Feito, Tapweto Mwiri—an ewe Samon Kokkotun Fofforuch

Seni Mark L. Pace

Presentenin Sukunen Raninfel

Ewe Samon a ammonata noun kewe aramas ngeni ewe fiun ekkewe repwe oput ir. Feito, Tapweto Mwiri ina an ewe Samon Kokkotun Fofforuch.

Sia pwapwa ne chufengen non ei mwichenapen Ewe Mwichifenin Jises Kraist ren Aramas mi Pin non Fansoun Soponon. lei ach feioch sipwe angei me ren ekiekin me netipen ewe Samon ren osukkunun noun kewe soufos me aposel. Preseten Russell M. Nelson I noun ewe Samon soufos mi manau. Sia ennetin kinisou ren an aurour mi pin me ewe emwen sia angei ikenai.

Ua pwan apasa usun ai nuku ren met mi fen katou. Ua pwarata ai kapasen pwarata usun Kot, Semach ese Much. I a manau me a tongeikich o tumunu kich. An kokkotun pwapwa a awora ewe feioch non ei manauen fonufan me ach sipwap niwinsefan ngeni.

Ua pwan pwarata usun Jises Kraist. I noun Kot we Anaemon. I a amanaua kich seni mano, me I a epichi kich seni tipisich ika sipwe aea ach nuku non I me aier. An fangeno ren ewe achasefan fan itach a wato ekkewe feiochun manau ese much me manausefan. Ennetin, “Feioch ngeni Kot ren an niffang noun we mi pin” (“Ewe Kraist mi Manau: Kapasen pwarata seni ekkewe Engon me Ruemon Aposel,”,” Liahona, May 2017, non ewe apwonun mwan).

Ekkewe Sounang mi Pin non Fansoun Soponon won unusan fonufan ra feioch ne fen ngeni Jises Kraist non an kewe temple. Eu me nein ekkei tempel mi chiwen for non Winnipeg non Canada. Punuwei, Anne Marie, me ngang aua tufichin churi nenien ar forata non ewe August. Ewe tempel mi fokkun ningoch me epwe ennetin murinno nupwen a wes. Nge, ese tongeni wor eu tempel mi murinno non Winnipeg, ika ekis meinisin, ika ewe nongonong ese pochokun.

Ewe pwennin tettenin founo me tenino me mwokutukutun awattenon puun non Winnipeg a aweiresi amwonetan nongonongen ewe tempel. Iwe, a kapunguno pwe nongonongen ei tempel epwe foruta ren 70 chukun mecha mi pwonuno non simen. Ekkei chukun mecha ra 60 fit (18 m) tamer me 12 ngeni 20 inish (30 to 50 cm) iteno. Ir mi puretiw non ewe puun tori ra tikeri kinikinin foun fau, arapakan 50 fit (15 m) fan ewe puun. Non ei napanap, ekkewe 70 chukun mecha ra awora ew nongonong mi pochokun, me nukuchar fan iten met epwene winiti Winnipeg tempel mi ning.

Kich Souneng, sia kutta ew nongonong usun chok mi nukuchar non manauach—ew nongonongen ngun mi auchea ngeni ach sai non ei manau me sai sefan ngeni imwach nang. Ena nongonong mi foruta won ewe kinikinin foun faun ach ekkesiwin ngeni ewe Samon Jises Kraist.

Aua chemesefani ewe afanafan an Ilaman seni ewe Puken Mormon: “Iwe iei, nei anuon, chechemeni, chechemeni pwe ina won ewe foun ach Chon Angasano, i ewe Kraist, ewe Noun Kot, ewe mi auchea oupwe aueta ami nongonong won; pwe nupwen ewe tefin epwe tinato an asepwan mi pochokun, ewer, an kewe assefich non ewe ewuniar, … esap wor an nemenem womi ne etekinikemitiw ngeni ewe pwangen riaffou me riaffou esemuch, pokiten ewe fau minne oua kauuta won, minne a ew nongonong mi nukuchar, ew nongonong won minne ika aramas ra kauuta won resap tongeni turutiw” (Ilaman 5:12).

Sia kinisou, pun sia manau non eu fansoun soufos me aposel ra aitikich usun ewe Chon Amanau Jises Kraist. Ach tapweno ren ar aurour a efisi ach nongonong mi pochokkun non Kraist.

