An ewe Chon Amanau Angangen Angasa
Nupwen sia feito ngeni Ii, Kot epwe angasa kich, ren an epwe echikara kich ika epwe apochokuna kich ach sipwe pochokun ngeni sokopaten sosot.
Ina epwe 2,000 ier a no, ewe Chon Amanau a feitiw seni ewe chuk mwirin an afanafana Ekkewe feioch me ekkoch nongongen ewe kapas allim. Nupwen an fetan, a churi emon mwan mi rupwupwotur. Ewe mwan a fokkun mwosonoson me menin nupwen a fotopwukutiw me mwen Kraist, a tingor aninis an epwe ngaseno seni an we riaffou. An we tingor mi chok mecheres: “Samon, ika pwe mi tufich, kose mochen kopwe enimochu ei.”
Ewe Chon Amanau a eitieu Poun me, atapa ii, a apasa, “Upwe; kopwe nimenimochuno.”
Sia kaeo ikei pwe ach we Chon Amanau a mochen epwe efeiochu kich iteitan. Ekkoch feioch mi chok mwitir fis, ekkoch epwe ekis mang, me ekkoch epwe fis mwirin ei manau, nge ekkei feioch epwe fis an eu me eu fansoun.
Usun chok ewe mi rupwupwotur, sia tongeni kuna manaman me kinamwe non ei manau seni ach atiwa An we angang me sinei pwe A mochen efeiochu kich. Sia tongeni kuna ewe pochokun ach sipwe ungeni sosotuch kewe, ne akkufu sossot, me ach sipwe weweiti me engino ngeni nonnomuch mi weires. Nge, napengeni non fansoun non Manauan, an ewe Chon Amanau manamanen nikitu achok anongonong won met A apasa ngeni Saman we, “Om angang epwe wesino.”
Ewe mi rupwupwotur ese chok tingor non anapanap ika atapwanapwan. An kapas a pwarano usun manauen tipetekison, ren napanap mi tekia nge pwan ren an ennetin mochen an ewe Chon Amanau epwe anisi. Iei ew awewen ewe feioch ren minne sipwe feito ngeni Kraist. Sia tongeni feito ngeni Kraist ren ewe ennet pwe An mochen iei pwe epwe emon chon aninis mi murino non manauach non ei manau me manau feinfeino. Ewe a wor ren manau ese much minne ese wor rech. Mi auchea sipwe feito ngeni Kraist ren ennetin mochen pwe netipach epwe nemenemeno non mochenin ewe Sam, usun chok Ii. Ei epwe amonna kicheta ngeni manau ese much.
Mi weires ach sipwe anapanapa usun ewe weiresin netip me aion mi fis ngeni ewe mi rupwupwotur ewe a feito ngeni ewe Chon Amanau. Rupwupwotur a aweiresi inis me fituk, a awora nipwakingaw me tamatamangaw. Naponon, a fis pwe och mettoch mi enieput. Emon a uri rupwupwotur a suseni ekkewe a tonger me towaw seni mwicheichen aramas. Rupwupwotur a wewe ngeni nimengaw, non pekin aion me pekin ngun. Ren ei wewe, ewe annukun Moses a annuku pwe ekkewe mi rupwupwotur repwe ufouf uf mi mes puchoruu “Nimemgaw!” nupwen ra fetan. Samwau me koput, ekkewe mi rupwupwotur ra nonnom non imw mi monnukano ika non pwokumwo. Ese weires ach sipwe ekieki usun ewe mi rupwupwotur ewe a feito ren ewe Chon Amanau pwe mi rupwurupwukis.
Fan ekkoch—non ew aan ika pwan ew—sia pwan mefi tatakis, ren ach pusin foffor ika ren ekkoch, ika ren ekkoch sokkun foffor sise tongeni pwak ngeni. Non ekkei sokkun napanap, sia tongeni wanong ach mochen Ne poun.
