Nuku Mei Chok Nenepek me Pechekun
Nuku non ewe Samon a fiti nukunuk non An fansoun me sipwe achocho me fiu ngeni ekkewe asapwanin manaw.
Neum ewe aat Dan a unusen samaw me non an mission non Africa me a no ngeni ewe imwen safei mi aukuk pisekin safei non. Nupwen aua aneani ewin neun taropwe ngenikem mwurin an samwaw, awa ekieki pwe epwe netipengaw, nge a fen makei, “Nupwen uwa kon non ewe rumwen emeregency, uwa mefi kinamwe. Esap fan ew non manawei upwe mefi ei sokkun pwapwa.”
Nupwen pwunuwei we me angang auwa aneani ekkei kapas, awa ur ren memef. Nenepekun me pechekunen pwapwa. Ause mwo rorongorong pwapwa ese mwuch epwe awewe non ei sokkun, nge an kapas mei ennet. Aua sinei pwe ewe pwapwa ese mwuch a awewei ese mwoch, ika an nikinik, nge kinamwe me pwapwa mi fis nupwen sia anomwu inisich ngeni Kot me anomwu ach nukunuk non ii ren mettoch meinisin. Mei pwan wor ekkena fansoun non manawach nupwen Kot a kapasen kinamwe ngeni non ngunuch me a fori ach sipwe tupwon non Kraist fen pwan nupwen manawach a weires ika nonomwongaw.
Liai a aitikich pwe ika Adam me Eve rese turutiw, “ir repwe nonnom non ew napanapen nimenimoch, ese wor pwapwa, pun rese sinei riaffou; …
“Nge nengeni, mettoch meinisin ra fen for anongonong won ewe mirit an I ewe a sinei mettoch meinisin.
“Adam a turutiw pwe aramas repwe; are ra fen, pwe repwe mefi pwapwa.”
Non ew ngawen wewe, samwaw me netipechow ra amonakicheta ach sipwe sinei pwapwa ika sipwe nuku non ewe Samon me an ekiek fan itach. Mi affatoch me ren emon chon mak [me nom] non ewe engon me unungatin-ipuku ier: “Netipechou a ammonoketa ngeni pwapwa. A nimetingawei mettoch meinisin seni non imwomw, pwe minafon pwapwa epwe tongeni wor nenian an epwe tonong. A uchuki ewe chen ira mei on seni popunapan ngasangasom, pwe minafon, chen ira mei onuen fetin repwe tongeni mar non nenier. A uti ekewe waran mei ngaw, pwe minafon waran ra opono fan repwe tongeni mar. Ese nifinifin sokun netipechow a achungu netipom, mettoch mei euchea repwe angei nenier.”
Preseten Russell M. Nelson a aitikich, “Ewe pwapwan ewe Chon Amanau a ngeni [kich] … mi chok fifis, apinukunuku kich pwe ach riaffou repwe chok mwochomwoch fansour [nengeni Doctrine and Covenants 121:7] me repwe epinipinino ngeni ach feioch.” Ach sossot me riaffou repwe awora nenien pwapwa watte.
Ewe echun pworousen ewe kapas allim esapw ewe pwon pwe manaw esapw wor netipechow me osukosukan nge manaw epwe ur ren pwopwun me wewechun—ew manaw ian ach kewe netipechow me osukosuk repwe tongeni “wesino ren ewe pwapwan Kraist.” Ewe chon Amanau a affata, “Non fonufan oupwe kuna riaffou: Nge oupwe chok epinukunuk; Ua fen okkufu fonufan.” An kapas allim ew pworousen apinukunuk. Netipechow fiti fengen me apinukunuk non Jises Kraist a amwochu ewe apinukunukun pwapwa fochofoch.
Ewe pworousen an ekkewe chon Jared sai ngeni ewe fonuen pwon a tongeni aa ren pekin awewe ren ach sai non ei manaw. Ewe Samon a pwon ngeni pwin Jared me neun aramas pwe epwe “feino me [mwer] ngeni ew fonu minne mi kefinita nap seni fonuen ewe fonufan meinisin.” A annuku ngenir pwe repwe fan mwota, me repwe feino angang non ar nukunuk me fori usun an ewe Samon okot. Nge, nupwen ewe angang a fis, a wor an pwin Jared aurek ika an ewe Samon kokkot ren ekkewe mwota ese naf. A sio:
“O Samon, ua fen fori ewe angang minne ka fen annuku ngeniei, me ua fen fori ekkewe mwota anongonong won met ka fen auroura ngeniei.
“Iwe nengeni, O Samon, non ir ese wor saram.”
“O Samon, kopwe mutata pwe am aupwe saino won ei anonnonen matau non rochopwak?”
En mei fen wau netipom ngeni Kot non ew wewe? Nupwen achocho ne manaweni usun ewe Samon a finingonuk me mwochen kose fori, en mei kan ekieki ika kopwe feino non ei manaw non rochopwak?
Iwe pwin Jared we a pwarata ew watten osukosuk usun ar tongeni ar repwe manaw won ewe mwota. A sio, “Iwe am aupwe pwan mano, pun non ir am ause tongeni ngasangas, tiwenon chok ewe asepwan minne mi nom non ir.” Met ekkewe weiresin manaw ra fen aweiresi omw kopwe ngasangas me fori omw kopwe ekieki omw kopwe tongeni manaw non ewe ran, akaewin omw kopwe tori safan imwomw non nang?
Mwirin ewe Samon a angang fengen me ewe pwin Jared we ar repwe awesi ew me ew ekkewe osukosuk, A awewei, “Ouse tongeni saino won ei anonnonen matau tiwenon chok ngang upwe amonnata [ew aan] ngeni ekkewe nonon ewe sat, me ekkewe asepwan minne ra fen no, me ekkewe konik ra puu minne repwe feito.”
