Mwirin ewe Kapwungun Ach Nuku
Nupwen sia tapweno mwirin mongungun Kot me An aanen pwon, I epwe apochkuna kich non ach sossot.
Nupwen ai we emon kukkun, Frank Talley, emon chon Mwichefen a mwochen epwe anisi ai we famini ne chang seni Puerto Rico ngeni Salt Lake City pwe aupwe tongeni riri fengen non ewe tempel, nge mwitir chok eppet ra poputa ne fis. Emon fefinei kewe, Marivid, a semwen. Non osukosuk, semei me inei ra iotek usun met repwe fori nge ir mi chiwen mefi pwe repwe fori ewe sai. Ra apinukunuk pwe non ar nikutu ne tapweno mwirin an ewe Samon aurour, am we famini epwe tumun me feioch—me am mi tumun.
Ese nifinifin ekkewe eppet kich mi weri non manau, sia tongeni nuku pwe Jises Kraist epwe amonata ew aan nupwen sia fetan ren nuku. Kot a pwonei pwe meinisin ir mi manau anongonong won ekkewe pwon ra fen for ren, pwe non an fansoun, repwe angei meinisin An feioch mi pwonei. Elter Jeffrey R. Holland a aitikich, “Ekkoch feioch ra mwitireto, ekkoch ra mangeto, me ekkoch rese war tori sia nom nang; nge ekkewe ra etiwa ewe kapas allimen Jises Kraist, repwe feitto..”1
Moronai a aitikich pwe “nuku ir mettoch minne sia apinukunuku me sise kuna; ina minne, anini esapw pwokiten sise kuna, pun sise angei pisekin pwarata tori mwirin sossotun ami nuku.”2
Ach kapaseis pwe: Met sipwe fori pwe sipwe weriochu ekkewe sossot mi torikich?
Non an aewin afanafan non wisan Presetenin ewe Mwichefen, Preseten Russell M. a aitikich: “Ren ei minafon Presetensi aua mochen pwopwuta ren ewe sopwonon non ach ekiek. Ren ei popun, aua kapas ngeni kemi ikenai seni ew tempel. Ewe nesopun ren minne emon me emon kich sia achocho ngeni ina ach sipwe feioch ren manaman non ew imwen ewe Samon, riri fengen ren famini, nukuchar ngeni pwon mi pin a for non ew tempel minne a atufichi kich ngeni ewe niffang mi nap an Kot—ewe niffangen manau esemuch. Ekkewe angangepinin ewe tempel me ekkewe pwon mi pin oua fori ikewe ir ekkewe kii ne apochokuna manauemi, ami pupunu me famini, me ami tufichin ungeni ekkewe feiengawen ewe chon ungenikich. Ami fen me non ewe tempel me ami angang ikewe fan iten ami kewe neuo epwe efeiochu kemi ren napenon ami pwisin pwarata me kinamwe me epwe apochokuna ami nikitu ne nom won ewe aanen pwon.”3
Nupwen sia tapweno mwirin mongungun Kot me An aanen pwon, I epwe apochkuna kich non ach sossot.
An ai famini sai ngeni ewe tempel ekkoch ier a no a weires, nge nupwen aua arap ngeni ewe tempel non Salt Lake City, Utah, inei, mi uren pwapwa me nuku, a apasa, “Sipwe feioch; ewe Samon epwe eppeti kich.” Aua riri fengen pwe ew famini, me fefinei we a chikar. Ei a fis chok mwirin sossotun an semei me inei nuku me nupwen ra tapweno mwirin an ewe Samon aurour.
Ei nenien appiru an semei me inei mi chiwen anisi manauem ikenai. Ar nenien appiru a aitikem ewe pwata usun kapas allim me anisikem aupwe weweiti wewen, pwopwun, me feiechun ewe kapas allim ngenikem. Ach weweiti ewe pwata usun ewe kapas allimen Jises Kraist mi tongeni pwan anisikich ach sipwe weri ach sossot ren nuku.