Ekkoch ier a no, Zulma— punuwei we, chienei mi murino, a murino seniei, a angei ekkoch porous mi aweiresi ruu wiik chok me mwen emon noum epwe pupunu. A wor efou pwo fan seningan, a fokkun mwitir ne pwono. Mesan a poputa ne pwo, me a chok weiweita an epwe reirei. Chommong ekiek a tonong non mokuran ra chok fokkun achou netipan. Ewe pwo epwe fen cancer? Epwe ifa usun inisin epwe chikar? Mesan epwene paranais? Epwe ifa ukukun metekin? Mesan epwene mesen tatakis ika? Ewe pwo epwe mar sefan ika a reireino? Epwe tongeni fiti an we pupunun noum we at? Nupwen a kokon non ewe rumen reirei, netipan a tatakis.
Non ena fansoun mi auchea, ewe Ngun mi Fel a mongunungun ngeni pwe epwe etiwa mochenin ewe Samon. A fini pwe epwe apinukunuk non Kot. A ennetin mefi pwe ese nefinifin met epwe fiis, An mochen epwe fen och fan itan. Mwitir chok a anutono me non ewe rumwen reirei.
Mwirin, a makei porousan non noun we puken met mi fis non manauan: “Won an ewe chon reirei we chepen ua pworetiw me mwen En, me uwa fangeta ngeni Omw mochen, uwa annutano. Ua sinei pwe upwe apinukunukuk, ngang mi sinei pwe ese wor mettoch mi ngaw epwe feito sonuk.”
A kuna pochokun me kinamwe ren an fangeta an mochen ne wanong nepoun ewe Sam. Ena ran, Kot a fokkun efeiochu.
Sokopaten ach osukosuk epwe fis, sia tongeni anganga ach nuku ne feito ngeni Kraist me kuta Kot ach epinukunuk Usun emon nei kewe, Gabriel, a makkei:
Usun met ekkewe soufos ra apasa, mesan Kot a saram seni tinen en akar
me mokuran a pwech seni en snow
me Nouwan a ungung usun mwitirin en chonupupu,
ese wor nampan aramas me unukun. …
Ua mefi tipengaw nupwen ua sinei pwe pwan ngang use pwan wor nampai.
Nge ua fori aanei ngeni ewe kot ua nuku.
Emon Kot sia tongeni nuku a apechekuna ach apinukunuk. Sia tongeni nuku non Ii pwe a tongei kich me a mochen met mi murino ngeni kich non manauach.
Ewe mi rupwupwotur a feito ngeni pokiten ewe manamanen epinukunuk. Ewe fonufan ese ngeni pungun an we riafou, ese pwan ekinamwei. Nge, an ewe Chon Amanau we chok atapa a mefi och kinamwe non unusen inisin. Sia tongeni ach sipwe mefi usun ewe anononun memefin kinisou ewe mi rupwupwotur a mefi nupwen an ewe Chon Amanau we atapa, akaewin nupwen an a rong ekkewe kapas “Upwe; kopwe nimenimoch.”
Ewe porous a apasa pwe “mwitir chok kinin we a nimenimochuno.”
Sia pwan tongeni mefi ewe atapen tong me echikara ren poun ewe Chon Amanau kewe. Met ren ei pwapwa, epinukunuk, me kinisou epwe tonong non manauach nupwen sia sinei pwe A mochen epwe anisi kich pwe sipwe nimoch! Nupwen sia feito ngeni Ii, Kot epwe anisi kich, ren an epwe echikara kich ika epwe apochokuna kich ach sipwe pochokun ngeni ekkewe sokopaten sosot.
Non sokkun napanap, etiwa An we mochen—esapw pusin ach—epwe anisi kich ach sipwe weweiti nonomun manauach. Ese wor mettoch mi ngaw epwe feito seni Kot. A sinei met mi och fan itach. Nge nengeni esapw chok mwitir ne angei seni kich ach chourek. Fan ekkoch A tongeni an epwe fori ekkewe chourek epwe paan, usun A fori ngeni Alma me noun kewe aramas. Saingonon, pokiten ekkewe pwon mi pin, ekkewe chourek repwe pwaseno, non ei manau ika non ewe fansoun Manausefan.