Ewe Samon a fen affata pwe ekkewe chon Jared resapw tongeni tori ewe fonuen pwon me nukun I. Esapw iir chon nemenem, me repwe chok tongeni saino won ewe watten konik ren ar nuku non ii. Ekkei sine me pekin kaeo seni ewe Samon usun epwe awateno an ewe pwiin Jared asamwonu me epechekuna an nukunuk non ewe Samon.
Katon usun an iotek a siwin seni kapas eis me aurek ngeni nuku me epinukunuk:
“Ua sinei, O Samon, pwe a wor unusen om manaman, me ka tongeni fori met chok ka mochen fan iten efeiochun aramas; …
“Nengeni, O Samon, ka tongeni fori ei. Aua sinei pwe ka tongeni pwarano om manaman mi napanap, minne mi nikinikin kukkun ngeni miritin aramas.”
A fen mak pwe ekkewe chon Jared “ra tota won war …mwota, me ra saino non ewe saat, nikitano inisir ngeni ewe Samol ar Kot.” Sipwe fangeno wewen sipwe asamwonu me fangeta. Ekkewe chon Jared rese tota won ekkewe mwota pwokiten ra sinei ifa usun ekkewe mettoch repwe fis non ar sai. Ra tota won pwokiten ra kaeo ne nuku non an ewe Samon pechekun, ningech, me chen, me repwe mochen repwe fangono inisir me ar tipemwaramwar ika nuokus epwe nomw rer ngeni ewe Samon.
Noun noum we itan Abe a nuokus an epwe fiti ew ekkewe niosun man mi sata me satiw. A sani ew esap mwokut. Inan chinnap a pesei pwe I epwe tumun, iwe, ren an nuku, a tota. Mwirin a apasa ren ew emenimen watte, “Use mefi tumun, nge ngang mi tumun.” Menin ina usun met ekkewe Chon Jared ra mefi. Menin sisap mefi pwe ach nuku Kot epwe tumun, nge pwapwa mi fis.
Ewe sa ese mecheres ngeni ekkewe chon Jared. “Fan chommong ra kokkono non anonnonen ewe sat, pokiten ekkewe chukun no minne ra turutiw wor.” Nge mi pwan mak pwe “ewe asapwan ese tongeni kouno ne [usireno] ngeni ewe fonuen pwon.” Usun weiresin ach sipwe weweiti, akaewin non ewe fansoun non manawach nupwen asapwan seni mwach rakon pechekun me ewe saat ra nono, sipwe tongeni angei ach kinamwe non ach sinei pwe Kot non an ningoch a usikich ngeni imwach.
Ewe mak a sopwosopwono, “Iwe iei ra paseno; me ese wor anungawen ewe sat a tongeni kupireno, pwan raaw rese tongeni atareno; iwe a soposopono ne wor ar saram, ika pwe me won ewe matau are fan ewe matau.” Sia nomw non ei fonufan ia ewe watten nonon mano, semwenin inis me ekiek, me sosot me nipwakingaw ren ese nifinifin ra tatiw woch. Inamwo, ren nukunuk non Jises Kraist me finata ne nuku non ii, kiich sipwe pwan tongeni angei saram iteitan, esepwan nifinifin ika won saat ika fan saat. Kiich sipwe tongeni angei ach enukunuk pwe Kot esapw tongeni keuno ne usi kiich ngeni imwach nang.
Nupwen ra nuwet fetan me non ekkewe mwota, ekkewe chon Jared ra “kön mwareiti ngeni ewe Samol; … ewer [ra] kinisou me mwareiti ewe Samol unusen nangatamen ewe ran; iwe nupwen ewe pwinin a feito, rese kouno ne mwareiti ewe Samon.” Ra mefi pwapwa me nifangen kinisow inamwo non nukanapen ar semwen. Rese mwo tori ewe fonuen pwon, nge rafen mweireir non ewe pwonen efeioch pokiten ar achocho me epechekuna ar nukunuk non ii.
Ekkewe chon Jared rafen no non ewe saat 344 raan. Kopwe tongeni ekieki ena? Nukunuk non ewe Samon a fiti nukunuk non an fansoun me sipwe achocho me fiu ngeni ekewe asapwanin manaw.
Nesoponon, ekkewe chon Jared “ra in won orossetin ewe fonuen pwon. Iwe nupwen ra eipwatiw pecher won orossetin ewe fonuen pwon ra chappetiw won unungen ewe fonu, me ra etipetekisona inisir me mwen ewe Samon, me ra kechiwen pwapwa me mwen ewe Samon, pokiten chommongun an umoumoch mi napanap wor.”
Ika sia nukunuk me fori ach pwon, non ew ran sipwe pwan tongeni tori imwach non kinamwe me chapetiw memwen ewe Samon me kechiwen pwapwa ren kinikinin an efeich non manawach; kapach ngeni netipeta ewe a efisata neni ren watten pwapwa.
Uwa pwarata pwe ika sia finata pwe sipwe sopweno me achocho fori ach nukunuk non Jises Kraist me an kewe pwopwun non manawach, II epwe feito rech non an eureur, kapasen kinamwe ngeni manawach, me fori ach sipwe “apinukunuk ngeni ach sipwe nonomw ren.”
Ua pwarata pwe Jises ii ewe Kraist. I ewe popun pwapwa. An chen mi naf, me I mi manaman ne amanaua kich. I ewe saram, ewe manaw, me ewe apinukunukun ei fonufan. Esapw tongeni epwe putikicheno. Non iten Jises Kraist, amen.