Nuku non ewe Samon
Ewe chok mettoch sia tongeni anongonong won pwe sipwe nuku non ewe Samon me An tong fan iten noun kewe semirit.
Achengicheng pwii me fefinei, echo toropwe u angei me nom a poputani itenapen ai afanafan. Ewe chon mak a ekipwichi ew apupunun non tempel ngeni emon mwan punuwan fochofoch a fen mano. I a aruemonun punuwan. A eis ei kapaseis: epwe tufich an epwe pwisin wor imwan non ewe manau miwirin, ika epwe nom ren atewe me punuwan atewe we akkom? Ua chok ureni pwe epwe nuku ewe Samon.
Ua sopweno ren ew mettoch ua rong seni emon chienei ammen chiechioch, minne ua aporousa ren an mutngeniei. Mwirin manon punuwan we achengicheng me inen noun kewe semirit, emon sam a pupunu sefan. Ekkoch ekkewe semirit ra watte rese fokun tipeew ngeni ewe pupunu sefan me kutta aurour seni emon aramaser I emon Souemwenin Mwichefen mi sufon. Mwirin an rongorong popun ar rese tipeew, minne ra aureki usun nonnomur me nefiner me non ewe nenien ngun ika non ekkewe ningen muu mwirin ewe Amuchunon Kapung, ei souemwen a apasa: “Oua aureki ekkewe mettoch ese pung. Oupwe aureki ika pwe ouse tori ekkena neni. Anonga ami ekiek won ena. Ika oupwe tori ikewe, mettoch meinisin epwe kon amwarar nap seni met oua tongeni ekieki.”
Met ren aururun ei afanafan! Nuku non ewe Samon!
Seni toropwe ua fen angei, ngang mi sinei pwe ekkoch ra osukosuk ren kapaseis usun ewe nenien ngun sipwe nom non mwirin sia mano me mwen sipwe manausefan. Ekkoch ra ekieki pwe ewe nenien ngun epwe sopweno chommong me nein nonnomuch kewe non pekin inis me ekkewe osukosuk sia weri non ei manau. Met sia ennetin sinei usun nonnomun non ewe nenien ngun? Ua nuku a pung met emon sensen namanam non BYU a makkei non noun toropwe usun ei itenap: “Nupwen sia pwisin eisinikich met kich mi sinei usun ewe nenien ngun seni ekkewe puken nongonong, ponuwan pwe ‘esap met sia soun ekieki.’”
Ewer, kich mi sinei seni ekkewe pukefel pwe mwirin inisich repwe mano sia soposopono ne manau non ngun me non ewe nenien ngun. Ekkewe pukefel ra pwan aitikich pwe ei nenien ngun mi eimufeseni ekkewe ra fen “tupwon” ika “pung” non manau me ekkewe mi ngaw. Ra pwan awewei ifa usun ekkoch ngun mi nukuchar ra afanafana ewe kapas allim ngeni ekkewe mi ngaw are anneasonap (nengeni 1 Peter 3:19; Doctrine and Covenants 138:19–20, 29, 32, 37). Met mi kon auchea, pwaratan ikenai ra pwari pwe ewe angangen amanau mi soposopono me non ewe nenien ngun (nengeni Doctrine and Covenants 138:30–34, 58), me inamo sia pesepes ach sisap ammangano ach aier non ei manau (nengeni Alma 13:27), sia kaeo pwe ekkoch aier mi tufich ikewe (nengeni Doctrine and Covenants 138:58).
Ewe angangen amanau non ewe nenien ngun mi pachenong pekin angasa ngun seni met ekkewe pukefel ra soun anapanapa usun “fotek.” Meinisin mi nom non ewe nenien ngun ir mi nom fan ekkoch napanapen fotek. An Preseten Joseph F. Smith pwarata mi nap, a winiti uwokisin non kinikin 138 non the Doctrine and Covenants, a apasa pwe ekkewe mi mano mi tupwon, ekkewe mi nom non nikinikin “kinamwe” (Doctrine and Covenants 138:22) nupwen ra awitiwiti ewe Manausefan (nengeni Doctrine and Covenants 138:16), “ra nenengeni taman keimunon ngunur seni inisir pwe ew fotek” (Doctrine and Covenants 138:50).
Ekkewe mi ngaw ra pwan riaffouni ew fotek. Pokiten tipis rese musuno, ir ra nom non met ewe Aposel Peter a aita ngeni nenien “fotekin” ngun (1 Peter 3:19 nengeni pwan Doctrine and Covenants 138:42). Ekkei ngun ra wewe ngeni usun “fofo” ika usun “fotek” (Doctrine and Covenants 138:31, 42) ika usun “katuruu non ewe rochopwak nukun” ren “kechiw, me puchor, me akkarungi” nupwen ra awitiwiti manausefan me kapung (Alma 40:13–14).