Ew ier a no, non an afanafanen nepoputan ewe mwichenapen mwichefen non ewe October 2018, Preseten Russell M. Nelson a awora an esinesin me fon: “Ewe pwopwun mei nomw ren ewe Mwichefen non nakatamen fansoun an epwe anisi ekewe chon Mwichefen ar repwe awateno ar nuku non ach Samon Jises Kraist me An Achasefan, epwe anisir non ar fori me amwochu ar kewe pwon mi pin me ren Kot, me apochokuna me riri fengeni ar kewe famini. Non ei fonufan mi fitikoko, ei ese mecheres. Ewe chon koum mi anapano an efeiengaw won nuku me woch me ach famini mi mwitir. Ach sipwe manau non pekin ngun, mi auchea epwe wor ach kokkot epwe eppeti me ungeni” (“Afanafanen nepoputan,” Liahona, Nov. 2018, 7; auchean mi kapacheta).

Mwirin an Preseten Nelson porous, Elter Quentin L. Cook seni ewe Mwichen Ekkewe Engon me Ruemon Aposel a affatau ewe puken Feito, Tapweto Mwiri fan iten emon me emon me famini. An kapas mi pachenong ekkei mak:

• “Ewe minafon kaeo non imw puken Feito, Tapweto Mwiri … mi foruno an epwe anisi chon ewe mwichefen ne kaeo ewe kapas allim non ewe imw.”

• “Ei puk a fis fan iten emon me emon me famini non ewe Mwichefen’ [Feito, Tapweto Mwirii—Fan iten emon me emon me Famini (2019), vi].”

• “Ach popun pwe sipwe anonopoku met sia fori non Mwichefen me ewe imw non ew napanap epwe awatteno nuku me pekin ngun me anapa ekkewisin ngeni Samach won Nang me ewe Samon Jises Kraist.” (“Deep and Lasting Conversion to Heavenly Father and the Lord Jesus Christ,” Liahona, Nov. 2018, 9–10.)

Poputa non January non ei ier, Souneng non unusen fonufan ra poputan ne kaeo ewe Testamen Sofo, fiti ewe puken Feito, Tapweto Mwiri pwe ach emwen. Ren ew kokkoten iteiten wiik, Feito, Tapweto Mwiri a anisi kich ne kaeo ekkewe pukefel, ewe annukun ewe kapas allim, me ewe afanafanen ekkewe soufos me aposel. A ew puk mi amwarar ngeni kich meinisin.

Mwirin tiu maramen ei pekin keao pukefel non unusen fonufan, met sia kuna? Sia kuna Souneng ekis meinisin ra marita non nuku me sufon ngeni ewe Samon Jises Kraist. Sia kuna emon me emon me famini ra eimueno och fansoun non ewe wiik ne kaeo kapasen ach Chon Amanau. Sia kuna ochunon ourouren kapas allim non ach kewe klasin Raninfel nupwen sia kaeo ekkewe pukefel non imw me porousa met sia kaeo non fan. Sia kuna watten pwapwan famini me etipew ren ach mwokut seni chok anneani ekkewe pukefel ngeni kaeo ekkewe pukefel non ew napanap mi anonnon.

Ua tufich ne churi chommong Souneng me pwisin ausening ngeni ar fori Feito, Tapweto Mwiri. Ar fofforun nuku a aurano netipei ren pwapwa. Ikkei chok ekkoch kapas ua fen rong seni chommong chon ewe Mwichefen non sokopaten kinikinin ewe fonufan.

• Emon Sam a apasa, “Ua pwapwaiti Feito, Tapweno Mwiri pun a awora ewe tufich ai upwe pwarata usun ewe Chon Amanau ngeni nei kewe.”

• Non pwan eu imw, ewe semerit a apasa: “Iei eu tufich pwe upwe rong inei me semei repwe pwarata ar kapasen pwarata.”

• Emon in a apasa: “Aua kuna emwen ren ifa usun Kot epwe nom akkomwach. Ewe fansoun ause nuku pwe mi nom a fen [ur ren] epinukunuk, pwapwa, kinamwe, me fofforoch me ause tongeni sinei pwe mi tufich.”

• Ruemon pupunu ra kuna: “Aua anneani ekkewe pukefel nge mi siwini seni am anneani akkom. Aua fakkun kaeo usun ause kaeo me nom. Ewe Samon a mochen aupwe siwini am nengeni mettoch. Ewe Samon a ammonakich meinisin.”

• Emon inenap a apasa: “Ua sani pwe mi chok nonno met aua kaeo.” Me mwan, aua anneani. Ikeanai, aua kaeo usun.”

