Fefin mi Fori Pwon mi Pin mi Angang fengen ren Kot
Winiti emon fefin mi fori pwon mi pin non angang ngeni Kot ina usun unusechun me echun nenginin Kot ra fori wisen fefin, emweni, me iamwir.
Ua kinisou ren ei tufich ai upwe afanafan ngenikemi, ekkewe noun Kot fefin mi fori pwon mi pin. Nepwinei, ua mochen apochokuna kemi ren ami angang minne oua kokko ngeni. Ewer, meinisin nengin noun Kot mi ausening ngeni mongungui ra angei eu kokko seni ewe Samon Jises Kraist.
Omw koko a pwopwuta nupwen ka nomw non mano, non neni me fansoun a kefinita fan itom seni Kot ewe a sinechuk me tongek usun neun nengin. Non ewe fonuwen ngun, A sinek me aituk me anomwuk ian epwe wor omw fansoun, ese fifis non uruwon fonufan, repwe tungorek kopwe tonong non ewe nenien papatais. Ikena ie, oupwe rong ekkei kapas seni emon chon angang noun Jises Kraist: “Seni ewe mumuta an Jises Kraist, Ngang ua paptaisuk fan iten ewe Sam me ewe Nau, me ewe Ngun mi Fel. Amen.”1
Nupwen oua tou seni ewe konik, oua etiwa pwan eu kokko ren ami oupwe angang. Ami minafon nengin noun Kot mi fori pwon mi pin, oua pwon me angei wisemi non Ewe Mwichefenin Jises Kriast ren Aramas mi Pin non Fansoun Soponon, mine oua apungano pwe ami chon ei Mwichefen. Oua fori pwon mi pin ren Kot pwe oupwe mwareiwomi itan Jises Kraist, aponueta An kewe annuk, me angang ngeni I.
Me ren aramas meinisin mi fori ekkei pwon mi pin, ewe angang minne ewe Samon a kokkori i an epwe fori epwe fich ngeni emon me emon. Nge mi wor eu wis mi auchea me apwapwa minne meinisin noun Kot at me neingen mi fori pwon mi pin mi angei. Pwe repwe angang ngeni ekkoch fan Itan.
Nupwen Preseten Russell M. Nelson a kapas ngeni ekkewe fefin a awewe an ewe Samon kokkorikemi ami oupwe fiti I non An angang. President Nelson a awewei omw koko non ei nikinik: “Ewe Samon a apasa, ai angang me ai ning epwe esenipato ewe manau ese much me manau fefeita an aramas.(nengeni Moses 1:39.) Iwe Noun kewe nengin mi nukuchar-chon kuno repwe ennetin apasa, ‘Ai angang me ai ning pwe upwe anisi atongei kewe ar repwe angei manau ese much me manau fefeita.’
“Anisi pwan emon an epwe winiti met a tufichin winiti mi eu misin mi pin an fefin. Ren emon inenap, sense, are aramas mi pin mi aninisoch, a anisi aramas ne echueno kewe clay mi manau usun nonowun an anean. Ren an angangfengen ren Kot, an misin mi pin pwe epwe anisi aramas ar repwe manau me ngunur repwe fefeita. Iei popun manauan. A esenipato sufen, pwapwa, me ning.”2
Ouse tongeni sinei inet, are ifa nakataman, ami misin epwe anongonong won angang ren wisen emon inenap, souemwen, are fefin chon iamwir. Ewe Samon, ren an tong, ese mut ngenikich ach sipwe finata inet, ifa nakataman, are tetenin wisach kewe. Nge oua sinei seni ekkewe pukfel me soufos mi manau pwe ekkei wis repwe feito, non ei manau are pwan mwirin, ngeni noun Kot kewe nengin meinisin. Me ir meinisin ra monota ngeni manau ese much non famini mi tong—“ewe niffang seni Kot mi nap seni meinisin.”3
Oupwe tipachem ika oupwe ennetin achocho iei ren ami ekieki usun met epwe fis. Mi mecheres pokiten met sia fori ach sipwe ammonnata mi nonno ngeni ekkei wis.
Sipwe poputa ren ewe wisen emon fefin chon iamwir. Inamwo ika iei wisemi nupwen ami emon nengin 10 ierin non eu famini a ma ewe sam, are ami presetenin ewe mwichen Fin Anisi non eu neni mi kareno ren ekei, are ami mi nom pioing ren ami asoso mwirin oua reirei—oua tongeni aponueta wisemi seni ewe Samon pwe oupwe Noun fefin chon iamwir.
Usun ita ekkei wisen iamwir mi fokkun sokono. Nge mi nammot ren meinisin pwe oupwe ammonnata ren tipepochokun me tong, me nukunuk pwe ewe Samon esap ngenikich annuk chinon chok ika A ammonnata eu aan, me mochen pwe sipwe feino me fori met a annuku fan itan.4
Pokiten a fen ammonnata, ewe nengin 10 ierin a turufi ewe inenap mi mano punuwan me a iotek an epwe sinei ifa usun epwe ansi an famini. Me a soposopweno ne iotek.