Manausefan fan iten meinisin ekkewe mi nom non ewe nenien ngun mi foruno me ren ewe Manausefan an Jises Kraist (nengeni 1 Corinth 15:22), ina mwo ika a fis non fansoun mi sokkono ngeni ekkoch pwan mwich. Tori ena fansoun mi kefinino, met ekkewe pukefel ra urenikich usun mwokutukutun non ewe nenien ngun a chok anonga angangen amanau. Ekis chok mi pwano. Ewe kapas allim mi afanafan ngeni ekkewe rese sinei, rese aier, me annesonap pwe repwe ngaseno seni ar fotek me nikitu ngeni ekkewe feioch Samach won Nang mi tong a awora fan iter.
Ewe fotek ekkewe mi tupwon ekkewe ra siwin me non ewe Nenien ngun mi mefi pwe repwe witi—ar efeioch emon epwe fori fan iter, eni ir mi tongeni pesei ekkoch repwe fori fan iter won fonufan pwe repwe tongeni papatais me pwapwaiti ekkewe feiochun ewe Ngun mi Fel (nengeni Doctrine and Covenants 138:30–37, 57–58). Ekkei efeioch mi fis me ren emon non ei manau mi pwan apochokunair ar repwe soposoponofan mumutan pristut ar repwe awatteno ewe mwichen mi tupwon ekkewe ra tongeni afanafana ewe kapas allim ngeni ewe ngun non fotek.
Me nukun ekkei nongonong, noun kewe pukefel mi masoweni ekis usun ewe nenien ngun mi tapweno mwirin mano me mwen ewe Amuchunon Kapung. Iwe pwan met kich mi sinei usun ewe nenien ngun? Chommong chon ewe Mwichefen a fen wor ar nemasepwi ika ekkoch memef ar repwe urenir ifa usun mwokutukutun mettoch ika tettenin mettoch me non ewe neenien ngun, nge ar kei pwisin memefin ngun resap weweoch ika kait pwe annukun ewe Mwichefen. Me, ewer, mi chommong areere seni chon mwichefen me ekkoch mi makkeno usun ekkewe puken an ekkoch chippu mano.
Nupwen sipwe weri ekkei, ekkewe aurour mi murino an Elter D. Todd Christofferson me Neil L. Andersen non mwichenapen mwichefen akkom ra auchea ach sipwe chechemeni. Elter Christofferson a aitikich: “Sipwe chechemeni pwe esap meinisin porous a wor me ren emon souemwenin Mwichefen, akkom are iei, esap fis pwe annuk. Mi weweoch me non ewe Mwichefen pwe ew porous a fis me ren emon souemwen non ew fansoun a kan soun kawor, pwe ew pwisin ar ekiek, esap fisino ika kapungo fan iten unusen ewe Mwichefen.”
Non ewe mwichenap mwirin, Elter Anderson a aitikich ei nongonong: “Ewe annuk mi kait seni ir meinisin 15 chon ewe Aewin Presetensi me Mwichen Engon me Ruemon. Ese opono non ew monomonen kinikinin ew afanafan.” Ewe esinesin ngeni famini, mi sain me ren meinisin 15 ekkewe soufos, chon osini, me chon pwarata, ew anapanapen ena nongonong mi amwarar.
Mi nap seni och mettoch mi auchea usun ewe esinesinen famini, ekkewe afanafanen Presetenin ewe Mwichen, ra kapunguno me ren ekkoch soufos me aposel, ir pwan pisekin awewe usun ei. Iwe ren nonnomun non ewe neenien ngun, ewe Soufos Joseph Smith a awora ru afanafan arap ngeni nesopun an angang mi kan soun afanafan me ekkewe chon siwini. Ew me nein ekkei ina an afanafan non ewe afanafan King Follet pwe chochon famini mi tupwon repwe nom fengen non ewe neenien ngun. Pwan ew ina ei porous atun ew soma non amuchunon ierin manauan: “Ekkewe ngunun mi pung ra fefeita ngeni angang mi nap me ning … [non] ewe neenien ngun. … Ir rese towaw seni kich, me sinei me weweiti ach ekiek, memef, me foffor, me ra kan soun metek pokiter.”
