Ruu Ekkewe Watten Annuk
Sipwe sotuni ne aponueta me ruu ekkewe watten annuk. Ren ach sipwe fori, sia fetan non ewe aan mi pung nefinen annuk me tong.
Fefinei achengicheng non ewe kapas allimen Jises Kraist, ua kapas ngeni kemi non wisemi ren chon emwenin ewe famini ese much. Preseten Russell M. Nelson a aiti kich, “Ei Mwichefen a niwinsefanito pwe famini epwe for, ririfengen, me fefeita ese much.” Ena asukun a wor auchean ngeni aramas ra ekieki pwe ir mi sani pusin fefin, sani pwisin mwan, are ekkewe rekan ewinireno, ra iteni LGBT. Preseten Nelson a pwan achema ngeni kich pwe sisap “soun chok titipeeu fengen iteitan ne tong fengen.” Ekkei afanafan seni soufos a fokkun auchea ngeni an famini aporous fengen ar repwe ponuweni an semirit me serafo kapas eis. Ua fokkun iotek ai upwe kutta aurour ren ai upwe kapas ngeni ei mwich pokiten ami mi pwan aani ekkei kapas eis, minne mi wenengeni famini meinisin non ewe Mwichefen.
I.
Ua poputa won met Jises a afanafana ekkewe ruu watten annuk.
“Kopwe tongei ewe Samon om Kot ren unusen nenukom, ren unusen ngunum o ren unusen om ekiek.
“Iei ewe aewin annuk a fokkun napanap o auchea.
“Ewe aruan annuk mi fokkun auchea usun ewe aewin, Kopwe tongei monun unukum ussun ka pwisin tongek.”
Wewen ei pwe sia annuk pwe sipwe tongei meinisin, usun an Jises we kapas monomon ren ewe Re Samarita mi murino a aiti kich pwe o kich meinisin eu chok. Nge ach tiniken ne aponueta ei oruen annuk esapw uwei ngeni kich ach sipwe monukano ewe aewin, ne tongei Kot ren unusen netipach, ngunuch, me ekiek. Sia pwarano ena tong ren ach “aponueta [An] kewe annuk” Kot a mochen pwe sipwe aneasochisi An kewe annuk pokiten seni ena aneasochis, mi pachenong aier, sia tongeni niwino ren non nenian me unusoch usun chok ii.
Non an we chok keran afanfan ngeni serafo non ewe Mwichefen, Preseten Russell M. Nelson a kapas usun met a eita ngeni “pochokun nefinen an Kot tong me An annuk.” Ewe annuk mine a kon auchea ngeni ekkewe sokkun osukosuk mi afat usun LGBT ina an Kot annuk ren pupunu me chienan ewe annukun nimenimoch. Me ruu ra fokkun auchea me non an Samach won Nang we kokkoten manau fan iten Noun aramas. Usun an Preseten Nelson afanafan, “An Kot annuk ra unusen pesepes me ren An we tong mi ennet fan itach me An mochen pwe sipwe winiti ion ewe a mochen sipwe winiti.”
Preseten Nelson a aitikich: “Chomong neni … ra epwenueta pwupwunu fengen ren ew sokun aramas. Kich chon ewe Mwichefen, sia sufoniti ewe annukun fonu … , pachenong pupunun sifinian. Ewe ennet, nge, pwe me nepoputan … pupunu a seikita me ren Kot! Me tori ikenai a etetten seni I pwe epwe nefinen emon mwan me emon fefin. Kot ese mwo siwini An wewen pupunu.
Preseten Nelson a sopwosopwono: “Kot ese mwo pwan siwini An annukun nimenimoch. Met ekkewe a namot epwe wor rech ach sipwe tonong non tempel ese siwin.”
Preseten Nelson a achema ngeni kich pwe “wisach Aposel ese wor met sipwe afanafana nge ewe ennet. Ena wis ese ngeni kewe Aposel ewe mwumwuta ar repwe ekesiwini ei annuk.” Nge, fefinei kana, souemwenin ewe Mwichefen repwe afanafana ewe auchean pupunu nefinen mwan me fefin me chiechian we ewe annukun nimenimoch.
II.
Ewe angangen Ewe Mwichefefnin Jises Kraist ren Aramas mi Pin non Fansoun Soponon a kawor fan asengesin amonetan noun Kot kewe semirit ren ewe muun celestian, me naponon ren an we ning mi tekia, fefeita ika manau ese much. Ena tekian neni a chok tufich ren apupunu esemuch. Manau esemuch mi pachenong ewe manamanen foruta mi fis ren nefinen mwan me fefin—met pwaratan ikenai ra awewei pwe ewe “soposoponon mwirimwirin feinfeino chok.”
Non an afanafan ngeni sarafo, Preseten Nelson a aitikich, “Fori an Kot annuk epwe tumunukemi ren ami achocho ngeni manaesemuch”—ren ei, oupwe usun Kot, fiti manaw esemwuch me foforech ren Inach me Samach non Nang. Ina met sia mochen fis ngeni ekkewe ekkewe sia tonger. Pokiten ena tong, sise tongeni mut ngeni ach tong epwe siwini ekkewe annuk me ewe kokkot me angang an Kot, ewe sia sinei epwe uweiato pwapwa ngeni ekkewe sia tonger.
Nge mi chommong sia tongei, pachenong ekkewe mi nom rer ewe kapas allim mi niwinsefan, ekkewe rese nuku ika finata pwe resapw tapweno mwirin an Kot kewe annukun pupunu me ewe annukun nimenimoch. Nge ir?