Nesoponon, mettoch meinisin Kot a tingor me annuku ngenikich ne fori ina esisinen an tong ngeni kich me An mochen ne ngeni kich ekkewe feioch mi anomu fan iten ekkewe mi nikitu. Sisap chok ekieki pwe nouch semirit repwe pwisin kaeo ne tongei ewe kapas allim; ina wisach ne aitir. Nupwen sia anisi nouch kewe semirit ne kaeo ifa usun repwe aeaoch ar pungun finata, ach neenien appiru epwe anisir ne pwisin finata mi pung. Ar manau mi tupwen epwe anisi nour semirit ne pwisin sinei ewe ennetin ewe kapas allim.
Anuon me fopun, ausening ngeni ewe soufos ikenai a kapas ngeni kemi. Kutta ne kaeo ennet me kutta ne weweiti ewe kapas allim ren pwisin ami. Preseten Nelson a keran aurour: “Met mirit ese wor reom? … Appiru ewe Soufos Joseph. Kutta ew neni mi monono … Etipetekisoneok me mwen Kot. Wau netipom ngeni Semom won Nang. Kun ngeni I ren ponuwen kapaseis.”4 Nupwen ka kutta emwen seni Semom won Nang mi tong, ausening ngeni aurouren soufos mi manau me katon appirun sam me in mi tupwon, en mi pwan tongeni winiti ew pochokunen fofon nuku non om famini.
Ngeni ekkewe in me sam ekkewe mei wor neur ra su seni ewe aanen pwon, pweteete ne niwin sefan. Anisir ne weweiti ennetin ewe kapas allim. Poputa iei, ese tongeni ser nupwan.
Ach fofforun nonomwech epwe watte forian. Preseten Nelson a apasa: “Ren aramas mi pin non fansoun sopwonon, sia ereni ach ekieki pwe ‘fan’ ina ew mettoch a fis non ach kewe imwen mwich, aninis seni met a fis non imwach. Sipwe ekkesiwini ei fofor. Iei fansoun ew fan non imw, aninis seni met a fis non ach kewe imwen branch, ward, me steik.”5
Ekkewe pukefel ra aitikich, “Aiti emon smirit non an epwe feino: me nupwen a mwukono, esapw feino seni.”7
Ra pwan apasa, “Iwe iei, pokiten afanafanen ewe kapas a fis pwe ew mettochun echimw ne emmweni ekkewe aramas ne fori met minne mi pung—ewer, a kon fen wor pochokunen pungun won ekiekin ekkewe aramas nap seni ewe ketinas, are och pwan mettoch, minne a fen fis ngeni ir—iei minne Alma a ekieki pwe mi auchea pwe repwe sossot ewe pochokunen kapas an Kot.”7
Ew porous usun emon fefin ewe a song pwokiten neun ewe aat a mwongo watte okasi. Ese nifinifin fan fite epwe ureni epwe kouno, a sopweno me apwapwai ngiin kewe mi ningech. Ren an song, neminewe a finata epwe uwei neun ewe aat pwe epwe churi emon mwan mirit ewe mi afona.
Neminewe a fetan ngeni atewe me apasa, “Mwan, nei ei aat a mwongo chommong okasi. Kose mwochen kopwe ureni epwe keuno ne mwongo oksasi?”
Atewe a euseningoch mwirin a apasa ngeni noun neminewe we att, “Feino neimw me niwin safan non ruu wiik.”
Neminewe a angei noun we aat me feino ngeni imwer, a mairu pwata ese eisini ewe aat an epwe kouno ne mwongo watte okasi.
Ruu wik mwirin ra niwin. Ewe mwan mirit a nenengeni ewe aat me apasa, “Aat, kopwe keuno ne mwongo mwong okasi. Ese och ngeni nonomwun inisumw.”
Ewe aat a chimwechimw me pwonei pwe epwe kouno.
Inen ewe at ewe a eis, “Pwata kose ureni ena ruu wiik a no?”