Iwe, met ren ew kapaseis usun ua fen apasa akkom usun ian ngun ra nom ia? Ika ena kapaseis mi oro sokkono are ese kon auchea ngonuk, ekieki chommong me nein om pwisin kapaseis, are ekkewe en mi fen mochen ponuwenir ren popun och mettoch en mi rong seni pwan emon non ekkewe fansoun a no. Ren ekkewe kapaseis meinisin usun ewe nenien ngun, ua apasa ru punuwan. Aewin, chechemeni pwe Kot mi tongei Noun semirit me epwe ennetin fori met mi murino ngeni emon me emon kich. Aruwan, chechemeni ei afanafanen non Paipel mi itefouno, minne mi fen aninisoch ngeniei fansoun chommong ai kapaseis rese ponu:
“Kopwe nukunuk ewe Samol ren unusen netipom. Kosap epinukunuku met ka ekieki pwe ka sinei.
“Kopwe chechemeni ewe Samon non mettoch meinisin ka fori, iwe epwe pwar ngonuk ewe an mi pung” (Proverb 3:5–6).
Usun chok, Nifai a osupwano an kon ren ekkei kapas: “O Samon, ua fen apinukunuk non en, iwe upwe wanong ai apinukunuk non en tori feinfeino chok.” Usap tongeni pungutiw ai we apinukunuk non poun futuk”(2 Nifai 4:34).
Kich meinisin sia tongeni ekiek monomon usun nonnomun non ewe nenien ngun are fen aporousa ekkei ika ekkoch kapaseis rese ponu non famini ika ekkoch neni mi mwirino. Nge sisap afanafana are aea pwe ir annuk mi mumuta met ese fis ngeni nongonongen annuku mi mumuta. Om kopwe fori esap anisi ewe angangen ewe Samon me epwe fen etipemwaramwa aramas seni ar kutta pwisin ar kinamwe ika aurour seni pwisin pwarata an ewe Samon kokkot mi awora fan itach. Watten anongonong won ach pwisin afanafan ika ekiek epwe fen aruka kich seni ach anonga ach kaeo me achocho ewe epwe anisi ach wewe me anisi kich sipwe nikitu won ewe aanen pwon.
Nukunuk non ewe Samon ina ew afanafan mi itefouno me ennet non ewe Mwichefenin Jises Kraist ren Aramas mi Pin non Fansoun Soponon. Ina an Joseph Smith afanafan nupwen ekkewe akkomwen Souneng ra weri ninni me wachemuken eppet. Ina chok ewe nongonong mi echipwer sia tongeni aea nupwen ach achocho ne kaeo ika ach sossot ne kutta kinamwe a eppet non napanap eseamo pwano ika esamo ketiw pwe annukun ewe Mwichefen.
Ena chok nongonong mi fich ngeni kapaseis rese ponu usun ririfengen non ewe manau mwirin ika ekkesiwin sefan pokiten mettoch ika atai annuk non ei manau. Mi chommong met sise sinei ina minne sipwe chok anongonong ne nuku non ewe Samon me An tong fan iten Noun kewe.
Nesoponon, met kich mi sinei usun ewe nenien ngun pwe an ewe Sam me ewe Nau angangen Amanau mi soposopono ikewe. Ach chon Amanau a poputani ewe angangen esinesinen ngaseno ngeni ekkewe mi fotek (nengeni 1 Peter 3:18–19, 4:6; Doctrine and Covenants 138:6–11, 18–21, 28–37), me ena angang mi soposopono nupwen chon kuno mi nimenimoch me fich ngeni ar repwe sopweno ne afanafana ewe kapas allim, mi pachenong aier, ngeni ekkewe mi auchea ngenir repwe nimenimoch (nengeni Doctrine and Covenants 138:57). Ewe popunapen ekkei mi awewetiw me non annukun ewe Mwichefen, a kawor seni pwarata ikenai.
“Ewe mi mano mi aier epwe ngaseno, seni anneasochis ngeni angangepinin ewe imwen Kot,
“Iwe mwirin ar moni niwinin ar atai annuk, me ra nimenimoch, repwe angei ew niwinin anongonong won ar angang, pun repwe angei amanau” (Doctrine and Covenants 138:58–59).
Wisen emon me emon kich pwe sipwe afanafana ewe annukun ewe kapas allim mi niwinsefan, anneasochisi ekkewe annuk, tong me aninis fengen, me fori ewe angangen Amanau me non ekkewe tempel mi pin.
Ua pwarata usun ennetin met ua fen apasa ikei me usun ekkewe ennet ra kait me repwe kait me non ei mwichenap. Ei a tufich pokiten ewe Achasefanin Jises Kraist. Usun kich mi sinei seni pwarata ikenai, A “mwareiti ewe Sam, me tumunu angangen poun” (Doctrine and Covenants 76:43; auchean mi kapacheta). Non iten Jises Kraist, amen.