngeni ewe Samon, ua ureni pwe an mefi pwapwa ina niffangen pwon pokiten ren, an angang nikitu, a winiti mi kon pin. An pin a atufichi ngeni ena pwapwa.
Ekkoch mi ausening ikeanai repwe aureki: “Pwata use mefi ewe kinamwe me pwapwa mi pwon ngeni ekkewe ir mi nikitu? Ua fen nikitu non unusen weires, nge use mefi pwapwa.”
Pwan mwo ewe Soufos Joseph Smith mi weri sossot. A iotek fan iten ngaseno nupwen a mwoch non neenien kanapus non Liberty, Missouri. A fen nikitu ngeni ewe Samon. A fen watteno non pin. Nge an mefi pwapwa ese pwonuta.
Ewe Samon a aiti i ewe nesenin engino mi auchea ngeni kich meinisin non ekkoch fansoun, me menin non fansoun nangatam, non ach sossot won fonufan. Iei an ewe Samon porous ngeni noun we soufos mi nikitu me riaffou:
A apasa pwe ika Joseph epwe turunong me non ewe pwang, are me non poun chon nini, me ika pwe epwene mano; ika pwe a turunong non ewe annonnon; ika chommong mi u ngeni i; ika asepwan watte a tori; ika nang a winiti kiroch, me mettoch meinisin a u ngeni i; me pwan, ika enn a suki awan ngeni i, epwe sinei, nei at, pwe ekkei mettoch meinisin epwe kaeo seni, me ra fis fan iten ochun pwisin i.
Ewe Noun Aramas a fen mefi metekin mettoch meinisin. Ka nap seni I?
Iwe, Joseph epwe nikitu, me ewe pristut epwe nonnom ren; pokiten annukun a fen foruno, rese tongeni morono. Ranin kewe mi affateno, me ierin resap kis; iwe kosap nuokusiti met mwan mi tongeni fori, pokiten Kot epwe nonnom ren feinfeino.
Iei chok ewe aurour ewe Samon a ngeni Job, ewe a mefi weiresin sossot ren an epwe mut ngeni ewe Achasefan epwe fori an epwe kon pin. Kich mi sinei pwe Job mi pin, seni ewe kapasen awewe usun i: “A wor emon mwan itan Job a nonnom won ewe fonu Uz, a pin ngeni God o a nikitu ne annesosich ngeni.”
Mwirin a pout seni an pisekisek, an famini, me pwan an pochokun. Eni oupwe chechemeni pwe Job a tipemwaramwarei pwe an pin mi watte, minne a angei seni watten an riaffou, a atufichi i ngeni pwapwa mi nap. Me ren Job pwe pin a wato riaffou.
Nge ewe Samon a ngeni Job ewe chok nesenin apungu a ngeni Joseph Smith. A mut ngeni Job epwe weweiti nonnomun mi ariaffou ren mesan non pekin ngun. A apasa:
“Kopwe uta iei ussun emon mwan, iwe kopwe ponuweni ai kei kapas eis ngonuk.
“Met, en mi nom nupwen ua fori ewe fonufan? Ika pwe sinei, kopwe ereniei ussun.
“Ion a finata epwe ifa ussun watten? Ion a apou ukukun taman?
“Met ka amwochata ekkewe urouren fonufan? Ion a watiw ewe foun nepokukun fonufan?
“Nesossoren ewe ran, ekkewe fuu ra chufengen ne kon o ekkewe chon nang ra puppuchor non ar pwapwa?”
Iwe, mwirin an Job aier seni an kor ngeni Kot pwe ese kirekiroch, Job a mumuta ne weweiti an sossot non ew napanap mi tekia me pin. A fen aier.
“Iwe Job a ponuweni ewe Samol, me apasa,
“Ua sinei pwe ka unusen pochokun o ka tongeni fori mettoch meinisin ka mochen.
“Ion ewe a opano aurour nge ese wor mirit? Ua porous ussun ekkewe mettoch use weweiti me ekkewe mettoch mi amwarar use tongeni upwe sinei.