Ewe presetenin mwichen Fin Anisi a ammonata an epwe iamwir me mwen a fis ewe kar non nenian. A fen sinei me tongei ekkewe aramas. An nuku non Jises Kraist a fen mammarita ren an angei ponuen an kewe iotek non chommong ier pwe ewe Samon epwe anisi i non an angang fan itan. Pokiten an ammonata mi nakatam, a moneta me pwapwa an epwe etteteni ekkewe fefin ar repwe iamwiri ekkewe aramas me famini mi osukosuk.
Emon fefin a asoso pioing mwirin an reirei a ammonata an epwe iamwir ngeni ekkewe aramas mi pwan nom pioing. A fen iamwir unusan manauan fan iten ewe Samon ngeni chon wasona meinisin usun chok ika ir chon orun are chienan. Nupwen a mefi ewe kokko non netipan an epwe iamwir non ewe pioing, a angang ngeni ekkoch ren pochokun me ren tong iwe ekkewe aramas ir mi pwan nom pioing ra apinukunuk an esap mwitir an epwe chikar sefan.
Non ei chok napanap oua ammonata pwe oupwe iamwir, mi namwot oupwe ammonata ren ami kokko pwe oupwe emon souemwen fan iten ewe Samon nupwen a feito. Mi namwot epwe wor ami nuku non Jises Kraist mi anongonong won ami ennetin tongei ekkewe puk fel pwe oupwe emweni aramas me aiti An kapas me esap wor ami nuokus. Iwe oupwe ammonata pwe ewe Ngun mi Fel epwe nonnom remi fansoun meinisin. Oupwe mochen apasa, “Upwe fori,” nupwen noum chon aninis non ewe Presetensin ekkewe Fopun a apasa, fiti nuokus non mengungun, “Sister Alvarez a semwen ikenai. Ion epwe wisen asukuna an klass?”
A nonno chok met oupwe fori pwe oupwe ammonata ngeni ewe ran mi murrino minne ewe Samon epwe kokkorikemi pwe oupwe wisen emon in. Nge mi namwot pwe ewe tong non netipemi epwe watte nap seni nom. Epwe namwot epwe wor ami nuku non Jises Kraist nap seni met mi nom non netipemi me nom. Me epwe namwot epwe wor ami tufichin iotek ren ekesiwin, emwen, me kinamwe seni ewe Ngun mi Fel nap seni met oua mefi pwe mi tufich.
Naman oupwe kapas eis ifa usun emon mwan ese nifinifin ierin a tongeni sinei met mi namwot ngeni emon inenap. Mi pung ena kapas eis. Mwan rese tongeni sinei mettoch meinisin, nge aua tongeni keao ekkoch nesen seni pwarata seni Kot. Me aua pwan tongeni keao seni met aua kuna, nupwen aua kutta ewe Ngun an epwe anisikem am aupwe weweiti met aua kuna.
Ua fen katon Kathleen Johnson Eyring non ekkewe 57 ier non am pupunu fengen. I inen fomen at me ruemon nengin. Iei, a fen etiwa ewe kokko an epwe fori wisen emon inenap a nap seni ipuku aramas chon am famini me pwan fitepuku aramas minne a fen etiwa non netipan.
Oua chechemeni an Preseten Nelson awewe usun ewe misin mi pin an fefin—pwan ewe misin an emon inenap: “Ren inenap, sense, are aramas mi pin mi aninisoch, a anisi ewe clay mi manaw an epwe usun nonomwun an anean. Ren an angangfengen ren Kot, an misin mi pin pwe epwe anisi aramas ar repwe manau me ngunur repwe fefeita. Iei popun a foruta.”5
Usun met ua weweiti, punuei we, Kathleen, a fen aponueta ena wis, minne noun Samach kewe nengin mi angei. Me rei met mi namwot iei ekkewe kapas “a anisi aramas ar repwe angei manau ese much … ren an angangfengen ren Kot.” Ese echimwa. A anisi. Me mi wor an anean ren met a mochen epwe fis, me a achocho an epwe anisi ekkewe a tongei me tumunu. Ewe kapas allimen Jises Kraist ina an kokkot—minne ua tongeni kuna fiti iotek non ekkewe ier.
Ami winiti emon fefin mi fori pwon mi pin mi angangfengen ren Kot iei ifa usun noun Kot kewe nengin mi murrino mi fori wisen inenap, emwen, me iamwir, ra angang non ewe napanap me neni I a fen ammonata fan iter. Ua pwon pwe oupwe kuna pwapwa non ami aan ngeni imwemi non nang nupwen oua niwin ngeni I pwe ami noun Kot kewe nengin mi aponueta pwon mi pin.
Uwa pwarata pwe Kot ewe Sam mi manau me A tongei kemi. Epwe penuweni ami kewe iotek. Noun we Achengicheng mi emweni Ewe Mwichefenin Jises Kraist ren Aramas mi Pin non Fansoun Soponon ren mettoch meinisin. Preseten Russell M. Nelson i Noun soufos mi manau. Me Joseph Smith a kuna me kapas ngeni Kot ewe Sam me Jises Kraist me nein ewe ira non Palmyra, New York. Ua sinei pwe mi ennet. Uwa pwan pwarata pwe Jises Kraist omw chon Amanaw; mei tongek. Me ren an achesafan, kopwe tongeni echuno me fefeita non ewe koko mi pin ewe epwe wareituk. Ua pwarata ekkei non itan Jises Kraist mi pin, amen.