An Kot annuk a aiti neni kich pwe kich meinisin Noun semirit me A fori kich ach sipwe pwapwa. Pwarata ikenai a aiti kich pwe Kot a awora ew kokot fan itach me won fonufan pwe sipwe tongeni finata aneasosich ne kutta An kewe feioch mi tekia ika finata met epwe uwei ngonuk ewe eu muu mi kisikis. Pokiten an Kot tong mi napanap ngeni Noun meinisin, ekkena muu mi kisikis mi chok pwan amwarar nap seni met aramas repwe tongeni weweiti. Ewe Achasefan an Jises Kraist a atufichi mettoch meinisin, usun A “eningano ewe Sam, me tumunu angangen poun.”
III.
Ua kapas usun ewe aewin annuk, nge met usun ewe oruwan? Ifa usun ach sipwe aponueta ewe annuk me tongei chon oruch? Sia kutta ne pesei nouch memper pwe ekkewe mi fori mwokutun me angangen pupunu fengen pwisin nefinen fefin, mwan, winin, ekkewe mi siwini inisir repwe kuna ewe tong minne ach Chon Amanau a annuku kich sipwe pwar ngeni chon oruch. Pwan, nupwen pwupwunu fengen ew sokun aramas a kapwunguno pwe mi ech non United States, ewe Auewin Presetensi me ewe mwichen engon me ruemen ra apwungano: “Ewe kapas allimen Jises Kraist a atikich ach sipwe tongei me foforech ngeni aramas meinisin me aramasech—ina mwo ika sise tipew ngenir. Sia affata pwe ekkewe ra aea annuk ika an kapung mutata apupunu nefinen ruemon mi chok taitap mwan ika fefin pwe sisap sufonungaw ngenir.”
Naponon, sisap tongeni ach sipwe nini ekkewe ese nono fengen ach nuku me annuk. Niamam pun, ekkoch aramas mi weri ekkei osukosuk ra mefi pwe rese auchea me ketiwengaw seni ekkoch souneng me souemwen me non ach famini, wart, me steik. Sipwe nikitu ne aramas och me kirekiroch.
IV.
Ren ekkoch wewe sise fen weweiti, mi sokofesen ach osukosuk non manauach. Nge sia sinei pwe Kot epwe anisi emon me emon kich ne akkufu ekkei osukosuk ika sia ennetin kun ngeni ren aninis. Mwirin riafou me aier seni ach atai annuk sia fen kaeo, sipwe en me pusin fini an muu me ning. Ewe wesen me saingonon kapung epwe seni ewe Samon, i ewe anaemon a wor ren ewe mirit, sine, me chen ne apungu emon me emon kich.
Non ei fansoun, sipwe fokkun sotuni ne aponueta me ruu ekkewe annuk. Ach sipwe fori, sia fetan won ew an mi ech nefinen annuk me tong—aponueta ekkewe annuk me fetan won ewe aanen pwon, me tongei chon oruuch non ach fetan. Ei aan a mut ngeni kich ach sipwe kuta emwen ren met sipwe peni me met sipwe ungeni me ifa usun sipwe tongei me auseningoch me asukun non ewe tetten. Ach fetan a aiti kich pwe sisapw atipeew won annuk nge pwari eu unusochun napanapen weweiti me tong. Mi namwot ach fetan epwe pwan tumunoch ngeni semirit ekkewe ra osukosuk ika ir mi sani nengin ika at, nge a auku ar pwisin annomur non ei nikinik pokiten me ren chommong semirit ar osukousk mi kisino mwirin och fansoun. Ach fetan ese tipew ngeni ach achu aramas seni ewe aanen pwon, me a amam aninis ngeni ekkewe ra emweni aramas seni ewe Samon. Non meinisin ekkei sia chechemeni pwe Kot a pwonei epinukunuk me ennetin pwapwa me feioch fan iten ekkewe ra aponueta An kewe annuk.
V.
Inenap me semenap me kich meinisin wisach sipwe osukuna me ruu ekkei watten annuk. Ren ekewe fefin non ewe Mwichefen, Preseten Spencer W. Kimball a awewei pwe ewe wiis non ei euchean fansoun: “Napengeni ekewe watten mamarita epwe tori ewe Mwichefen non kewe ranin sopwonon epwe waroto pwokiten chomong ekewe euchean fefinen ei fonufan … repwe tori ewe Mwichefen non watten nampa. Ei epwe fis tori ukukun an ekkewe fefin seni ewe Mwichefen repwe pwomeni wenechar me tufich non manauer me tori ukukun an ekkewe fefin seni ewe Mwichefen repwe pwa pwe ir mi sokkon … seni ekkewe fefin non ewe fonufan. … Pwe iei fefin chon appiru non ewe Mwichefen repwe pochokun ne awattenon maritan chon ewe Mwichefen me pwan maritan ngun non fansoun soponon.”
Ach kapas usun ena osini, Preseten Russell M. Nelson a affata pwe “ikenai ina ewe ran minne Preseten Kimball a osini usun. Ami ekkewe fefin a fen osini usun!” Kich ekkewe sia rong ena osini 40 ier a no sise apareni pwe menin me nein ekkewe fefin non ewe Mwichefen repwe tumunu pusin chiener me famini ekkewe ra keran tanech ren kokkotun fonufan me wewengaw. Ai iotek me efeioch pwe oupwe asukuna me foffor ne aponueta ena osini, non iten Jises Kraist, amen.