Ua fokkun chengen me mochen pwe An angang epwe fis, fiti ach weweiti usun an ach ewe Chon Angasano angang, a anisi kich ach sipwe kaeo usun ewe sokun nuku ewe mi rupwupwotur a pwarano ren an epwe nimenimoch. Jises Kraist ii ewe Koten tong, ewe Koten epinukunuk, ewe Koten echikara, ewe Kot a mochen epwe efeiochu kich me anisi kich ach sipwe nimenimoch. Ina met A mochen me mwen an feito won ei fonufan nupwen a tipe eu ngeni an epwe eto anisi kich nupwen sia turutiw non tipis. Ina met A mochen me non ewe manaman Gethsemane nupwen A mefi riafou me weires fansoun a fangetani me moni niwinin ach kewe tipis. Ina met A mochen iei nupwen a tingor ngeni ewe Sam fanitach. Ina popun mwongungun a chiwen apasa ngenikich: “Oupwe feito rei, ami meinisin mi pekus ren choun osemi o ngang upwe asoso kemi.”
A tongeni echikara kich me sapakicheta pokiten mi wor ren ewe tufich an epwe fori. A wata won sokkun metek meinisin ren pekin ngun me pekin fituk pwe Ngunun epwe ureno ren umoumoch pwe epwe tongeni tufichin anisi kich non mettoch meinisin me echikara kich me sapakicheta. An Aisea kapas, usun chok Abinatai apwan apasa, sipwe eningano me omokutu:
“Ennetin i a fen engino ngeni ach netipechou, me uwei ach netipengaw. …
“… Nge i a kinas fan iten ach tipis, i a feiengaw fan iten ach angangangaw; kapungun ach kinamwe a nom won; iwe seni an kewe kinasen opup sia chikar.”
Ei chok pwan porous a kapas usun non ei foufoun kapas:
“O ewe Chon Kou imw seni Nazareth,
Ei netip, mi tatakis me nomw a chikar,
Ei manau, a fetan ngeni mano,
O, ka tongeni kopwe siwini, Chon kou Imw?”
Me seni Poun kewe mi umoumoch me moneta,
Manauan mi unusen murino a fokkun tufich
Manauach mi tatakis, tori an epwe uta
Eu minefon Forutan—“mettoch meinisin minefo.”
Ika pwe ka mefi ena memef non och sokkun wewe, ika ka mefi tatatkis, kose mochen kopwe sinei me chemeni pwe ka tongeni om kopwe nimoch, ka tongeni om kopwe for sefan, pun A tongeok. Nuku pwe ese wor mettoch mi ngaw epwe feito seni Ii.
Pokiten A “feitiw fan mettoch meinisin,” A atufichi mettoch meinsin mi tatatkis me non manauach pwe repwe for sefan, me sia pwan tongeni ach sipwe museno me ren Kot. Pokiten II, mettoch meinisin ra museno, me ruwepek non nang me won fonufan, a wor “kinamwe seni chaan won an we irapenges.”
Mut ngeni kich sipwe feito ren Kraist sipwe fori meinisin ekkewe teten ra tufich. Nupwen sipwe fori, sipwe unusen kinisou me apasa, “Samon, ika pwe mi tufich, kose mochen kopwe fori ai upwe nimenimoch.” Ika pwe sia fori, sia tongeni angei ewe unusen atapen chikar, fiti ewe mongungu ren An kapas: “Upwe; kopwe nimenimochuno.”
Ewe Chon Amanau ewe Kot sia tongeni sipwe nuku. Ii ewe Kraist, ewe Anaemon mi kefinita, ewe Messiah, ewe ua pwarata non Itan we mi pin, usun Jises Kraist, amen.