Ewe mwan mirit a emenimen. “Ruu wii a no ngang mei pwan mwongo mwong okasi.”
Ei mwan mi manaueni ew manau wenechar mi sinei pwe an fon epwe uwei pochokun ika chok I mi pwisin fori an aurour.
Ewe nikinik sia ngeni neuch kewe a men pechekun usun nge ra kuna kich ne fetan wenechar non ewe anen pwon. Ewe soufosun Puken Mormon Jacob ii ew awewe ren aramasoch. Noun we att Enos a makkei pochokunen an seman afanafan:
“Ngang, Enos, ua sinei semei we pwe i emon mwan mi pung—pun i a aitiei usun kapasen fonuan, me pwan usun tumun me kapasen fon an ewe Samon—iwe epwe feioch iten ai Kot pokiten ena. …
“... Iwe ekkewe kapas minne ua sou rong an semei we a apasa usun manau esemuch, me ewe pwapwan ekkewe souneng, a ureno non netipei.”8
Inenapen ekkewe sounfiu ra manaueni ewe kapas allim, me neur kewe ra uren tipepos. Neur souemwen a repotei:
“Ra fen kaeo me ren iner kewe, pwe resap tipemwaramwar, Kot epwe angaser.
“Iwe ra apasa sefani ngeniei ekkewe kapas an iner kewe, ra apasa: Am ause tipemwaramwar inem kewe ir mi sinei.”9
Enos me ekkewe sounfiu ra pochokun ren an semer me iner nuku, minne a anisir ne weri pwisin ar sossotun nuku.
Sia feioch ren ewe nwinsefaniton ewe kapas allimen Jises Kraist non ach fansoun, minne a wanakicheta nupwen sia tipemwaramwar ika osukosuk. Sia apinukunuk pwe ach achocho epwe wor uwan non an ewe Samon pwisin fansoun ika sipwe nikitu ngeni sossotun ach nuku.
Pwunuwei we me angang, fiti ewe Presetensin Area, auwa keran fiti Elter David A. Bednar ngeni ewe epinipinin ewe Haiti Port-au-Prince tempel. Noum we aat Jorge, mi fitikem, a apasa usun me a fis: “Amwarar, Papa! Mwitir chok nupwen Elter Bednar a poputani ewe iotekin epinipin, ua mefi ewe rum a ur ren pwichikar me saram. Ewe iotek a apacha watten ai weweiti usun euchean tempel. Ennetin ina ewe imwen ewe Samon.”
Non ewe Puken Mormon, Nifai a aitikich pwe nupwen sia mochen sinei mochenin Kot, I epwe apochokuna kich. A makkei, “Ngang, Nifai, a fokkun kukkun ieri … me ua pwan ennetin mochen ai upwe sinei ekkewe monomonen Kot, ina minne, ua sio ngeni ewe Samon; iwe nengeni i a churiei, me a apwetetei netipei pwe upwe nuku meinisin ekkewe kapas minne semei we a apasa; ina minne, use pwan ungeni i usun pwi kewe.”10
Pwi me fefinei, sipwe anisi nouch semirit me meinisin mi nom unukuch ne tapweno mwirin an Kot aanen pwon pwe ewe Ngun epwe aitir me apwetetei netiper pwe repwe mochen tapweno mwirin I non unusen manauer.
Nupwen ua ekieki an semei me inei neenien appirun, ua apareni pwe ach nuku non ewe Samon Jises Kraist epwe pwar ngeni kich ewe aanen niwin no ngeni ngeni imwach nang. Ua sinei manaman ra fis mwirin sossotun ach nuku.
Ua pwarata usun Jises Kraist me An asoren achasefan. Uwa sinei pwe ii ach Chon Amanaw me Chon Angasakicheno. Ii me Samach non Nang ra feito non ena sosoran non ewe maramen poputan ier non 1820 ngeni kukun Joseph Smith, ewe soufosun ewe Niwinsefanito. Preseten Russell M. Nelson I ewe soufosun ach fansoun. Non iten Jises Kraist, amen.