• Emon sister a aporousa ei ekiek mi weweoch: “Akkom, mi wor ewe nesen, me ekkewe pukefel ra anisata. Iei, a wor ekkewe pukefel me we nesen a anisata.”

• Pwan emon sister a apasa: “Ua mefi sokkono nupwen uwa fori [anono ngeni] nupwen use fori. Ua kuna pwe a mecheres ai fos ngeni ekkoch usun Jises Kraist me ach nuku.”

• Emon in chinnap a apasa: “Ua kokkori nei kewe me noun nei kewe non Raninfel, me aua porous fengen usun mettoch seni Feito, Tapweto Mwiri.”

• Emon sister a kuna: “Feito, Tapweto mwiri a usun ewe Chon Amanau mi pwisin iamwir ngeniei. Mi pwato seni nang.”

• Emon sam a apasa: “Nupwen sia aea Feito, Tapweto Mwiri, sia usun ekkewe aramasen Israel, sia esisina uren asamaach kewe, sia tumunu ach famini seni mwokutukutun ewe chon atai.”

Pwi me fefinei, a apwapwa ai churi kemi me ausening ifa usun ami achocho ren Feito, Tapweto Mwiri a efeiochu manauemi. Kinisou ren ami nikitu.

Annea ekkewe pukefel ren Feito, Tapweto Mwiri an epwe emweni kich epwe apochokkuna ach ekkesiwin ngeni Jises Kraist me An kapas allim. Sise chok siwini eu aua me non fan won Raninfen pwe epwe eu chok aua non annea pukefel non imwach. Ach kaeo ewe kapas allim ina eu angang mi fifis non unusen ewe wiik. Usun anon emon fefin ngeniei, “Ewe mochen esap sipwe mwochuno fan; nge fan epwe sopweno non onu ran!”

Iwe, ekieki sefan kapasen esinesin seni nouch soufos, Preseten Nelson, an apasa non ewe October 2018 mwichenapen mwichifen:

“Ewe chon oput kich a anapano an fiu ngeni nuku me won ach famini me mi chok kapacheno.” Ika sipwe tumunu ngunuch, sipwe kokkot me fofforoch” (Opening Remarks,” 7).

Iwe (mwirin 29 aua) non neanowasen Raninifen, a asopwano ewe mwichenap ren ei pwon: “Ika oupwe ennetin achocho ne sinon imwemi pwe nenien kaeo non ewe kapas allim, … pochokkunen ewe chon oput non manauemi me imwemi epwe kukkununo” (“Becoming Exemplary Latter-day Saints,” Liahona, Nov. 2018, 113).

Ifa usun ewe chon oput epwe apochokkuna an fiu ngenikich nge sia pwan tongeni akukkununo an manaman non manauach? Mi tufich, me mi chok fifis non ewe Mwichifen, pun ewe Samon a ammonata Noun aramas seni an ewe chon oput pisekin fiu.Feito, Tapweto Mwiri ina an ewe Samon kokkotun fofforoch. Usun Preseten Nelson a aiti, “Ewe kokotun kaeo mi fo a nongonong non imw nge Mwichifen a anisi, me mi tongeni epichano pochokkunen ach kewe famini.” Nge, mi namwot iei me epwe namwot ach ennetin achocho; mi namwot sipwe “[tapweno] ren tipachem me tumun ne siwini [imwach] pwe epwe nenien tumunu nuku” (“Becoming Exemplary Latter-day Saints,” 113).

Iwe, usun anon Preseten Nelson a pwan apasa, “Kich sia pwisin tumunu fefeitan ngunuch” (“Opening Remarks,” 8).

Ren ewe puken Feito, Tapweto Mwiri ewe Samon a ammonakich ren “ekkewe fansoun mi ennetin weires sia kuna ikenai” (Quentin L. Cook, “Deep and Lasting Conversion,” 10). I a anisikich ach sipwe aueta “ew nongonong mi nukuchar, ew nongonong won minne ika aramas ra kauuta won resap tongeni turutiw” (Ilaman 5:12)—ewe nongonong ina ach Kapasen pwarata mi fot non ewe fau minen ach ekkesiwin ngeni ewe Samon Jises Kraist.

Amo ach achocho non aneani ekkewe pukefel repwe apochokkunakich me sipwe fich ren ekkewe feioch mi pwon ngenikich. Ua Iotek non itan Jises Kraist, amen.