“Ka ereni ei pwe upwe ausening nupwen ka kapas: o upwe sotuni ne ponuweni om kewe kapas eis.
“Me noom ua chok sinei ekkewe mettoch aramas ra ereni ei, nge iei ua fen pwisin kunok ren mesei.
“Iwe ua saw ren ekkewe mettoch ua apasa o non ai noninen me aiersefan ua fanagei mokurei.”
Mwirin an Job aier me winiti mi kon pin, ewe Samon a efeiochu i nap seni mettoch meinisin a pout seni. Nge menin ewe watten feioch ren Job nge an epwe napeno non an pin seni an weires me aier. A fich ngeni an epwe angei pwapwa mi nap non ekkewe ran epwe manau.
Pin mi napanap epwe fis ren chok ach tingor. Epwe fis ren ach fori met mi auchea an Kot epwe siwini kich.
Preseten Russell M. Nelson a awora met me rei pwe ew aurour mi murino ren usun ach sipwe soposopono won ewe aanen pwon ngeni pin mi nap. A itini ewe aan nupwen a pesei:
“Oupwe mefi pochokunen ewe manamanen aier iteitan—ren fofforochuno me pwisin aochuno iteitan ran.
“Nupwen sia finata ne aier, sia finata ne siwin! Sia mut ngeni ewe Chon Amanau ne ekkesiwinikich ngeni napanapoch. Sia finata ne mamarita non pekin ngun me weri pwapwa—ewe pwapwan ngaseno non I. Nupwen sia finata ne aier, sia finata ne winiti pwan usun chok Jises Kraist!”
Preseten Nelson a sopweno ne ngenikich ei pesepes non ach achocho ne winiti mi kon pin: “Ewe Samon ese esuku unusoch seni kich non ei fansoun. … Nge a anamwota pwe sipwe achocho ngeni unusoch ekkis me ekkis. Aier iteiten ran ina ewe aanen nimenimoch.”
Preseten Dallin H. Oaks, non an afanafan non mwichenap akkom, a pwan anisiei ne kunaochu ifa usun sipwe watteno non pin me ifa usun sipwe tongeni sinei pwe sia fein ngeni. A apasa: “Ifa usun sipwe apwonueta pekin ngun? Ifa usun sipwe angei ena kinikinin pin ikewe annomu chiechian ewe Ngun mi Fel fansoun meinisin? Ifa usun sipwe ekieki usun me apungu mettochun ei fonufan ren miriten kapas allim ese much?”
Ponuwan me ren Preseten Oak a apoputa ren watten nuku non Jises Kraist ach Chon Amanau mi tong. Ena a esenipato ach sipwe kutta omusomus iteiten ran me ne chechemeni I iteiten ran ren ach anneasochisi An kewe annuk. Ena watten nuku non Jises Kraist a fis nupwen sia kametip iteiten ran won An kapas.
Ewe kon mi fel “More Holiness Give Me” a ngenikich ew aanen ach sipwe iotek fan iten aninisin winiti mi kon pin. Ewe chon mak mi mirit ne makkei pwe ewe pin sia kutta ina ew niffang seni emon Kot mi tong, mi soun awora, mwirinon meinisin met sia tongeni fori. Oupwe chechemeni ewe amuchunon uwokisin:
Met chok pwisin nonnomuch, ian chok sipwe nom ia me won ewe aanen pwon ngeni imwach nang, amwo ach Iotek fani iten pin mi nap epwe ponu. Ngang mi sinei pwe nupwen ach tingor epwe ponu, ach pwapwa epwe napeno. Menin epwe mang ne feito, nge epwe feito. A wor ai apinukunuk seni emon Sam non Nang me Noun we, Jises Kraist.
Ua pwarata pwe Joseph Smith emon soufosun Kot, pwe Preseten Russell M. Nelson in nouch soufosun ikenai mi manau. Kot ewe Sam mi manau me tongei kich. A mochen kich sipwe no ngeni imwach ren I non famini. Ach Chon Amanau mi tong a etiwa kich sipwe tapweno mwirin won ach sai ikewe. Ra fen amonata ewe aan. Non iten Jises Kraist mi pin, amen.